Sɛb-sõw yielu 132 - A SƐB-SÕW

Sɛb-sõw yielu 132 (131) sob A Sore kaa na ír a Sɩyɔ̃ tẽw ʋ ɩ a ʋ kpɛb zie

1 Zerizalɛm dob daar yielu.

¹ Zerizalɛm dob daar yielu. Sore e, lɛb tɩɛrɩ a Daviir yele nɩ a hanʋ za ʋ na hanɩ a.

² A Daviir'ʋ tɩ kõ nʋɔr ŋa a Sore zie, ʋlɛ n'ʋ tɩ pɔ à ŋá yel a Zakɔb Naaŋmɩn fãw sob:

³ «Ɩ̃ kʋ̃ lɛb kpɛ a pɛn-sɛw ɩ̃ na kpɩɛr a pʋɔ ɩ, ɩ̃ kʋ̃ lɛb gã a ɩ̃ gado zu ɛ,

⁴ ɩ̃ kʋ̃ lɛb ũù mimir ɛ, ɩ̃ kʋ̃ lɛb bãw gʋ̃ɔ za ɩ,

⁵ mãa bɛ wa nyɛ̃ zie kʋ̀ a Sore a ɩ, mãa bɛ wa nyɛ̃ kpɛb zie kʋ̀ a Zakɔb Naaŋmɩn na ɩ fãw sob a ɩ!»

⁶ Tɩ wõ na bɛ yel k'aa wõ-taa daga be n Efarata. Tɩ nyɛ̃ ʋ nɩ Yaar vuo pʋɔ.

⁷ Nyɩ ɩ tɩ kpɛ a Sore Ŋmɩn-yir-kpɛ̃ɛ pʋɔ, tɩ lo gbĩ dume gũu tɩ tɔ tẽw a ʋ naalʋ-dà-kɔw pɛr.

⁸ Sore e, ìr wa a fʋ pɩ̃ɛnʋ zie, fʋ̃ʋ nɩ a wõ-taa daga na ɩ a fʋ kpɛnʋ bãwfʋ a.

⁹ A mɩnʋ, a pàw a fʋ bàwr-maalbɛ mɛ̃ kparʋ a, ɛ́ a fʋ nɩbɛ lɔbr nʋ̃ɔ̀ cɛlsɩ!

¹⁰ A fʋ tõ-tõ-bie Daviir zũú a, ta dáa a fʋ nɩ-kabra bɛr ʋ lɛb ɛ.

¹¹ A Sore pɔ n a Daviir zie à ŋá, ɛ́ bɛ be za na lɩɛbɩ bɛr ɛ: «A fʋ bʋ̃-dɔwra kãw n'ʋ ɩ̃ na zɩɩlɩ a fʋ naalʋ-dà-kɔw zu.

¹² A fʋ bidɛbr wa tɛr a ɩ̃ wõ-taa vla a, nɩ a lɛ ɩ̃ na yere kʋ̀rɛ bɛ a, a bɛ bibiir mɩ̀ na zɩ̃ n a fʋ naalʋ-dà-kɔw zu, ɛ́ a na ɩ n à à ŋá kʋralɛ.»

¹³ Bʋ̃ʋ n'ʋ vɛ̃, a Sore kaa na ír a Sɩyɔ̃ tẽw, ʋ bɔ ʋ na k'ʋʋ ɩ a ʋ kpɛb zie.

¹⁴ Ʋ yel'a: «A ɩ̃ pɩ̃ɛnʋ zie n'ɩ a ka kʋralɛ, a ka n'a ɩ̃ bɔbr k'ɩ̃ɩ kpɩɛr.

¹⁵ Ɩ̃ na maal'ɩ a Sɩyɔ̃ tẽw, kʋ̀ ʋ bʋ̃-dɩrɩ, ɩ̃ na kʋ̀ n bʋ̃-dɩrɩ a ʋ nan dem bɛ dɩ tɩw.

¹⁶ A faafʋ n'ʋ ɩ̃ na su a ʋ bàwr-maalbɛ mɛ̃ kparʋ a, ɛ́ a ʋ nɩbɛ lɔbr nʋ̃ɔ̀ cɛlsɩ.

¹⁷ A Sɩyɔ̃ tẽw pʋɔ ka a, ɩ̃ na ɩ na nãà na tɛr kpɛnʋ a yi, ʋ yi a Daviir yir pʋɔ. Ɩ̃ na ɩ na a ɩ̃ nɩ-kabra lɩɛrɛ be a ʋ pʋɔ kʋralɛ, ɩ mɛ̃ fɩ̃tɩlɛ vũu na 'lere a.

¹⁸ Ɩ̃ na ƴãw nɩ a ʋ dɔ̃ dem vĩ, ɛcɛ, a naalʋ-kpawʋɔ na nyɩwrɛ nɩ a ʋ zũú.»