Sɛb-sõw yielu 119 - A SƐB-SÕWSɛb-sõw yielu 119 (118) sob A Naaŋmɩn wulu vɩɛlʋ 1 Zu-nʋ̃ɔ̀ dem'ɩ a bɛl a cenu na vɩɛl, ɛ́ bɛ tuur a Sore wulu a. 2 Zu-nʋ̃ɔ̀ dem'ɩ a bɛl na mɩ́ tuur a lɛ ʋ na yel a, a bɛl na mɩ́ bɔbr ʋ nɩ bɛ pʋɔ za a. 3 Bɛ bɛ maalɛ yel-faa kãw za ɩ, bɛ mɩ́ tuur'ɩ a ʋ sɛ́ɛ. 4 Fʋ yel'ɩ a tub a na fɛr k'aa nɩbɛ tuur a, kɛ́ bɛ ƴãw fãw tuur a vla a. 5 A ɩ̃ sɛ́ɛ nãá ɩ sɛ-vɩɛlɩ gã, ɩ̃ tʋ̃ɔ́ tuur a fʋ pʋ-tɩɛrʋ. 6 Lɛ n'a vĩ kʋ̃ ɩrɛ mɛ̃, mãa wa jɛlɛ a fʋ nɛ-ƴãwnɩ za a ɩ. 7 Ɩ̃ na puore fʋ nɩ yãanɩ nɩ tɩɛrʋ na vɩɛl a, zanɛ nɩ a lɛ fʋ na dɩ a ƴɛ̀rʋ a tu yel-mɩŋa a. 8 Ɩ̃ na ƴãw nɩ fãw maalɛ a fʋ pʋ-tɩɛrʋ, taa zawrɛ mɛ̃ bɛrɛ towtow ɛ. * 9 Ŋmɩŋmɩn n'a pɔlbile na ɩrɛ a ʋ cenu vɩɛl? — Ʋlɛ wa sàwr a fʋ ƴɛ̀rʋ a n'a, Sore e. 10 Ɩ̃ bɔbr fʋ na nɩ ɩ̃ pʋɔ za, ta sàw k'ɩ̃ wa bɔr zãá nɩ a fʋ nɛ-ƴãwnɩ ɛ. 11 Ɩ̃ maal'a tɛr a fʋ wulu a ɩ̃ socir pʋɔ, k'ɩ̃ɩ taa wa sãwnɛ fʋ ɛ. 12 Fʋ tɛr'ɩ puoru, Sore e, zanɩ nɩ mɛ̃ a fʋ pʋ-tɩɛrʋ ɩ̃ bãw ʋ. 13 A lɛ fʋ na dɩ a ƴɛ̀rʋ yel a, ɩ̃ sɔrɛ nɩ a za. 14 Nʋ̃ɔ̀ mɩ́ ɩrɛ mɛ̃ na, ɩ̃ na mɩ́ tuur a lɛ fʋ na yel a, a mɩ́ ɩ na mɛ̃ ɩ̃ tɛr'ɩ a tẽ-daa na-bome za a. 15 Ɩ̃ na tɩɛrɛ nɩ a fʋ tub a na fɛr kɛ́ bɛ tuur a, ɛ́ tuur a sɔ́r fʋ na puo kʋ̀ m a vla. 16 Nʋ̃ɔ̀ ɩrɛ mɛ̃ nɩ yaga, a fʋ pʋ-tɩɛrʋ maalʋ ƴãw, ɩ̃ bɛ yiire a fʋ ƴɛ̀rʋ bɛrɛ ɩ. * 17 Mãa na ɩ a fʋ tõ-tõ-bie a, maalɩ mɛ̃ vla ɩ̃ vʋʋrɛ ɛ́ dier a fʋ ƴɛ̀rʋ. 18 Yuo a ɩ̃ mimie, ɩ̃ɩ na nyɛ̃ nɩ a fʋ wulu vɩɛlʋ. 19 Nʋʋra nɛ m a tẽw zu, ta sɔwlɩ a fʋ nɛ-ƴãwnɩ a ɩ̃ zie ɩ. 20 Kʋralɛ n'a ɩ̃ mɩ́ kpiir lore bɔbr'ɩ a lɛ fʋ na dɩ a ƴɛ̀rʋ a. 21 Fʋ vɛlɛ nɩ nũu cɔwr a pɔ̀lʋ dem bɛ ŋa, a nɩ-ŋmɛ-ƴãwnɩ bɛ ŋa na bɔrɛ zãánɛ nɩ a fʋ nɛ-ƴãwnɩ a. 22 Ɩ a zʋmɛ nɩ a ɩ-lab a zãá nɩ mɛ̃, ɩ̃ na ƴãw fãw tuur a lɛ fʋ na mɩ́ yel a ƴãw. 23 Na-mɩnɛ saa mɩ́ zɩ̃ bʋ̀rɛ taa, a mãa fʋ tõ-tõ-bie ƴãw a, ɩ̃ mɩ́ tɛr'ɩ a fʋ pʋ-tɩɛrʋ tɩɛrɛ kʋralɛ. 24 A lɛ fʋ na mɩ́ yel a ɩrɛ mɛ̃ nɩ nʋ̃ɔ̀, alɛ n'a wule mɛ̃ a yã. * 25 Mãa n'ɩ ŋan ɓiile a tanɛ pʋɔ, ɩ k'ɩ̃ lɛb vʋʋrɛ mɛ̃ a lɛ fʋ na yel a. 26 Ɩ̃ man nɩ a ɩ̃ nyɔ-vʋʋrʋ kʋ b fʋ sɔw mɛ̃, wul mɛ̃ a fʋ pʋ-tɩɛrʋ ɩ̃ bãw ʋ. 27 A fʋ tub a na fɛr kɛ́ bɛ tuur a, ɩ k'ɩ̃ bãw a pɛr, ɛ́ ɩ̃ na tɛr'ɩ a fʋ nɔ-ɓãa-yele tɩɛrɛ. 28 A mʋta-kʋ̃ɔ zɔrɛ mɛ̃ na a pʋ-sãwna zũú, nyɔw mɛ̃ k'ɩ̃ lɛb ìr mɛ̃ a lɛ fʋ na yel a. 29 Ɩ a ziri sɔ́r ʋ zãá mɛ̃, ɛ́ ɩ k'ɩ̃ bãw a fʋ wulu a fʋ vɩɛlʋ zũú. 30 A fʋ pùor-tub'a ɩ̃ kaa ír, a lɛ fʋ na dɩ a ƴɛ̀rʋ a n'a ɩ̃ sàw de. 31 A lɛ fʋ na yel kʋ̀ m a n'a ɩ̃ tu, Sore e, ta ɩ k'ɩ̃ nyɛ̃ vĩ ɛ. 32 A fʋ nɛ-ƴãwnɩ sɔ́r zu n'a ɩ̃ zɔrɛ, fʋ na ɩ a ɩ̃ yã ʋ yuo a ƴãw. * 33 Sore e, wul mɛ̃ a fʋ pʋ-tɩɛrʋ sɔ́r, ɩ̃ɩ na tu ʋ na tɩ baarɩ. 34 Ɩ k'ɩ̃ bãw a fʋ wulu pɛr, ɩ̃ɩ na tuur ʋ na, ɩ̃ na ƴãw nɩ fãw tuur ʋ nɩ a ɩ̃ pʋɔ za. 35 Ɩ k'ɩ̃ tuur a fʋ nɛ-ƴãwnɩ sɔ́r, bʋ̃ʋ n'ʋ vɛ̃, ɩ̃ nyɛrɛ nɩ a ɩ̃ nʋ̃ɔ̀ a be. 36 Ɩ a ɩ̃ socir nɔ̃w a lɛ fʋ na mɩ́ yel a, ʋ ta nɔ̃w a tɔnɛ ɩ. 37 Ta sàw a ɩ̃ mimie jɩ́rɛ a yel-foli ɛ, ɩ k'ɩ̃ vʋʋrɛ mɛ̃ a lɛ fʋ na bɔbr a. 38 Maalɩ a mãa, fʋ tõ-tõ-bie zie, a nʋɔr fʋ na ƴãw kʋ̀ a bɛlɩ dem na zɔrɛ fʋ a. 39 Gù m a zʋmɛ ƴãw, ɩ̃ zɔrɛ a na, a lɛ fʋ na dɩ a ƴɛ̀rʋ a n'a mɩ́ vɩɛl. 40 Ɩ̃ nɔnɛ nɩ a fʋ tub a na fɛr kɛ́ bɛ mɩ́ tuur a, ɩ k'ɩ̃ vʋʋrɛ a fʋ mɩnʋ zũú. * 41 A fʋ nɔ̃wfʋ ɩb, ʋ ta m, Sore e, faa mɛ̃, mɛ̃ a lɛ fʋ na ƴãw a nʋɔr a. 42 Bɛlɛ wa tʋʋr mɛ̃ a lɛn daar a, ɩ̃ na bãw nɩ a sɔwfʋ sɔw, bʋ̃ʋ n'ʋ vɛ̃, ɩ̃ ƴãw nɩ a ɩ̃ tɩɛrʋ a fʋ ƴɛ̀rʋ ƴãw. 43 Sõw mɛ̃ ɩ̃ yere a yel-mɩŋa kʋralɛ, bʋ̃ʋ n'ʋ vɛ̃, ɩ̃ ƴãw nɩ a ɩ̃ tɩɛrʋ a lɛ fʋ na dɩ a ƴɛ̀rʋ a ƴãw. 44 Ɩ̃ na sàwr'ɩ a fʋ wulu kʋralɛ, dɩ̃a nɩ bio. 45 Ɩ̃ na ɓãá nɩ ƴãw cere, ɩ̃ na bɔbr a fʋ tub a na fɛr kɛ́ bɛ tuur a ƴãw. 46 Ɩ̃ na ƴɛ̀rɛ nɩ a lɛ fʋ na yel a ƴɛ̀rʋ a na-mɩnɛ niŋé, ɛ́ vĩ kʋ̃ ɩrɛ mɛ̃ ɩ. 47 Ɩ̃ nɔnɛ nɩ a fʋ nɛ-ƴãwnɩ, a mɩ́ ɩrɛ mɛ̃ nɩ nʋ̃ɔ̀ yaga. 48 Ɩ̃ tur'ɩ nuru cɔw a fʋ nɛ-ƴãwnɩ ɩ̃ na nɔnɛ a, ɩ̃ tɛr'ɩ a fʋ pʋ-tɩɛrʋ tɩɛrɛ. * 49 Cãà bãwnɩ a fʋ ƴɛ̀rʋ a fʋ tõ-tõ-bie zie, ƴɛ̀rʋ na ɩ k'ɩ̃ ƴãw a ɩ̃ tɩɛrʋ a fʋ ƴãw a. 50 A mɔwlʋ ɩ̃ na mɩ́ nyɛ̃ a ɩ̃ wʋ̀ʋr pʋɔ a n'ɩ ŋa: a nʋɔr fʋ na ƴãw kʋ̀ m a ɩ na k'ɩ̃ vʋʋrɛ. 51 A pɔ̀lʋ dem ɩ m a la vla vla, ɛcɛ ɩ̃ bɛ gùr pùor cɔw a fʋ wulu ɛ. 52 Sore e, ɩ̃ cãà na bãwnɩ a lɛ fʋ na dɩ a ƴɛ̀rʋ a koro za a, ɛ́ mɩ́ nyɛ̃ mɔwlʋ a pʋɔ. 53 Suur za mɩ́ kʋrɛ mɛ̃ nɩ a nɩ-faar ƴãw, na mɩ́ zawrɩ a fʋ wulu bɛr a. 54 A ɩ̃ nʋʋra kpɛb zie ka a, a fʋ pʋ-tɩɛrʋ n'a ɩ̃ tɛr yiele. 55 Sore e, a tɩ̃ɩsɔw a, ɩ̃ bɛ mɩ́ yiiri a fʋ yele ɩ, ɛ́ mɩ́ tuur a fʋ wulu. 56 A ɩ̃ bom'ɩ a tub fʋ na bin kɛ́ tɩ tuur a. * 57 Sore e, ɩ̃ yel'a k'aa ɩ̃ bom'ɩ a fʋ ƴɛ̀rʋ ɩ̃ na na tɛr vla a. 58 A ɩ̃ pʋɔ za n'ʋ ɩ̃ bɔbr'ɩ k'ɩ̃ɩ ɩ nʋ̃ɔ̀ kpɛ b, zɔ ɩ̃ nɩbaalʋ mɛ̃ a lɛ fʋ na ƴãw a nʋɔr a. 59 Ɩ̃ tɩɛr'ɩ a ɩ̃ ɩb kaa, ɩ̃ bɔbr'a k'ɩ̃ɩ lɛb wa tuur a lɛ fʋ na yel a. 60 Ɩ̃ bɛ lɛb gùre bom ɛ, ɛ́ páwr a fʋ nɛ-ƴãwnɩ sàwfʋ ƴãw. 61 A nɩ-faar bɛrɩ jil'a koli mɛ̃, ɛcɛ ɩ̃ bɛ yiiri a fʋ wulu bɛr ɛ. 62 Ɩ̃ mɩ́ ìr'ɩ a tɩ̃ɩsɔw-bɩ̃ɩn k'ɩ̃ɩ puori fʋ yãanɩ, a ƴɛ̀rʋ fʋ na mɩ́ dɩ a tu yel-mɩŋa a ƴãw. 63 A bɛlɩ dem za na zɔrɛ fʋ ɛ́ tuur a tub fʋ na bin a, ɩ̃ ɩ n a bɛ tɔ. 64 Sore e, a fʋ nɔ̃wfʋ paal'ɩ a tẽ-daa, wul mɛ̃ a fʋ pʋ-tɩɛrʋ ɩ̃ bãw. * 65 Sore e, fʋ maalɩ mɛ̃ nɩ vla, a mãa fʋ tõ-tõ-bie, mɛ̃ a lɛ fʋ na tɩ yel a. 66 Zanɩ nɩ mɛ̃ ɩ̃ bãw a yele jielu, ɛ́ bãw a fʋ nɛ-ƴãwnɩ, bʋ̃ʋ n'ʋ vɛ̃, ɩ̃ ƴãw nɩ a ɩ̃ tɩɛrʋ a ƴãw. 67 Ɩ̃ na bɛ tɩ wõ tuo sɛr a, ɩ̃ tɩ bɔrɛ na, ɛcɛ ƴɛrɛŋa a, ɩ̃ maalɛ nɩ a lɛ fʋ na yel a. 68 Fʋ ɩ n nɩ-vla ɛ́ maalɛ a nɩbɛ vla, wul mɛ̃ a fʋ pʋ-tɩɛrʋ ɩ̃ bãw ʋ. 69 Pɔ̀lʋ dem ŋma ŋma n ziri sãw nɩ a ɩ̃ yúor, ɛcɛ mãa a, a fʋ tub'a ɩ̃ tuur'ɩ ɩ̃ pʋɔ za. 70 Bɛ bɛ bɔbr kɛ́ bɛ bãw bom pɛr towtow ɛ, ɛcɛ mãa a, a fʋ wulu tub ɩrɛ mɛ̃ nɩ nʋ̃ɔ̀ yaga. 71 Mãa zie a, a kpɩɛrʋ ɩ̃ na nyɛ̃ a ɩ n bʋ̃-vla, a wul mɛ̃ nɩ a fʋ pʋ-tɩɛrʋ ɩ̃ bãw. 72 A wulu na yi a fʋ nʋɔrɩ́ a, vɩɛl'ɩ a ɩ̃ zie zuo salm-zɩɛ nɩ salm-pla libie tu-tu-túr. * 73 A fʋ nuru n'a maalɩ mɛ̃, ɛ́ mɩ́ nyɔw mɛ̃ ɩ̃ àr. Ɩ k'ɩ̃ tɛr yã, tʋ̃ɔ́ zanɩ a fʋ nɛ-ƴãwnɩ. 74 A bɛlɩ dem na zɔrɛ fʋ a, bɛlɛ mɩ́ wa nyɛ̃ m a, nʋ̃ɔ̀ mɩ́ ɩrɛ bɛ na, ɩ̃ na ƴãw a ɩ̃ tɩɛrʋ a fʋ ƴɛ̀rʋ ƴãw a zũú. 75 Sore e, ɩ̃ sàw na k'aa fʋ ƴɛ̀rʋ-dɩb tu n yel-mɩŋa, ɛ́ fʋ tɛr yel-mɩŋa fʋ na bɛr mɛ̃ a kpɩɛrʋ pʋɔ a. 76 A fʋ nɔ̃wfʋ, ʋ́ mɔwlɩ mɛ̃ a ƴɛrɛŋa, mɛ̃ a lɛ fʋ na ƴɛ̀r a mãa, fʋ tõ-tõ-bie zie a. 77 Tɛr su-ɓaarʋ a ɩ̃ zie, ɩ̃ɩ na vʋʋrɛ na, bʋ̃ʋ n'ʋ vɛ̃, a fʋ wulu ɩrɛ mɛ̃ nɩ nʋ̃ɔ̀ bɛ dɩ vuo ɩ. 78 Ɩ kɛ̀ vĩ nyɔw a pɔ̀lʋ dem na dɔwrɛ mɛ̃ zawla a. Mãa a, a tub fʋ na bin kɛ́ bɛ tuur a n'a ɩ̃ tɛr tɩɛrɛ. 79 A bɛlɩ dem na zɔrɛ fʋ a, bɛ lɛb wa a ɩ̃ zie wa bãw a lɛ fʋ na yel a! 80 A fʋ pʋ-tɩɛrʋ n'a ɩ̃ bɔbr k'ɩ̃ɩ maalɛ nɩ ɩ̃ pʋɔ za, lɛ n'a ɩ̃ kʋ̃ nyɛ̃ vĩ ɛ. * 81 Ɩ̃ gù n a fʋ faafʋ tɩ bàl, a fʋ ƴɛ̀rʋ ƴãw n'a ɩ̃ ƴãw a ɩ̃ tɩɛrʋ. 82 A ɩ̃ mimie gù n a lɛ fʋ na ƴãw a nʋɔr a tɩ bàl, ɩ̃ sowre: «Debor'a fʋ na mɔwlɩ mɛ̃?» 83 Ɩ̃ ɩ na mɛ̃ wɔ-gbãw bɛ na yawlɩ zʋ̀ʋ́r pʋɔ ʋ ko a, ɛcɛ ɩ̃ bɛ yiire a fʋ pʋ-tɩɛrʋ bɛrɛ ɩ. 84 Nyɔ-vʋʋrʋ bibie a ŋmɩn n'a fʋ cãà bɛr mɛ̃? Debor'a fʋ na dɩ n a bɛlɩ dem na dɔwrɛ mɛ̃ a ƴɛ̀rʋ? 85 Pɔ̀lʋ dem tuw nɩ bɔw a ɩ̃ ƴãw, ɛ́ a lɛ dɛ bɛ tu a fʋ wulu ɛ. 86 A fʋ nɛ-ƴãwnɩ za ɩ n yel-mɩŋa. Bɛ dɔwrɛ mɛ̃ nɩ zawla, sõw mɛ̃! 87 Zaa pʋrɩ, a ɩ̃ yele nãá baarɩ a tẽw zu, ɛcɛ ɩ̃ bɛ zawrɩ a fʋ tub fʋ na ƴãw a bɛr ɛ. 88 A fʋ nɔ̃wfʋ ƴãw a, ɩ k'ɩ̃ vʋʋrɛ, ɩ̃ɩ na tuur'ɩ a lɛ a fʋ nʋɔr na yel a. * 89 Sore e, kʋralɛ n'a a fʋ ƴɛ̀rʋ be a salom zu bɛ tɛr nãà lɩɛbɩ ɛ. 90 Yome yome za n'a a fʋ yel-mɩŋa be be. Fʋ maal'ɩ a tẽsɔw, ʋ kpɛmɛ àr. 91 A lɛ fʋ na ƴɛ̀r bin a n'a so bom za be be a dɩ̃a. A tẽ-daa za sɩrɩ na be be a fʋ yele maalʋ ƴãw. 92 A fʋ wulu bɛ tɩ n'ɩ a ɩ̃ nʋ̃ɔ̀ a, ɩ̃ nãá ɩ n wʋ̀ʋr tɩ kpi. 93 Ɩ̃ bɛ be na yiiri a fʋ tub a na fɛr kɛ́ bɛ tuur a bɛr ɛ, alɛ n'a fʋ mɩ́ ɩ n k'ɩ̃ vʋʋrɛ. 94 Fʋ̃ʋ so m, faa mɛ̃, bʋ̃ʋ n'ʋ vɛ̃, ɩ̃ bɔ n a fʋ tub a na fɛr kɛ́ bɛ tuur a. 95 Nɩ-faar gù na kɛ́ bɛ ŋmɛ m lɔb, ɛcɛ a lɛ fʋ na yel a zie n'a mãa cɛlɛ. 96 Ɩ̃ nyɛ̃ a na, vɩɛlʋ za tɛr'ɩ baarʋ zie, ɛcɛ a fʋ nɔ-ƴãwna bɛ tɛr tɛwfʋ zie ɩ. * 97 Nɔ̃wfʋ bɛ n'a ɩ̃ nɔ̃w a fʋ wulu ɛ! Ɩ̃ mɩ́ tɛr ʋ na tɩɛrɛ a bibie za. 98 A fʋ nɔ-ƴãwna kʋ̀ m'ɩ yã-bãwfʋ zuo a ɩ̃ dɔ̃ dem, a ɩ̃ bom'ʋ kʋralɛ. 99 Ɩ̃ bãw a na zuo a ɩ̃ wul-wulbɛ za, ɩ̃ na mɩ́ tɛr a lɛ fʋ na yel a tɩɛrɛ a ƴãw. 100 Ɩ̃ bãw nɩ yã zuo a dɛb-nyamɛ, ɩ̃ na sàwr a fʋ tub a na fɛr kɛ́ a nɩbɛ tuur a ƴãw. 101 Ɩ̃ zawr'ɩ a yel-faa sɔ́r loba, k'ɩ̃ɩ tʋ̃ɔ́ de a fʋ ƴɛ̀rʋ. 102 Ɩ̃ bɛ zawrɩ a lɛ fʋ na dɩ a ƴɛ̀rʋ bin a ɩ, fʋ̃ʋ na n'ʋ wule mɛ̃ a ƴãw. 103 A lɛ fʋ na yel a nʋmɛ nɩ a ɩ̃ nʋɔrɩ́, a nʋmɛ na gãw sɩwr. 104 A ɩ̃ yã yi n a fʋ tub a na fɛr kɛ́ bɛ tuur a pʋɔ, lɛ so ɩ̃ bɛ nɔ̃w bom za na ɩ ziri a ɩ. 105 A fʋ ƴɛ̀rʋ ɩ n fɩ̃tɩlɛ na caalɛ a ɩ̃ gbɛ́ɛ binu zie a, nɩ cãà na caalɛ a ɩ̃ sɔ́r a. 106 Ɩ̃ pɔ na k'ɩ̃ɩ na tu n a lɛ fʋ na dɩ a ƴɛ̀rʋ nɩ mɩnʋ yel a, ɩ̃ɩ bɛ lɩɛbɛ bɛrɛ ɩ. 107 Bɛ ɩ m a a kpɛ tɩ zuo, Sore e, ɩ k'ɩ̃ lɛb vʋʋrɛ mɛ̃ a lɛ fʋ na yel a. 108 Sore e, sàw de a ɩ̃ puoru mɛ̃ de-kʋ̀b bom a, ɛ́ zanɩ nɩ mɛ̃ a lɛ fʋ na dɩ a ƴɛ̀rʋ yel a. 109 A kũu mɩ́ jɩɛrɛ mɛ̃ nɩ kʋralɛ, ɛcɛ ɩ̃ bɛ yiire a fʋ wulu bɛrɛ ɩ. 110 A nɩ-faar ƴãw nɩ bɛra a ɩ̃ nyɔwfʋ ƴãw, ɛcɛ ɩ̃ bɛ taw zãá nɩ a tub fʋ na ƴãw kɛ́ bɛ tuur a ɩ. 111 A lɛ fʋ na yel a ɩ n na-bom kʋralɛ a ɩ̃ zie, a mɩ́ ɩ na k'ɩ̃ tɛr su-nʋ̃ɔ̀. 112 Ɩ̃ ƴãw nɩ fãw maalɛ a fʋ pʋ-tɩɛrʋ, a ɩ̃ tɔnɛ n'ɩ a lɛ kʋralɛ. 113 Ɩ̃ bɛ nɔnɛ a nɩbɛ a tɩɛrʋ na mɩ́ põ a ɩ, a fʋ wulu n'ʋ ɩ̃ nɔnɛ. 114 Fʋ̃ʋ n'ɩ a ɩ̃ sɔwlʋ zie nɩ a ɩ̃ zɛbr-kur-pãgala. Ɩ̃ ƴãw nɩ a ɩ̃ tɩɛrʋ a fʋ ƴɛ̀rʋ ƴãw. 115 Nyɩ cen taw zaa a ɩ̃ zie, nyɩɩm yel-fa-maalbɛ bɛ ŋan i, ɩ̃ɩ na sàwr'ɩ a ɩ̃ Naaŋmɩn nɛ-ƴãwnɩ. 116 Tɩɛ mɛ̃, mɛ̃ a lɛ fʋ na yel a, ɩ̃ɩ na vʋʋrɛ na. Ta ɩ k'ɩ̃ ƴãw a ɩ̃ tɩɛrʋ a fʋ ƴãw zawla ɩ. 117 Ɩ a sob nɛ na tɩɛ mɛ̃ tɛr a, ɩ̃ɩ na nyɛ̃ nɩ a faafʋ, ɩ̃ na mɩ́ bɔbr'ɩ kʋralɛ k'ɩ̃ɩ bãw a fʋ pʋ-tɩɛrʋ. 118 Fʋ mɩ́ diw nɩ a bɛlɩ dem na bɛ maalɛ a fʋ pʋ-tɩɛrʋ a bɛr, bʋ̃ʋ n'ʋ vɛ̃, a bɛ libelibe-ɩb ɩ n ziri tɛwr. 119 A tẽw zu nɩ-faar ɩ na mɛ̃ sagɛ a a fʋ zie, alɛ n'a so ɩ̃ nɔnɛ a lɛ fʋ na yel a. 120 Fʋ ɩrɛ mɛ̃ nɩ dɛ̃bɩ̃ɛ, ƴãw a ɩ̃ ƴã-gan za ʋ màwr, a lɛ fʋ na dɩ a ƴɛ̀rʋ yel a mɩ̀ ɩrɛ mɛ̃ nɩ dɛ̃bɩ̃ɛ. * 121 Ɩ̃ maal'ɩ a lɛ-na-tu-sɔr nɩ yel-mɩnʋ a, ta bɛr mɛ̃ kʋ̀ a bɛlɩ dem na dɔwrɛ mɛ̃ a ɩ. 122 Ɩ k'ɩ̃ bãwnɩ a k'aa yele za na tu n vla. A pɔ̀lʋ dem, bɛ taa wa dɔwrɛ mɛ̃ ɩ. 123 A ɩ̃ mimie piwr'ɩ a fʋ sõwfʋ bàl, nɩ a faafʋ fʋ na yel a. 124 Ɩrɛ a mãa fʋ tõ-tõ-bie zie mɛ̃ a lɛ a fʋ nɔ̃wfʋ na ŋmɛ̃ a, wul mɛ̃ a fʋ pʋ-tɩɛrʋ ɩ̃ bãw. 125 Ɩ̃ ɩ n a fʋ tõ-tõ-bie: kʋ̀ m yã, ɩ̃ tʋ̃ɔ́ bãw a lɛ fʋ na yel a vla. 126 Ɩ ɩb kãw, Sore e, a daar ta na: bɛ zawr'ɩ a fʋ wulu. 127 Alɛ so ɩ̃ nɔnɛ a fʋ nɛ-ƴãwnɩ zuo a salm-zɩɛ, zuo a salm-zɩɛ ʋl na vɩɛl zuo a salm-zɩɛ za a. 128 A fʋ tub a na fɛr kɛ́ bɛ tuur a, ɩ̃ nyɛ̃ nɩ a za a ɩ yel-mɩŋa, yel za na ɩ ziri a, ɩ̃ bɛ nɔnɛ ʋ towtow ɛ. * 129 A lɛ fʋ na yel a vɩɛl'a bɛ dɩ vuo ɩ, alɛ so ɩ̃ ƴãw fãw tuur a. 130 A fʋ ƴɛ̀rʋ bãwfʋ waar'ɩ nɩ cãà, ʋ mɩ́ kʋ̀ n yã a nɩbɛ na bɛ tɛr a mɩnɛ kãw a. 131 Ɩ̃ dier'ɩ a fʋ ƴɛ̀rʋ mɛ̃ kʋ̃ɔ n'a ɩ̃ nyúur a, ɩ̃ na nɔnɛ a fʋ nɛ-ƴãwnɩ vũuvũu a ƴãw. 132 Lɩɛb kaa mɛ̃, ɛ́ zɔ ɩ̃ nɩbaalʋ, mɛ̃ a lɛ fʋ na yel kɛ́ fʋ na ɩ n a bɛlɩ dem na nɔnɛ fʋ a zie a. 133 A lɛ fʋ na yel a, a ɩ ɩ̃ ɓãá ƴãw cere, ta sàw yel-faa kãw za wa tʋ̃ɔ́ mɛ̃ ɩ. 134 Faa mɛ̃ a nɩbɛ na dɔwrɛ mɛ̃ a nuru pʋɔ, ɩ̃ɩ na sàwr'ɩ a tub fʋ na ƴãw kɛ́ bɛ tuur a. 135 Tɛr niw-vla a mãa, fʋ tõ-tõ-bie zie, wul mɛ̃ a fʋ pʋ-tɩɛrʋ ɩ̃ bãw ʋ. 136 A ɩ̃ mimie zɔrɛ nɩ mʋta-kʋ̃ɔ, bɛ na bɛ sàwr a fʋ wulu a ƴãw. * 137 Sore e, fʋ tɛr'ɩ yel-mɩŋa, ɛ́ a ƴɛ̀rʋ fʋ na dɩ a tori. 138 A lɛ fʋ na yel a, a mɩnʋ nɩ a yel-mɩŋa tɔr za n'a a tu. 139 A nɔ̃wfʋ ɩ̃ na nɔnɛ fʋ a dɩrɛ mɛ̃ na mɛ̃ vũu a, a ɩ̃ dɔ̃ dem na yiire a fʋ ƴɛ̀rʋ bɛrɛ a ƴãw. 140 A fʋ ƴɛ̀rʋ sɩrɩ na tɛr yel-mɩŋa, ɩ̃ nɔnɛ ʋ nɩ yaga, a mãa fʋ tõ-tõ-bie. 141 Ɩ̃ ɩ n pʋrɩ ɛ́ bɛ bɛ ŋmɛlɛ kaar mɛ̃ ɩ, ɛcɛ ɩ̃ bɛ yiiri a fʋ tub a na fɛr kɛ́ bɛ tuur a bɛr ɛ. 142 A fʋ mɩnʋ ɩ n mɩnʋ na be be kʋralɛ a, ɛ́ a fʋ wulu ɩ yel-mɩŋa. 143 Kpɩɛrʋ nɩ pʋl-vʋ̃ɔ nyɔw mɛ̃ na, ɛcɛ a fʋ nɛ-ƴãwnɩ ɩrɛ mɛ̃ nɩ nʋ̃ɔ̀. 144 A lɛ fʋ na yel a ɩ n yel-mɩŋa kʋralɛ, ɩ k'ɩ̃ bãw a pɛr, ɩ̃ɩ na vʋʋrɛ na. * 145 Sore e, ɩ̃ bʋɔlɛ fʋ na nɩ ɩ̃ pʋɔ za, sɔw mɛ̃, ɩ̃ na maal'ɩ a lɛ fʋ na bɔbr a. 146 Ɩ̃ bʋɔlɛ fʋ na, faa mɛ̃, ɛ́ ɩ̃ na sàwr'ɩ a lɛ fʋ na yel a. 147 A zie bɛ mɩ́ vɩɛ sɛr ɛ, ɩ̃ɩ kone bʋɔlɛ fʋ, ɩ̃ mɩ́ ƴãw nɩ a ɩ̃ tɩɛrʋ a fʋ ƴɛ̀rʋ ƴãw. 148 Ɩ̃ mɩ́ ŋmãa nɩ zie ìr, k'ɩ̃ɩ tʋ̃ɔ́ tɩɛrɛ a fʋ wulu ƴɛ̀r-bie. 149 Sore e, a fʋ nɔ̃wfʋ zũú a, wõ a ɩ̃ bʋɔlʋ, ɛ́ ɩ k'ɩ̃ vʋʋrɛ, a tu a lɛ fʋ na dɩ a ƴɛ̀rʋ yel a. 150 A nɩbɛ na zɔrɛ tuur a faalʋ a pɩɛlɛ mɛ̃ na, ɛcɛ bɛ zãá nɩ nɩ a fʋ wulu. 151 Sore e, fʋ̃ʋ a, fʋ pɩɛlɩ mɛ̃ na, ɛ́ a fʋ nɛ-ƴãwnɩ za ɩ yel-mɩŋa. 152 Koro za n'a ɩ̃ bãwnɩ k'aa lɛ fʋ na yel a be n be kʋralɛ. * 153 Nyɛ̃ a ɩ̃ wʋ̀ʋr ɛ́ faa mɛ̃, bʋ̃ʋ n'ʋ vɛ̃, ɩ̃ bɛ yiiri a fʋ wulu bɛr ɛ. 154 Ƴɛ̀r faa mɛ̃ ɛ́ ya de m, lɛb kʋ̀ m a nyɔ-vʋʋrʋ mɛ̃ a lɛ fʋ na yel a. 155 A faafʋ zãá nɩ nɩ a nɩ-faar, bɛ na bɛ maalɛ a fʋ pʋ-tɩɛrʋ a ƴãw. 156 Sore e, a fʋ nɩbaal-zɔba ɩ n kpɛ̃ɛ, ɩ k'ɩ̃ vʋʋrɛ, a tu a lɛ fʋ na dɩ a ƴɛ̀rʋ yel a. 157 A bɛlɩ dem na dɔwrɛ mɛ̃ a, nɩ a ɩ̃ dɔ̃ dem a, bɛ yãwmɛ na, ɛcɛ ɩ̃ bɛ dɛ a lɛ fʋ na yel a ɩ. 158 Ɩ̃ nyɛ̃ nɩ nɩbɛ na zawrɩ fʋ bɛr a kɔkɔrʋ ɩrɛ mɛ̃, a nɩbɛ bɛ ŋa bɛ dier a fʋ wulu ƴɛ̀r-bie ɩ. 159 Sore e, nyɛ̃, ɩ̃ nɔnɛ nɩ a fʋ tub a na fɛr kɛ́ bɛ tuur a yaga. Ɩ k'ɩ̃ vʋʋrɛ a fʋ nɔ̃wfʋ zũú. 160 Zuo a za, a fʋ ƴɛ̀rʋ ɩ n yel-mɩŋa, ɛ́ a ƴɛ̀rʋ fʋ na dɩ a tu a mɩnʋ a, be n be kʋralɛ. * 161 Na-mɩnɛ dɔwrɛ mɛ̃ nɩ zawla, ɛcɛ a fʋ ƴɛ̀rʋ tɛwr dɛ̃bɩ̃ɛ n'a ɩ̃ zɔrɛ. 162 A lɛ fʋ na yel a ɩrɛ mɛ̃ nɩ nʋ̃ɔ̀ mɛ̃ nɩr na nyɛ̃ na-bʋ̃-kpɛ̃ɛ a. 163 Ɩ̃ bɛ nɔnɛ a ziri ɛ, ɩ̃ hɩ̃ɛn ʋ na, ɛcɛ ɩ̃ nɔnɛ nɩ a fʋ wulu. 164 Ɩ̃ mɩ́ danɩ fʋ nɩ gb'a ayopõi a bibi-ɓil, a fʋ ƴɛ̀rʋ fʋ na mɩ́ dɩ a tu yel-mɩŋa a ƴãw. 165 Bɛlɩ dem na nɔnɛ a fʋ wulu a mɩ́ tɛr'ɩ ƴã-ɓaarʋ yaga, ɛ́ bom bɛ ɩrɛ bɛ ŋmɩɛr gbɛ́r ɛ. 166 A ɩ̃ tɩɛrʋ a, ʋlɛ n'ɩ kɛ́ fʋ na faa mɛ̃ na, Sore e, a na ɩ lɛ a, ɩ̃ sàwr'ɩ a fʋ nɛ-ƴãwnɩ. 167 Ɩ̃ maal'a tɛr a lɛ fʋ na yel a, ɩ̃ nɔnɛ a nɩ yaga. 168 Ɩ̃ tɛr'ɩ a fʋ tub a na fɛr kɛ́ bɛ tuur a, nɩ a lɛ fʋ na yel a, a ɩ̃ sɛ́ɛ za be n a fʋ niŋé. * 169 Sore e, a cɛl ɩ̃ na ŋmɛ a, ɩ ʋ ta b! Kʋ̀ m a yã, mɛ̃ a lɛ fʋ na yel a. 170 A ɩ̃ zɛlʋ, ʋ ta fʋ, faa mɛ̃ mɛ̃ a lɛ fʋ na ƴãw a nʋɔr a. 171 Ɩ̃ na yiele na danɛ nɩ fʋ, fʋ na wule mɛ̃ a fʋ pʋ-tɩɛrʋ a ƴãw. 172 Ɩ̃ na manɛ nɩ a fʋ ƴɛ̀rʋ, a fʋ nɛ-ƴãwnɩ za na ɩ yel-mɩŋa a ƴãw. 173 A fʋ nũu, ʋ gù a ɩ̃ sõwfʋ, a fʋ tub ɩ̃ na kaa ír a ƴãw. 174 A fʋ faafʋ n'ʋ ɩ̃ bɔbr, Sore e, ɛ́ a fʋ wulu n'ɩ a bom na ɩrɛ mɛ̃ nʋ̃ɔ̀ a. 175 Ɩ̃ na vʋʋrɛ na tʋ̃ɔ́ danɛ fʋ, ɛ́ a lɛ fʋ na dɩ a ƴɛ̀rʋ yel a na sõwne mɛ̃ na. 176 Ɩ̃ viire na gʋɔr mɛ̃ pɛrʋ na bɔr a: bɔ nyɔw mɛ̃, mãa fʋ tõ-tõ-bie, bʋ̃ʋ n'ʋ vɛ̃, ɩ̃ bɛ yiiri a fʋ nɛ-ƴãwnɩ bɛr ɛ. |
La Bible en Dagara © Alliance Biblique du Burkina Faso, 2013.
Bible Society of Burkina Faso