Sɛb-sõw yielu 118 - A SƐB-SÕW

Sɛb-sõw yielu 118 (117) sob Ɩ̃ na vʋʋrɛ na, tʋ̃ɔ́ manɛ a Sore tome

¹ Nyɩ puore a Sore yãanɩ, ʋ na ɩ nɩ-vla ɛ́ a ʋ nɔ̃wfʋ be kʋralɛ a ƴãw.

² Ɩsɩrayɛl yie dɔwlʋ ʋ, nyɩ lɛb yel: a ʋ nɔ̃wfʋ be n kʋralɛ.

³ Aarɔ̃ yir dem i, nyɩ lɛb yel: a ʋ nɔ̃wfʋ be n kʋralɛ.

⁴ Nyɩɩm na zɔrɛ a Sore a, nyɩ lɛb yel: a ʋ nɔ̃wfʋ be n kʋralɛ.

⁵ Ɩ̃ kõ na bʋɔlɩ a Sore a ɩ̃ kpɩɛrʋ pʋɔ, ʋ sɔw mɛ̃, ɛ́ ɩ k'ɩ̃ lɛb so ɩ̃ tʋɔra.

⁶ A Sore mɩ́ kpɛ m'a, ɩ̃ bɛ zɔrɛ bom za ɩ, bʋ̃ʋ n'ʋ nɩsaal na tʋ̃ɔ́ ɩ m?

⁷ A Sore mɩ́ kpɛ m'a, ʋlɛ n'ɩ a ɩ̃ sõwne, alɛ so ɩ̃ na nyɛ̃ a ɩ̃ dɔ̃ dem loba.

⁸ A Sore naayir zɔ-kpɛb sa, fʋ na na ƴãw a fʋ tɩɛrʋ nɩsaal ƴãw a.

⁹ A Sore naayir zɔ-kpɛb sa, fʋ na na ƴãw a fʋ tɩɛrʋ nũ-kpɛn dem ƴãw a.

¹⁰ A nɩ-bʋʋr-yoru za tɩ ŋmãa na jil pàw mɛ̃, a Sore yúor ƴãw a, ɩ̃ ŋma bɛ nɩ pʋrpʋr.

¹¹ Bɛ tɩ ŋmãa na jil pàw mɛ̃ a ziir za, a Sore yúor ƴãw a, ɩ̃ ŋma bɛ nɩ pʋrpʋr.

¹² Bɛ tɩ mɛ na pàw mɛ̃, mɛ̃ sɩw-bie a, ɛcɛ bɛ kpi na mɛ̃ mɔ̃-kon vũu na dɩ kpiiri a. A Sore yúor ƴãw a, ɩ̃ ŋma bɛ nɩ pʋrpʋr.

¹³ Bɛ tɩ dáa mɛ̃ na, kɛ́ bɛ dáa lɔb, ɛcɛ a Sore wa na wa sõw mɛ̃.

¹⁴ A Sore n'ɩ a ɩ̃ fãw, ɩ̃ yiele na danɛ nɩ ʋ, ʋlɛ n'ʋ wa ɩ a ɩ̃ faarɛ.

¹⁵ Nʋ̃ɔ̀ cɛlsɩ nɩ zɛb-tʋ̃ɔ́fʋ cɛlsɩ n'a lɔbr a nɩ-mɩn pɛnɛ-sɛwr pʋɔ: «A Sore dʋrʋ nũu tõ n gãda-tome!

¹⁶ A Sore dʋrʋ zɛw na! A Sore dʋrʋ nũu tõ n gãda-tome!»

¹⁷ Ɩ̃ bɛ kpiir ɛ, ɩ̃ na vʋʋrɛ na, tʋ̃ɔ́ manɛ a Sore tome ʋ na tõ a.

¹⁸ Sɩza n'a, a Sore kpãa mɛ̃ na, ɛcɛ ʋ bɛ bɛr mɛ̃ ɩ̃ kpi ɛ.

¹⁹ Nyɩ yuo a nɩ-mɩn dɩ̃dɛɛ kʋ̀ m, ɩ̃ kpɛ puori a Sore yãanɩ.

²⁰ — A Sore dɩ̃dɔr'ɩ ŋan: a nɩ-mɩn, bɛ tu kpɛ.

²¹ Ɩ̃ na puore fʋ nɩ yãanɩ, Sore e, fʋ na sɔw mɛ̃, ɛ́ faa mɛ̃ a ƴãw.

²² A kʋsɩɛr a yir-mɩɛrbɛ na ír lɔb bɛr a lɩɛb'ɩ a yir pɛr kʋsɩɛr.

²³ A Sore zie n'a a yi, nɔ-ɓãa-yel'ʋ a tɩ zie.

²⁴ A bibir a Sore na maalɩ a n'ɩ à ŋá, tɩ cɩlɛ ɛ́ cáarɛ nʋ̃ɔ̀ cáarʋ.

²⁵ «Alɛ, Sore e, faa tɩ wɛ! Alɛ, Sore e, ɩ kɛ́ tɩ zɛb tʋ̃ɔ́!»

²⁶ — A sob nɛ na waar a, ʋ tɛr'ɩ puoru a Sore yúor ƴãw! Tɩ be n a Ŋmɩn-yir-kpɛ̃ɛ pʋɔ ɛ́ kʋ̀rɛ nyɩ a ʋ maalʋ.

²⁷ — A Sore ɩ n Naaŋmɩn, ʋ caalɩ tɩ na nɩ a ʋ cãà! Nyɩ cɔrɩ nɩ a nyɩ váar tɩ ta n a bàwr-maal-kuur ɩ́lɛ́ ƴãw.

²⁸ Fʋ̃ʋ n'ɩ a ɩ̃ Naaŋmɩn, ɩ̃ puore fʋ nɩ yãanɩ. Ɩ̃ Naaŋmɩn i, ɩ̃ sàw na kɛ́ fʋ ɩ n kpɛ̃ɛ.

²⁹ Nyɩ puore a Sore yãanɩ, ʋ na ɩ nɩ-vla ɛ́ a ʋ nɔ̃wfʋ be kʋralɛ a ƴãw.