Sɛb-sõw yielu 116 - A SƐB-SÕW

Sɛb-sõw yielu 116 (114-115) sob Ŋmɩŋmɩn n'a ɩ̃ na ɩ yaa a Sore maalʋ san?

¹ Ɩ̃ nɔnɛ nɩ a Sore, ʋ na mɩ́ bɛr wõ m mãa wa bʋɔlɛ ʋ a.

² Ʋ cɩɩl'ɩ a ʋ tobr cɔw mɛ̃, a ɩ̃ nyɔ-vʋʋrʋ daar za a, ʋlɛ n'ʋ ɩ̃ na mɩ́ bʋɔlɩ.

³ A kũu mie tɩ 'lẽ m'a baarɩ, a kpɩmɛ tẽw bamɛ tɩ fɩɩrɩ mɛ̃ na, pʋl-vʋ̃ɔ nɩ kpɩɛrʋ tɩ tɛr mɛ̃ nɩ yaga za.

⁴ Lɛ n'a ɩ̃ tɩ kõ bʋɔlɩ a Sore yúor yel: «'Woi, Sore e, faa mɛ̃!»

⁵ A Sore zɔrɛ nɩ nɩbaalʋ, ɛ́ ɩ nɩ-mɩŋa. A tɩ Naaŋmɩn ɩ n su-baalʋ sob.

⁶ A Sore mɩ́ gùre nɩ a bɛlɩ dem na bɛ tɛr a mɩnɛ kãw a, a ɩ̃ fãw za tɩ baar'a, ʋʋ faa mɛ̃.

⁷ A fɛr'a k'ɩ̃ɩ ɓãá ɩ̃ mɩŋa, a Sore na maalɩ mɛ̃ vla a ƴãw.

⁸ Fʋ faa mɛ̃ nɩ a kũu pʋɔ, fʋ fɩɛl'ɩ a ɩ̃ mʋta-kʋ̃ɔ bɛr, fʋ bɛ sàw ɩ̃ kaw lo ɩ.

⁹ Ɩ̃ na cere nɩ a Sore niŋé a nɩ-vʋʋrɩ tẽw zu.

*

¹⁰ Ɩ̃ sàw na de, ɩ̃ na saa mɩ́ tɩ yel kɛ́: «A kpɩɛrʋ gãw mɛ̃ na» a!

¹¹ Ɩ̃ bɛ tɩ cãà bãw ŋmɩŋmɩn za n'a ɩ, ɛ́ tɩ yere: «A nɩsaalbɛ za ɩ n zir-ŋmarbɛ!»

¹² Ŋmɩŋmɩn n'a ɩ̃ na ɩ yaa a maalʋ al za a Sore na maalɩ mɛ̃ a san?

¹³ Ɩ̃ na zɛw nɩ a faafʋ koli-nyúura, ɛ́ bʋɔlɩ a Sore yúor.

¹⁴ Ɩ̃ na ír'ɩ a nɛ́ɛ ɩ̃ na kõ kʋ̀ a Sore a, a ʋ nɩ-bʋʋrɛ za niŋé.

¹⁵ A mɩ́ ɩ n kpɩɛrʋ a Sore zie, ʋ na mɩ́ nyɛ̃ a nɩbɛ na sàw de ʋ bɛ kpiir a.

¹⁶ 'Woi, Sore e, ɩ̃ ɩ n a fʋ tõ-tõ-bie, fʋ tõ-tõ-bie nɩ a fʋ tõ-tõ-bi-pɔw bidɛb! Fʋ cɛ̀r'ɩ a mie bɛ na 'lẽ nɩ mɛ̃ a bɛr.

¹⁷ Ɩ̃ na maal'ɩ barka bàwr kʋ̀ b, ɩ̃ɩ na bʋɔl'ɩ a Sore yúor.

¹⁸ Ɩ̃ na ír'ɩ a nɛ́ɛ ɩ̃ na kõ kʋ̀ a Sore a, a ʋ nɩ-bʋʋrɛ za niŋé,

¹⁹ a Sore Ŋmɩn-yir-kpɛ̃ɛ davʋrɩ pʋɔ, a fʋ sɔgɔ, Zerizalɛm i! Aleluya!