Sɛb-sõw yielu 109 - A SƐB-SÕW

Sɛb-sõw yielu 109 (108) sob Bɛ mɩ́ maalɩ mɛ̃ nɩ faa yaa a vla san

1 Yiel-yielbɛ nɩ-kpɛ̃ɛ sɛbɛ pʋɔ yielu. Daviir yielu. Sɛb-sõw yielu.

¹ Yiel-yielbɛ nɩ-kpɛ̃ɛ sɛbɛ pʋɔ yielu. Daviir yielu. Sɛb-sõw yielu. Naaŋmɩn i, fʋ̃ʋ ɩ̃ na danɛ a, taa ɩrɛ gbili ɛ!

² Bʋ̃ʋ n'ʋ vɛ̃, nɩ-faar, zir-ŋmarbɛ yere na k'ɩ̃ɩ sãw na, bɛ ƴɛ̀rɛ nɩ a ɩ̃ ƴɛ̀rʋ ŋmarɛ nɩ ziri.

³ Dɔ̃ ƴɛ̀rʋ n'a bɛ ƴɛ̀rɛ a ɩ̃ ƴãw ziir za, bɛ zɛbr'ɩ mɛ̃ na, ɩ̃ɩ bɛ ɩ bom za ɩ.

⁴ Mãa nɔnɛ bɛ na, ɛ́ bɛ yere k'ɩ̃ɩ sãw na, ɛcɛ mãa puore na kʋ̀rɛ bɛ.

⁵ Bɛ mɩ́ maalɩ mɛ̃ nɩ faa yaa a vla san, ɛ́ tɛr'ɩ mɛ̃ dɔ̃ yaa a ɩ̃ nɔ̃wfʋ san.

⁶ À ŋá n'a bɛ ƴɛ̀rɛ a ɩ̃ ƴãw: «Tɩ kaa ír nɩ-faa ʋ ìr àr a ʋ ƴãw, nɩr na manɛ a ʋ sãwna a, ʋ àr a ʋ dʋrʋ lowr.

⁷ A ƴɛ̀rʋ-dɩb nʋɔr kʋb daar a, bɛ nyɛ̃ ʋ k'ʋ ɩ sãwna sob, ɛ́ a ʋ puoru ɩ mɛ̃ Naaŋmɩn n'ʋ ʋ sãwnɛ a!

⁸ A ʋ nyɔ-vʋʋrʋ bibie, á ɩ blãlelɛ, nɩ-yũo, ʋ de a ʋ tõ-nʋɔr!

⁹ A ʋ bibiir, bɛ lɩɛbɩ bi-kpebe, ɛ́ a ʋ pɔw ɩ pɔw-kʋɔr!

¹⁰ A ʋ bibiir, bɛ ɩ nɩ-yʋɔrɩ nɩ zɛlbɛ, bɛ zɛlɛ zãá nɩ a bɛ yie na lo a!

¹¹ A sob nɛ san ʋ na tɛr a, ʋ wa de a ʋ bome za, ɛ́ zawlbɛ wa wa de a ʋ tome tɔnɛ za!

¹² Nɩr za taa cãà ɩrɛ vla a ʋ zie ɩ, nɩr za taa zɔrɛ a ʋ bi-kpebe nɩbaalʋ ɛ!

¹³ A ʋ bʋʋrɛ, bɛ baarɩ, a ʋ yúor, ʋ bɔr a nɩbɛ na na dɔw tu a pʋɔ!

¹⁴ Bɛ lɛb sɩ̃w a Sore tɩɛrʋ, a ʋ sãà nɩ a ʋ sãàkʋm sãwna ƴãw, ɛ́ bom za taa íre a ʋ mã yel-bebe bɛrɛ ɩ!

¹⁵ A Sore, ʋ tɛr a bɛ sãwna tɩɛrʋ kʋralɛ, ɛ́ ɩ a bɛ yúor bɔr a tẽw zu!

¹⁶ Bʋ̃ʋ n'ʋ vɛ̃, a nɩr ŋa tɩ yiir'a na ɩrɛ vla, ʋ tɩ dɔwr'ɩ nã́w sob tɩ kʋ, bãbàal a na tɩ wone a.

¹⁷ Ʋ tɩ nɔnɛ nɩ a nɩbɛ ŋmɛ-ƴãwfʋ yaga, a ŋmɛ-ƴãw páw ʋ na. Ʋ bɛ tɩ nɔnɛ k'ʋʋ mɩ́ ƴɛ̀r nɔ-vla ɩ, a nɔ-vla zãá nɩ ʋ na.

¹⁸ Ʋ su n a ŋmɛ-ƴãw mɛ̃ kpar-kpɛ̃ɛ a, a ŋmɛ-ƴãw, ʋ kpɛ a ʋ pʋɔ mɛ̃ kʋ̃ɔ a, ʋ kpɛ a ʋ ƴã-ganɩ́ mɛ̃ kãá a.

¹⁹ Ʋ pàw ʋ mɛ̃ kparʋ a, ʋ ɩ mɛ̃ kpàwr ʋ na sɛ kʋralɛ a!»

²⁰ À ŋá n'a a Sore na ya a bɛlɩ dem na yere k'ɩ̃ɩ sãw na a, na ƴɛ̀rɛ po-to-ƴɛ̀rʋ a ɩ̃ ƴãw a.

²¹ Ɛcɛ fʋ̃ʋ a, Sore ɩ̃ Naaŋmɩn i, ɩ ɩb kãw a ɩ̃ ƴãw, a fʋ yúor zũú. A fʋ nɔ̃wfʋ mɩ́ maalɩ mɛ̃ na, faa mɛ̃.

²² Bãbàal nɩ nã́w sob nɛ m, ɛ́ a ɩ̃ socir sãw ʋ za.

²³ Ɩ̃ kule na mɛ̃ zaanʋɔra ɓaarʋ na bɔrɛ a, bɛ mɩr mɛ̃ na bɛr mɛ̃ sãsowr a.

²⁴ Ɩ̃ gal'ɩ a bʋ̃-dɩrɩ bɛ tɩ cãà tʋ́ɔr àrɛ saaƴẽwn ɛ, ɩ̃ cɛ nɩ kɔbɛ tɛwr, a bʋ̃-dɩrɩ na bɛ ka be a ƴãw.

²⁵ Mãa n'ɩ a bɛ nɩ-ɩ-laara, bɛlɛ wa nyɛ̃ m a, bɛ mɩ́ gɔwrɛ nɩ zu, ɩrɛ nɩ mɛ̃ laar.

²⁶ Sore ɩ̃ Naaŋmɩn i, wa sõw mɛ̃, faa mɛ̃, fʋ na ɩ nɩ-vla a.

²⁷ A nɩbɛ bɛ ŋa a, bɛ bãwnɩ a k'aa fʋ tome n'a, kɛ́ a fʋ̃ʋ, Sore e, fʋ̃ʋ n'ʋ maalɩ à à ŋá.

²⁸ Bɛl mɩ́ ŋmɩɛr'a ƴãwn, ɛ́ fʋ̃ʋ ƴɛ̀rɛ nɔ-vla. Bɛlɛ wa ìr a ɩ̃ ƴãw a, bɛ na nyɛ̃ nɩ vĩ, ɛ́ nʋ̃ɔ̀ kpɩɛr a mãa, fʋ tõ-tõ-bie, yaga.

²⁹ A nɩbɛ na yere k'ɩ̃ɩ sãw na a, a bɛ yúor, ʋ́ sãw, a vĩ, ʋ́ pili pàw bɛ mɛ̃ kparʋ a!

³⁰ Ɩ̃ na danɩ nɩ a Sore kpɛ̃w za a yi, ɩ̃ na ír'ɩ a ʋ yúor a zu-sɛbla sɔgɔ.

³¹ Bʋ̃ʋ n'ʋ vɛ̃, ʋ àr'ɩ a nã́w sob dʋrʋ lowr, k'ʋʋ faa ʋ a ƴɛ̀r-dɩrbɛ nuru pʋɔ.