Sɛb-sõw yielu 107 - A SƐB-SÕW

SƐBR ANŨU SOB 107—150 Sɛb-sõw 107 (106) sob A Naaŋmɩn na faarɛ a nɩsaal a so barka puoru

¹ Nyɩ puore a Sore yãanɩ, a ʋ vɩɛlʋ ƴãw, nɩ a ʋ nɔ̃wfʋ na be kʋralɛ a ƴãw.

² A bɛlɩ dem a Sore na faa a, bɛ yere à à ŋá, a bɛl ʋ na faa a dɔ̃ sob nuru pʋɔ a,

³ a bɛl ʋ na lɛb tɛr a ten za pʋɔ wa ɓã taa a, a saa-pɛrɩ́ nɩ a mʋ̃tɔ̃w-kpɛb-lowr, a saa-pɛrɩ́-gʋba-lowr nɩ a saa-pɛrɩ́-dʋrʋ-lowr a.

⁴ Bɛ mɩnɛ tɩ bɔrɛ na gʋɔr wɛja-kpal-faa pʋɔ ɛ́ bɛ nyɛrɛ zie nɩbɛ na kpɩɛr a sɔ́r ɛ.

⁵ Kɔ̃ nɩ kʋ̃ɔ-nyúur za bɛ tɩ bɛrɛ bɛ ɩ, a bɛ fãw za tɩ báarɛ na.

⁶ Lɛ n'a bɛ tɩ kõ bʋɔlɩ a Sore a bɛ kpɩɛrʋ pʋɔ, ʋ faa bɛ a bɛ pʋl-vʋ̃ɔ pʋɔ.

⁷ Ʋ ɩ na bɛ lo sɔr-daadaa cen zie nɩbɛ na kpɩɛr a.

⁸ Bɛ puore a Sore yãanɩ a ʋ nɔ̃wfʋ ƴãw, a ʋ nɔ-ɓãa-yele ʋ na maalɩ a nɩsaalbɛ zie a ƴãw.

⁹ Bʋ̃ʋ n'ʋ vɛ̃, ʋ kʋ̀ n kʋ̃ɔ a bɛlɩ dem a kʋ̃ɔ-nyúur na tɩ kʋrɛ a, ɛ́ kʋ̀ bʋ̃-dɩrɩ yaga za a bɛlɩ dem a kɔ̃ na tɩ kʋrɛ a.

¹⁰ Bɛ mɩnɛ tɩ zɩ̃ n gaso di-lige pʋɔ, ƴãw bamɛ a wone bɛ,

¹¹ bɛ na bɛ tɩ tu a lɛ a Naaŋmɩn na yel a ƴãw, bɛ na bɛ tɩ ŋmɛlɩ kaa a lɛ a Naaŋmɩn-na-do-saa-bɛ-pɩɛl-a na tɩɛrɩ a yele bin a.

¹² A Sore tɩ dĩ bɛ na nɩ a kpɩɛrʋ, bɛ tɩ lo na, ɛ́ nɩr za bɛ wa sõw bɛ ɩ.

¹³ Lɛ n'a bɛ tɩ kõ bʋɔlɩ a Sore a bɛ kpɩɛrʋ pʋɔ, ʋ faa bɛ a bɛ pʋl-vʋ̃ɔ pʋɔ.

¹⁴ Ʋ tɩ ɩ na bɛ yi a bɛ gaso di-lige pʋɔ, ɛ́ ŋma a bɛ bʋ̃-'leni bɛr.

¹⁵ Bɛ puore a Sore yãanɩ a ʋ nɔ̃wfʋ ƴãw, a ʋ nɔ-ɓãa-yele ʋ na maalɩ a nɩsaalbɛ zie a ƴãw!

¹⁶ Bʋ̃ʋ n'ʋ vɛ̃, ʋ kár'ɩ kure pamɛ bɛr, ʋ kár'ɩ kur-dàar na mɩ́ jɩ́r pamɛ a bɛr.

¹⁷ Bɛ mɩnɛ tɩ ɩ n a ɩ-faar tɩ gem'ɩ, bɛ tɩ lɛb'a ŋmɛlɩ ɩrɛ a kpɩɛr a bɛ tʋɔra nɩ a bɛ sãwna.

¹⁸ Bʋ̃-dɩra za bɛ tɩ cãà ɩrɛ bɛ vʋla ɩ, bɛ tɩ cɛ a kũu yɩ̃ɛlɛ.

¹⁹ Lɛ n'a bɛ tɩ kõ bʋɔlɩ a Sore a bɛ kpɩɛrʋ pʋɔ, ʋ faa bɛ a bɛ pʋl-vʋ̃ɔ pʋɔ.

²⁰ Ʋ tõ n a ʋ ƴɛ̀rʋ a bɛ sanʋ ƴãw, ʋ faa bɛ nɩ a bɔw-zɩɛ nʋɔrɩ́.

²¹ Bɛ puore a Sore yãanɩ a ʋ nɔ̃wfʋ ƴãw, a ʋ nɔ-ɓãa-yele ʋ na maalɩ a nɩsaalbɛ zie a ƴãw!

²² Bɛ maalɛ bagɛ puore nɩ ʋ yãanɩ, bɛ lɔbr nʋ̃ɔ̀ cɛlsɩ manɛ nɩ a tome ʋ na tõ a!

²³ Bɛ mɩnɛ tɩ kpɛ n gbor duwre a kʋ̃ɔ-kpɛ̃ɛ zu, tone a bɛ yɛ̀rʋ́ tome a kʋ̃ɔnɩ na cere bɛ pɩɛl a zu.

²⁴ A nɩbɛ bɛ ŋa nyɛ̃ nɩ a Sore tome ʋ na tõ a, a ʋ nɔ-ɓãa-yele ʋ na maalɩ a kʋ̃ɔ-kpɛ̃ɛ zu a.

²⁵ Ʋ tɩ ƴɛ̀r'a ƴãw saa-sɛsɛb cɛ̀r, mɩ́ ɓáw a kʋ̃ɔ-mie ìr'ɩ.

²⁶ A bɛ gbor mɩ́ tɩ do n saa, ɛ́ lɛb wa siw tɩ siw. A bɛl tɛɛ za bɛ tɩ cãà laar ɛ,

²⁷ nĩw-viir tɩ nyɔw bɛ na, bɛ titibr mɛ̃ dã-kuolbɛ a. A bɛ bãwfʋ za tɩ baar'a.

²⁸ Lɛ n'a bɛ tɩ kõ bʋɔlɩ a Sore a bɛ kpɩɛrʋ pʋɔ, ʋ faa bɛ a bɛ pʋl-vʋ̃ɔ pʋɔ.

²⁹ Ʋ tɩ ɩ na a sɛsɛb ŋmãa, ɛ́ a kʋ̃ɔ mie bɛr gɔmɛ.

³⁰ Nʋ̃ɔ̀ tɩ ɩrɛ bɛ na, a kʋ̃ɔ na lɛb tɩ gã zoom a ƴãw, a Sore tɩ tɛr bɛ na tɩ ta n a siwfʋ zie bɛ na bɔbr a.

³¹ Bɛ puore a Sore yãanɩ a ʋ nɔ̃wfʋ ƴãw, a ʋ nɔ-ɓãa-yele ʋ na maalɩ a nɩsaalbɛ zie a ƴãw!

³² Bɛ manɛ a nɩbɛ lãw pʋɔ ʋ na ɩ kpɛ̃ɛ a, bɛ danɛ ʋ a nɩ-kore lãw pʋɔ.

³³ Ʋlɛ n'ʋ mɩ́ ɩ mamɛ a lɩɛbɩ wɛja-kpalɛ, ɛ́ ɩ bul-nɛ́ɛ a lɩɛbɩ tẽsɔw-kõw,

³⁴ tẽsɔw na vɩɛl a, ʋ lɩɛbɩ tẽsɔw na kpɛ zɩ̃ɛ a, a tẽw dem ɩ-faar zũú.

³⁵ Ʋ mɩ̀ mɩ́ ɩ n wɛja-kpalɛ ʋ lɩɛbɩ gbãtar-yɛlʋ, ɛ́ tẽsɔw-kõw lɩɛbɩ bul-nɛ́ɛ.

³⁶ Ʋ mɩ́ ɩ na kɔ̃ dem kpɩɛr a be, bɛ mɩ́ ŋmãa nɩ tẽ-kpɛ̃ɛ kpɩɛr,

³⁷ bɛ mɩ́ bʋ̀r'ɩ póru, sɛl divɛ̃ tɩɩr, mɩ́ pɔr a wɔmɛ.

³⁸ A Sore mɩ́ maalɩ bɛ na bɛ yɛ̀r yãwmɛ yaga, ʋ bɛ mɩ́ sàw a bɛ dʋn nʋɔr siwri ɛ.

³⁹ Ɛcɛ nɩbɛ bɛ mɩnɛ nʋɔr mɩ́ siwre na. Bɛlɛ n'ɩ bɛ ŋan a gbãgbaalʋ, a kpɩɛrʋ nɩ a pʋ-sãwna dĩ.

⁴⁰ A Sore mɩ́ ɩ na a na-mɩnɛ ɩ nɩ-ɩ-laarɩ, ʋ mɩ́ bɛr bɛ na bɛ bɔrɛ gʋɔr wɛja-kpalɛ na bɛ tɛr sɛ́ɛ a pʋɔ.

⁴¹ Ɛcɛ ʋ mɩ́ ír'ɩ a nan dem a bɛ wʋ̀ʋr pʋɔ bɛr, ʋ mɩ́ ɩ na a bɛ yie nɩbɛ yãwmɛ mɛ̃ a bɛ zaw dʋn a.

⁴² A nɩ-vɩɛlɩ mɩ́ nyɛ̃ nɩ à à ŋá nʋ̃ɔ̀ ɩrɛ bɛ, ɛ́ a nɩ-faar pàw a bɛ nɛ́ɛ.

⁴³ Nɩr wa ɩ yã-bãwnɛ a, ʋ cɛlɛ a yele á ŋá zie vla, ʋʋ na nyɛ̃ na bãw a Sore nɔ̃wfʋ!