Sɛb-sõw yielu 106 - A SƐB-SÕW

Sɛb-sõw yielu 106 (105) sob A Naaŋmɩn na maalɩ a Ɩsɩrayɛl bʋʋrɛ, ɛ́ bɛ sãw ʋ a

¹ Aleluya! Nyɩ puore a Sore yãanɩ, a ʋ vɩɛlʋ ƴãw nɩ a ʋ nɔ̃wfʋ na be kʋralɛ a ƴãw.

² Ãa n'ʋ na tʋ̃ɔ́ manɩ a Sore gãda-tome, ɛ́ cɛ̀ a ʋ danʋ ziir za bɛ wõ?

³ Zu-nʋ̃ɔ̀ dem'ɩ a bɛlɩ dem na mɩ́ ɩrɛ a lɛ-na-tu-sɔr-a, ɛ́ tuur a mɩnʋ pùor kʋralɛ a!

⁴ Sore e, bãwnɩ tɩ, fʋ̃ʋ na nɔnɛ a fʋ nɩ-bʋʋrɛ a. Ɩ ɩb kãw a tɩ ƴãw, fʋ̃ʋ tɩ faarɛ ɛ.

⁵ Lɛ n'a tɩ na nyɛ̃ a bɛlɩ dem fʋ na kaa ír a nʋ̃ɔ̀, tɩ na lãwnɩ a fʋ nɩ-bʋʋrɛ cɩlɛ, ɛ́ danɛ tɩ tʋɔra lãwnɩ a nɩbɛ fʋ na só a.

⁶ Tɩ maal'ɩ yel-bebe mɛ̃ a tɩ sãàkʋm-kore a, tɩ maal'ɩ a yel-faa, tɩ sãw na.

⁷ A tɩ sãàkʋm-kore na tɩ be a Eziptɩ tẽw a, bɛ bɛ tɩ bãw a fʋ nɔ-ɓãa-yele pɛr ɛ, bɛ tɩ yiir'ɩ a fʋ nɔ̃wfʋ tõ-yaga bɛr. Bɛ tɩ jɛ n a Bàa-kɛkɛɛ kʋ̃ɔ-kpɛ̃ɛ́.

⁸ Ɛcɛ a Sore yúor zũú n'a ʋ tɩ faa bɛ, k'ʋʋ wul a ʋ kpɛnʋ.

⁹ Ʋ tɩ tanɩ nɩ a Bàa-kɛkɛɛ kʋ̃ɔ-kpɛ̃ɛ, ʋ ko daadaalɛ, ʋʋ ƴãw bɛ cen tɔl a man dĩo pʋɔ mɛ̃ wɛja-kpalɛ pʋɔ a.

¹⁰ Ʋ tɩ faa bɛ nɩ a bɛlɩ dem na hɩ̃ɛn bɛ a nũú, ʋ tɩ zɛb'a faa bɛ a dɔ̃ dem nuru pʋɔ.

¹¹ A kʋ̃ɔ tɩ paal'a pàw a bɛ dɔ̃ dem, been za bɛ tɩ cɩ̃ɛ ɩ.

¹² Lɛ n'a bɛ tɩ sàw de a lɛ a Naaŋmɩn na yel a, ɛ́ tɩ yieli danɩ nɩ ʋ.

¹³ Ɛcɛ bɛ tɩ yiir'ɩ a ʋ tome bɛr fɔ̃wlɛ, bɛ bɛ tɩ gù ʋ maalɩ a lɛ ʋ na tɩɛrɩ a yele bin a baarɩ ɛ.

¹⁴ Bom za vʋla tɩ tɛr bɛ nɩ a wɛja-kpalɛ pʋɔ, bɛ tɩ ɩ n a Naaŋmɩn kaa a zi-kõw pʋɔ be.

¹⁵ A Naaŋmɩn tɩ kʋ̀ bɛ nɩ a alɩ bome nɛ bɛ na tɩ bɔbr a, ʋ kʋ̀ bɛ na bɛ dɩ a tɩ ɓa bɛ nɛ́ɛ.

¹⁶ Bɛ tɩ nyùur'ɩ nɩ a Moyiir nɩ a Sore nɩ-sõw Aarɔ̃, a laɩ pʋɔ.

¹⁷ Alɛ n'a a tẽsɔw tɩ háa a nʋɔr vɔl Datan, ʋ tɩ lɩɛbɩ pàw Abiram nɩ a ʋ taabɛ.

¹⁸ Vũu tɩ dɩ n a bɛ lãw nɩbɛ, a tɩ dɩ n a nɩ-faar bɛ ŋa.

¹⁹ Bɛ tɩ maal'ɩ nadele a Orɛb tãw zu, ɛ́ tɩ lo gbĩ dume gũu tɩ tɔ tẽw kure bom niŋé.

²⁰ Bɛ tɩ de nɩ a Naaŋmɩn na ɩ a bɛ yúor-vɩɛlʋ-danʋ a, tɛw nɩ náab na 'wɔbr mʋ̃ɔ a dasule.

²¹ Bɛ tɩ yiir'ɩ a Naaŋmɩn, bɛ faarɛ, bɛr, ʋl na tɩ maalɩ yel-bɛrɛ a Eziptɩ tẽw a,

²² na tɩ maalɩ nɔ-ɓãa-yele a Kam tẽw a, na tɩ tõ tome na ɩrɛ dɛ̃bɩ̃ɛ a Bàa-kɛkɛɛ kʋ̃ɔ-kpɛ̃ɛ́ a.

²³ Lɛ n'a a Naaŋmɩn tɩ yel k'ʋʋ na kʋ bɛ na pàw pɛr. Ɛcɛ a ʋ nɩ-kaa-íra Moyiir tɩ ŋmãa na yi àr a ʋ niŋé, bɛ sàw ʋ na kʋ bɛ pàw pɛr nɩ suur ɛ.

²⁴ Bɛ tɩ zawr'ɩ tẽw na ɩ tẽw a bɛr, bɛ bɛ tɩ sàw de a Sore ƴɛ̀rʋ ɛ.

²⁵ Bɛ tɩ zɩ̃ na zɛbr a bɛ pɛnɛ-sɛwr pʋɔ, bɛ bɛ tɩ cãà bɛrɛ wone a Sore ƴɛ̀rʋ ɛ.

²⁶ Lɛ n'a ʋ tɩ zɛw a nũu pɔ yel, k'ʋʋ na ɩ na bɛ kpi a wɛja-kpalɛ pʋɔ,

²⁷ k'ʋʋ na diw nɩ a bɛ bʋʋrɛ yaarɩ a ziir za, ɛ́ bɛr bɛ bɛ kpi a nɩ-bʋʋr-yoru pʋɔ.

²⁸ Bɛ tɩ maal'ɩ a Pewɔɔr tẽw ŋmɩn Báàl, ɛ́ 'wɔb dʋn nɛnɛ bɛ na kʋ kʋ̀ kũuni a.

²⁹ Bɛ tɩ ɩ n à à ŋá, ƴãw a Sore nyɛ̃ suur. Yel-faa kpɛ̃ɛ kãw tɩ lo n a bɛ zu.

³⁰ Ɛcɛ Pɩnasɩ tɩ ìr'a maalɩ a yele, a yel-faa kpɛ̃ɛ ŋa tɛw.

³¹ A Sore tɩ sàw na kʋ̀ ʋ k'ʋʋ ɩ n nɩ-mɩŋa, a yome yome za nɩ kʋralɛ.

³² Bɛ tɩ ɩ na a Sore nyɛ̃ suur a Meriba kʋ̃ɔ pɛr, ɛ́ faa tɩ páw a Moyiir a bɛl ƴãw.

³³ Bʋ̃ʋ n'ʋ vɛ̃, bɛ tɩ sãw nɩ a ʋ suur, ʋ bɛ tɩɛrɩ ɛ, ɛ́ ƴɛ̀r.

³⁴ Bɛ bɛ tɩ kʋ a Kanãa tẽw dem mɛ̃ a lɛ a Sore na tɩ yel kʋ̀ bɛ a ɩ.

³⁵ Ɛcɛ bɛ tɩ cen na tɩ mɩɩlɩ a tɩbɛ dem, zanɩ a bɛ ɩb,

³⁶ bɛ tɩ maalɛ nɩ a bɛ tɩbɛ, a lɩɛbɩ bɛrɩ a bɛ zie.

³⁷ Bɛ tɩ nyɔw nɩ a bɛ bidɛbr nɩ a bɛ pɔwyaar maal'ɩ bàwr kʋ̀ kɔ̃tɔmɛ.

³⁸ Bɛ tɩ cir'ɩ nɩbɛ na bɛ tɛr sãwna a zɩ̃ɩ, — a bɛ bidɛbr nɩ a bɛ pɔwyaar bɛ na maal'ɩ bàwr kʋ̀ a Kanãa tẽw tɩbɛ a zɩ̃ɩ — ɛ́ a zɩ̃ɩ á ŋá tɩ dɛw a tẽw bɛr.

³⁹ A bɛ ɩ-ɩrɩ tɩ ɩ na bɛ ɩ dɛwr dem, a bɛ tome tɩ ɩ n pɔw-yɛm tome.

⁴⁰ Lɛ n'a a Sore tɩ nyɛ̃ nɩ a ʋ nɩ-bʋʋrɛ suur yaga, ɛ́ bɛ tɩ cãà nɔnɛ a nɩbɛ ʋ na so a yele ɩ.

⁴¹ Ʋ tɩ bɛr bɛ na kʋ̀ a nɩ-bʋʋr-yoru: a bɛlɩ dem na hɩ̃ɛn bɛ a tɩ tʋ̃ɔ́ bɛ na.

⁴² A bɛ dɔ̃ dem tɩ dɔwrɩ bɛ na, ɛ́ ɩ kɛ̀ bɛ nyɛ̃ vĩ.

⁴³ A Sore tɩ faa bɛ nɩ gb'a a ŋmɩn za, ɛcɛ bɛ tɩ cãà na kpãa tobr ɩrɛ a lɛ bɛ na tɩɛrɛ a, ɛ́ sãwnɛ cere nɩ.

⁴⁴ A Sore tɩ wõ n a bɛ kon ɛ́ nyɛ̃ a bɛ kpɩɛrʋ.

⁴⁵ Ʋ tɩ lɛb'a tɩɛrɩ a wõ-taa ʋ na maal'ɩ bɛ a, ʋ tɩ zɔ n bɛ nɩbaalʋ, a ʋ nɔ̃wfʋ na ɩ kpɛ̃ɛ a zũú.

⁴⁶ Ʋ tɩ ɩ na a bɛlɩ dem za na tɛr bɛ a gbãgbaalʋ pʋɔ a, bɛ zɔ bɛ nɩbaalʋ.

⁴⁷ Sore tɩ Naaŋmɩn i, faa tɩ, lɛb bʋɔlɩ tɩ a nɩ-bʋʋr-yoru sɔgɔ wa ɓã taa, tɩ tʋ̃ɔ́ íre a fʋ yo-sõw, ɛ́ danɛ fʋ nyʋʋr'ɩ.

⁴⁸ A Sore, Ɩsɩrayɛl Naaŋmɩn, so danʋ! A koro za nɩ kʋrakʋralɛ. A nɩbɛ za na yel'a: «Amɛn! Aleluya!»