Sɛb-sõw yielu 104 - A SƐB-SÕW

Sɛb-sõw yielu 104 (103) sob A Naaŋmɩn, bome za Íre, so danʋ

¹ Ɩ̃ sɩ́ɛ ɛ, danɛ a Sore yoo! Sore ɩ̃ Naaŋmɩn i, fʋ ɩ n kpɛ̃ɛ yaga za. Fʋ ɩ n dɛpaalʋ nɩ vɩɛlʋ tɛwr,

² fʋ cir'ɩ a cãà mɛ̃ kpar-kpɛ̃ɛ a. Fʋ dɔl'ɩ a salom mɛ̃ pɛn-sɛw pɛn a,

³ ɛ́ cãà lɛb maalɩ a fʋ kpɛb zie ʋ do gãw a salom. A zũzuge n'a mɩ́ ɩ a fʋ torko, ɛ́ fʋ cere a sɛsɛb pɩgɛ zu.

⁴ A sɛsɛb'ʋ fʋ mɩ́ tõ bɛr a ziir, ɛ́ de a vũu-zɛlɛ a ɩ a fʋ tõ-tõ-biir.

⁵ Fʋ ɩ na a tẽsɔw kpɛmɛ àr a ʋ pɛr zu, ʋ bɛ be za nãà dam ɛ.

⁶ Fʋ yɛ́r'ɩ a kʋ̃ɔ-kpɛ̃ɛ pàw ʋ mɛ̃ kparʋ a, a kʋ̃ɔnɩ tɩ paal'a do tɩ pàw a tan.

⁷ Ɛcɛ fʋ tanɩ a na, a zɔ! A na wa wõ a fʋ saa na tanɩ a, a lɩɛb'a zɔ.

⁸ A zɔ na do a tan zu, ɛ́ siw a fʋɔlɩ pʋɔ, ɛ́ tɩ sãá a zie ʋl fʋ na ƴãw a a.

⁹ Fʋ ƴãw nɩ tʋr-bɔw kʋ̀ a, k'aa taa gãwnɛ bɛrɛ ɩ, a ta lɛb wa paalɩ pàw a tẽw ɛ.

¹⁰ Fʋ ɩ na a kʋ̃ɔ bule yire a fʋɔlɩ pʋɔ, gbɔlɛ a tan cará.

¹¹ Alɛ n'a a wɛ-dʋn za nyuur, alɛ n'a mɩ́ ɓãá a bõw-gaara kʋ̃ɔ-nyúur.

¹² A mʋ̃ɔ pʋɔ lili kpɩɛr'ɩ a kʋ̃ɔ nʋɔr, ɛ́ mɩ́ ɩrɛ gɔmɛ a tɩɩr váar pʋɔ.

¹³ Fʋ be n a salom zu ɛ́ mɩ́ ɩ a saa wa ƴãw a tan. Fʋ mɩ́ paal'ɩ a tẽsɔw nɩ a fʋ yel-maalɩ.

¹⁴ Fʋ̃ʋ n'ʋ mɩ́ ɩ a mʋ̃ɔ bul a dʋn ƴãw, nɩ a bʋ̃-buli a nɩsaalbɛ na kʋɔr a. À ŋá n'a a bɛ nʋɔr-dɩb mɩ́ yi a tẽsɔw pʋɔ:

¹⁵ a divɛ̃ na mɩ́ cɩrɛ bɛ ƴãw a, a kãá na mɩ́ ɩ a bɛ niwn nyɩlɛ a, nɩ a dipɛ̃ na mɩ́ lɛb kʋ̀ bɛ fãw a.

¹⁶ A Sore tɩɩr páwr'ɩ kʋ̃ɔ k'a sɛw, lãwnɩ a Libã tẽw sɛɛdɩr tɩɩr.

¹⁷ Be n'a a lili wóbr a cowr, ɛ́ a gʋ̃ɔnagʋ̃ɔna ganɛ a sɩpɩrɛ tɩɛ zu.

¹⁸ A tan pʋɔ bʋʋr so a tã-bɛrɛ, ɛ́ a sasɩ́ɩr sɔwlʋ zie n'ɩ a pie pʋɔ.

¹⁹ Fʋ maal'ɩ a cuw a dàrʋ ƴãwfʋ ƴãw, nɩ a mʋ̃tɔ̃w na mɩ́ bãw a ʋ kpɛb daar a.

²⁰ Fʋ mɩ́ ɩ na a lige wa, a ɩ a tɩ̃ɩsɔw, a lɛn daar a tuwr pʋɔ dʋn za na mɩ́ yi dɛnɛ a.

²¹ A gben-pɔlɛ mɩ́ kone na bɔbr'ɩ a bom a na na nyɔw a, a mɩ́ bɔbr'ɩ a dɩb a fʋ zie.

²² A mʋ̃tɔ̃w wa pure a, a mɩ́ lɛb'a tɩ gã a bɔwrɩ pʋɔ.

²³ Lɛ n'a a nɩsaal mɩ́ yi cen a ʋ tome zie, tɩ tõ tɩ ta n a zaanʋɔra.

²⁴ Sore e, a fʋ tome yãwmɛ na bɛ tɛr tɛwr ɛ: fʋ tõ n a za nɩ yã-bãwfʋ! A tẽsɔw paal'a nɩ a fʋ bʋ̃-íri.

²⁵ A kʋ̃ɔ-kpɛ̃ɛ n'ɩ ŋan, ʋ bɛ dɩ vuo ɩ cere bɛ tɛr tɛwfʋ zie ɩ. Dʋ̃-bɛrɛ nɩ dʋ̃-bili na bɛ tɛr nʋɔr a damnɛ nɩ a ʋ pʋɔ.

²⁶ Gbee duwre na gʋɔr a ʋ zu, be n'a a wa-bɩɛ, a Levɩatã, mɩ̀ be, fʋ na maalɩ kɛ́ fʋ mɩ́ dɩ̃ɛnɛ nɩ a.

²⁷ A bʋ̃-vʋʋrɩ á ŋá za tɩɛrɛ fʋ na, kɛ́ fʋ mɩ́ kʋ̀ a a bʋ̃-dɩrɩ a daar.

²⁸ Fʋ mɩ́ kʋ̀ a na, a de, fʋ mɩ́ yuo nɩ a fʋ nũu, a tɩw.

²⁹ Fʋ mɩ́ sɔwl'ɩ a fʋ niwn, pʋl-vʋ̃ɔ nyɔw a. Fʋ mɩ́ lɛb'a de a vʋʋrʋ, a ŋmãa vʋʋrʋ, lɛb lɩɛbɩ a tanɛ a na dãw ɩ a.

³⁰ Fʋ mɩ́ lɛb'a kʋ̀ a a fʋ vʋʋrʋ, lɛb ír a, fʋ mɩ́ lɩɛb'ɩ a tẽsɔw niwn ʋ ɩ paala.

³¹ A Sore yúor-vɩɛlʋ-danʋ, ʋ be be kʋralɛ, a Sore, ʋ nyɛrɛ nʋ̃ɔ̀ a tome ʋ na tõ a pʋɔ!

³² Ʋ mɩ́ jɩ́r'ɩ a tẽsɔw kaa, ʋ màwr, ʋ mɩ́ tɔ n a tan, a ɩrɛ zʋ̀ʋ́r.

³³ Ɩ̃ na yiele nɩ a Sore ƴãw a ɩ̃ nyɔ-vʋʋrʋ daar za, ɩ̃ na yiele na danɛ nɩ a ɩ̃ Naaŋmɩn, a ɩ̃ cãafʋ daar za.

³⁴ A ɩ̃ ƴɛ̀rʋ, a nʋmɛ a Sore zie, mãa ƴãw a, ʋlɛ n'ɩ a ɩ̃ nʋ̃ɔ̀.

³⁵ A yel-bebe dem, bɛ bɔr a tẽw zu! A nɩ-faar, bɛ ta cãà be ɩ! Ɩ̃ sɩ́ɛ ɛ, danɛ a Sore. Aleluya!