Sɛb-sõw yielu 102 - A SƐB-SÕW

Sɛb-sõw yielu 102 (101) sob Ɩ̃ kõ n a kon tɩ cɛ kɔbɛ tɛwr

¹ Bãbàal na bɛ cãà tɛr fãw a puoru. A Sore n'ʋ ʋ kone a ʋ kpɩɛrʋ kʋ̀rɛ.

² Sore e, bɛr wõ a ɩ̃ puoru, a cɛl ɩ̃ na lɔb a, ʋ ta b!

³ Ta mɩ́ lɩɛbɩ kpaar cɔw mɛ̃ a kpɩɛrʋ bibir ɛ. Cɩɩl a fʋ tobr cɔw mɛ̃. A bibir ʋl ɩ̃ na mɩ́ bʋɔlɛ fʋ a, mɩ́ sɔw mɛ̃ fɔ̃w.

⁴ Bʋ̃ʋ n'ʋ vɛ̃, a ɩ̃ bibie zɔrɛ na tɔlɛ mɛ̃ zʋ̀ʋ́r a, ɛ́ a ɩ̃ kɔbɛ dɩrɛ mɛ̃ vũu-kpɛ̃ɛ a.

⁵ A ɩ̃ socir ko na mɛ̃ mʋ̃ɔ bɛ na ŋma a, ɩ̃ tɩ yiiri a ɩ̃ bʋ̃-dɩrɩ dɩb.

⁶ Ɩ̃ kõ n a kon tɩ wɛ ɛ́ cɛ kɔbɛ tɛwr.

⁷ Ɩ̃ ŋmɛ̃ na mɛ̃ a gbagba na kpɩɛr a wɛja-kpalɛ pʋɔ a, ɩ̃ ɩ na mɛ̃ vìí na kpɩɛr a dekpole pʋɔ a.

⁸ Ɩ̃ mɩ́ gã nɩ mimir, mɛ̃ lile na zɩ̃ ʋ yõ gar zu a.

⁹ A ɩ̃ dɔ̃ dem mɩ́ tʋʋr mɛ̃ nɩ bibie za, bɛ mɩ́ nyɛ̃ nɩ mɛ̃ nɩ suur, a ɩ̃ yúor'ʋ bɛ mɩ́ ŋmɩɛr'ɩ ƴãwn taa.

¹⁰ Tãpɛlʋ n'ɩ a ɩ̃ bʋ̃-dɩrɩ, ɛ́ mãa wa nyúur bom a, ɩ̃ mɩ́ nyúur'a lãwnɩ a ɩ̃ mʋta-kʋ̃ɔ.

¹¹ Sore e, fʋ tɩ nyɛ̃ nɩ mɛ̃ nɩ suur yaga, ɛ́ a fʋ suur pʋɔ a, fʋ nyɔw mɛ̃ na lɔb bɛr.

¹² A ɩ̃ bibie ɩ na mɛ̃ zaanʋɔra ɓaarʋ a, ɩ̃ɩ ɩ mɛ̃ mʋ̃ɔ na kore a.

¹³ Ɛcɛ fʋ̃ʋ a, Sore e, fʋ ɩ n nãà kʋralɛ, ɛ́ a nɩbɛ na dɔwr lɩɛrɛ taa a, kʋ̃ yiiri a fʋ yele ɩ.

¹⁴ Fʋ na ìr'a, fʋ na zɔ n a Sɩyɔ̃ tẽw nɩbaalʋ. A ʋ nɩbaalʋ zɔba daar'ɩ à à ŋá, a daar sɩrɩ n'ʋ.

¹⁵ A tɩɩm fʋ tõ-tõ-biir nɔnɛ nɩ a ʋ kʋsɛbɛ, a ʋ tanɛ tɛɛ za ɩrɛ tɩ nɩ nɩbaalʋ.

¹⁶ A nɩ-bʋʋr-yoru na ƴãwnɛ fʋ na, Sore e, a tẽw zu na-mɩnɛ za na ƴãwnɛ nɩ a fʋ yúor-vɩɛlʋ-danʋ.

¹⁷ A Sore wa lɛb mɩɛr a Sɩyɔ̃ tẽw a, bɛ na nyɛ̃ ʋ nɩ a ʋ vɩɛlʋ pʋɔ.

¹⁸ A bɛlɩ dem bome bɛ na fa a, ʋ na bɛr'a wõ a bɛ puoru, ʋ bɛ zawrɛ a bɛ zɛlʋ bɛrɛ ɩ.

¹⁹ Bɛ sɛb a yel ŋa a nɩbɛ na bɩ́ɛrɛ dɔwr a ƴãw, ɛ́ nɩ-bʋʋr-paala na danɛ nɩ a Sore.

²⁰ A Sore be n a ʋ zi-sõw pʋɔ a saa-zu, ɛ́ gũu k'ʋʋ jɩ́r kaa, ʋ be n a salom zu, ɛ́ jɩ́r a tẽw kaa,

²¹ k'ʋʋ bɛr wõ a nɩ-pàwra kon, ɛ́ cɛ̀r a kũu nɩbɛ mie bɛr.

²² Lɛ n'a bɛ na íre a Sore yúor a Sɩyɔ̃ tẽw pʋɔ, bɛ na yiele danɛ nɩ ʋ a Zerizalɛm tẽw pʋɔ,

²³ a lɛn daar a nɩ-bʋʋrɛ za nãà wa ɓã taa a, a naalʋ-ten za nãà wa puore a Sore a.

²⁴ Ɩ̃ cen nɩ a sɔr põ-zɛ̃-taa, ɛ́ a Sore ɩ a ɩ̃ fãw siwri, ʋ ŋmãa nɩ a ɩ̃ nyɔ-vʋʋrʋ bibie bɛr.

²⁵ Alɛ n'a so ɩ̃ yere: «Ɩ̃ Naaŋmɩn i, fʋ̃ʋ na be be kʋralɛ a, ta ɩ ɩ̃ pʋ̃ɔ kpi ɛ.»

²⁶ Fʋ̃ʋ n'ʋ ír a tẽw a koro za, ɛ́ a fʋ nuru n'a maalɩ a salom.

²⁷ Al na wɛ na, ɛcɛ fʋ̃ʋ be n be. A tẽw nɩ a salom na zaw na mɛ̃ kparʋ a, fʋ na lɩɛr'a na mɛ̃ kparʋ a, ɛ́ a na bɛr'ɩ a zie.

²⁸ Ɛcɛ fʋ̃ʋ ŋmɛ̃ n fʋ ŋmɛ̃a, ɛ́ a fʋ yome bɛ tɛr baarʋ daar ɛ.

²⁹ A fʋ tõ-tõ-biir bibiir na tɛr'ɩ kpɛb zie, ɛ́ a bɛ bʋʋrɛ na be n a fʋ niŋé.