Sɛb-sõw yielu 10 - A SƐB-SÕW

Sɛb-sõw yielu 10 (9) sob

¹ Sore e, bʋ̃ʋ n'ʋ ɩ fʋ àr zãá, bʋ̃ʋ n'ʋ ɩ fʋ sɔwlɛ a kpɩɛrʋ daar?

² A nɩ-faa pɔ̀l-ɩb kʋrɛ nɩ a nan dem, ʋ ɩ n a ʋ libelibe ɩb nyɔw bɛ.

³ A nɩ-faa nyɛ̃ nɩ a ʋ pʋ-tɩɛr-faar a vɩɛl! A mɔl-bɔbrɛ ŋa daarʋ da na, ʋ tʋʋr a Sore, ɛ́ ɩrɛ ʋ laar.

⁴ A ʋ pɔ̀l-ɩb pʋɔ a, a nɩ-faa bɛ cãà sowre bom za ɩ. «Naaŋmɩn bɛ ka ɩ», a ʋ tɩɛrʋ za n'ɩ a lɛ.

⁵ A ʋ yele za mɩ́ maal'ɩ vla kʋralɛ. A Naaŋmɩn na mɩ́ dɩ a ƴɛ̀rʋ bin lɛ a, a do na zuo, bɛ tʋɔr a nɩ-faa ŋa ɩ. Ʋ mɩ́ pɛbl'ɩ a ʋ dɔ̃ dem za bɛr.

⁶ Ʋ tɩɛrɛ nɩ ʋ pʋɔ: «Ɩ̃ bɛ bãwnɛ damnʋ ɛ, yel-faa bɛ be za na páw mɛ̃ ɩ.»

⁷ Ŋmɛ-ƴãw ƴɛ̀rʋ tɛwr'a be a ʋ nʋɔrɩ́, nɩ ziri nɩ po-to-ƴɛ̀rʋ, ɩ-faar nɩ tõ-faar tɛwr ƴɛ̀rʋ n'a a ʋ zɛl bãw.

⁸ Ʋ mɩ́ sɔwl'a zɩ̃ pɩɛlɩ a tẽli, ʋ mɩ́ sɔwl'a kʋ a nɩr na bɛ sãw a, ʋ mɩ́ piwre nɩ a bãbàal.

⁹ Ʋ mɩ́ jɩɛrɛ na, ɛ́ ũú gù mɛ̃ gbẽw na ũú tuw pʋɔ a. Ʋ mɩ́ jɩɛrɛ na k'ʋʋ wa nyɔw a nã́w sob. Ʋ mɩ́ bɛlɩ ʋ na ʋ wa lo a ʋ bɛra pʋɔ, ʋ nyɔw.

¹⁰ Ʋ mɩ́ vure nɩ mɛlmɛl, ʋ mɩ́ ũú na, ɛ́ wa lo nyɛ a bãbàalbɛ.

¹¹ Ʋ mɩ́ tɩɛr'ɩ ʋ pʋɔ: «Naaŋmɩn yiir'a, ʋ pàw nɩ a ʋ niwn, ʋ bɛ mɩ́ nyɛ̃ bom towtow ɛ.»

¹² Sore e, ìr! Naaŋmɩn i, ɩ ɩb kãw, ta yiiri a nan dem bɛr ɛ.

¹³ Bʋnʋ ƴãw n'a a nɩ-faa na ɩrɛ fʋ laar, tɩɛrɛ nɩ ʋ pʋɔ kɛ́: «Naaŋmɩn bɛ sowre mɛ̃ bom ɛ?»

¹⁴ Fʋ̃ʋ a, fʋ nyɛrɛ nɩ a nã́w sob kpɩɛrʋ nɩ a ʋ wʋ̀ʋr, fʋ cɛlɛ nɩ be na tu a ʋ yele pùor. Fʋ zie n'a a bãbàal mɩ́ ƴãw a ʋ tɩɛrʋ za, ɛ́ fʋ̃ʋ n'ʋ mɩ́ sõw a bi-kpieb.

¹⁵ Ɩ a nɩ-faa kpɛnʋ a baarɩ, bɛlɛ wa bɔbr a faa ʋ na maalɩ a, bɛ kʋ̃ nyɛ̃ bom ɛ!

¹⁶ A Sore dɩrɛ nɩ naalʋ kʋralɛ, a nɩ-bʋʋr-yoru kʋ̃ cãà be a ʋ tẽw pʋɔ ɩ.

¹⁷ Sore e, fʋ mɩ́ tu n a su-siwri dem bʋ̃-bɔbrɩ pùor, fʋ mɩ́ ɩ na bɛ kpɛmɛ socir, fʋ mɩ́ ƴãw nɩ tobr,

¹⁸ kɛ́ fʋ wul a bi-kpieb nɩ a sob nɛ bɛ na ɩrɛ a kpɩɛr a yel-mɩŋa. Lɛ n'a nɩsaal za kʋ̃ lɛb ɩ po-to-sob a tẽw zu ɛ.