Ʋrɔm 15 - A SƐB-SÕW

Ɩrɛ nʋ̃ɔ̀ kpɩɛr a fʋ tɔ

¹ A tɩɩm na tɛr fãw a sàw-deb pʋɔ a, a fɛr'a kɛ́ tɩ mɩ́ sõw a bãbàalbɛ a bɛ bãbàalʋ pʋɔ, ɛ́ ta bɔbr kɛ́ tɩ ɩrɛ lɛ na nʋmɛ a tɩ zie a ɩ.

² Ŋa za a tɩ pʋɔ, ʋ mɩ́ bɔbr k'ʋʋ ɩrɛ nʋ̃ɔ̀ kpɩɛr a ʋ tɔ sob a ʋ vla ƴãw, k'ʋʋ tʋ̃ɔ́ sõwne ʋ ʋ kɛrɛ a ʋ sàw-deb pʋɔ.

³ Bʋ̃ʋ n'ʋ vɛ̃, a Kɩrɩta bɛ tɩ bɔbr k'ʋʋ ɩrɛ lɛ na nʋmɛ a ʋ zie a ɩ, ɛcɛ a nɩ̃ɛ na tɩ ɩ mɛ̃ à ŋá a Sɛb-sõw na yere a: «A fʋ zʋm-tʋʋrbɛ zʋmɛ lo n a ɩ̃ zu.»

⁴ A yele al za na sɛb a Sɛb-sõw pʋɔ a koro za a, tɩɩm wulu ƴãw n'a a sɛb, k'aa su-nyɔwra nɩ a mɔwlʋ a na kʋ̀rɛ tɩ a zũú, tɩ tʋ̃ɔ́ tɛr a tɩɛrʋ a Naaŋmɩn ƴãw.

⁵ A Naaŋmɩn na ɩ su-nyɔwra nɩ mɔwlʋ sob a, ʋ ɩ nyɩ cɔwrɛ a Yeezu Kɩrɩta, wone taa vla a nyɩ cara pʋɔ.

⁶ Lɛ n'a nyɩ na lãw tɛr tɩɛr-been nɩ nɔ-been danɛ nɩ a Naaŋmɩn, tɩ Sore Yeezu Kɩrɩta Sãà.

Yel-nʋ̃ɔ̀ a nɩ-bʋʋrɛ za ƴãw

⁷ A na ɩ lɛ a, nyɩ dier taa mɛ̃ a lɛ a Kɩrɩta na de nyɩ, Naaŋmɩn tʋ̃ɔ́ nyɛ̃ danʋ a.

⁸ Bʋ̃ʋ n'ʋ vɛ̃, ɩ̃ yere na kʋ̀rɛ nyɩ, a Naaŋmɩn na ŋmɛ̃ ʋ ŋmɛ̃a a zũú n'a, a Kɩrɩta lɩɛbɩ a Zifʋ mɩnɛ tõ-tone, k'ʋʋ tu a nɛ́ɛ a Naaŋmɩn na ƴãw kʋ̀ a bɛ sãàkʋm-kore a.

⁹ A bɛl na bɛ ɩ Zifʋ mɩnɛ a, a Naaŋmɩn nɩ-bàal-zɔba zũú n'a bɛ danɛ ʋ, a tu mɛ̃ a lɛ a Sɛb-sõw na yel a: «Alɛ n'a so ɩ̃ na danɛ fʋ nɩ-bʋʋr-yoru sɔgɔ, ɩ̃ na yiele na ƴãwnɛ nɩ a fʋ yúor.»

¹⁰ A Sɛb-sõw mɩ̀ lɛb'a yel: «Nɩ-bʋʋrɛ ɛ, nyɩ cɩlɛ lãwnɩ a Sore nɩbɛ!»

¹¹ Ɛ́ lɛb maalɛ: «Nɩ-bʋʋrɛ ɛ, nyɩ danɛ a Sore nyɩ za, nyɩɩm nɩbɛ za, nyɩ íre a ʋ yúor!»

¹² Ɩzayi mɩ̀ cãà na yere: «A Zese bʋʋrɛ nɩr na wa na, ʋ na ìr'a dɩrɛ naalʋ a nɩ-bʋʋr-yoru zu, ɛ́ bɛ na ƴãw nɩ a bɛ tɩɛrʋ a ʋ ƴãw.»

¹³ A Naaŋmɩn na n'ʋ tɩ mɩ́ tɩɛrɛ a, ʋ ɩ kɛ̀ nʋ̃ɔ̀ nɩ ƴã-ɓaarʋ paalɩ nyɩ a nyɩ sàw-deb pʋɔ, k'aa nyɩ tɩɛrʋ nyɩ na ƴãw a Naaŋmɩn ƴãw a, ɩ kpɛ̃ɛ yaga za a Vʋʋrʋ Sõw fãw zũú.

A Pol tome ʋ na tõ a

¹⁴ Ɩ̃ yɛbr i, ɩ̃ mɩŋa za bãwnɩ a na nyɩ na tɛr tɩɛr-vɩɛlɩ yaga ɛ́ bãw bom za vla, na tʋ̃ɔ́ wule nɩ taa yã a.

¹⁵ Ɛcɛ ɩ̃ nyɔw nɩ nyãa bʋʋrɛ kãw sɛb'ɩ nyɩ a ɩ̃ sɛbɛ ziir a mɩnɛ, k'ɩ̃ɩ tʋ̃ɔ́ sɩ̃w a nyɩ tɩɛrʋ. Ɛ́ mãa wa sɛb a lɛ a, a ɩ n a maalʋ a Naaŋmɩn na kʋ̀ m a zũú n'a,

¹⁶ k'ɩ̃ɩ ɩ a Yeezu Kɩrɩta tõ-tõ-bie a nɩ-bʋʋr-yoru ƴãw. Tõ-sõw n'ʋ ɩ̃ tone hiere a Naaŋmɩn Yel-nʋ̃ɔ̀, k'aa nɩ-bʋʋr-yoru lɩɛbɩ bàwr-maal-bom na nʋmɛ a Naaŋmɩn zie a, bàwr-maal-bom Vʋʋrʋ Sõw na ɩ k'ʋ ɩ sõw a.

¹⁷ A na ɩ lɛ a, mãa nɩ a Yeezu Kɩrɩta na lãw taa a, ɩ̃ na tʋ̃ɔ́ na nyʋʋr a ɩ̃ ton ƴãw ɩ̃ na tone a Naaŋmɩn ƴãw a.

¹⁸ Bʋ̃ʋ n'ʋ vɛ̃, mãa wa sʋ̃ɔmɩ sàw ƴɛ̀rɛ bom kãw ƴɛ̀rʋ a, a ɩ n a ʋlɩ bom nɛ a Kɩrɩta na tu a ɩ̃ zie maalɩ, k'ʋʋ ɩ a nɩ-bʋʋr-yoru sàwr a Naaŋmɩn nʋɔr a. Ƴɛ̀rʋ nɩ ɩ-ɩrɩ n'a ʋ maal'ɩ a yel ʋl,

¹⁹ nɩ yele na ɩ bãwfʋ sãá a fãw, nɩ yel bãw-guuri nɩ a Naaŋmɩn Vʋʋrʋ Sõw fãw. À ŋá n'a ɩ̃ tĩ a Zerizalɛm ɛ́ yel a Kɩrɩta Yel-nʋ̃ɔ̀ vla za gʋɔr'ɩ tɩ ta n Ɩlɩɩrɩ.

²⁰ Ɛcɛ ɩ̃ bɛ sàw yel a Yel-nʋ̃ɔ̀ be nɩbɛ na wõ a Kɩrɩta yele a ɩ, k'ɩ̃ɩ taa wa mɩɛr a dacine dɔwlɛ yir pɛr zu nɩ-yũo na lɔb a ɩ.

²¹ A na ɩ à ŋá a, ɩ̃ tu na mɛ̃ a lɛ a Sɛb-sõw na yel a: «A bɛlɩ dem bɛ na bɛ tɩ yel a ʋ yel kʋ̀ a, bɛ na nyɛ̃ ʋ na, ɛ́ a bɛlɩ dem na bɛ tɩ wõ a ʋ yele a, na bãw nɩ a pɛr.»

A Pol na ƴɛ̀rɛ Ʋrɔm cenu ƴɛ̀rʋ a

²² A yel ŋa n'ʋ bɛ sɩrɩ sàw ɩ̃ wa a nyɩ zie gb'aa ŋmɩn za ɩ.

²³ Ɛcɛ ƴɛrɛŋa a, zie bɛ cɛ ɩ̃ bɛ tɔ a voru á ŋá pʋɔ ɩ. A yome yãwmɛ na ɩ̃ na bɔbr a nyɩ zie waa a,

²⁴ ɩ̃ɩ bɔbr'a kɛ́ mãa wa cere a Ɛsɩpanyɩ a, mãa tu a be. Bʋ̃ʋ n'ʋ vɛ̃, ɩ̃ tɩɛrɛ na kɛ́ mãa wa tɔlɛ a, mãa nyɛ̃ nyɩ, ɛ́ nyɩ sõw mɛ̃ ɩ̃ cen a tẽw ŋa. Ɛcɛ, ɩ̃ na de nɩ niwn be a nyɩ zie blãlɛ wõ nʋ̃ɔ̀ baarɩ.

²⁵ Ƴɛrɛŋa a, Zerizalɛm'a ɩ̃ cere a kɩrɩta-nɩbɛ tome ƴãw.

²⁶ Bʋ̃ʋ n'ʋ vɛ̃, a Masedʋan nɩ a Akayi kɩrɩta-nɩbɛ yel'a kɛ́ bɛ na cɩɛr'ɩ bome sõw nɩ a Zerizalɛm kɩrɩta-nɩbɛ na bɛ tɛr a a.

²⁷ Bɛl mɩŋa nɛbɛ nyɛ̃ bɛ tʋɔra ɩ a lɛ, ɛcɛ yel-mɩŋa za, a tɩ fɛr'a kɛ́ bɛ sõw bɛ. Bʋ̃ʋ n'ʋ so, a Zifʋ kɩrɩta-nɩbɛ ɩ n a Naaŋmɩn maalʋ kʋ̀ a nɩ-bʋʋr-yoru. A na ɩ lɛ a, a fɛr'a k'aa nɩ-bʋʋr-yoru mɩ̀ sõw bɛ a bɛ ƴã-gamɛ yel-bɔbrɩ pʋɔ.

²⁸ Mãa wa tu a yel ŋa pùor baarɩ, kʋ̀ bɛ a cɩɛrʋ bome a, ɩ̃ na tu n a nyɩ zie cen a Ɛsɩpanyɩ.

²⁹ Ɩ̃ɩ bãwnɩ a na kɛ́ mãa wa waar a nyɩ zie a, a Kɩrɩta maalʋ yaga za n'a ɩ̃ na wa n.

³⁰ Ɛcɛ yɛbr i, bom ŋa n'ʋ ɩ̃ zɛlɛ a nyɩ zie, a tɩ Sore Yeezu Kɩrɩta ƴãw, nɩ a nɔ̃wfʋ a Vʋʋrʋ Sõw na tɩrɛ a ƴãw: nyɩ lãw nɩ mɛ̃ a ɩ̃ mɔb pʋɔ, puore a Naaŋmɩn kʋ̀rɛ mɛ̃.

³¹ Nyɩ puore k'ɩ̃ɩ taa lore a Zude tẽw nɩbɛ bɛl na bɛ sàw de a nuru pʋɔ ɩ, ɛ́ a sõwfʋ ɩ̃ na cere nɩ a, a kɩrɩta-nɩbɛ sàw de ʋ vla.

³² Lɛ n'a ɩ̃ na tɛr pʋ-pɩɛlʋ wa n a nyɩ zie, Naaŋmɩn wa sàw a, wa lãw nɩ nyɩ pɩ̃ɛnɩ blã.

³³ A Naaŋmɩn na ɩ a ƴã-ɓaarʋ sob a, ʋ be a nyɩ za zie. Amɛn.