Ʋrɔm 14 - A SƐB-SÕW

Ta mɩ́ bãwnɛ a fʋ yɛb yele ɩ

¹ Nyɩ mɩ́ sàw de sob nɛ na bɛ tɛr fãw a ʋ naaŋmɩn-sàw-deb pʋɔ a, ɛ́ ta bãwnɛ a lɛ ʋ na tɩɛrɛ a ɩ.

² Mɛ̃ à ŋá a, kãw tɩɛrɛ na k'ʋʋ na tʋ̃ɔ́ na dɩrɛ bom za, ɛ́ kãw na bɛ tɛr fãw a ʋ sàw-deb pʋɔ a, dɩrɛ zɛ-vaar tɛwr.

³ Sob nɛ na dɩrɛ a za a, ʋ ta jewre a sob nɛ na bɛ dɩrɛ a za a ɩ, ɛ́ sob nɛ na bɛ dɩrɛ a za a, ʋ ta bãwnɛ a sob nɛ na dɩrɛ a za a yele ɩ, bʋ̃ʋ n'ʋ vɛ̃, a Naaŋmɩn mɩ̀ sàw na de ʋ.

⁴ A fʋ̃ʋ a, ãa nɛ b na bãwnɛ nɩ-yũo tõ-tõ-bie yele? Ʋ àr'ɩ saaƴẽwn bɩɩ ʋ lo na a, a ʋ tõ-tõ-nɩ-kpɛ̃ɛ n'ʋ a jɩ́rɛ. Ʋ na kpɛmɛ na àr mɩ̀, bʋ̃ʋ n'ʋ so, a Sore tɛr'ɩ fãw na tɩɛ ʋ tɛr.

⁵ Kãw zie a, a bibie bɛ ɩ been ɛ, ɛ́ kãw zie a bibie za ɩ been. Ŋa za ta mɩ́ bʋ́nɛ a ʋ tɩɛrʋ ŋa pʋɔ ɩ.

⁶ Sob nɛ na mɩ́ bãwnɩ bibir kãw a, a Sore ƴãw n'a ʋ mɩ́ ɩ a lɛ, sob nɛ na dɩrɛ a za a, a Sore ƴãw mɩ̀ n'a ʋ ɩrɛ a lɛ, bʋ̃ʋ n'ʋ vɛ̃, ʋ mɩ́ puor'ɩ a Sore yãanɩ. Sob nɛ na bɛ dɩrɛ a za a, ʋ ɩrɛ nɩ a lɛ a Sore ƴãw, ɛ́ a ʋl mɩ̀ a, ʋ mɩ́ puor'ɩ a Sore yãanɩ.

⁷ Bʋ̃ʋ n'ʋ vɛ̃, tɩ been kãw za bɛ vʋʋrɛ ʋl mɩŋa ƴãw ɛ, ɛ́ tɩ been kãw za mɩ̀ bɛ kpiir ʋl mɩŋa ƴãw ɛ.

⁸ Tɩmɛ wa vʋʋrɛ a, a Sore ƴãw n'a tɩ vʋʋrɛ, ɛ́ tɩmɛ wa kpiir a, a Sore ƴãw n'a tɩ kpiir: tɩ vʋʋrɛ na o, tɩ kpi na o, a Sore so tɩ.

⁹ Bʋ̃ʋ n'ʋ vɛ̃, a Kɩrɩta kpi na ɛ́ lɛb vʋʋrɛ, k'ʋʋ ɩ a nɩ-kũuni nɩ a nɩ-vʋʋrɩ za Sore.

¹⁰ Ɛcɛ fʋ̃ʋ a, bʋnʋ ƴãw n'a fʋ bãwnɛ a fʋ yɛb yele? Ɛ́ fʋ̃ʋ, bʋnʋ ƴãw n'a fʋ jewre a fʋ yɛb? Tɩ za na cen nɩ a Naaŋmɩn ƴɛ̀rʋ-dɩb zie.

¹¹ Bʋ̃ʋ n'ʋ vɛ̃, a Sɛb-sõw yere nɩ à ŋá: «A Sore yere na: Ɩ̃ taa bɛ wa be, a nɩsaalbɛ za na lo na gbĩ dume a ɩ̃ niŋé, bɛ za na háa nɩ nʋɔr danɛ nɩ a Naaŋmɩn.»

¹² A na ɩ à ŋá a, a tɩ kãw za n'ʋ na mɩ́ manɩ a ʋ yel-mɩŋa kʋ̀ a Naaŋmɩn.

Ta ɩ a fʋ yɛb ʋ lo ɩ

¹³ A na ɩ à ŋá a, nyɩ ɩ tɩ ta cãà bãwnɛ taa yele ɩ. Nyɩ nɩ̃ɛ bãwnɩ a a na fɛr kɛ́ nyɩ ta ɩ a nyɩ yɛb ʋ ŋmɛ gbɛ́r bɩɩ ʋ lo a tulu pʋɔ a ɩ.

¹⁴ A Sore Yeezu ƴãw a, ɩ̃ bãwnɩ a nɩ yel-mɩŋa, kɛ́ bom bɛ be be à ŋá ɩ bʋ̃-dɛwr ɛ. Ɛcɛ nɩr wa tɩɛrɛ kɛ́ bom ɩ n bʋ̃-dɛwr a, ʋ mɩ́ ɩ n bʋ̃-dɛwr a ʋ zie.

¹⁵ Fʋ̃ʋ wa dɩrɛ bom a waar'ɩ pʋ-sãwna a fʋ yɛb zie a, a fʋ ɩb bɛ cãà tuur a nɔ̃wfʋ ɛ. Gù vla taa ɩrɛ a sob ŋa ƴãw a Kɩrɩta na kpi a, ʋ wa kpiir bʋ̃-dɩra tɛwr ƴãw ɛ.

¹⁶ A bom nɛ na ɩ bʋ̃-vla a nyɩ zie a, bɛ mɩnɛ taa wa ƴɛ̀rɛ faa a ʋ ƴãw ɛ.

¹⁷ Bʋ̃ʋ n'ʋ vɛ̃, a Naaŋmɩn Naalʋ bɛ ɩ dɩb nɩ nyub yele ɩ, ʋ ɩ n mɩnʋ, ƴã-ɓaarʋ nɩ nʋ̃ɔ̀ a Vʋʋrʋ Sõw na tɩrɛ a.

¹⁸ Ʋlɩ sob na tone a Kɩrɩta à ŋá a, ʋ mɩ́ pɛlɩ nɩ a Naaŋmɩn pʋɔ ɛ́ a nɩsaalbɛ de a ʋ yele.

¹⁹ A na ɩ à ŋá a, nyɩ ɩ tɩ bɔbr a yele al na waar'ɩ a ƴã-ɓaarʋ a, nɩ a al na mɩ́ ɩ tɩ lãw kɛrɛ a sàw-deb pʋɔ a.

²⁰ Ta sãw a Naaŋmɩn ton bɛr bʋ̃-dɩra ƴãw ɛ. Sɩza n'a, bʋ̃-dɩra za vɩɛl'a, ɛcɛ fʋ̃ʋ wa dɩrɛ bom ƴãw a fʋ yɛb ʋ lo a, a bɛ vɩɛl ɛ.

²¹ A ʋlɩ bom nɛ na vɩɛl a, ʋlɛ n'ɩ ta 'wɔb nɛn, ta nyũ dãa, ʋlɛ n'ɩ a bɛr bom za na na tʋ̃ɔ́ ɩ a fʋ yɛb ʋ lo a.

²² A lɛ fʋ na sàw de k'aa ɩ n yel-mɩŋa a fʋ zie a, tɛr a lɛ a Naaŋmɩn niŋé. Zu-nʋ̃ɔ̀ sob'ɩ a sob nɛ na bɛ nyɛ̃ k'ʋʋ tɛr'ɩ sãwna a ʋ kaa-íru pʋɔ a!

²³ Ɛcɛ sob nɛ na tɛr bʋnʋ a ʋ socir pʋɔ bʋ̃-dɩra ƴãw ɛ́ dɩrɛ a, ʋ sãw na, a ʋ ɩb na bɛ tu sàw-deb ʋ na nyɛ̃ bãw kɛ́ sɩza n'a a ɩ. Ɛcɛ ɩb za na bɛ tu a sàw-deb a ɩ n yel-bier.