Sɔr-nɛ́ɛ 6 - A SƐB-SÕW

A naziir yele

¹ A Sore tɩ ƴɛ̀r'ɩ a Moyiir zie yel ʋ á ŋá:

² «Ƴɛ̀r a Ɩsɩrayɛl nɩbɛ zie yel bɛ: Dɛb bɩɩ pɔw wa kõ nʋɔr ɩ naziir, k'ʋʋ de ʋ tʋɔra kʋ̀ a Sore a,

³ ʋ na ciir'ɩ divɛ̃ nɩ dã-kpɛ̃w za, divɛ̃ miiru nɩ dã-bɩ̃ɩ za, lãwnɩ bʋ̃-nyúura za na maal'ɩ divɛ̃ tɩ-wɔmɛ a. Ʋ bɛ 'wɔbr a divɛ̃ tɩɛ wɔ̃-ɓaar nɩ a wɔ̃-kon ɛ.

⁴ A lɛn daar za ʋ na ɩ a naziir a, ʋ bɛ dɩrɛ a divɛ̃ tɩɛ bom kãw za ɩ, alɛ mɩ̀ saa ɩ a divɛ̃ tɩ-wɔmɛ bie bɩɩ a pɛgɛ a.

⁵ Ʋ mɩ̀ bɛ pone a ʋ zu ɛ: ʋ de nɩ ʋ tʋɔra kʋ̀ a Sore, lɛ so a fɛr k'ʋʋ bɛr a ʋ zukɔbɛ a bʋnɩ bule tɩ ta a daar ʋl ʋ na ƴãw a.

⁶ A lɛn daar za mɩ̀ a, ʋ bɛ pɩɛlɛ kũu ɛ.

⁷ A ʋ sãà bɩɩ a ʋ mã, a ʋ yɛb bɩɩ a ʋ yeepuule saa nɛbɛ kpi a, ʋ bɛ bɔbr dɛwr ƴãwn ʋ tʋɔra ɩ. Bʋ̃ʋ n'ʋ vɛ̃, ʋ de nɩ ʋ tʋɔra kʋ̀ a Sore, mɛ̃ a lɛ a ʋ zu-tuo na wule a.»

⁸ «A lɛn daar za ʋ na ɩ a naziir a, ʋ na ɩ n a Sore nɩ-sora.

⁹ Nɩr wa ur kpi a ʋ lõbowrí a, a ʋ naziir ɩb baar'a nɩ a kũu ʋ na tɔ a. Da-ɓil wa tɔl a, ʋ lɛb'a vɩɛl, ʋ na põ n a zu.

¹⁰ A bio daarɩ́ a, ʋ na wa n nɩ ŋmamɛ ayi bɩɩ naŋmamɛ ayi wa kʋ̀ a bàwr-maalɛ a tuor-taa pɛn-sɛw dɩ̃dɔr nʋɔr.

¹¹ A bàwr-maalɛ na maal'ɩ nɩ a kãw yel-bier ír-bɛrʋ bàwr, ɛ́ maal'ɩ a kãw nyɩw-a-za-bàwr. Al pùorí, ʋ tu a suur-dɩ-kʋ̀b tub a sob zie, a sãwna ʋ na tɔ a kũu tɛr a ƴãw. A ʋlɩ bibir nɛ a, a sob nɛ na tʋ̃ɔ́ na lɛb de ʋ tʋɔra tɩr ɩ Naaŋmɩn nɩ-sora.

¹² A sob na lɛb'a tĩ de ʋ tʋɔra kʋ̀ a Sore, maalɩ lɛb-kpɛ-taa bàwr nɩ yũon-been pele. A bibie al na cen tɔl a bɛ pʋɔ ɩ, a ʋ naziir ɩb na faa sãw a ƴãw.»

¹³ «Nyɛ̃ a tub na càarɩ a naziir a: a ʋ naziir ɩb baarʋ bibir wa vɩɛ a, bɛ na tɛr ʋ na cen nɩ a tuor-taa pɛn-sɛw dɩ̃dɔr nʋɔr.

¹⁴ Ʋ na wa n nɩ dʋn ata a ƴã-gamɛ zie kãw za na bɛ sãw a wa kʋ̀ a Sore: yũon-been pele nyɩw-a-za-bàwr maalʋ ƴãw, yũon-been peli-pɔw yel-bier ír-bɛrʋ bàwr maalʋ ƴãw, nɩ pʋ́ra lãw-taa bàwr maalʋ ƴãw.

¹⁵ Ʋ mɩ̀ na wa n nɩ dipɛ̃ na bɛ ƴãw dãbɩl a nɩ pèlé, gato bɛ na naw a zɔ̃ nɩ kãá a, nɩ sɛ̃sɛ̃-ɓɛrɓɛr na bɛ ƴãw dãbɩl ɛ́ sɔ kãá a, de nɩ a zɔ̃ nɩ a divɛ̃ na mɩ́ pʋɔ a bàwr maalʋ pʋɔ a.

¹⁶ A bàwr-maalɛ na wa na wa de a kʋ̀ a Sore, al pùorí, ʋ maalɩ a yel-bier ír-bɛrʋ bàwr nɩ a nyɩw-a-za-bàwr.

¹⁷ Al pùorí, ʋ maal'ɩ a pʋ́ra a lãw-taa bàwr, lãwnɩ a pèlé nɩ a dipɛ̃ na bɛ ƴãw dãbɩl a, ɛ́ pãa de a zɔ̃ nɩ a divɛ̃ tɩr.

¹⁸ Lɛ n'a a naziir na põ a ʋ zu-tuo a tuor-taa pɛn-sɛw dɩ̃dɔr nʋɔr, de a zukɔbɛ lɔb ƴãw a lãw-taa bàwr vũu na dɩrɛ a pʋɔ.

¹⁹ A bàwr-maalɛ na de nɩ a pʋ́ra bawŋman na bɩ baar'a nɩ a pèlé pʋɔ gato been na bɛ ƴãw dãbɩl a, nɩ sɛ̃sɛ̃-ɓɛrɓɛr been na bɛ ƴãw dãbɩl a, ƴãw a naziir na põ a zu baar'a nuru pʋɔ.

²⁰ A bàwr-maalɛ na de a na kʋ̀ a Sore, mɛ̃ a lɛ bɛ na mɩ́ tu tɩr a bom a. A bàwr-maalɛ so a bome á ŋá ƴãw pʋɔ a nyãa nɩ a pɛrɩ́ gbɛ́r na ɩ a ʋ sób a ƴãw. Al pùorí a, a naziir na tʋ̃ɔ́ na lɛb nyúur a divɛ̃.»

²¹ «A tub'ɩ à á ŋá na càarɩ a naziir na kõ a nʋɔr a. A bome ʋ na na mɩ́ kʋ̀ a Sore a al ƴãw a mɩ̀ n'ɩ à á ŋá. Ʋlɛ wa tɛr fãw na tʋ̃ɔ́ tɩr bome dɔwlɩ a, ʋ na tʋ̃ɔ́ na tɩr. Ɛcɛ a fɛrɛ ʋ na k'ʋʋ tu a lɛ ʋ na kõ a nʋɔr a, a nɛ́ɛ ʋ na ƴãw a ʋ nʋɔr-kob pʋɔ a.»

A lɛ a bàwr-maalɛ na na mɩ́ ƴɛ̀r nɔ-vla kʋ̀ a nɩbɛ a

²² A Sore tɩ yel'ɩ a Moyiir à ŋá:

²³ «Ƴɛ̀r a Aarɔ̃ nɩ a ʋ bidɛbr zie yel bɛ à ŋá: nyɩ nyɛ̃ a lɛ nyɩ na na mɩ́ ƴɛ̀r a nɔ-vla kʋ̀ a Ɩsɩrayɛl nɩbɛ a. Nyɩ na mɩ́ yel bɛ nɩ à ŋá:

²⁴ “A Sore, ʋ maalɛ nyɩ ɛ́ gùre nyɩ!

²⁵ A Sore, ʋ wule nyɩ a ʋ niw-vla ɛ́ zɔrɛ a nyɩ nɩbaalʋ!

²⁶ A Sore, ʋ sàw jɩ́rɛ nyɩ nɩ nɔ̃wfʋ ɛ́ kʋ̀rɛ nyɩ a ƴã-ɓaarʋ!”

²⁷ A bàwr-maalbɛ mɩ́ wa bʋɔlɩ a ɩ̃ yúor à à ŋá kɛ́ bɛ ƴɛ̀r nɔ-vla kʋ̀ a Ɩsɩrayɛl nɩbɛ a, mãa mɩŋa na mɩ́ maalɩ bɛ na.»