Sɔr-nɛ́ɛ 35 - A SƐB-SÕW

A levitɩ mɩnɛ tẽ-bɛrɛ

¹ A Sore tɩ ƴɛ̀r'ɩ a Moyiir zie, a Mowab tɩ̃talɛ na pɩɛlɩ a Zurdɛ̃ a pʋɔ, ɛ́ tori a Zeriko a. Ʋ tɩ yel ʋ na:

² «Yel a Ɩsɩrayɛl nɩbɛ kɛ́ bɛ kaa ír tẽ-bɛrɛ a bɛ tẽsɔwr pʋɔ kʋ̀ a Levi bʋʋrɛ, bɛ tʋ̃ɔ́ kpɩɛr a be. A fɛr'a kɛ́ bɛ mɩ̀ kʋ̀ bɛ dʋn mʋ̃ɔ 'wɔbrʋ ziir jil koli a tẽ-bɛrɛ á ŋá.

³ A Levi bʋʋrɛ na kpɩɛr'ɩ a tẽ-bɛrɛ pʋɔ, ɛ́ so a tẽsɔwr na viiri koli a a, a bɛ dʋ̃-gbɛ́ɛ anaɩ ƴãw, nɩ a bɛ dʋ̃-yoru al za na cɛ a ƴãw.

^4-5 A dʋn mʋ̃ɔ 'wɔbrʋ ziir á ŋá na mɩ́ yi n a dacine na piw a tẽw a ƴãw, ɛ́ cen tɩ ta mɛtɩr kɔbr anũu (500), a saa-pɛrɩ́ lowr, a saa-pɛrɩ́-dʋrʋ-lowr lowr, a mʋ̃tɔ̃w-kpɛb-lowr lowr, nɩ a saa-pɛrɩ́-gʋba-lowr lowr. A na ɩ à ŋá a, nyɩ na ŋmãa na ír ɓãgala-sɛw-taa, a lõbowr na mɩ́ ɩ mɛtɩr túr (1 000) a, ɛ́ a tẽ-kpɛ̃ɛ be a sɔwlɩsɔw.

⁶ Bɛ na kʋ̀ n a levitɩ mɩnɛ a naayir zɔ-kpɛb zie tẽ-bɛrɛ ayʋɔb, a be nɩr na bɛ bãw kɛ́ kʋ nɩr a, na na mɩ́ tʋ̃ɔ́ zɔ tɩ kpɛ a. Bɛ mɩ̀ na kʋ̀ bɛ nɩ tẽ-bɛrɛ lɩz'a ayi nɩ ayi ƴãw pʋɔ.

⁷ A za na ɓã n taa ɩ tẽ-bɛrɛ lɩz'a ayi nɩ ani, de nɩ a dʋn mʋ̃ɔ 'wɔbrʋ ziir na viiri koli a.

⁸ Dɔwlʋ za na mɩ́ kʋ̀ bɛ nɩ tẽ-bɛrɛ man nɩ a ʋ tẽsɔw zɛ̃a: dɔwlʋ na ɩ kpɛ̃ɛ a na tɩr'ɩ yaga, ɛ́ dɔwlʋ na ɩ pʋrɩ a tɩr blã.»

A naayir zɔ-kpɛb zie tẽ-bɛrɛ yele

⁹ A Sore tɩ yel'ɩ a Moyiir à ŋá:

¹⁰ «Ƴɛ̀r a Ɩsɩrayɛl nɩbɛ zie yel bɛ à ŋá: Nyɩmɛ wa lo gãw a Zurdɛ̃ kpɛ a Kanãa tẽw pʋɔ baar'a,

¹¹ nyɩ na kaa na ír tẽ-bɛrɛ a mɩnɛ a ɩ naayir zɔ-kpɛb zie tẽ-bɛrɛ. Be n'a sob nɛ na bɛ bãw kɛ́ kʋ nɩr a na tʋ̃ɔ́ mɩ́ zɔ tɩ kpɛ naayir.

¹² À ŋá n'a a nɩr ʋl a na fɛr k'ʋʋ kʋ ʋ yáa a san a kʋ̃ páw ʋ ɛ. Bɛ kʋ̃ kʋ ʋ ɛ́ a lãw bɛ dɩ a ƴɛ̀rʋ sɛr ɛ.

¹³ A naayir zɔ-kpɛb zie tẽ-bɛrɛ na ɩ n ayʋɔb,

¹⁴ ata be a Zurdɛ̃ saa-pɛrɩ́, ɛ́ ata be a Kanãa tẽw.

¹⁵ Nɩr za, ʋ ɩ n Ɩsɩrayɛl nɩr bɩɩ sãan kpɩɛr a Ɩsɩrayɛl nɩbɛ pʋɔ, bɩɩ sãan na tɔlɛ a, ʋlɛ bɛ wa bãw kɛ́ kʋ nɩr a, ʋ na tʋ̃ɔ́ na zɔ tɩ kpɛ naayir a ten á ŋá kãw pʋɔ.

¹⁶ Nɩr wa ŋmɛ nɩr nɩ kure bom ʋ kpi a, nɩ-kʋrɛ n'ʋ: a fɛr'a kɛ́ bɛ kʋ ʋ.

¹⁷ Ʋlɛ wa lɔb'ɩ kʋsɩɛr na na tʋ̃ɔ́ kʋ ʋ, ʋʋ kpi a, nɩ-kʋrɛ n'ʋ: a fɛr'a kɛ́ bɛ kʋ ʋ.

¹⁸ Ʋlɛ wa ŋmɛ n ʋ dàa na na tʋ̃ɔ́ kʋ ʋ, ʋʋ kpi a, nɩ-kʋrɛ n'ʋ: a fɛr'a kɛ́ bɛ kʋ ʋ.

¹⁹ A nɩr ʋl a na fɛr k'ʋʋ yaa a sob nɛ bɛ na kʋ a san a, ʋlɛ n'ʋ na kʋ a nɩ-kʋrɛ, ʋlɛ wa dɛ nyɛrɛ ʋ a.

²⁰ Nɩr wa dáa ʋ tɔ sob ʋ na hɩ̃ɛn ʋ a zũú, bɩɩ ʋlɛ wa tɛr tɩɛr-faar lɔb'ɩ ʋ bʋ̃-kãw a yi kũu a,

²¹ bɩɩ ʋlɛ wa gùr nũu ŋmɛ n ʋ nɩ po-tuo, ʋ kpi a, nɩ-kʋrɛ n'ʋ: a fɛr'a kɛ́ bɛ kʋ ʋ. A nɩr ʋl a na fɛr k'ʋʋ yaa a sob nɛ bɛ na kʋ a san a na kʋ ʋ na, ʋlɛ dɛ wa nyɛrɛ ʋ a.

²² Ɛcɛ nɩr na tʋ̃ɔ́ na dáa nɩr lɔb ʋ kpi, ɛ́ a bɛ ɩ ʋ tɩɛr'a tɔ kɛ́ ɩ ɛ, bɩɩ a bɛ ɩ dɔ̀nʋ zũú n'a ɩ, bɩɩ a na tʋ̃ɔ́ na ɩ lɔbrʋ n'a ʋ lɔb'ɩ ʋ bom ʋ kpi, ɛ́ a bɛ ɩ tɩɛr-faar'a ʋ tɛr lɔb'ɩ ʋ ɛ.

²³ A mɩ̀ na tʋ̃ɔ́ na ɩ kʋsɩɛr na na tʋ̃ɔ́ kʋ nɩr a n'ʋ, ʋ ɩ k'ʋ lo nɩr ʋ na bɛ nyɛ̃ a zu, ɛcɛ ʋ bɛ ɩ a sob nɛ dɔ̃ sob ɛ, ʋ bɛ bɔbr ʋ faa ɩ.

²⁴ A lãw na tu n a nɛ́ɛ na ƴãw càar'ɩ a yele á ŋá taabɛ a, dɩ a ƴɛ̀rʋ a nɩr na bɛ bãw kɛ́ kʋ nɩr a nɩ a nɩ-kũu san-yarɛ cara pʋɔ.

²⁵ A lãw na piw nɩ a nɩ-kʋrɛ na bɛ bãw kɛ́ kʋ a tɛr a san-yarɛ ƴãw, ɛ́ tɛr ʋ lɛb wa n a tẽ-kpɛ̃ɛ ʋl pʋɔ ʋ na zɔ tɩ kpɛ a naayir a. A sob na bɛ bãw kɛ́ kʋ a nɩr a na be n a naayir zɔ-kpɛb zie tẽ-kpɛ̃ɛ pʋɔ, ɛ́ gù a bàwr-maal-kara bɛ na cir a kãá ƴãw a zũú, ʋ ɩ Naaŋmɩn nɩ-sora a, tɩ kpi.

²⁶ Ɛcɛ ʋlɛ wa yi zaa a naayir zɔ-kpɛb zie tẽ-kpɛ̃ɛ tʋr-bɔwrɩ pʋɔ,

²⁷ ɛ́ a nɩ-kũu san-yarɛ wa nyɛ̃ ʋ a, ʋ na tʋ̃ɔ́ na kʋ ʋ, ɛ́ bɛ tɛr sãwna ɩ.

²⁸ Bʋ̃ʋ n'ʋ vɛ̃, a nɩr na bɛ bãw kɛ́ kʋ nɩr a, a fɛr'a k'ʋʋ be a naayir zɔ-kpɛb zie tẽ-kpɛ̃ɛ pʋɔ, ɛ́ gù a bàwr-maal-kara kũu daar. A bàwr-maal-kara wa kpi baar'a n'a ʋ na tʋ̃ɔ́ lɛb cen a ʋ tẽw pʋɔ.

²⁹ Nyɩ na tɛr'ɩ a ƴɛ̀rʋ-dɩb tub ŋa kʋralɛ, zie nɛ za nyɩ na kpɩɛr a.

³⁰ Nɩr kʋb yel za pʋɔ a, nɩ-yaga dãsɩɛ dɩb tɛwr zũú n'a bɛ na ƴãw a nɩ-kʋrɛ a kũu dɔwrʋ. Bɛ bɛ ƴãwnɛ nɩr kũu dɔwrʋ nɩ-been yõ dãsɩɛ dɩb zũú ɛ.

³¹ Nyɩ bɛ sàwr dier libir nɩ-kʋrɛ na sɛw k'ʋʋ kpi a nyɔ-vʋʋrʋ ƴãw ɛ: a fɛr'a k'ʋʋ kpi.

³² Nyɩ mɩ̀ bɛ sàwr dier libir ɛ́ bɛrɛ nɩr ʋ zɔrɛ cere naayir zɔ-kpɛb zie tẽ-kpɛ̃ɛ pʋɔ, ɛ́ a pùorí ʋ lɛb cen a ʋ tẽw pʋɔ, ɛ́ a bàwr-maal-kara bɛ kpi sɛr ɛ.

³³ Nyɩ bɛ dɛwr a tẽw nyɩ na na kpɩɛr a bɛrɛ ɩ. Ɛcɛ nɩr kʋb dɛwr'ɩ a tẽw. Ɛ́ a nɩ-kʋrɛ kũu yõ n'a pɛ́wr a zɩ̃ɩ na dɛw a tẽw a.

³⁴ A na ɩ à ŋá a, nyɩ na gù n vla taa dɛwr a tẽw nyɩ na na kpɩɛr a bɛrɛ ɩ, a be mãa mɩŋa na na kpɩɛr a nyɩ sɔgɔ a. Yel-mɩŋa n'a, a mãa Sore, ɩ̃ kpɩɛr'ɩ a Ɩsɩrayɛl nɩbɛ sɔgɔ.»