Sɔr-nɛ́ɛ 33 - A SƐB-SÕW

A tɛw-zɩma ziir a Eziptɩ yib daar tɩ ta a Mowab tẽw

¹ Nyɛ̃ a cenu a Ɩsɩrayɛl nɩbɛ na tɩ cere kɛ́ tɛwr zɩnɛ, a lɛn daar a Moyiir nɩ a Aarɔ̃ na tɩ tɛr bɛ bɛ cɔrɩ yi a Eziptɩ a.

² A Moyiir tɩ sɛb'ɩ a ziir al a Sore na mɩ́ tɩ ƴãw bɛ tɛw, ɛ́ yi a be lɛb lo a sɔ́r a. Alɛ n'ɩ á ŋá:

³ A yũon cuw-dãw-niwn sob bibie pie nɩ a nũu sob, a Tɔl-gãw dãw-niwn sob bio daarɩ́ n'a a Ɩsɩrayɛl nɩbɛ tɩ yi a Aramɩsɛsɩ. A Eziptɩ tẽw dem niŋé n'a bɛ tɩ yi so bɛ tʋɔra cere,

⁴ ɛ́ a Eziptɩ tẽw dem ũùne a bɛ bidɛb-dãw-dɔwrɩ a Sore na tɩ ɩ bɛ kpi k'ʋʋ dɔwrɩ a Eziptɩ ŋmɩmɛ a.

⁵ A Ɩsɩrayɛl nɩbɛ tɩ yi n a Aramɩsɛsɩ, ɛ́ cen tɩ maalɩ a bɛ laɩ Sukotɩ.

⁶ Bɛ tɩ yi n a Sukotɩ cen Etam na be a wɛja-kpalɛ nʋɔr a.

⁷ Bɛ tɩ yi n a Etam lɛb wa sãá Pi-Hahirɔtɩ na tori Baal-Sefon a, wa maalɩ a bɛ laɩ tori Migɩdɔl.

⁸ Bɛ tɩ yi n a Pi-Hahirɔtɩ gãw a Bàa-kɛkɛɛ kʋ̃ɔ-kpɛ̃ɛ, cen a wɛja-kpalɛ pʋɔ. Bɛ tɩ cen nɩ a Etam wɛja-kpalɛ pʋɔ bibie ata, ɛ́ ta Maara maalɩ a bɛ laɩ a be.

⁹ Bɛ tɩ yi n a Maara ta Elim. Bul-nɛ́ɛ pie nɩ ayi nɩ kpãkparmɛ tɩɩr lɩz'a ata nɩ pie tɩ be n a be. Bɛ tɩ maal'ɩ a bɛ laɩ a be.

¹⁰ Bɛ tɩ yi n a Elim cen tɩ maalɩ a bɛ laɩ pɩɛlɩ a Bàa-kɛkɛɛ kʋ̃ɔ-kpɛ̃ɛ.

¹¹ Bɛ tɩ yi n a Bàa-kɛkɛɛ kʋ̃ɔ-kpɛ̃ɛ cen Sin wɛja-kpalɛ pʋɔ.

¹² Bɛ tɩ yi n a Sin wɛja-kpalɛ pʋɔ cen Dofika,

¹³ yi a Dofika cen Alusi,

¹⁴ ɛ́ yi a Alusi cen Erefidim, be n'a a nɩbɛ bɛ tɩ nyɛ̃ kʋ̃ɔ na nyũ ɛ.

¹⁵ Bɛ tɩ yi n a Erefidim cen a Sinayi wɛja-kpalɛ pʋɔ,

¹⁶ yi a wɛja-kpalɛ pʋɔ cen Kɩvʋrɔtɩ-Hataava,

¹⁷ yi a Kɩvʋrɔtɩ-Hataava cen Aserɔtɩ,

¹⁸ yi a Aserɔtɩ cen Iritima,

¹⁹ yi a Iritima cen Irimon-Perɛsɩ,

²⁰ yi a Irimon-Perɛsɩ cen Livina,

²¹ yi a Livina cen Irisa,

²² yi a Irisa cen Kehelata,

²³ yi a Kehelata cen Sefɛɛr tãgɛ̃́,

²⁴ yi a Sefɛɛr tãgɛ̃́ cen Harada,

²⁵ yi a Harada cen Makelɔtɩ,

²⁶ yi a Makelɔtɩ cen Tahatɩ,

²⁷ yi a Tahatɩ cen Tera,

²⁸ yi a Tera cen Mitika,

²⁹ yi a Mitika cen Hasemona,

³⁰ yi a Hasemona cen Moserɔtɩ,

³¹ yi a Moserɔtɩ cen Bene-Yakan,

³² yi a Bene-Yakan cen Hoor-Gidigadɩ,

³³ yi a Hoor-Gidigadɩ cen Yɔtɩvata,

³⁴ yi a Yɔtɩvata cen Avurona,

³⁵ yi a Avurona cen Esion-Gevɛɛr,

³⁶ yi a Esion-Gevɛɛr cen Kadɛsɩ, a Sin wɛja-kpalɛ pʋɔ,

³⁷ ɛ́ yi a Kadɛsɩ cen Hoor tãgɛ̃́ na pɩɛlɩ a Edɔm tʋr-bɔw a.

^38-39 A bàwr-maalɛ Aarɔ̃ tɩ do n a Hoor tãw zu a Sore ƴɛ̀rʋ zũú. Be n'a ʋ tɩ kpi, a ʋ yome lɩz'a ayʋɔb'ɩ ata (123) pʋɔ, a cuwr anũu sob bibi-dãw-niwn sob, a Ɩsɩrayɛl nɩbɛ na tɩ yi a Eziptɩ maalɩ yome lɩz'a ayi a.

⁴⁰ A Aradɩ tẽw nãà na tɩ ɩ Kanãa tẽw nɩr kãw na tɩ kpɩɛr a Negɛɛvʋ vuo pʋɔ a, tɩ wõ n a Ɩsɩrayɛl nɩbɛ tab.

⁴¹ A Ɩsɩrayɛl nɩbɛ tɩ yi n a Hoor tãgɛ̃́ cen Salimona,

⁴² yi a Salimona cen Punon,

⁴³ yi a Punon cen Ovɔtɩ,

⁴⁴ yi a Ovɔtɩ cen Iyim-Avarim, a Mowab tʋr-bɔw ƴãw.

⁴⁵ Bɛ tɩ yi n Iyim cen Divon-Gadɩ,

⁴⁶ yi a Divon-Gadɩ cen Alimon-Divlatayim,

⁴⁷ yi a Alimon-Divlatayim cen a Avarim tan pʋɔ, na tori a Nebo tãw a,

⁴⁸ ɛ́ yi a Avarim tan pʋɔ cen a Mowab tɩ̃talɛ pʋɔ, na pɩɛlɩ a Zurdɛ̃, ɛ́ tori a Zeriko a.

⁴⁹ Bɛ tɩ maal'ɩ a bɛ laɩ a Mowab tɩ̃talɛ pʋɔ pɩɛlɩ a Zurdɛ̃, Bɛtɩ-Yesimɔtɩ nɩ Avɛl-Sitim cara pʋɔ.

A Sore wule nɩ a lɛ bɛ na na põ a Kanãa tẽw a

⁵⁰ A Sore tɩ yel'ɩ a Moyiir, a Mowab tɩ̃talɛ pʋɔ na pɩɛlɩ a Zurdɛ̃, ɛ́ tori a Zeriko a:

⁵¹ Ƴɛ̀r a Ɩsɩrayɛl nɩbɛ zie yel bɛ à ŋá: «Nyɩmɛ wa gãw a Zurdɛ̃ kpɛ a Kanãa tẽw pʋɔ a,

⁵² nyɩ na diw nɩ a tẽw dem za a nyɩ niŋé, nyɩ na ɩ n a bɛ ŋmɩmɛ dasuli za bɛ na maal'ɩ kʋsɛbɛ bɩɩ kure a, a bɔr, ɛ́ nyɩ sãw a bɛ maalʋ-ziir za bɛr.

⁵³ Nyɩ na de nɩ a bɛ tẽw so ʋ kpɩɛr a be. Ɩ̃ de ʋ na kʋ̀ nyɩ nyɩ so ʋ.

⁵⁴ Nyɩ na ŋmɛ n gbãw põ ʋ a nyɩ dɔwlʋ nɩ a nyɩ yie. Dɔwlʋ na ɩ kpɛ̃ɛ a, nyɩ na mɩ́ kʋ̀ ʋ nɩ zie na ɩ kpɛ̃ɛ a, ɛ́ dɔwlʋ na ɩ pʋrɩ a, nyɩ kʋ̀ ʋ zie na ɩ pʋrɩ a. Yir za na mɩ́ sàw na de a zie bɛ na ŋmɛ a gbãw ír kʋ̀ ʋ a.

⁵⁵ Ɛcɛ nyɩmɛ bɛ wa diw a tẽw dem a nyɩ niŋé a, a bɛl nyɩ nãà wa cãà bɛr a na ɩrɛ na a kpɩɛr nyɩ mɛ̃ gʋʋr na cɔ̀rɛ nyɩ a mimie a, bɩɩ gʋʋr na cɔ̀rɛ nyɩ a lõboge a. Bɛ na fɛrɛ nyɩ nɩ a tẽw nyɩ na na kpɩɛr a pʋɔ.

⁵⁶ Ɛ́ a nyɩmɛ nɛbɛ ɩ̃ na ɩ mɛ̃ a lɛ ɩ̃ na tɩ tɩ́ɛrɛ k'ɩ̃ɩ ɩ bɛ a.»