Sɔr-nɛ́ɛ 30 - A SƐB-SÕW

¹ A Moyiir tɩ yel'ɩ a lɛ za a Sore na ƴãw a nʋɔr kʋ̀ ʋ a, kʋ̀ a Ɩsɩrayɛl nɩbɛ.

A nʋɔr na ƴãw càarɩ a nɛ́ɛ bɛ na mɩ́ kõ a

² Al pùorí, a Moyiir tɩ ƴɛ̀r'ɩ a Ɩsɩrayɛl nɩbɛ dɔwlʋ nɩ-bɛrɛ zie yel à ŋá: Yele a mɩnɛ n'ɩ á ŋá a Sore na yel a:

³ «Nɩr wa kõ nʋɔr k'ʋʋ na kʋ̀ n bom a Sore a, bɩɩ ʋlɛ wa pɔ yel k'ʋʋ na bɛr'ɩ bom ɩb a, ʋ kʋ̃ tʋ̃ɔ́ bɛ tu a lɛ ʋ na yel a ɩ. A fɛr'a k'ʋʋ tu a lɛ tɔr za ʋ na yel a.

⁴ Ɛcɛ, a ɩ mɛ̃ pɔwsɩrale cãà na be a ʋ sãà yir ɛ́ kõ nʋɔr a Sore zie, bɩɩ pɔ yel k'ʋʋ na ɩ n bom.

⁵ A sãà wa wõ a ɛ́ bɛ yel yel kʋ̀ ʋ a, a fɛr'a k'aa pɔwsɩrale tu a lɛ ʋ na yel a.

⁶ Ɛcɛ a sãà wa wõ a a ʋlɩ bibir nɛ, ɛ́ bɛ sàw kʋ̀ ʋ a, a bɛ fɛrɛ a pɔwsɩrale k'ʋʋ tu a ʋ nɛ́ɛ ɩ. A Sore na dɩ n suur kʋ̀ ʋ, a ʋ sãà na bɛ sàw ʋ na tu a ʋ nɛ́ɛ a ƴãw.

⁷ Ƴɛrɛŋa a, a ɩ mɛ̃ pɔwsɩrale bɛ tɩɛrɩ tɔ ɩ, ɛ́ kõ nʋɔr bɩɩ pɔ yel k'ʋʋ na ɩ n bom. Al pùorí, ʋ kul sɩr.

⁸ A sɩr wa wõ a a ʋlɩ bibir nɛ ɛ́ bɛ yel yel kʋ̀ ʋ a, a fɛrɛ ʋ na k'ʋʋ tu a ʋ nɛ́ɛ.

⁹ Ɛcɛ a sɩr bɛ wa sàw kʋ̀ ʋ a ʋlɩ bibir nɛ ʋ na wõ a a, ʋ ɩ na a nʋɔr a pɔw na ƴãw a bɛ cãà pʋɔ ɩ. A Sore na dɩ n suur kʋ̀ a pɔw a nʋɔr ŋa bɛ-tub ƴãw.

¹⁰ Pɔw-kʋɔr bɩɩ pɔw a sɩr na zawrɩ bɛr a wa kõ nʋɔr a, a fɛrɛ ʋ na k'ʋʋ tu a lɛ ʋ na yel a.

¹¹ Ɛcɛ a ɩ mɛ̃ pɔw na kul sɩr a kõ n nʋɔr, bɩɩ pɔ na yel k'ʋʋ na ɩ n bom.

¹² A ʋ sɩr wa wõ a ɛ́ bɛ yel bom kʋ̀ ʋ a, a fɛrɛ ʋ na k'ʋʋ tu a lɛ ʋ na yel a.

¹³ Ɛcɛ a sɩr wa wõ a a ʋlɩ bibir nɛ ɛ́ yel k'aa bɛ pʋɔ a, a nɛ́ɛ á ŋá tub bɛ fɛrɛ a pɔw ɛ. A Sore na dɩ n suur kʋ̀ ʋ, a ʋ sɩr na yel k'aa nɛ́ɛ bɛ pʋɔ a ƴãw.

¹⁴ A na ɩ à ŋá a, pɔw wa kõ nʋɔr bɩɩ pɔ yel k'ʋʋ na bɛr'ɩ bom ɩb a, a sɩr na tʋ̃ɔ́ na yel k'aa pʋɔ na, bɩɩ k'aa bɛ pʋɔ ɩ.

¹⁵ A sɩr wa wõ a ɛ́ bɛ yel bom kʋ̀ ʋ tɩ dãw bio a, ʋ sàw nɩ a nɛ́ɛ al za a ʋ pɔw na ƴãw a, a gbili ʋ na ɩ a ƴãw.

¹⁶ Ɛcɛ a pùorí, ʋlɛ wa yel k'aa bɛ pʋɔ a, ʋl mɩŋa n'ʋ tɛr sãwna, a nɛ́ɛ a ʋ pɔw na bɛ tu a ƴãw.»

¹⁷ A nɛ́ɛ n'ɩ à á ŋá a Sore na kʋ̀ a Moyiir càar'ɩ a nɛ́ɛ pɔw na kul sɩr a na kõ a, bɩɩ pɔwsɩrale na cãà a ʋ sãà yir a na kõ a.