Sɔr-nɛ́ɛ 27 - A SƐB-SÕW

A pɔwbɛ tɛr'ɩ sɔ́r na mɩ́ dɩ a gbãw

¹ Mala, Nowa, Hogɩla, Mɩlka nɩ Tɩrsa tɩ ɩ n Selofeadɩ pɔwyaar, ɛ́ a Selofeadɩ ɩ Manase yir kãw nɩr. A Manase, Makɩɩr, Galaadɩ nɩ Hefɛɛr zũú n'a ʋ tɩ ɩ Zuzɛb bʋʋrɛ.

² A pɔwbɛ bɛ ŋa tɩ wa n a Moyiir, a bàwr-maalɛ Eleazaar, a nɩ-bɛrɛ nɩ a lãw za niŋé, a tuor-taa pɛn-sɛw dɩ̃dɔr nʋɔr wa yel à ŋá:

³ «A tɩ sãà kpi n a wɛja-kpalɛ pʋɔ. Ɛcɛ ʋ bɛ tɩ pʋɔ a nɩbɛ bɛl pʋɔ na tɩ wõ taa ɛ́ pʋɔ a Koore ƴãw zɛbr'ɩ a Sore a ɩ. A ʋl mɩŋa sãwna ƴãw n'a ʋ tɩ kpi. Ɛcɛ ʋ bɛ tɩ tɛr bidɛbr ɛ.

⁴ A tɩ sãà yúor na bɔr'ɩ a ʋ yir pʋɔ, ʋ na bɛ dɔw bidɛb a ƴãw bɩɩ? A lɛ pʋɔ a, nyɩ kʋ̀ tɩ zie mɛ̃ a tɩ sãà yɛbr a!»

⁵ A Moyiir tɩ de nɩ a bɛ zɛlʋ tɩ páw nɩ a Sore,

⁶ ʋ yel ʋ à ŋá:

⁷ «A Selofeadɩ pɔwyaar tɛr'ɩ yel-mɩŋa! Kʋ̀ bɛ zie, mɛ̃ a bɛ sãà yɛbr a, ʋ ɩ a bɛ gbã-dɩ-bom. Kʋ̀ bɛ a bɛ sãà gbã-dɩ-bom.

⁸ Al pùorí, nyɛ̃ a lɛ fʋ na na tɩ yel kʋ̀ a Ɩsɩrayɛl nɩbɛ a: “Nɩr bɛ wa tɛr bidɛb ɛ́ kpi a, nyɩ na de nɩ a ʋ gbã-dɩ-bome kʋ̀ a ʋ pɔwyaa.

⁹ Ʋlɛ bɛ wa tɛr pɔwyaa a, nyɩ na kʋ̀ n a ʋ gbã-dɩ-bome a ʋ yɛbr.

¹⁰ Ʋlɛ bɛ wa tɛr yɛbr a, nyɩ na kʋ̀ n a ʋ gbã-dɩ-bome a ʋ sãà yɛbr.

¹¹ A ʋ sãà bɛ wa tɛr yɛbr a, a nɩr ʋl na pɩɛlɩ a ʋ sãà a yir pʋɔ a n'ʋ bɛ na kʋ̀ a gbã-dɩ-bome. A sob ʋl'ʋ na so a.” A Ɩsɩrayɛl nɩbɛ zie a, ʋ na ɩ n tub na tɛr sɔ́r mɛ̃ a lɛ ɩ̃ na yel kʋ̀ a Moyiir a.»

Zozue n'ʋ na lɩɛrɩ a Moyiir

¹² A Sore tɩ yel'ɩ a Moyiir à ŋá: «Do a Avarim tã-kɔlkɔl zu ɛ́ jɩ́r a tẽw ɩ̃ na kʋ̀rɛ a Ɩsɩrayɛl nɩbɛ a.

¹³ Fʋ na nyɛ̃ ʋ na, ɛ́ a pùorí fʋ kpi mɛ̃ a fʋ yɛb Aarɔ̃ a.

¹⁴ Bʋ̃ʋ n'ʋ vɛ̃, nyɩ zawr'ɩ a ɩ̃ nʋɔr a Sin wɛja-kpalɛ pʋɔ, a lɛn daar a lãw na tɩ bɔbr mɛ̃ nɔhaarʋ a. Nyɩ bɛ tɩ bɛr a ɩ̃ sonu ʋ sãá a Ɩsɩrayɛl nɩbɛ zie, a lɛn daar bɛ na tɩ yel kɛ́ nyɩ kʋ̀ bɛ kʋ̃ɔ a ɩ.» A Meriba kʋ̃ɔ yele n'a a Sore tɩ yere, a Nɔhaarʋ kʋ̃ɔ, a Kadɛsɩ, a Sin wɛja-kpalɛ pʋɔ.

¹⁵ A Moyiir tɩ yel'ɩ a Sore à ŋá:

¹⁶ «Sore Naaŋmɩn i, fʋ̃ʋ na kʋ̀ a nyɔ-vʋʋrʋ a bʋ̃-íri za a, ƴãw nɩr ʋ de a lãw nɩbɛ niwn,

¹⁷ nɩ-kpɛ̃ɛ na na tʋ̃ɔ́ kaarɛ a bɛ zie a yele za pʋɔ a, a fʋ lãw nɩbɛ ta ɩ mɛ̃ píir na bɛ tɛr cɩ̃ɩnɛ a ɩ.»

¹⁸ A Sore tɩ sɔw nɩ a Moyiir à ŋá: «De Nun bidɛb, Zozue, a ɩ̃ vʋʋrʋ be n a ʋ zie. Ír a fʋ nũu dɔwlɩ a ʋ zu.

¹⁹ Fʋ na tɛr ʋ na cen nɩ a bàwr-maalɛ Eleazaar nɩ a lãw nɩbɛ za niŋé tɩ de a fʋ tõ-nʋɔr kʋ̀ ʋ, a bɛ mimirí.

²⁰ Fʋ na kʋ̀ ʋ nɩ a fʋ nɩ-kpɛ̃ɛnʋ ŋmãa, a Ɩsɩrayɛl nɩbɛ za tʋ̃ɔ́ sàwr a ʋ nʋɔr.

²¹ Ɛcɛ a ʋl mɩŋa na mɩ́ páw nɩ a bàwr-maalɛ Eleazaar: a bàwr-maalɛ n'ʋ na mɩ́ sowri mɛ̃ nɩ a kpan-bie kʋ̀ ʋ. A Zozue nɩ a lãw za na sàwr'ɩ a ʋ nɛ́ɛ a yele za pʋɔ.»

²² A Moyiir tɩ ɩ na mɛ̃ a lɛ a Sore na yel kʋ̀ ʋ a: ʋ tɩ ƴãw na a Zozue wa, ʋ wa ƴãw ʋ àr a bàwr-maalɛ Eleazaar nɩ a lãw za niŋé,

²³ ɛ́ ʋ ír a ʋ nuru dɔwlɩ a ʋ zu, de a ʋ tõ-nʋɔr kʋ̀ ʋ, mɛ̃ a lɛ a Sore na tɩ yel kʋ̀ ʋ a.