Sɔr-nɛ́ɛ 22 - A SƐB-SÕW

A ƖSƖRAYƐL NA BE A MOWAB TẼW TƖ̃TALƐ PƲƆ A 22—36 A Mowab tẽw nãà Balakɩ na zɛlɛ Balaam sõwfʋ a

¹ A Ɩsɩrayɛl nɩbɛ tɩ lɛb'a lo a sɔ́r. Bɛ tɩ maal'ɩ a bɛ laɩ a Mowab tɩ̃talɛ pʋɔ, a Zurdɛ̃ man gãwn, tori a Zeriko.

^2-4 Sipoor bidɛb, Balakɩ, na tɩ ɩ a Mowab nãà a lɛn daar a tɩ wõ n a lɛ a Ɩsɩrayɛl nɩbɛ na ɩ a Amoritɩ mɩnɛ a. A nãà nɩ a ʋ nɩbɛ za na tɩ nyɛ̃ a Ɩsɩrayɛl nɩbɛ bɛ waar sɛw a lɛ za a, pʋ̀lá tɩ vʋ̃ɔ bɛ na bɛ màwr bɛ za. Lɛ n'a a Mowab tẽw dem tɩ yel a Madian tẽw dem nɩ-kore: «A nɩ-yaga bilili bɛ ŋa kʋ̃ yaa kɛ́ sãw bom za na jil koli tɩ a bɛr, mɛ̃ náab na 'wɔb mʋ̃ɔ wɩ̀ɛ pʋɔ a ɩ.»

⁵ A nãà tɩ tõ n nɩbɛ Bewɔɔr bidɛb Balaam zie. A Balaam tɩ kpɩɛr'ɩ Petoor, a Efaratɩ man nʋɔr, a Amavʋ bʋʋrɛ tẽw. Ƴɛ̀rʋ ŋa n'ʋ ʋ tɩ tɩr kʋ̀ ʋ: «Nɩ-bʋʋrɛ kãw be n a ka yi Eziptɩ wa wa paalɩ a tẽw za. Bɛ zɩ̃ na pɩɛlɩ mɛ̃.

⁶ Ɩ̃ zɛlɛ fʋ na, wa wa ŋmɛ ƴãw bɛ, bɛ na tɛr fãw zuo a ɩ̃ nɩ-bʋʋrɛ a ƴãw. Fʋ̃ʋ wa sàw a, a mɩnɛ kãw, ɩ̃ na tʋ̃ɔ́ bɛ na, ɛ́ diw bɛ bɛr a tẽw pʋɔ. Bʋ̃ʋ n'ʋ vɛ̃, ɩ̃ bãwnɩ a na, fʋ̃ʋ wa ƴɛ̀r nɔ-vla kʋ̀ nɩr a, a mɩ́ tu ʋ na, fʋ̃ʋ mɩ̀ lɛb wa ŋmɛ ƴãw nɩr a, a mɩ́ tu ʋ na.»

⁷ A Mowab nɩ a Madian nɩ-kore bɛ na tõ a tɩ tɛr'ɩ bome cen nɩ kɛ́ bɛ tɩ kʋ̀ a bàwr-bʋwrɛ. Bɛ na tɩ ta a Balaam zie a, bɛ yel'ɩ a lɛ a Balakɩ na yel a kʋ̀ ʋ.

⁸ A Balaam tɩ yel bɛ na: «Nyɩ gã a ka ìr. A bio a, ɩ̃ na yel'ɩ a lɛ a Sore nãà wa yel kʋ̀ m a, kʋ̀ nyɩ.» A lɛ n'a a Mowab nɩ-bɛrɛ tɩ gã a Balaam zie.

⁹ A Naaŋmɩn tɩ wa n a Balaam zie wa sowr'ʋ: «Nɩ-tẽbowle n'ɩ a nɩbɛ bɛ ŋa na be a fʋ zie a?»

¹⁰ A Balaam sɔw: «Sipoor bidɛb Balakɩ na ɩ a Mowab tẽw nãà a n'ʋ tõ a nɩbɛ bɛ ŋa kɛ́ bɛ wa yel mɛ̃:

¹¹ “A nɩ-bʋʋrɛ bɛl na yi a Eziptɩ a pàw nɩ a tẽw za. A na ɩ lɛ a, wa wa ŋmɛ ƴãw bɛ kʋ̀ m. Fʋ̃ʋ wa sàw a, a mɩnɛ kãw ɩ̃ na tʋ̃ɔ́ bɛ na, ɛ́ diw bɛ.”»

¹² A Naaŋmɩn tɩ yel'ɩ a Balaam: «Fʋ bɛ páwr bɛ cere ɩ, fʋ bɛ ŋmɩɛr ƴãwn a nɩ-bʋʋrɛ bɛ ŋa ɩ, ɩ̃ na maalɩ bɛ a ƴãw.»

¹³ A Balaam na wa ìr a biɓaara a, ʋ yel'ɩ a nɩ-bɛrɛ a Balakɩ na tõ a: «Nyɩ lɛb kul a nyɩ tẽw. A Sore bɛ sàwr k'ɩ̃ɩ páw nyɩ cen ɛ.»

¹⁴ A Mowab nɩ-bɛrɛ tɩ lɛb'a wa yel a Balakɩ: «A Balaam bɛ sàw páw tɩ wa ɩ.»

¹⁵ A Balakɩ tɩ lɛb'a tõ nɩ-bɛrɛ bɛ mɩnɛ bɛ yãwmɛ zuo a dãw-niwn dem, ɛ́ ɩ nɩ-tɩbrɛ zuo bɛ.

¹⁶ Bɛ tɩ cen na tɩ yel a Balakɩ zɛlʋ ŋa kʋ̀ a Balaam: «A mãa Balakɩ na ɩ Sipoor bidɛb a, ɩ̃ zɛlɛ fʋ nɩ yãayãa, ta zawrɩ a ɩ̃ zie waa ɩ.

¹⁷ Ɩ̃ na ƴãw fʋ nɩ yaga za, ɩ̃ na ɩ n a alɩ bome nɛ za fʋ na na yel k'ɩ̃ɩ ɩ a. A na ɩ lɛ a, wa wa ŋmɛ ƴãw a nɩ-bʋʋrɛ bɛ ŋa.»

¹⁸ Ɛcɛ a Balaam tɩ sɔw nɩ a nɩbɛ a Balakɩ na tõ a: «A Balakɩ saa na kʋ̀ m a salm-pla nɩ a salm-zɩɛ za na paalɩ a ʋ yir a, ɛcɛ ɩ̃ kʋ̃ tʋ̃ɔ́ ɩ bom, bʋ̃-pʋrɩ bɩɩ bʋ̃-kpɛ̃ɛ na bɛ tu a a lɛ a Sore ɩ̃ Naaŋmɩn na yel a ɩ.

¹⁹ Ɛcɛ a nyɩɩm mɩ̀ a, nyɩ mɩ̀ gã a ka ìr, ɩ̃ɩ na bãw nɩ a ʋlɩ bom nɛ a Sore na bɔbr k'ʋʋ lɛb yel kʋ̀ m a.»

²⁰ A Naaŋmɩn tɩ wa n a tɩ̃ɩsɔw wa yel a Balaam: «A fʋ bʋɔlʋ ƴãw wa n'a a nɩbɛ bɛ ŋa wa a, fʋ̃ʋ ìr páw bɛ cen. Ɛcɛ fʋ na tɩ ɩ n a lɛ tɛwr ɩ̃ na na yel kʋ̀ b a.»

²¹ A Balaam tɩ ìr'ɩ a bio daarɩ́ biɓaara, ƴãw a ʋ bõw-nyãw a kɔw, ɛ́ páw a Mowab nɩ-bɛrɛ cen.

A Balaam bõw-nyãw yele

²² A Naaŋmɩn na tɩ nyɛ̃ a Balaam ʋ cere a, ʋ nyɛ̃ nɩ suur. A Balaam na tɩ zɔm a ʋ bõw-nyãw cere nɩ, ɛ́ tõ-tõ-biir ayi bɩɛlɛ ʋ a, a Sore malkɩ tɩ cen na tɩ àr a sɔ́r zu, k'ʋʋ piw ʋ a tɔlʋ zie.

²³ A bõw-nyãw tɩ nyɛ̃ nɩ a malkɩ na àr a sɔ́r sɔwlɩsɔw ɛ́ vʋ̃ɔ a ʋ zɛbr-sɔ-kpɛ̃ɛ ƴãw a ʋ nũú a. Ʋ tɩ bɩɛ na kpɛ cere a póru pʋɔ. A Balaam tɩ ŋmɛ ʋ na lɛb wa ƴãw a sɔ́r zu.

²⁴ A malkɩ tɩ tɔl'ɩ nidaa tɩ àr sɔr-fɩɩra kãw zu na tɔlɛ divɛ̃ tɩɩr póru pʋɔ, dacine ayi cara pʋɔ a.

²⁵ A bõw-nyãw tɩ nyɛ̃ ʋ na, cen lanɩ a dacin, a Balaam gbɛ́r tɩɩrɩ a dacin, ʋ lɛb maal ŋmɛ ʋ.

²⁶ A malkɩ tɩ lɛb'a maal tɔl a bɛ nidaa tɩ àr zi-fɩɩra kãw a na bɛ tɛr dʋrʋ lowr bɩɩ gʋba lowr bɩɛfʋ a.

²⁷ A bõw-nyãw na wa nyɛ̃ ʋ a, ʋ siw na gã a Balaam pile, a Balaam nyɛ̃ suur mab, ɛ́ pɔb ʋ nɩ dabɔl.

²⁸ Lɛ n'a a Sore tɩ ɩ a bõw-nyãw ƴɛ̀rɛ, yel a Balaam: «Bʋ̃ʋ n'ʋ ɩ̃ ɩ b, fʋ ŋmɛ m a gb'a ata?»

²⁹ A Balaam sɔw ʋ: «Fʋ ɩ m a la! Mãa tɩ tɛr zɛbr-sɔ-kpɛ̃ɛ a ka a, ɩ̃ nãà kʋ b'ɩ a pɛr ŋa pʋɔ!»

³⁰ A bõw-nyãw yel ʋ: «Mãa bɛ n'ɩ a fʋ bõw-nyãw fʋ na zɔmnɛ a koro za a ɩ? À à ŋá n'a ɩ̃ tɩ ɩrɛ a fʋ zie e?» A Balaam sɔw: «Ʋ̃ʋ'hʋ̃!»

³¹ Lɛ n'a a Sore tɩ yuo a Balaam mimie, ʋ nyɛ̃ a Sore malkɩ na àr a sɔ́r zu, tɛr a zɛbr-sɔ-kpɛ̃ɛ a nũú a. Ʋ tɩ lo na vɔblɩ muru daadaalɛ.

³² A malkɩ tɩ sowr'ʋ na: «Bʋ̃ʋ n'ʋ so fʋ pɔb a fʋ bõw-nyãw a gb'a ata? Ɩ̃ wa na k'ɩ̃ɩ wa piw fʋ a tɔlʋ zie, a fʋ cenu ŋa na bɛ ɩ cen-vla mãa zie a ƴãw.

³³ A bõw-nyãw nyɛ̃ m'a, ɛ́ dɛ̀ m a gb'a ata. Ʋlɛ bɛ tɩ ɩ a lɛ a, ɩ̃ nãa kʋ b a, ɛ́ bɛr ʋ ʋ cãà vʋʋrɛ.»

³⁴ A Balaam tɩ yel'ɩ a Malkɩ: «Ɩ̃ sãw na! Ɩ̃ sɩrɩ bɛ tɩ bãw kɛ́ fʋ àr'ɩ a ɩ̃ niŋé a sɔ́r zu ɛ. Ƴɛrɛŋa a, a ɩ̃ cenu ŋa bɛ wa pɛlɩ a fʋ pʋɔ a, ɩ̃ na lɛb'a kul.»

³⁵ A Sore malkɩ tɩ sɔw ʋ na: «Páw a nɩbɛ bɛ ŋa cen. Ɛcɛ fʋ na tɩ yel'ɩ a al tɛwr ɩ̃ na na yel kʋ̀ b a.» A lɛ n'a a Balaam tɩ cãà páw a nɩ-bɛrɛ a Balakɩ na tõ a cen.

A Balaam nɩ a Balakɩ tuor-taa

³⁶ A Balakɩ na tɩ wõ k'aa Balaam tarɛ na a, ʋ yi na tuori ʋ tɩ sãá a Mowab tẽ-kpɛ̃ɛ ʋl na be a tẽw tʋr-bɔw ƴãw a, a Arnon bà-fʋɔla nʋɔr.

³⁷ A Balakɩ tɩ sowr'ʋ na: «Bʋ̃ʋ n'ʋ so fʋ bɛ wa a gb'aa dãw-niwn sob ɩ̃ na tõ nɩbɛ kɛ́ bɛ wa bʋɔlɩ fʋ a? Fʋ tɩ tɩ́ɛrɛ na k'ɩ̃ɩ kʋ̃ tʋ̃ɔ́ ƴãw fʋ yaga za bɩɩ?»

³⁸ A Balaam tɩ sɔw ʋ na: «Ãà, mãa n'ɩ ŋan! Ɛcɛ bʋ̃ʋ n'ʋ ɩ̃ na tʋ̃ɔ́ yel kʋ̀ b? A ƴɛ̀rʋ a Naaŋmɩn na na ƴãw a ɩ̃ nʋɔrɩ́ a, al tɛwr'a ɩ̃ na yel kʋ̀ b.»

³⁹ A Balaam tɩ páw nɩ a Balakɩ bɛ cen Kɩrɩyatɩ-Husotɩ.

⁴⁰ A Balakɩ tɩ maal'ɩ bàwr, kʋ nĩi nɩ píir, ŋma a nɛnɛ ír tɩr bɛ tɩ kʋ̀ a Balaam nɩ a nɩ-bɛrɛ na bɩɛlɛ ʋ a.

A Balaam ƴɛ̀rɛ nɩ nɔ-vla kʋ̀rɛ a Ɩsɩrayɛl nɩbɛ

⁴¹ A bio daarɩ́ biɓaara a, a Balakɩ tɩ tɛr'ɩ a Balaam do n Bamɔtɩ-Baal. A Balaam tɩ àr'ɩ a be, ɛ́ nyɛ̃ a Ɩsɩrayɛl nɩbɛ ŋmãa.