Sɔr-nɛ́ɛ 20 - A SƐB-SÕW

A Meriba kʋ̃ɔ

¹ A Ɩsɩrayɛl nɩbɛ lãw za tɩ ta n Sin wɛja-kpalɛ pʋɔ, a cuw-dãw-niwn sob pʋɔ, zɩ̃ Kadɛsɩ. Be n'a a Miriyam tɩ kpi bɛ ũù.

² Kʋ̃ɔ na bɛ tɩ ka be a nɩbɛ ƴãw a, bɛ tɩ mɛ na pàw a Moyiir nɩ a Aarɔ̃.

³ Bɛ tɩ bɔ n a Moyiir nɔhaarʋ yel ʋ à ŋá: «Bʋ̃ʋ pãa ɩ tɩ mɩ̀ bɛ kpi, a lɛn daar a tɩ yɛbr na tɩ kpi a Sore niŋé a!

⁴ Bʋnʋ ƴãw n'a nyɩ tɛr tɩ, a tɩɩm Sore nɩbɛ, wa n a wɛja-kpalɛ ŋa pʋɔ? Kɛ́ tɩɩm nɩ a tɩ dʋn wa kpi bɩɩ?

⁵ Bʋnʋ ƴãw n'a nyɩ tɛr tɩ yi n a Eziptɩ wa n a zi-faa faa ŋa pʋɔ? Bɛ kʋ̃ tʋ̃ɔ́ bʋ̀r bom ɛ, kãkamɛ, divɛ̃ tɩɩr nɩ girenadɩ tɩɩr bɛ ka be ɩ, kʋ̃ɔ tɛɛ za bɛ ka be a nyub ƴãw ɛ!»

⁶ A Moyiir nɩ a Aarɔ̃ tɩ bɛr'ɩ a nɩbɛ bɛ ŋa na ɓã taa a, ɛ́ cen a tuor-taa pɛn-sɛw dɩ̃dɔr nʋɔr tɩ lo vɔblɩ muru a be. Lɛ n'a bɛ tɩ nyɛ̃ a Sore yúor-vɩɛlʋ-danʋ,

⁷ ɛ́ a Sore yel a Moyiir à ŋá:

⁸ «De a fʋ dabɔl, ɛ́ fʋ̃ʋ nɩ a fʋ yɛb Aarɔ̃ bʋɔlɩ a Ɩsɩrayɛl nɩbɛ lãw ɓã taa. Nyɩ na ƴɛ̀r'ɩ a pìir ŋa na wɩɛr tɩ àr a zie, a bɛ niŋé, ʋʋ na tɩr'ɩ kʋ̃ɔ. Fʋ na ɩ na kʋ̃ɔ tɛb yi a pìir pʋɔ a bɛ ƴãw, ɛ́ fʋ na kʋ̀ n kʋ̃ɔ a Ɩsɩrayɛl nɩbɛ lãw nɩ a bɛ dʋn bɛ nyũ!»

⁹ A Moyiir tɩ cen na tɩ de a dabɔl a Sore pɛn-sɛw pʋɔ mɛ̃ a lɛ ʋ na tɩ yel kʋ̀ ʋ a.

¹⁰ Ʋlɛ nɩ a Aarɔ̃ tɩ bʋɔl'ɩ a Ɩsɩrayɛl nɩbɛ lãw ɓã taa a pìir niŋé, ɛ́ yel bɛ à ŋá: «Nyɩ bɛrɛ wone, nɩsaal-gaarɩ bɛ ŋan ɩ! Tɩ na tʋ̃ɔ́ na ɩ kʋ̃ɔ tɛb wa yi a pìir ŋa pʋɔ a nyɩ ƴãw ɩ?»

¹¹ A Moyiir tɩ zɛw nɩ a nũu ŋmɛ a pìir gb'a ayi nɩ a ʋ dabɔl. Kʋ̃ɔ na bɛ dɩ vuo a tɩ tɛb a wa yi daadaalɛ, a lãw nɩbɛ nyũ, lãwnɩ a bɛ dʋn.

¹² Ɛcɛ a Sore tɩ yel'ɩ a Moyiir nɩ a Aarɔ̃ à ŋá: «Nyɩ bɛ sàw de m ɛ, nyɩ bɛ wul a ɩ̃ sonu a Ɩsɩrayɛl nɩbɛ ɩ, à à ŋá ƴãw a, nyɩmɛ bɛ nɛbɛ na tɛr a nɩbɛ bɛ ŋa kpɛ n a tẽw ɩ̃ na kʋ̀rɛ bɛ a pʋɔ ɩ.»

¹³ A Meriba kʋ̃ɔ yele n'ɩ à à ŋá —a pɛr lɛ kɛ́ Nɔhaarʋ kʋ̃ɔ—. Bʋ̃ʋ n'ʋ vɛ̃, a Ɩsɩrayɛl nɩbɛ tɩ bɔ n a Sore nɔhaarʋ a be, ɛcɛ a tɩ ɩ na a Sore wul a ʋ sonu.

A Edɔm tẽw nãà bɛ sàw a Ɩsɩrayɛl nɩbɛ na tu tɔl a ʋ tẽw pʋɔ ɩ

¹⁴ Kadɛsɩ n'a bɛ tɩ be, ɛ́ a Moyiir tõ nɩbɛ a Edɔm nãà zie, kɛ́ bɛ tɩ yel ʋ à ŋá: «Bɛr wõ a fʋ yɛbr Ɩsɩrayɛl nɩbɛ ƴɛ̀rʋ: Fʋ bãw nɩ a kpɩɛrʋ al za tɩ na nyɛ̃ a.

¹⁵ Koro koro za n'a a tɩ sãàkʋm-kore cen a Eziptɩ, ɛ́ a tɩ nɩbɛ kpɛ n a be cɛlɩ. A Eziptɩ tẽw nɩbɛ dɔwrɩ tɩ na, a tɩ sãàkʋm-kore nɩ a tɩɩm.

¹⁶ Tɩ kõ na bʋɔlɩ a Sore, ʋ wõ a tɩ cɛlsɩ, ɛ́ tõ a ʋ malkɩ ʋ wa tɛr tɩ yi n a Eziptɩ. Ƴɛrɛŋa a, tɩ be n a Kadɛsɩ ka, tẽ-kpɛ̃ɛ na be a fʋ tẽw tʋr-bɔw ƴãw a.

¹⁷ Sàw kɛ̀ tɩ tu tɔl a fʋ tẽw pʋɔ. Tɩ bɛ tuur a póru pʋɔ nɩ a divɛ̃ tɩɩr póru pʋɔ ɩ. Tɩ bɛ nyúur a buli kʋ̃ɔ ɩ. A sɔ-kʋɔr-kpɛ̃ɛ n'ʋ tɩ na lo, tɩ bɛ bɩ̀ɛrɛ dʋrʋ bɩɩ gʋba ɩ, ɛ́ gù tɩ wa tɩ tɔl a fʋ tẽw za pʋɔ.»

¹⁸ Ɛcɛ a Edɔm tẽw nãà tɩ sɔw na: «Nyɩ bɛ tuur tɔlɛ a ɩ̃ tẽw pʋɔ ɩ, alɛ bɛ ɩ lɛ ɩ̃ na yi na ŋmãa nɩ nyɩ zɛbr!»

¹⁹ A Ɩsɩrayɛl nɩbɛ tɩ cãà na zɛlɛ yere nɩ à ŋá: «A sɔ́r zu n'a tɩ na cere. Tɩmɛ nɩ a tɩ dʋn wa nyũ a fʋ kʋ̃ɔ a, tɩ na ya b'a. Bʋ̃-been yõ n'ʋ tɩ zɛlɛ a fʋ zie, kɛ́ tɩ tu a fʋ tẽw pʋɔ tɔl.»

²⁰ Ɛcɛ a nãà tɩ sɔw na: «Nyɩ bɛ tuur tɔlɛ a ka ɩ!» A Edɔm tẽw nɩbɛ tɩ tuor'ɩ a Ɩsɩrayɛl nɩbɛ nɩ zɛbr-nɩbɛ na yãwmɛ ɛ́ tɛr fãw a,

²¹ ɛ́ bɛ sàw bɛ tu tɔl a bɛ tẽw pʋɔ ɩ. A lɛ n'a a Ɩsɩrayɛl nɩbɛ tɩ lɛb tu zi-yoru cen.

A Aarɔ̃ kũu

²² A Ɩsɩrayɛl nɩbɛ lãw za tɩ yi n a Kadɛsɩ ɛ́ cen Hoor tãgɛ̃́

²³ na be a Edɔm tẽw tʋr-bɔw ƴãw a. A Sore tɩ yel'ɩ a Moyiir nɩ a Aarɔ̃ a be:

²⁴ «A Aarɔ̃ kʋ̃ yaa kɛ́ kpi cen tɩ páw a ʋ sãà mɩnɛ ɩ. Ʋ kʋ̃ kpɛ a tẽw ɩ̃ na kʋ̀rɛ a Ɩsɩrayɛl nɩbɛ a pʋɔ ɩ. Bʋ̃ʋ n'ʋ vɛ̃, nyɩ bɛ sàw a ɩ̃ nʋɔr a Meriba kʋ̃ɔ zie ɩ.

²⁵ A lɛ pʋɔ a, a fʋ̃ʋ Moyiir, tɛr a Aarɔ̃ nɩ a ʋ bidɛb Eleazaar do n a Hoor tãw nyʋɔrɩ́.

²⁶ Fʋ na tɩ yaa nɩ a Aarɔ̃ bàwr-maal-kparɩ a be su a Eleazaar. A be n'a a Aarɔ̃ na kpi cen tɩ páw a ʋ sãà mɩnɛ.»

²⁷ A Moyiir tɩ ɩ n a lɛ a Sore na yel kʋ̀ ʋ a: bɛ za ata tɩ do n a Hoor tãw zu, a lãw nɩbɛ za niŋé.

²⁸ A Moyiir tɩ yaa nɩ a Aarɔ̃ kparɩ su a Eleazaar. A Aarɔ̃ tɩ kpi n a be, a tãw nyʋɔrɩ́. Al pùorí, a Moyiir nɩ a Eleazaar yi a tãw zu lɛb siw.

²⁹ A Ɩsɩrayɛl nɩbɛ na tɩ nyɛ̃ bãw k'aa Aarɔ̃ kpi na a, bɛ maal'ɩ a ʋ kuor bibie lɩzɛr'ɩ pie.