Sɔr-nɛ́ɛ 19 - A SƐB-SÕW

A dɛwr-so-bɛrʋ kʋ̃ɔ cɔbrʋ

¹ A Sore tɩ yel'ɩ a Moyiir nɩ a Aarɔ̃ à ŋá:

² «A tub al a wulu na ƴãw a, alɛ n'ɩ à á ŋá ɩ̃ na kʋ̀rɛ nyɩ a: Nyɩ yel a Ɩsɩrayɛl nɩbɛ kɛ́ bɛ wa n na-zɩɛ wa kʋ̀ nyɩ, náab a ƴã-gan zie kãw za na bɛ sãw a, ʋʋ mɩ̀ bɛ dãw kɔ a.

³ Nyɩ na de ʋ na kʋ̀ a Eleazaar na ɩ a bàwr-maalɛ a, ʋ tɛr ʋ yi n a laɩ pʋɔ, tɩ ƴãw bɛ ŋmaar'ʋ kɔkɛɛ a ʋ niŋé.

⁴ A Eleazaar na ɩ n a zɩ̃ɩ blã nɩ a ʋ nobir mɩr'ɩ a tuor-taa pɛn-sɛw dɩ̃dɔr lowr gb'a ayopõi.

⁵ Bɛ na nyɩw nɩ a náab za a ʋ niŋé: a gán, a nɛn, a zɩ̃ɩ nɩ a nyagɛ.

⁶ A bàwr-maalɛ na de nɩ sɛɛdɩr dàa, ɩzɔpɩ váar nɩ píir kɔblʋ pɛn-zɩɛ mʋɔlɛ, lɔb ƴãw a náab na dɩrɛ a vũumí.

⁷ Al pùorí, a bàwr-maalɛ na pɛ́w nɩ a ʋ kparɩ, ɛ́ so kʋ̃ɔ ɛ́ bãw lɛb kpɛ a laɩ pʋɔ. Ɛcɛ ʋ na ɩ n dɛwr sob tɩ ta a zaanʋɔra.

⁸ A sob nɛ na na nyɩw a náab a mɩ́ na pɛ́w nɩ a ʋ kparɩ ɛ́ so kʋ̃ɔ. Ʋ na ɩ n dɛwr sob tɩ ta a zaanʋɔra.

⁹ Nɩr na bɛ tɛr dɛwr a na wob'ɩ a náab tãpɛlʋ tɩ bin zie na vɩɛl, ɛ́ a bɛ ɩ a laɩ pʋɔ a. A Ɩsɩrayɛl nɩbɛ lãw na maal'a bin a tãpɛlʋ á ŋá, a dɛwr-so-bɛrʋ kʋ̃ɔ cɔbrʋ ƴãw. A tub ŋa za ɩ na mɛ̃ yel-bier ír-bɛrʋ bàwr'ʋ a.

¹⁰ A sob nɛ na na wob a náab tãpɛlʋ a mɩ̀ na pɛ́w nɩ a ʋ kparɩ, ɛ́ ɩ dɛwr sob tɩ ta a zaanʋɔra. A Ɩsɩrayɛl nɩbɛ nɩ a nʋʋrɩ na kpɩɛr a bɛ pʋɔ a na tɛr'ɩ a tub á ŋá tuur kʋralɛ.»

A nʋɔr na ƴãw càarɩ a dɛwr-so-bɛrʋ a

¹¹ A Sore tɩ cãà na lɛb yel à ŋá: «Nɩr za na tɔ kũu a, ʋ ɩ n dɛwr sob bibie ayopõi.

¹² A bibie ata sob nɩ a bibie ayopõi sob a, a fɛr'a kɛ́ bɛ mɩr'ɩ ʋ a dɛwr-so-bɛrʋ kʋ̃ɔ, ʋ lɛb vɩɛl. Ʋlɛ bɛ wa tu à à ŋá a bibie ata sob nɩ a ayopõi sob a, ʋ na cãà na ɩ a dɛwr sob.

¹³ Nɩr wa tɔ kũu, ɛ́ bɛ so a ʋ dɛwr bɛr a, ʋ dɛwr'ɩ a Sore kpɛb zie. Bɛ na ír ʋ na bɛr a Ɩsɩrayɛl nɩbɛ pʋɔ. Bɛ na bɛ mɩr'ɩ ʋ a dɛwr-so-bɛrʋ kʋ̃ɔ a, ʋ cãà na tɛr a ʋ dɛwr.»

¹⁴ «A tub a mɩnɛ mɩ̀ cãà n'ɩ á ŋá: Nɩr wa kpi pɛn-sɛw kãw pʋɔ a, a nɩbɛ na cere kpɩɛr a ʋ pʋɔ, bɩɩ a nɩbɛ na tɩ be a ʋ pʋɔ baar'a, bɛ na tɛr'ɩ dɛwr bibie ayopõi.

¹⁵ Bom bɛ wa ƴãw nɔ-pàwra ɛ́ 'lẽ a, a bom na be a ʋ pʋɔ a tɛr'ɩ dɛwr.

¹⁶ A wɩ̀ɛ pʋɔ a, nɩr wa tɔ nɩr bɛ na kʋ bɛr a, bɩɩ ʋlɛ wa tɔ nɩr na kpi Naaŋmɩn kũu a, ʋ na tɛr'ɩ dɛwr bibie ayopõi. Lɛ mɩ̀ n'a nɩr na tɔ nɩsaal kɔbɛ, bɩɩ tɔ yaa a zie.

¹⁷ A dɛwr sob ŋa dɛwr-so-bɛrʋ ƴãw a, bɛ na ɩ n a náab bɛ na maal'ɩ a yel-bier-ír-bɛrʋ bàwr a tãpɛlʋ ƴãw bom pʋɔ, ɛ́ ɩ bule kʋ̃ɔ ƴãw.

¹⁸ Nɩr na bɛ tɛr dɛwr a na de nɩ ɩzɔpɩ váar tõ a kʋ̃ɔ pʋɔ ɛ́ mɩr'ɩ a pɛn-sɛw ʋl pʋɔ a nɩr na kpi a, nɩ a bome za na be a ʋ pʋɔ a, nɩ a nɩbɛ na tɩ be a ʋ pʋɔ a, bɩɩ ʋ mɩr'ɩ a nɩr na tɔ kũu kɔbɛ, bɩɩ tɔ yaa a.

¹⁹ A nɩr na bɛ tɛr dɛwr a na mɩr'ɩ a dɛwr sob a bibie ata sob nɩ a bibie ayopõi sob. Bɛlɛ wa mɩr ʋ a bibie ayopõi sob baar'a, ʋ na pɛ́w nɩ a ʋ kparɩ ɛ́ so kʋ̃ɔ, ʋʋ na lɛb'a vɩɛl a zaanʋɔra.»

²⁰ «Ɛcɛ nɩr na tɛr dɛwr a, ʋlɛ bɛ wa so a ʋ dɛwr bɛr lɛb vɩɛl a, bɛ na ír ʋ na bɛr a Ɩsɩrayɛl nɩbɛ lãw pʋɔ. Bʋ̃ʋ n'ʋ vɛ̃, ʋ dɛwr'ɩ a Sore zi-sõw bɛrɛ. Bɛ na bɛ mɩr ʋ nɩ dɛwr-so-bɛrʋ kʋ̃ɔ a, ʋ ɩ n dɛwr sob.»

²¹ «A Ɩsɩrayɛl nɩbɛ na tɛr'ɩ a tub ŋa tuur kʋralɛ. A sob nɛ na mɩr a nɩr nɩ a dɛwr-so-bɛrʋ kʋ̃ɔ a na pɛ́w nɩ a ʋ kparɩ bɛr, ɛ́ nɩr na tɔ a kʋ̃ɔ á ŋá a na ɩ n dɛwr sob tɩ ta a zaanʋɔra.

²² Bom nɛ za dɛwr sob na tʋɔr a na tɛr'ɩ dɛwr, ɛ́ nɩr za na tʋɔr dɛwr sob a na ɩ n dɛwr sob tɩ ta n zaanʋɔra.»