Sɔr-nɛ́ɛ 18 - A SƐB-SÕW

¹ Lɛ n'a a Sore tɩ yel a Aarɔ̃: «Dɩ̃a na ta a, a fʋ̃ʋ, a fʋ bidɛbr nɩ a fʋ yɛbr Levi dɔwlʋ nɩbɛ, nyɩmɛ na so a sãwna na càarɩ a zi-sõw a. Ɛ́ fʋ̃ʋ nɩ a fʋ bidɛbr so a sãwna al na càarɩ a nyɩ bàwr-maal-tome a.

² Fʋ na mɩ́ bɛr'ɩ a fʋ yɛbr levitɩ mɩnɛ na ɩ a fʋ sãà Levi dɔwlʋ nɩbɛ a, bɛ lãw nɩ fʋ taw pɩɛlɩ a zi-sõw. Bɛ na tu n a fʋ pùor sõwne fʋ. Ɛcɛ fʋ̃ʋ nɩ a fʋ bidɛbr a, nyɩ na mɩ́ àr'ɩ a pɛn-sɛw na tɛr a wõ-taa kʋsɛ-pamɛ a niŋé.

³ A fʋ yɛbr levitɩ mɩnɛ na tone nɩ a fʋ tome nɩ a pɛn-sɛw za tome, ɛcɛ bɛ bɛ pɩɛlɛ a bʋ̃-son nɩ a bàwr-maal-kuur ɛ. Lɛ n'a nɩr kʋ̃ ɩrɛ wa kpi ɛ, a bɛl bɩɩ a nyɩɩm.

⁴ Bɛ na sõwne fʋ na a tõ-nɛ́ɛ nɩ a tome al za na tone a tuor-taa pɛn-sɛw pʋɔ a ƴãw. Nɩ-zawla za bɛ tawr pɩɛlɛ nyɩ ɛ.

⁵ Nyɩmɛ nɛbɛ na tone a nyɩ tome a zi-sõw pʋɔ nɩ a bàwr-maal-kuur pɛr. Lɛ n'a ɩ̃ kʋ̃ lɛb nyɛ̃ nɩ a Ɩsɩrayɛl nɩbɛ suur ɛ.

⁶ Nyɩ nyɛ̃, ɩ̃ kaa na ír a levitɩ mɩnɛ a Ɩsɩrayɛl nɩbɛ pʋɔ, mãa so bɛ ɛ́ de bɛ kʋ̀ nyɩ, kɛ́ bɛ tone a tuor-taa pɛn-sɛw tome.

⁷ Ɛcɛ a fʋ̃ʋ Aarɔ̃ nɩ a fʋ bidɛbr a, nyɩ na tone nɩ a nyɩ bàwr-maal-tome a bàwr-maal-kuur pɛr nɩ a zi-sõw-za-zi-sõw pʋɔ, a pɛn-yawla na bʋ́r a ziir a pùorí. Mãa n'ʋ kʋ̀ nyɩ a tõ-nʋɔr ŋa. Nɩ-zawla wa tawr pɩɛlɛ a, a fɛr'a k'ʋʋ kpi.»

A de-kʋ̀b bome al na ɩ a bàwr-maalbɛ dem a

⁸ A Sore tɩ yel'ɩ a Aarɔ̃ à ŋá: «Nyɛ̃, a de-kʋ̀b bome al za a Ɩsɩrayɛl nɩbɛ na kʋ̀rɛ mɛ̃ a, fʋ̃ʋ n'ʋ ɩ̃ dier a kʋ̀rɛ kɛ́ fʋ kaarɛ. Ɩ̃ dier a na kʋ̀rɛ fʋ, a fʋ dem'a, nɩ a fʋ bidɛbr dem kʋralɛ.

⁹ Bɛlɛ wa nyɩw a ɩ̃ dem a bàwr-maal-kuur zu baar'a, a nyɩ dem n'ɩ á ŋá a de-kʋ̀b bʋ̃-son son pʋɔ a Ɩsɩrayɛl nɩbɛ na kʋ̀rɛ mɛ̃ a: a kukur bome za, a yel-bier ír-bɛrʋ bagɛ bome nɩ a lɛb-kpɛ-taa bagɛ bome. A de-kʋ̀b bʋ̃-son son á ŋá na ɩ n fʋ̃ʋ nɩ a fʋ bʋʋrɛ dem.

¹⁰ A na ɩ n a nyɩ bʋ̃-dɩrɩ. Ɛcɛ a nyɩ yie dɛbr nɩ a dɛbli tɛwr nɛbɛ na tʋ̃ɔ́ mɩ́ dɩ a, bʋ̃-dɩ-sõw na n'a a ƴãw.

¹¹ A bome a Ɩsɩrayɛl nɩbɛ na mɩ́ de kʋ̀ m a, nyɩ mɩ̀ na tʋ̃ɔ́ na mɩ́ de a ŋmãa. A nyɩ dem ɩ̃ na kʋ̀rɛ nyɩ kʋralɛ ƴãw a n'a, fʋ̃ʋ nɩ a fʋ bidɛbr nɩ a fʋ pɔwyaar. Bɛlɩ dem za na bɛ tɛr dɛwr a fʋ yir pʋɔ a na tʋ̃ɔ́ na mɩ́ dɩ a.

¹² Ɩ̃ mɩ̀ kʋ̀rɛ nyɩ nɩ a kukur bʋ̃-dan a Ɩsɩrayɛl nɩbɛ na mɩ́ de kʋ̀ m a: a kãá-vla za, a divɛ̃-paala vla za nɩ a ble vla za a.

¹³ A bɛ tẽw bʋ̃-dan za bɛ na na mɩ́ wa n wa kʋ̀ m a, nyɩmɛ na mɩ́ so a, ɛ́ a nyɩ yie nɩbɛ bɛl nãà bɛ wa tɛr dɛwr a na tʋ̃ɔ́ na mɩ́ dɩ a.

¹⁴ A alɩ bome nɛ za a Ɩsɩrayɛl nɩbɛ na mɩ́ de kʋ̀ m a nʋɔr kʋ a, nyɩmɛ mɩ̀ na mɩ́ so a.

¹⁵ Nyɩmɛ mɩ́ na pãa baa so a bʋ̃-dãw-dɔwrɩ za bɛ na mɩ́ de kʋ̀ m a, a nɩsaalbɛ bi-dãw-dɔwrɩ nɩ a dʋn bʋ̃-dãw-dɔwrɩ. Ɛcɛ nyɩ na mɩ́ ƴãw na bɛ ya de dɛbli-dãw-dɔwra za, nɩ dʋ̃-dɛwr bil-dãw za.

¹⁶ Nyɩ na mɩ́ ƴãw na bɛ ya de a, a na dɔw maalɩ cuw-been a. A libir nʋɔr na ɩ n salm-pla libie anũu, a al na dɩrɛ a zi-sõw pʋɔ ɛ́ a libi-mã tɩbrʋ ɩ gɩram pie a.

¹⁷ Ɛcɛ nyɩ bɛ ƴãwnɛ bɛ yarɛ dier náab, pɛ́rʋ bɩɩ bʋɔ bil-dãw ɛ: mãa yõ tẽtẽ so a dʋn á ŋá. Nyɩ na mɩ́ cir'ɩ a dʋn á ŋá zɩ̃ɩ ƴãw a bàwr-maal-kuur zu, ɛ́ nyɩw a zi-kãánɩ a ɩ bàwr. Lɛ n'a a zʋ̀ʋ́r nyũu na pɛlɩ a ɩ̃ pʋɔ.

¹⁸ Al pùorí, nyɩ na so nɩ a nɛn mɛ̃ a lɛ nyɩ na mɩ́ so dʋ̃w nyãa nɩ a dʋrʋ gbɛkpɛ̃ɛ bɛ na tu n a de-kʋ̀b tub lãw-taa bàwr pʋɔ a.

¹⁹ A na ɩ à ŋá a, ɩ̃ kʋ̀rɛ nyɩ nɩ a bome al za a Ɩsɩrayɛl nɩbɛ na mɩ́ de kʋ̀ m a ɩ de-kʋ̀b bʋ̃-son a. A na ɩ n a nyɩ dem kʋralɛ, a fʋ̃ʋ Aarɔ̃ nɩ a fʋ bidɛbr nɩ a fʋ pɔwyaar, wõ-taa na bɛ tɛr lɩɛbʋ a zũú, wõ-taa ɩ̃ na maal'ɩ fʋ̃ʋ nɩ a fʋ bʋʋrɛ a.»

²⁰ A Sore tɩ cãà na lɛb yel a Aarɔ̃ à ŋá: «Fʋ kʋ̃ tɛr zie nɩ na-bome a tẽw ɩ̃ na na kʋ̀ a Ɩsɩrayɛl nɩbɛ a pʋɔ ɩ. Mãa n'ʋ na ɩ a fʋ dem nɩ a fʋ na-bom a Ɩsɩrayɛl nɩbɛ na cɛ a sɔgɔ.»

A levitɩ mɩnɛ sã-ya

²¹ A Sore tɩ yel'a ƴãw pʋɔ: «Nyɛ̃ a sã-ya ɩ̃ na kʋ̀rɛ a levitɩ mɩnɛ a tome bɛ na tone a tuor-taa pɛn-sɛw pʋɔ a ƴãw: ɩ̃ kʋ̀rɛ bɛ nɩ a tɛra ziir pie sob k'ʋʋ ɩ a bɛ dem, a pɛr lɛ k'aa bome al za a nɩbɛ na mɩ́ tõ páw a Ɩsɩrayɛl tẽw pʋɔ a ziir pie sob.

²² A Ɩsɩrayɛl nɩbɛ bɛl na cɛ a, bɛ taa lɛb tawr pɩɛlɛ a tuor-taa pɛn-sɛw wa mab tɛrɛ sãwna kpiir ɛ.

²³ A levitɩ mɩnɛ tɛwr nɛbɛ na tone a tuor-taa pɛn-sɛw tome, ɛ́ mɩ́ so a sãwna bɛ nãà wa sãw a. Nyɩ na tuur'ɩ a nʋɔr ŋa kʋralɛ. A levitɩ mɩnɛ kʋ̃ tɛr tẽsɔwr mɛ̃ a Ɩsɩrayɛl dɔwlʋ al na cɛ a ɩ,

²⁴ ɛcɛ a tɛra ziir piir al a na fɛr k'aa Ɩsɩrayɛl nɩbɛ mɩ́ de kʋ̀ m a, ɩ̃ kʋ̀rɛ bɛ nɩ a al k'aa ɩ a bɛ dem. Alɛ so ɩ̃ na tʋ̃ɔ́ yel kʋ̀ bɛ kɛ́ bɛ kʋ̃ tɛr tẽsɔwr mɛ̃ a dɔwlʋ al na cɛ a ɩ.»

²⁵ A Sore tɩ yel'ɩ a Moyiir à ŋá:

²⁶ «Tɩ ƴɛ̀r a levitɩ mɩnɛ zie yel bɛ à ŋá: A Ɩsɩrayɛl nɩbɛ mɩ́ wa wa n a tɛra ziir pie sob, ɩ̃ na kʋ̀rɛ nyɩ kɛ́ nyɩ so a wa kʋ̀ nyɩ a, a nyɩɩm tɛɛ za na mɩ́ ír'ɩ a tɛra ziir pie sob ŋa ziir pie sob kʋ̀ m.

²⁷ A nyɩ zie a, a na ɩ na mɛ̃ a lɛ a Ɩsɩrayɛl nɩbɛ na mɩ́ ɩ bom a bɛ ble bɩɩ a bɛ divɛ̃-paala pʋɔ kʋ̀ m a.

²⁸ À à ŋá n'a nyɩ mɩ̀ na mɩ́ kʋ̀ m a nyɩ dem. A tɛra ziir pie sob ʋl a Ɩsɩrayɛl nɩbɛ na cɛ a na mɩ́ kʋ̀ nyɩ a pʋɔ n'a nyɩ na mɩ́ ír ʋ, ɛ́ nyɩ na mɩ́ kʋ̀ ʋ nɩ Aarɔ̃ na ɩ a bàwr-maalɛ a, a ɩ a mãa n'ʋ nyɩ kʋ̀.

²⁹ A bome za bɛ na na mɩ́ kʋ̀ nyɩ a pʋɔ a, nyɩ na mɩ́ ír'ɩ a vla zie a za pʋɔ ʋ ɩ de-kʋ̀b bʋ̃-sõw.

³⁰ Nyɩmɛ wa ír ʋ baar'a, nyɩ mɩ́ na tɛr'ɩ a al na cɛ a, mɛ̃ a lɛ a Ɩsɩrayɛl nɩbɛ na mɩ́ tɛr a bɛ ble, a bɛ divɛ̃ nɩ a bɛ kãá a.

³¹ Nyɩ na tʋ̃ɔ́ na mɩ́ dɩ a bome á ŋá zie za, nyɩmɛ nɩ a nyɩ yie dem za. Bʋ̃ʋ n'ʋ vɛ̃, a tome nyɩ na tone a tuor-taa pɛn-sɛw pʋɔ a sã-ya n'a.

³² Nyɩmɛ wa ír a vla zie kʋ̀ m baar'a, sãwna bɛ ka be a al na cɛ a dɩb ƴãw ɛ. A lɛ pʋɔ a, nyɩ kʋ̃ sãw a Ɩsɩrayɛl nɩbɛ de-kʋ̀b bʋ̃-son bɛr ɛ, ɛ́ nyɩ bɛ kpiir ɛ.»