Sɔr-nɛ́ɛ 17 - A SƐB-SÕW

Bɛ ɩ a Koore nɩ a ʋ nɩbɛ parfɛ̃ nyɩwfʋ-koli ŋmɩn?

¹ A Sore tɩ yel'ɩ a Moyiir à ŋá:

² «Yel a Aarɔ̃ bidɛb, Eleazaar, na ɩ bàwr-maalɛ a, k'ʋʋ ír a parfɛ̃ nyɩwfʋ-koli a vũumí, ɛ́ cir a vũu-bie yaarɩ bɛr zi-zãána. A parfɛ̃ nyɩwfʋ-koli á ŋá ɩ n son.

³ Bʋ̃ʋ n'ʋ vɛ̃, bɛ de a na kʋ̀ m, nɩbɛ na maalɩ yel-bier kpi a saa tɩ dãw so a a. Bɛ na ŋmɛ ŋmɛ a na mawlɩ a ɩ ɓɛr ɓɛr, bɛ pàw nɩ a bàwr-maal-kuur. A na ɩ n bãwfʋ a Ɩsɩrayɛl nɩbɛ zie.»

⁴ A nɩbɛ a vũu na tɩ dɩ a nɩ-mimie a, a Eleazaar na tɩ ɩ a bàwr-maalɛ a tɩ de nɩ a bɛ kur-zɩɛ parfɛ̃ nyɩwfʋ-koli ƴãw bɛ ŋmɛ mawlɩ a bàwr-maal-kuur pàwfʋ ƴãw.

⁵ A kur-ŋmɛ-mawlɩ á ŋá tɩ sɩ̃wnɛ nɩ a Ɩsɩrayɛl nɩbɛ tɩɛrʋ, kɛ́ nɩ-zawla za na bɛ ɩ a Aarɔ̃ bʋʋrɛ a bɛ tɛr sɔ́r na nyɩw a tɩ-suur-zɔ̃-na-nyùur-vla-vla-a, a Sore niŋé ɩ. Nɩr za wa ɩ a lɛ a, a na ŋmɛ̃ ʋ na mɛ̃ a lɛ a na tɩ ŋmɛ̃ a Koore nɩ a ʋ nɩbɛ zie a, mɛ̃ a lɛ a Sore na tɩ ƴãw a Moyiir yel kʋ̀ a Aarɔ̃ a.

A nɩbɛ zɛbr'ɩ nɩ a Moyiir nɩ a Aarɔ̃

⁶ A bio daarɩ́ a, a Ɩsɩrayɛl nɩbɛ lãw za tɩ zɛbr'ɩ nɩ a Moyiir nɩ Aarɔ̃. Bɛ tɩ yel bɛ na: «Nyɩ ɩ na a Sore nɩbɛ kpi!»

⁷ A Ɩsɩrayɛl nɩbɛ tɩ wa n a Moyiir nɩ a Aarɔ̃ ƴãw, wa ŋmãa jil bɛ. Lɛ n'a a Moyiir nɩ a Aarɔ̃ tɩ lɩɛbɩ jɩ́r a tuor-taa pɛn-sɛw, nyɛ̃ a zʋ̀ʋ́r ʋ pàw ʋ, ɛ́ a Sore yúor-vɩɛlʋ-danʋ sãá.

⁸ A Moyiir nɩ a Aarɔ̃ tɩ cen nɩ a tuor-taa pɛn-sɛw niŋé,

⁹ a Sore tɩ yel a Moyiir à ŋá:

¹⁰ «Nyɩ yi zaa a lãw nɩbɛ bɛ ŋa pʋɔ, ɩ̃ na kʋ bɛ na pàw pɛr pɛtɛlʋlɛ.» A Moyiir nɩ a Aarɔ̃ tɩ lo na vɔblɩ muru,

¹¹ ɛ́ a Moyiir yel a Aarɔ̃ à ŋá: «De a fʋ parfɛ̃ nyɩwfʋ-kole, ír vũu-bie a bàwr-maal-kuur zu ƴãw, ɛ́ ɩ tɩ-suur-zɔ̃-na-nyùur-vla-vla-a ƴãw. Cen a lãw nɩbɛ pʋɔ fɔ̃w tɩ tu a yel-bebe suur-dɩ-kʋ̀b tub a bɛ ƴãw. Bʋ̃ʋ n'ʋ vɛ̃, a Sore nyɛ̃ nɩ suur, ɛ́ a bʋ̃-faa tĩ kʋrɛ.»

¹² A Aarɔ̃ tɩ de nɩ a parfɛ̃ nyɩwfʋ-kole mɛ̃ a lɛ a Moyiir na tɩ yel a, zɔ cen nɩ a lãw nɩbɛ sɔgɔ a bʋ̃-faa na tɩ tĩ baarɩ a. Ʋ tɩ nyɩw nɩ a tɩ-suur-zɔ̃-na-nyùur-vla-vla-a, ɛ́ tu a yel-bebe suur-dɩ-kʋ̀b tub a Ɩsɩrayɛl nɩbɛ ƴãw.

¹³ Ʋ tɩ àr'ɩ a nɩbɛ na kpi baarɩ a, nɩ a nɩbɛ na cãà vʋʋrɛ a cara pʋɔ. Lɛ n'a a bʋ̃-faa tɩ tɛw àr.

¹⁴ A nɩbɛ a bʋ̃-faa na tɩ kʋ a tɩ ɩ n tùr-pie nɩ anaar dɔwlɩ kɔbr ayopõi (14 700), ɛ́ bɛ bɛ tɩ sɔ́r a Koore nɩbɛ na tɩ de niwn kpi a ƴãw ɛ.

¹⁵ A bʋ̃-faa na dɛ tɩ tɛwr àrɛ wa báarɛ a, a Aarɔ̃ tɩ lɛb'a cen tɩ páw a Moyiir a tuor-taa pɛn-sɛw dɩ̃dɔr nʋɔr.

A Sore wul'a a sãá ʋ na kaa ír a Aarɔ̃ a

¹⁶ A Sore tɩ yel'ɩ a Moyiir à ŋá:

¹⁷ «Yel a Ɩsɩrayɛl nɩbɛ kɛ́ dɔwlʋ za nɩ-kpɛ̃ɛ kʋ̀ b dabɔl. A na ɩ lɛ a, dabɔlɛ pie nɩ ayi n'a fʋ na páw, ɛ́ sɛb dɔwlʋ za yúor ƴãw a ʋ dabɔl zu,

¹⁸ ɛ́ tɩ cɛ Levi dɔwlʋ dabɔl. Aarɔ̃ yúor'ʋ fʋ na sɛb a dabɔl ŋa zu. A na ɩ à ŋá a, dɔwlʋ nɩ-kpɛ̃ɛ za na tɛr'ɩ a ʋ dabɔl.

¹⁹ Fʋ na bin nɩ a dabɔlɛ á ŋá a tuor-taa pɛn-sɛw pʋɔ, a daga na tɛr a wõ-taa kʋsɛ-pamɛ a niŋé, a be ɩ̃ na mɩ́ ɩ nyɩ nyɛ̃ m a.

²⁰ Yel ŋa n'ʋ na ɩ: a sob nɛ ɩ̃ na kaa ír a dabɔl na tɛ n pɩrmɛ. À ŋá n'a ɩ̃ na ɩ, a Ɩsɩrayɛl nɩbɛ zɛbr bɛ na mɩ́ zɛbr'ɩ nyɩ a ta cãà tarɛ mɛ̃ ɩ.»

²¹ A Moyiir tɩ yel'ɩ à á ŋá za kʋ̀ a Ɩsɩrayɛl nɩbɛ. Lɛ n'a a dɔwlʋ nɩ-kpɛ̃ɛ za tɩ kʋ̀ ʋ dabɔl, dɔwlʋ za dabɔl been. Ʋ tɩ páw nɩ dabɔlɛ pie nɩ ayi, a Aarɔ̃ dem na pʋɔ a.

²² A Moyiir tɩ bin a nɩ a Sore niŋé, a pɛn-sɛw na tɛr a wõ-taa kʋsɛ-pamɛ a pʋɔ.

²³ A bio daarɩ́ a, a Moyiir tɩ kpɛ n a pɛn-sɛw pʋɔ tɩ nyɛ̃ a Levi dɔwlʋ nɩr Aarɔ̃ dabɔl ʋ tɛ pɩrmɛ, tɛr puuru nɩ amãdɩ wɔ̃-mɔmɛ.

²⁴ A Moyiir tɩ de nɩ a dabɔlɛ za a pɛn-sɛw pʋɔ yi n tɩ wul a Ɩsɩrayɛl nɩbɛ. Bɛ za tɩ nyɛ̃ a na, ɛ́ nɩ-kpɛ̃ɛ ŋa mɩ́ lɛb de a ʋ dabɔl.

²⁵ A Sore tɩ yel'ɩ a Moyiir à ŋá: «Lɛb kpɛ n a Aarɔ̃ dabɔl tɩ bin a daga na tɛr a wõ-taa kʋsɛ-pamɛ a niŋé. Bɛ na ƴãw ʋ nɩ a be ʋ tʋ̃ɔ́ ɩ bãwfʋ a Ɩsɩrayɛl nɩbɛ zie kɛ́ bɛ ɩ n zu-kpɛn dem. À ŋá n'a fʋ na ɩ bɛ bɛr a zɛbr bɛ na mɩ́ zɛbr'ɩ mɛ̃ a, a kũu taa kʋrɛ bɛ ɩ.»

²⁶ A Moyiir tɩ ɩ n a lɛ tɔr za a Sore na yel a.

A bàwr-maalbɛ nɩ a levitɩ mɩnɛ tõ-nʋɔr

²⁷ A Ɩsɩrayɛl nɩbɛ tɩ yel'ɩ a Moyiir à ŋá: «Fʋ bɛ nyɛ̃ tɩ na na kpi a ɩ, tɩ za na na wɛ tɩ baarɩ a ɩ?

²⁸ Nɩr za na tawr pɩɛlɛ a Sore kpɛb zie a, a kũu mɩ́ kʋ ʋ na! À à ŋá n'a tɩ za na tɛr tɩ baarɩ bɩɩ?»