Sɔr-nɛ́ɛ 15 - A SƐB-SÕW

A zɔ̃, a kãá nɩ a divɛ̃ de-kʋ̀b yele

¹ A Sore tɩ yel'ɩ a Moyiir à ŋá:

² «Tɩ ƴɛ̀r a Ɩsɩrayɛl nɩbɛ zie yel bɛ à ŋá: Nyɩmɛ wa kpɛ a tẽw ʋl ɩ̃ na na kʋ̀ nyɩ a pʋɔ a, nyɩmɛ wa kpɩɛr a be baarɩ a,

³ nyɩ na mɩ́ de nɩ bome kʋ̀ m. Nyɩ na mɩ́ maal'ɩ nyɩw-a-za-bàwr bɩɩ lãw-taa bàwr kʋ̀ m. Nyɩ na mɩ́ de a na kʋ̀ m nʋɔr nyɩ na kõ a íru ƴãw bɩɩ nyɩ na nɔnɛ a ƴãw bɩɩ cuwr nyɩ na maalɛ a ƴãw. A bagɛ á ŋá taabɛ ƴãw a, nyɩ na mɩ́ kaa na ír náab, pɛ́rʋ bɩɩ bʋɔ, ɛ́ a zʋ̀ʋ́r nyũu na mɩ́ pɛlɩ nɩ a ɩ̃ pʋɔ.

⁴ A sob nɛ na kʋ̀rɛ mɛ̃ a dʋ̃w a na mɩ́ lãwnɩ nɩ kukur bome de-kʋ̀b: kilo ata zɔ̃ bɛ na naw nɩ litɩr been nɩ ŋmãa kãá a,

⁵ nɩ litɩr been nɩ ŋmãa divɛ̃ ʋlɛ wa kʋrɛ pele nyɩw-a-za-bàwr ƴãw, bɩɩ lãw-taa bàwr ƴãw a.

⁶ Pʋ́ra wa n'ʋ a, ʋ na lãwnɩ nɩ kilo ayʋɔb zɔ̃ bɛ na naw nɩ litɩr ayi kãá a,

⁷ de nɩ divɛ̃ litɩr ayi. A bagɛ á ŋá zʋ̀ʋ́r nyũu na mɩ́ pɛlɩ nɩ a ɩ̃ pʋɔ.

⁸ Náab wa n'ʋ bɛ kʋ̀rɛ mɛ̃ nyɩw-a-za-bàwr ƴãw bɩɩ lãw-taa bàwr ƴãw a, nʋɔr bɛ na kõ a íru ƴãw bɩɩ bàwr sãsaralɛ ƴãw a,

⁹ bɛ na mɩ́ lãwnɩ nɩ kilo piwaɩ zɔ̃ bɛ na naw nɩ litɩr ata kãá a,

¹⁰ de nɩ litɩr ata divɛ̃. A bàwr ŋa zʋ̀ʋ́r nyũu na mɩ́ pɛlɩ nɩ a ɩ̃ pʋɔ.»

¹¹ «À à ŋá n'a bɛ na mɩ́ tu, náab, pʋ́ra, pele bɩɩ bʋɔ bàwr maalʋ ƴãw.

¹² A dʋn nyɩ nãà kʋrɛ a saa mɩ́ yãwmɛ sɛw ŋmɩn a, à à ŋá n'a nyɩ na mɩ́ tu a za been been ƴãw: nyɩ na mɩ́ lãwnɩ nɩ a kukur bome de-kʋ̀b á ŋá.

¹³ A Ɩsɩrayɛl nɩbɛ za na tɛr'ɩ a tub á ŋá tuur bɛlɛ wa maalɛ bàwr a zʋ̀ʋ́r nyũu na mɩ́ pɛlɩ a ɩ̃ pʋɔ a kʋ̀rɛ mɛ̃ a.

¹⁴ Nʋʋrɩ wa be a nyɩ pʋɔ a bɛ cɛlɩ, bɩɩ bɛlɛ wa be be a tɩ cɛlɩ cɛlɩ a, bɛ na mɩ́ tu na mɛ̃ a lɛ nyɩ na tuur a, bɛlɛ wa bɔbr kɛ́ bɛ maalɩ bàwr a zʋ̀ʋ́r nyũu na mɩ́ pɛlɩ a ɩ̃ pʋɔ a kʋ̀ m a.

¹⁵ A tub na ɩ n been a lãw nɩbɛ za ƴãw, a nyɩɩm Ɩsɩrayɛl nɩbɛ nɩ a nʋʋrɩ na be a nyɩ pʋɔ a ƴãw, ʋʋ na gã nɩ kʋralɛ. A mãa Sore, ɩ̃ bɛ owre a Ɩsɩrayɛl nɩbɛ nɩ a nʋʋrɩ na be a nyɩ pʋɔ a ɩ:

¹⁶ a wulu nɩ a tub ɩ n been, a nyɩɩm nɩ a bɛl ƴãw.»

A dipɛ̃-dan de-kʋ̀b

¹⁷ A Sore tɩ yel'ɩ a Moyiir á ŋá:

¹⁸ «Ƴɛ̀r a Ɩsɩrayɛl nɩbɛ zie yel bɛ à ŋá: Nyɩmɛ wa kpɛ a tẽw ʋl pʋɔ ɩ̃ na tɛr nyɩ cere nɩ a baarɩ a,

¹⁹ nyɩmɛ wa 'wɔbr dipɛ̃ a be a, nyɩ na mɩ́ ír'ɩ a ŋmãa de kʋ̀ m.

²⁰ Nyɩ na de nɩ zɔ̃ nyɩ na naw paalʋ a maal'ɩ sɛ̃sɛ̃ de kʋ̀ m. Nyɩ na de ʋ na kʋ̀ m mɛ̃ a nyɩ zɔ̃-nawra bʋ̃-dãw a, mɛ̃ a lɛ bɛ na mɩ́ de bʋ̃-bie kʋ̀ m, a ble nɩ a ɔɔzʋ na mɩ́ va baar'a.

²¹ À à ŋá n'a nyɩ na mɩ́ de a nyɩ sɛ̃sɛ̃-zu kʋ̀ m. A nyɩ nɩbɛ nãà dɔwr lɩɛrɛ taa a ƴãw n'a a tub ŋa mɩ̀ be.»

Bɛ-nyɛ̃ bagɛ

^22-23 «A ɩ mɛ̃ nyɩ bɛ bãwnɩ a, ɛ́ gãw a nɛ-ƴãwnɩ a mɩnɛ ɩ̃ na tu a Moyiir a pɛr-tib daar bɩɩ a pùorí ƴãw kʋ̀ a nyɩɩm nɩ a nyɩ bʋʋrɛ a.

²⁴ A sãwna wa sãw ɛ́ a lãw bɛ bãwnɩ a a, a lãw za n'ʋ na nyɔw nadɛr maal'ɩ nyɩw-a-za-bàwr kʋ̀ m, a zʋ̀ʋ́r nyũu na na pɛlɩ a ɩ̃ pʋɔ a. Ʋ mɩ̀ na de nɩ zɔ̃ nɩ divɛ̃ kʋ̀ m, mɛ̃ a lɛ a tub na tuur a, lãwnɩ bʋra a yel-bier ír-bɛrʋ bàwr ƴãw.

²⁵ Al pùorí, a bàwr-maalɛ na tu n a yel-bebe suur-dɩ-kʋ̀b tub a Ɩsɩrayɛl nɩbɛ za na ɓã taa a ƴãw, ɛ́ bɛ na páw nɩ a yel-bebe suur. Bʋ̃ʋ n'ʋ vɛ̃, a na ɩ n sãwna nyɩ na bɛ bãwnɩ kɛ́ sãw a ƴãw, nyɩ na wa n dʋ̃w wa maal'ɩ bàwr nyɩw bɛr a, nɩ yel-bier ír-bɛrʋ bàwr nyɩ na maalɩ a ƴãw.

²⁶ A Ɩsɩrayɛl nɩbɛ lãw za nɩ a nʋʋrɩ na kpɩɛr a bɛ pʋɔ a na páw nɩ a yel-bebe suur, a bɛ za na pʋɔ a bɛ-nyɛ̃ sãwna ŋa pʋɔ a ƴãw.»

²⁷ «Nɩ-been yõ wa n'ʋ bɛ nyɛ̃ kɛ́ sãw a, a na fɛr'a ʋ nyɔw yũon-been bʋɔ maal'ɩ yel-bier ír-bɛrʋ bàwr.

²⁸ Al pùorí, a bàwr-maalɛ na tu n a yel-bier suur-dɩ-kʋ̀b tub a sãwna sob ƴãw a ɩ̃ niŋé, ʋʋ na páw nɩ a yel-bier suur-dɩ-kʋ̀b.

²⁹ A tub na ɩ n been a bɛlɩ dem za na bɛ mɩ́ nyɛ̃ kɛ́ sãw a zie, a Ɩsɩrayɛl nɩbɛ nɩ a nʋʋrɩ na kpɩɛr a bɛ pʋɔ a.»

³⁰ «Ɛcɛ Ɩsɩrayɛl nɩr bɩɩ nʋʋra wa bãw kɛ́ sãw a, ʋ sãw mɛ̃ na, bɛ na ír ʋ na bɛr a ʋ bʋʋrɛ pʋɔ.

³¹ A ʋ sãwna na lo n a ʋ zu, ʋ na faa bɛ ŋmɛlɩ kaa a ɩ̃ ƴɛ̀rʋ, ɛ́ gãw a ɩ̃ nɛ-ƴãwnɩ a, a fɛr'a kɛ́ bɛ ír ʋ bɛr.»

Nɩr na gãw a pɩ̃ɛnʋ-bibir nʋɔr bɛr a kũu

³² A Ɩsɩrayɛl nɩbɛ na tɩ be a wɛja-kpalɛ pʋɔ a, nɩbɛ tɩ ur'ɩ nɩr kãw ʋ bɔbr dàar a pɩ̃ɛnʋ-bibir.

³³ Bɛ tɩ tɛr ʋ na wa n a Moyiir, a Aarɔ̃ nɩ a lãw za niŋé.

³⁴ Bɛ tɩ ƴãw na bɛ gù ʋ vla, bɛ na bɛ tɩ yel a lɛ bɛ na na ɩ ʋ sɛr a ƴãw.

³⁵ Lɛ n'a a Sore tɩ yel a Moyiir: «A fɛr'a kɛ́ bɛ kʋ a nɩr ŋa. A lãw nɩbɛ za, bɛ tɛr ʋ yi zaa nɩ a laɩ pʋɔ tɩ lɔb'ɩ ʋ kʋsɛbɛ kʋ.»

³⁶ A lãw nɩbɛ za tɩ tɛr ʋ na yi zaa nɩ a laɩ pʋɔ tɩ lɔb'ɩ ʋ kʋsɛbɛ, ʋ kpi, mɛ̃ a lɛ a Sore na tɩ ƴãw a nʋɔr kʋ̀ a Moyiir a.

A kparɩ zʋɔrɛ

³⁷ A Sore tɩ yel'ɩ a Moyiir à ŋá:

³⁸ «Ƴɛ̀r a Ɩsɩrayɛl nɩbɛ zie yel à ŋá kʋ̀ bɛ: Nyɩɩm nɩ a nyɩ bʋʋrɛ a, nyɩ na ƴãw nɩ zʋɔrɛ a nyɩ kparɩ nɛ́ɛ ƴãw, ɛ́ ƴãw fomi-zɩɛ-mʋɔlɛ a zʋɔrɛ pʋɔ.

³⁹ A na ɩ lɛ a, nyɩ na suur'ɩ kparɩ na tɛr zʋɔrɛ a, ɛ́ nyɩmɛ mɩ́ wa nyɛ̃ a a, nyɩ na mɩ́ lɛb'a bãwnɩ a ɩ̃ nɛ-ƴãwnɩ ɛ́ tuur a. Lɛ n'a nyɩ kʋ̃ mɩ́ bɛr a nyɩ mimie nɩ a nyɩ socie tɛr nyɩ tu n a tɩbɛ pùor ɛ.

⁴⁰ Nyɩ na bãw nɩ a ɩ̃ nɛ-ƴãwnɩ za sàwr, ɛ́ nyɩ wul'ɩ a lɛn daar kɛ́ nyɩ ɩ son.

⁴¹ Mãa n'ɩ a Sore nyɩ Naaŋmɩn na ɩ nyɩ yi a Eziptɩ, k'ɩ̃ɩ tʋ̃ɔ́ ɩ a nyɩ Naaŋmɩn a. Mãa n'ɩ a Sore nyɩ Naaŋmɩn.»