Sɔr-nɛ́ɛ 14 - A SƐB-SÕW

A nɩbɛ bɛ sàwr a Kanãa cenu ɛ

¹ A Ɩsɩrayɛl nɩbɛ lãw za tɩ nyɔw nɩ cɛlsɩ ŋmɛb, ɛ́ a nɩbɛ tɩ kõ a ʋlɩ tɩ̃ɩsɔw nɛ za.

² Bɛ tɩ zɛbr'ɩ nɩ a Moyiir nɩ a Aarɔ̃, ɛ́ tɩ yere a bɛ zie à ŋá: «Bʋ̃ʋ pãa ɩ tɩ bɛ kpi a Eziptɩ bɩɩ a wɛja-kpalɛ ŋa pʋɔ a!

³ Bʋ̃ʋ n'ʋ so a Sore tɛr tɩ cere nɩ a tẽw ŋa tɔ sob pʋɔ? Tɩ na tɩ kpi n zɛbr zie a be, ɛ́ bɛ nyɔw a tɩ pɔwbɛ nɩ a tɩ bibiir. Alɛ bɛ sa kɛ́ tɩ lɛb cen a Eziptɩ ɛ?»

⁴ Lɛ n'a bɛ tɩ yel kʋ̀ taa: «Nyɩ ɩ tɩ kaa ír nɩ-kpɛ̃ɛ ɛ́ lɛb cen a Eziptɩ!»

⁵ A Moyiir nɩ a Aarɔ̃ tɩ lo na vɔblɩ muru a Ɩsɩrayɛl nɩbɛ lãw za niŋé.

⁶ A Nun bidɛb, Zozue, nɩ a Yefune bidɛb, Kalɛb, na tɩ pʋɔ cen tɩ cɔlɩ jɩ́r a tẽw kaa a, bɛl tɩ taw nɩ bɛ kparɩ cɩɛrɩ, pʋ-sãwna yaga na tɩ tɛr bɛ a zũú.

⁷ Al pùorí bɛ yel a Ɩsɩrayɛl nɩbɛ lãw za: «A tẽw tɩ na cen tɩ cɔlɩ kaa a ɩ n tẽw na vɩɛl vɩɛl vɩɛl a!

⁸ Tẽw bʋ̀rʋ nɩ sɩwr na gbɔlɛ a n'ʋ. A Sore wa tu tɩ a, ʋ na tɛr tɩ na cen nɩ a tẽw ŋa pʋɔ, tɩ de ʋ kʋ̀ tɩ.

⁹ A na ɩ lɛ a, nyɩ ta zɛbr'ɩ a Sore ɩ. Nyɩ ta zɔrɛ a tẽw ŋa nɩbɛ ɩ: tɩ na tɩ sɔw nɩ bɛ nɩ nʋɔr. Bʋ̃ʋ n'ʋ vɛ̃, a bɛ ŋmɩmɛ na gùre bɛ a taw na yi kɛ́ bɛr bɛ. Ɛcɛ a Sore ʋl be n a tɩ zie. A na ɩ à ŋá a, nyɩ ta zɔrɛ bɛ ɩ!»

¹⁰ A lãw za tɩ yere na kɛ́ bɛ lɔb'ɩ bɛ kʋsɛbɛ kʋ, wa bere a Sore yúor-vɩɛlʋ-danʋ sãá a Ɩsɩrayɛl nɩbɛ za niŋé, a tuor-taa pɛn-sɛw zu.

A Moyiir zɛlɛ nɩ a Sore k'ʋʋ dɩ suur kʋ̀ a nɩbɛ

¹¹ A Sore tɩ yel'ɩ a Moyiir: «Debor daar'a a nɩbɛ bɛ ŋa na jɛ m bɛr tɩ ta? Debor daar'a bɛ na zawrɩ a ɩ̃ sàw-deb tɩ ta, bɛ na saa nyɛ̃ a ɩ̃ fãw bãwfʋ ɩ̃ na maalɩ a bɛ sɔgɔ a?

¹² Ɩ̃ na dɔwrɩ bɛ na nɩ jɛ̀lmɛ̃ bàalʋ, kʋ bɛ pàw pɛr. Al pùorí ɩ̃ ɩ nɩ-bʋʋrɛ yi a fʋ pʋɔ, yãwmɛ ɛ́ tɛr fãw zuo a Ɩsɩrayɛl nɩbɛ.»

¹³ A Moyiir tɩ sɔw nɩ a Sore: «A Eziptɩ tẽw dem wõ na k'aa fʋ fãw n'a fʋ tɩ ɩ n a nɩbɛ bɛ ŋa bɛ yi a bɛ tẽw pʋɔ.

¹⁴ Bɛ man ʋ na kʋ̀ a tẽw ŋa dem. A na ɩ lɛ a, a Kanãa tẽw wõ na k'aa fʋ̃ʋ, Sore, fʋ bɩɛlɛ nɩ a fʋ nɩ-bʋʋrɛ, fʋ mɩ́ ɩ na bɛ càarɩ nyɛ̃ b. Bɛ wõ na kɛ́ fʋ̃ʋ n'ʋ gùre a fʋ nɩ-bʋʋrɛ fʋ na mɩ́ de bɛ niwn ɩ zũzuwr na ɩ mɛ̃ kpul a a mʋ̃tɔ̃w, ɛ́ ɩ vũu na ɩ mɛ̃ kpul a a tɩ̃ɩsɔw a.

¹⁵ Fʋ̃ʋ wa kʋ a fʋ nɩbɛ pàw pɛr daƴen daadaa a, a nɩ-bʋʋrɛ na wõ a yele al za fʋ na maalɩ a na yel'a:

¹⁶ “A Sore bɛ tʋ̃ɔ́ tɛr a nɩbɛ bɛ ŋa kpɛ n a tẽw ʋl pʋɔ ʋ na yel k'ʋʋ na kʋ̀ bɛ na a ɩ, alɛ so ʋ kʋ bɛ pàw pɛr a wɛja-kpalɛ pʋɔ.”

¹⁷ A na ɩ lɛ a, ɩ̃ zɛlɛ fʋ nɩ yãayãa, Sore e, wul a fʋ kpɛnʋ! Mɛ̃ fʋ taa yel à ŋá:

¹⁸ “Mãa n'ɩ a Sore na nyɔwr a ɩ̃ suur, ɛ́ a nɔ̃wfʋ bɛ dɩ vuo a. Ɩ̃ mɩ́ nyɔw nɩ ɩ̃ tʋɔra a yel-bebe nɩ a nɛ́ɛ-zawrʋ ƴãw. Ɛcɛ ɩ̃ bɛ yere k'aa sãwna sob bɛ tɛr sãwna ɩ. Nɩr na maalɩ yel-bebe a, ɩ̃ mɩ́ dɔwr'ɩ a ʋ bʋʋrɛ a ʋ yel-bebe ƴãw tɩ ta bɛ na dɔw tu taa ta gb'a ata bɩɩ gb'a anaar a.”

¹⁹ Sore e, a fʋ nɔ̃wfʋ na bɛrmɛ sɛw à à ŋá a, cãà lɛb dɩ a fʋ nɩbɛ yel-bier suur kʋ̀ bɛ, mɛ̃ a lɛ bɛ na dɛ yi a Eziptɩ ɛ́ fʋ dɩrɛ a suur kʋ̀rɛ bɛ wa tɔ a ka a.»

²⁰ A Sore tɩ sɔw nɩ à ŋá: «Ɩ̃ dɩ n a suur kʋ̀ bɛ, mɛ̃ a lɛ fʋ na zɛlɛ a.

²¹ Ɛcɛ, ɩ̃ taa bɛ wa be, a ɩ̃ yúor-vɩɛlʋ-danʋ taa bɛ wa paalɩ a tẽw za, ɩ̃ pɔ na

^22-23 k'aa nɩbɛ bɛ ŋa kãw za kʋ̃ kpɛ a tẽw ŋa pʋɔ ɩ. Bɛ nyɛ̃ nɩ a ɩ̃ yúor-vɩɛlʋ-danʋ nɩ a fãw ɩb al za ɩ̃ na ɩ a Eziptɩ nɩ a wɛja-kpalɛ pʋɔ a, ɛcɛ, bɛ bɛ bɛr a ɩ̃ ɩ-kaafʋ ɛ, zawrɛ a ɩ̃ nʋɔr kʋralɛ. Lɛ so, a bɛ been kãw za kʋ̃ nyɛ̃ a tẽw ɩ̃ na yel k'ɩ̃ɩ na kʋ̀ n a bɛ sãàkʋm-kore a ɩ, bɛ za na faa zawrɩ mɛ̃ bɛr a ƴãw.

²⁴ Ɛcɛ a ɩ̃ tõ-tõ-bie Kalɛb tɩ tɛr'ɩ tɩɛr-yũo, ɛ́ tu m bɛ bʋnɩ nɩ ɛ. Ɩ̃ na ɩ na ʋ kpɛ a tẽw ʋ na cɔlɩ a, ɛ́ kʋ̀ a tẽw vuo ŋa a ʋ bʋʋrɛ.

²⁵ A Amalesitɩ nɩ a Kanãa tẽw dem na cãà na kpɩɛr a zi-tɩ̃tal pʋɔ. A na ɩ lɛ a, a bio a, nyɩ lɩɛb'ɩ pɛr-tul cere a wɛja-kpalɛ pʋɔ, tu a Bàa-kɛkɛɛ kʋ̃ɔ-kpɛ̃ɛ lowr.»

A Sore ƴãw nɩ dɔwrʋ a ʋ nɩbɛ

²⁶ A Sore tɩ cãà na lɛb yel a Moyiir nɩ a Aarɔ̃ à ŋá:

²⁷ «Ɩ̃ wõ n a Ɩsɩrayɛl nɩbɛ na zɛbr'ɩ mɛ̃ a. Debor daar'a a lãw-faa ŋa nɩbɛ na zɛb'ɩ mɛ̃ tɩ ta?

²⁸ Nyɩ cen tɩ yel à ŋá kʋ̀ bɛ: “A mãa Sore, ɩ̃ taa bɛ wa be, ɩ̃ pɔ na k'ɩ̃ɩ na ɩ nyɩ na mɛ̃ a lɛ ɩ̃ na wõ nyɩ ƴɛ̀r a:

²⁹ Nyɩ na kpi n a wɛja-kpalɛ ŋa pʋɔ. Nyɩɩm za bɛ na sɔ́r, sɛb a nyɩ yée, ɛ́ nyɩ tɛr yome lɩzɛr'ɩ dɔwlɛ a. Nyɩ na kpi na nyɩ na faa zɛbr'ɩ mɛ̃ a.

³⁰ Ɩ̃ pɔ na, nyɩ kʋ̃ kpɛ a tẽw ʋl ɩ̃ na yel k'ɩ̃ɩ na kʋ̀ nyɩ na nyɩ kpɩɛr a pʋɔ ɩ. Yefune bidɛb Kalɛb, nɩ Nun bidɛb Zozue tɛwr nɛbɛ na kpɛ a ʋ pʋɔ.

³¹ A nyɩ bibiir bɛl a, a bɛl nyɩ na yel kɛ́ bɛ na tɩ nyɔw bɛ na a, ɩ̃ na ɩ na bɛ kpɛ a tẽw nyɩ na zawrɩ bɛr a pʋɔ, bɛ na bãw ʋ na.

³² A nyɩɩm a, nyɩ na kpi n a wɛja-kpalɛ ŋa pʋɔ,

³³ ɛ́ a nyɩ bibiir bɛl àr'ɩ a bɛ dʋn a be yome lɩz'a ayi. Bɛ na tuo nɩ a nyɩ-na-bɛ-tu-m-a sãwna dɔwrʋ, ɛ́ gù nyɩ za tɩ kpi a wɛja-kpalɛ pʋɔ.

³⁴ Bibie lɩz'a ayi n'a nyɩ cɔlɩ jɩ́r a Kanãa tẽw. A na ɩ à ŋá a, yome lɩz'a ayi n'a nyɩ na wõ tuo a nyɩ sãwna ƴãw. Bibi-been za na mɩ́ ɩ n yũon. À ŋá n'a nyɩ na bãw a lɛ a ɩ̃ zawr-bɛrʋ na buore a.

³⁵ À à ŋá n'a ɩ̃ tɩ yel k'ɩ̃ɩ yel kʋ̀ nyɩ, a mãa Sore. Ɛ́ ɩ̃ pɔ na k'aa à ŋá n'a ɩ̃ na ɩ nyɩ, nyɩɩm lãw-faa nɩbɛ na wõ taa zɛbr'ɩ mɛ̃ a: nyɩ na baar'ɩ nyɩ za a wɛja-kpalɛ pʋɔ. A be n'a nyɩ na kpi.”»

³⁶ A nɩbɛ bɛl a Moyiir na tɩ tõ bɛ cen tɩ cɔlɩ jɩ́r a Kanãa tẽw kaa ɛ́ lɛb wa wa yel k'aa tẽw bɛ vɩɛl, ƴãw a Ɩsɩrayɛl nɩbɛ lãw zɛb'ɩ a Moyiir a,

³⁷ bɛ tɩ ùr'a kpi. A Sore tɩ dɔwrɩ bɛ na, bɛ na tɩ gɛrɩ k'aa tẽw bɛ vɩɛl a ƴãw.

³⁸ A nɩbɛ bɛ ŋa pʋɔ a, Nun bidɛb Zozue nɩ Yefune bidɛb Kalɛb tɛwr nɛbɛ tɩ cɛ vʋʋrɛ.

A nɩbɛ lɛb'a maal zawr a nʋɔr

³⁹ A Moyiir tɩ lɛb'a yel a Sore ƴɛ̀rʋ za kʋ̀ a Ɩsɩrayɛl nɩbɛ. A tɩ ɩ bɛ nɩ pʋ-sãwna yaga za.

⁴⁰ Bɛ tɩ dãwnɩ nɩ ìru a bio daarɩ́, lo a tan pʋɔ sɔ́r ɛ́ yere: «Sɩza n'a, tɩ maal'ɩ yel-bier! Ɛcɛ ƴɛrɛŋa a, tɩmɛ n'ɩ bɛ ŋan, tɩ na cen nɩ a zie ʋl a Sore na wul a.»

⁴¹ A Moyiir tɩ sowri bɛ na: «Bʋ̃ʋ n'ʋ nyɩ ɩrɛ? Nyɩ gãwnɛ nɩ a Sore nʋɔr, nyɩ kʋ̃ tʋ̃ɔ́ ɩ!

⁴² A Sore bɛ be a nyɩ zie ɩ, nyɩ ta cen tɩ ƴãw a nyɩ dɔ̃ dem tʋ̃ɔ́ nyɩ ɛ.

⁴³ A Amalesitɩ mɩnɛ nɩ a Kanãa tẽw dem n'ɩ bɛ ŋa a nyɩ nidaa, bɛ na tɩ kʋ nyɩ nɩ a zɛbr zie. Nyɩ na faa gùr pùor kʋ̀ a Sore a, ʋ kʋ̃ be a nyɩ zie ɩ.»

⁴⁴ Ɛcɛ a Ɩsɩrayɛl nɩbɛ tɩ kpãa nɩ tobr cãà bɔbr kɛ́ bɛ do a tan pʋɔ. A Moyiir ʋl tɩ cãà na be a laɩ pʋɔ nɩ a Sore wõ-taa daga.

⁴⁵ A Amalesitɩ mɩnɛ nɩ a Kanãa tẽw dem na tɩ kpɩɛr a tan al pʋɔ a tɩ yi n a be siw. Bɛ tɩ zɛb'a tʋ̃ɔ́ a Ɩsɩrayɛl nɩbɛ, ɛ́ diw bɛ tɩ sãá nɩ Hɔrma.