Sɔr-nɛ́ɛ 13 - A SƐB-SÕW

A Moyiir tõ n nɩbɛ bɛ tɩ cɔlɩ jɩ́r a Kanãa tẽw

¹ A Sore tɩ ƴɛ̀r'ɩ a Moyiir zie yel á ŋá:

² «Tõ nɩbɛ bɛ cen tɩ cɔlɩ jɩ́r a Kanãa tẽw kaa, ɩ̃ na kʋ̀rɛ a Ɩsɩrayɛl nɩbɛ a. Dɔwlʋ za pʋɔ a, bɛ na tõ n nɩr bɛ na kaa ír a nɩ-bɛrɛ pʋɔ a.»

³ A Moyiir tɩ ɩ n a lɛ a Sore na yel a. Ʋ tɩ be n a Paran wɛja-kpalɛ pʋɔ ɛ́ tõ nɩbɛ na tɩ ɩ a Ɩsɩrayɛl nɩbɛ nɩ-bɛrɛ bɛ za a.

⁴ A bɛ yée n'ɩ á ŋá: Zakuur bidɛb, Samua, na yi Urubɛn dɔwlʋ pʋɔ a.

⁵ Hori bidɛb, Safatɩ, na yi Sɩmɩ̃ɔ dɔwlʋ pʋɔ a.

⁶ Yefune bidɛb, Kalɛb, na yi Zuda dɔwlʋ pʋɔ a.

⁷ Zuzɛb bidɛb, Yigeyal, na yi Ɩsakaar dɔwlʋ pʋɔ a.

⁸ Nun bidɛb, Hosea, na yi Efarayim dɔwlʋ pʋɔ a.

⁹ Arafu bidɛb, Palti, na yi Bɛ̃zamɛ dɔwlʋ pʋɔ a.

¹⁰ Sodi bidɛb, Gadiyɛl, na yi Zabulɔ̃ dɔwlʋ pʋɔ a.

¹¹ Susi bidɛb, Gadi, na yi Zuzɛb bidɛb Manase dɔwlʋ pʋɔ a.

¹² Gemali bidɛb, Amiyɛl, na yi Dan dɔwlʋ pʋɔ a.

¹³ Mɩkayɛl bidɛb, Setuur, na yi Asɛɛr dɔwlʋ pʋɔ a.

¹⁴ Vofesi bidɛb, Nabi, na yi Nɛfɩtali dɔwlʋ pʋɔ a.

¹⁵ Maki bidɛb, Gewuyɛl, na yi Gadɩ dɔwlʋ pʋɔ a.

¹⁶ A nɩbɛ a Moyiir na tɩ tõ bɛ tɩ cɔlɩ jɩ́r a Kanãa tẽw kaa a, yée n'ɩ à á ŋá. A Moyiir tɩ por'ɩ a Nun bidɛb Hosea kɛ́ Zozue.

¹⁷ A Moyiir na tɩ tone a nɩbɛ bɛ ŋa a, ʋ tɩ yel bɛ na: «Nyɩ tu a Negɛɛvʋ lowr kpɛ a tẽw pʋɔ, al pùorí nyɩ kpɛ a tan pʋɔ,

¹⁸ ɛ́ maal jɩ́rɛ a lɛ a tẽw na ŋmɛ̃ a: a nɩbɛ na kpɩɛr ʋ a, bɛ tɛr'ɩ fãw bɩɩ bɛ bɛ tɛr fãw, bɛ yãwmɛ na bɩɩ bɛ bɛ yãwmɛ.

¹⁹ Nyɩ jɩ́r nyɛ̃, a tẽw vɩɛl'a bɩɩ ʋ bɛ vɩɛl, a ziir bɛ na kpɩɛr a, pɛnɛ-sɛwr laɩ n'a bɩɩ tẽ-bɛrɛ bɛ na mɛ dacine viiri koli a n'a.

²⁰ Nyɩ jɩ́r nyɛ̃, a tẽsɔw vɩɛl'ɩ a kɔb ƴãw bɩɩ ʋ bɛ vɩɛl, tɩɩr be n be bɩɩ tɩɩr bɛ ka be. Nyɩ tɩ kpɛ socir pɔr a tẽw tɩ-wɔmɛ wa n.» Bʋ̃ʋ n'ʋ vɛ̃, divɛ̃ tɩ-wɔ̃-dan daar tɩ n'a.

²¹ Lɛ n'a a nɩbɛ bɛ ŋa tɩ yi a Sin wɛja-kpalɛ pʋɔ ɛ́ cɔlɩ jɩ́r a Kanãa tẽw tɩ ta n Erehovʋ na pɩɛlɩ Lebo-Hamatɩ a.

²² A Negɛɛvʋ lowr'a bɛ tɩ tu kpɛ a tẽw pʋɔ, ɛ́ cen tɩ sãá Ebrɔ̃. Be n'a a Ahiman, Sesaɩ nɩ Talmaɩ dɔwlʋ nɩbɛ tɩ kpɩɛr: a nɩ-kɛra jarmam Anakɩ bʋʋrɛ nɛbɛ. Bɛ tɩ ŋmãa nɩ a Ebrɔ̃ tẽw maalɩ yome ayopõi, ɛ́ bãw ŋmãa a Tanisɩ tẽw a Eziptɩ.

²³ Bɛ tɩ yi n a be cen Ɛsɩkɔl fʋɔla pʋɔ tɩ cɛ divɛ̃ tɩɛ wule na tɛr a divɛ̃ tɩ-wɔ̃-cãacul a, ƴãw dà-wogo ƴãw nɩbɛ ayi tuo. Bɛ mɩ̀ tɩ pɔr'ɩ girenadɩ tɩɛ wɔmɛ nɩ kãkamɛ.

²⁴ Bɛ tɩ por'ɩ a zie ʋl yúor kɛ́ Ɛsɩkɔl fʋɔla, a pɛr lɛ kɛ́ divɛ̃ tɩ-wɔ̃-cãacul fʋɔla, a divɛ̃ tɩ-wɔ̃-cãacul a Ɩsɩrayɛl nɩbɛ na tɩ ŋmãa a be a ƴãw.

A nɩbɛ a Moyiir na tõ a man nɩ a lɛ a yele na ɩ a

²⁵ A tɩ maal'ɩ bibie lɩz'a ayi ɛ́ a nɩbɛ na cen tɩ cɔlɩ jɩ́r a tẽw kaa a lɛb wa.

²⁶ Bɛ tɩ lɛb'a wa páw a Moyiir, a Aarɔ̃ nɩ a Ɩsɩrayɛl nɩbɛ lãw za a Paran wɛja-kpalɛ pʋɔ, a Kadɛsɩ. Bɛ tɩ yel'ɩ a alɩ bome nɛ bɛ na nyɛ̃ a kʋ̀ bɛ za, ɛ́ wul bɛ a tẽw tɩ-wɔmɛ.

²⁷ À ŋá n'a bɛ tɩ manɩ kʋ̀ a Moyiir: «Tɩ cen nɩ a tẽw ʋl pʋɔ fʋ na tõ tɩ a. Yel-mɩŋa sa ziri, tẽw bʋ̀rʋ nɩ sɩwr na gbɔlɛ a n'ʋ. Nyɛ̃ a tẽw tɩ-wɔmɛ a mɩnɛ.

²⁸ Ɛcɛ a nɩbɛ na kpɩɛr a tẽw a tɛr'ɩ fãw, ɛ́ a ten ɩ tẽ-bɛrɛ bɛrɛ bɛ na mɛ dacine viiri koli a. Tɩ mɔ̃ mɩ̀ nyɛ̃ nɩ a nɩ-kɛra jarmam Anakɩ bʋʋrɛ a be.

²⁹ A Amalesitɩ mɩnɛ kpɩɛr'ɩ a Negɛɛvʋ vuo pʋɔ. A Hititɩ mɩnɛ, a Zebi tẽw dem nɩ a Amoritɩ mɩnɛ be n a tan vuo pʋɔ, ɛ́ a Kanãa tẽw dem kpɩɛr a Mediterane kʋ̃ɔ-kpɛ̃ɛ nʋɔr nɩ a Zurdɛ̃ man nʋɔr.»

³⁰ Kalɛb tɩ ɩ na a nɩbɛ na zɛbr'ɩ a Moyiir a, bɛ ɩ gbili. Ʋ tɩ yel'a: «Nyɩ ɩ tɩ cen! Tɩ do tɩ zɛb de a tẽw. Tɩ na tʋ̃ɔ́ na!»

³¹ Ɛcɛ a nɩbɛ bɛl nɩ a ʋl na tɩ do a tɩ yel'a: «Tɩ kʋ̃ tʋ̃ɔ́ zɛb'ɩ a nɩbɛ bɛ ŋa ɩ, bɛ tɛr'ɩ fãw zuo tɩ.»

³² Ɛ́ tɩ tĩ manɛ a tẽw bɛ na cen tɩ cɔlɩ a faalʋ a Ɩsɩrayɛl nɩbɛ niŋé. Bɛ tɩ yere na: «A tẽw tɩ na cɔlɩ jɩ́r kaa a ɩ n tẽw na báarɛ a ʋ nɩbɛ a, ɛ́ a nɩbɛ tɩ na nyɛ̃ a be a ɩ nɩbɛ na kɛrɩ yaga bɛ za a.

³³ Tɩ mɔ̃ mɩ̀ nyɛ̃ nɩ nɩ-kɛrɩ jarmam jarmam, a Anakɩ bʋʋrɛ. Tɩ tɩ nyɛ̃ na tɩ ɩ mɛ̃ sãsoge a, a bɛ zie, ɛ́ a lɛ n'a a bɛl tɛɛ za mɩ̀ tɩ nyɛ̃ tɩ.»