Sɔr-nɛ́ɛ 10 - A SƐB-SÕW

A salm-pla wɩɩr

¹ A Sore tɩ yel'ɩ a Moyiir à ŋá:

² «Ƴãw bɛ ŋmɛ salm-pla nɩ 'hama maal'ɩ wɩɩr ayi. Alɛ n'a bɛ na mɩ́ bʋɔl'ɩ a lãw nɩbɛ ɓã taa, bɩɩ ƴãw a laɩ laɩ nɩbɛ ìr lo a sɔ́r.

³ Bɛlɛ wa lãw pɛblɩ a wɩɩr a za ayi a, a lãw nɩbɛ za na mɩ́ ɓã n ta jil koli fʋ a tuor-taa pɛn-sɛw dɩ̃dɔr nʋɔr.

⁴ Bɛlɛ wa pɛblɩ wɩ-been yõ a, a nɩ-bɛrɛ tɛwr nɛbɛ, a Ɩsɩrayɛl dɔwlʋ nɩ-bɛrɛ nɛbɛ na mɩ́ ɓã taa jil koli fʋ.

⁵ Nyɩmɛ wa pɛblɩ a gb'aa dãw-niwn sob lãwnɩ cáarʋ a, a bɛlɩ dem laɩ na be a tuor-taa pɛn-sɛw saa-pɛrɩ́ a, bɛlɛ nɛbɛ lore a sɔ́r.

⁶ Nyɩmɛ wa pɛblɩ a gb'a ayi sob lãwnɩ cáarʋ a, a bɛlɩ dem laɩ na be a saa-pɛrɩ́-dʋrʋ-lowr a nɛbɛ lore a sɔ́r. A sɔ́r loba za ƴãw a, bɛ na mɩ́ pɛbl'ɩ a wɩɩr lãwnɩ cáarʋ.

⁷ Ɛcɛ a lãw nɩbɛ bʋɔlʋ ƴãw a, bɛ bɛ pɛblɛ a wɩɩr lãwnɛ nɩ cáarʋ ɛ.»

⁸ «A bàwr-maalbɛ tɛwr na ɩ a Aarɔ̃ bʋʋrɛ a, bɛlɛ nɛbɛ na pɛblɛ a wɩɩr á ŋá. Nʋɔr'ɩ à ŋà na ƴãw gã kʋralɛ, nyɩɩm nɩ a nyɩ bʋʋrɛ ƴãw a.»

⁹ «Nyɩmɛ wa be a nyɩ tẽw pʋɔ a lɛn daar, ɛ́ wa cere kɛ́ nyɩ tɩ zɛb'ɩ a nyɩ dɔ̃ dem na ŋmãa nɩ nyɩ zɛbr a, nyɩ na mɩ́ pɛbl'ɩ a wɩɩr, lãwnɩ cáarʋ. A lɛ pʋɔ a, ɩ̃ na lɛb'a bãwnɩ nyɩ. Lɛ n'a a mãa Sore nyɩ Naaŋmɩn na faa nyɩ a nyɩ dɔ̃ dem nuru pʋɔ.

¹⁰ A nʋ̃ɔ̀, a cuw-bɛrɛ nɩ a cuw-paala bibie pʋɔ a, nyɩ na pɛbl'ɩ a wɩɩr ƴãw a nyɩ nyɩw-a-za-bagɛ nɩ a nyɩ lãw-taa bagɛ ƴãw. A na mɩ́ ɩ n à ŋá, ɩ̃ lɛb bãwnɩ nyɩ. Mãa n'ɩ a Sore nyɩ Naaŋmɩn.»

A ƖSƖRAYƐL NƖBƐ NA YI A SINAYI Ɛ́ CEN TƖ TA A MOWAB TẼW TƲR-BƆW ƳÃW A 10:11—21:35 A Ɩsɩrayɛl nɩbɛ bɛr'ɩ a Sinayi wɛja-kpalɛ

¹¹ A yome ayi sob bɛ na tɩ yi a Eziptɩ a, a cuwr ayi sob bibie lɩzɛr sob, a zũzuwr tɩ ìr'a do àr a pɛn-sɛw zu-sɔw, a be a wõ-taa kʋsɛ-pamɛ na be a.

¹² A Ɩsɩrayɛl nɩbɛ tɩ bɛr'ɩ a Sinayi wɛja-kpalɛ, ɛ́ cen tu taa. A zũzuwr tɩ cen na tɩ tɛw Paran wɛja-kpalɛ pʋɔ.

¹³ A dãw-niwn sob tɩ n'ɩ a lɛ bɛ na ìr lo a sɔ́r, tu n a nʋɔr a Sore na tɩ ƴãw a Moyiir yel kʋ̀ bɛ a.

¹⁴ A zɛbr-nɩbɛ nɩ-pɛ́ɛ na ɓã taa jil koli a Zuda dɩrapo a nɛbɛ tɩ de niwn cen. Aminadab bidɛb Nason n'ʋ tɩ ɩ a Zuda dɔwlʋ zɛbr-nɩbɛ nɩ-kpɛ̃ɛ.

¹⁵ Suwaar bidɛb, Netanɛl, tɩ ɩ n Ɩsakaar dɔwlʋ zɛbr-nɩbɛ nɩ-kpɛ̃ɛ,

¹⁶ ɛ́ Helon bidɛb Eliyaavʋ ɩ Zabulɔ̃ dɔwlʋ zɛbr-nɩbɛ nɩ-kpɛ̃ɛ.

¹⁷ Bɛ tɩ wɩl'ɩ a kpɛb-zi-sõw. Lɛ n'a Gɛrson nɩ Merari bʋʋrɛ tɩ tuo ʋ cen nɩ.

¹⁸ A zɛbr-nɩbɛ nɩ-pɛ́ɛ na ɓã taa jil koli Urubɛn dɩrapo a tɩ lo n a sɔ́r tu bɛ. Sedewuur bidɛb Elisuur'ʋ tɩ ɩ a Urubɛn zɛbr-nɩbɛ nɩ-kpɛ̃ɛ.

¹⁹ Suurisadaɩ bidɛb Selumiyɛl ɩ Sɩmɩ̃ɔ dɔwlʋ zɛbr-nɩbɛ nɩ-kpɛ̃ɛ,

²⁰ ɛ́ Dewuyɛl bidɛb Eliyasafʋ ɩ Gadɩ dɔwlʋ zɛbr-nɩbɛ nɩ-kpɛ̃ɛ.

²¹ Al pùorí, a levitɩ mɩnɛ na ɩ Kehatɩ bʋʋrɛ a tɩ tuo nɩ a kpɛb-zi-sõw bʋ̃-son cen tu n. A levitɩ mɩnɛ ŋmãa mɩ́ tɩ maalɛ nɩ a kpɛb-zi-sõw cɛlɛ nɩ a Kehatɩ bʋʋrɛ.

²² A zɛbr-nɩbɛ nɩ-pɛ́ɛ na ɓã taa jil koli Efarayim dɩrapo a mɩ̀ tɩ ìr'a lo a sɔ́r. Amihudɩ bidɛb Elisama n'ʋ tɩ ɩ a Efarayim dɔwlʋ zɛbr-nɩbɛ nɩ-kpɛ̃ɛ.

²³ Pedasuur bidɛb Gamaliyɛl'ʋ tɩ ɩ Manase dɔwlʋ zɛbr-nɩbɛ nɩ-kpɛ̃ɛ,

²⁴ ɛ́ Gideoni bidɛb Avidan ɩ Bɛ̃zamɛ dɔwlʋ zɛbr-nɩbɛ nɩ-kpɛ̃ɛ.

²⁵ A zɛbr-nɩbɛ nɩ-pɛ́ɛ na ɓã taa jil koli a Dan dɩrapo, ɛ́ mɩ́ pàw a pɛr a mɩ̀ pãa tɩ ìr'a lo a sɔ́r. Amisadaɩ bidɛb Ahiezɛɛr'ʋ tɩ ɩ a Dan dɔwlʋ zɛbr-nɩbɛ nɩ-kpɛ̃ɛ.

²⁶ Okiran bidɛb Pagiyel ɩ Asɛɛr dɔwlʋ zɛbr-nɩbɛ nɩ-kpɛ̃ɛ,

²⁷ ɛ́ Einan bidɛb Ahira ɩ Nɛfɩtali dɔwlʋ zɛbr-nɩbɛ nɩ-kpɛ̃ɛ.

²⁸ A bɛ na tu taa à ŋá a n'a a Ɩsɩrayɛl nɩbɛ zɛbr-nɩbɛ tɩ lo a sɔ́r.

Moyiir bɔbr'ɩ nɩr na na wule a sɔ́r a

²⁹ A Moyiir tɩ yel'ɩ a Hobab, a ʋ dɩɛm-sãà Erewuyɛl na ɩ Madian tẽw nɩr a, bidɛb: «Tɩ cere nɩ a tẽw a Sore na yel k'ʋʋ na kʋ̀ tɩ na a. Wa tɩ cen, tɩ na tɩ ɩ na fʋ pʋɔ a maalʋ a Sore na yel k'ʋʋ na kʋ̀ n a Ɩsɩrayɛl a pʋɔ.»

³⁰ A Hobab tɩ sɔw na: «Ɩ̃ bɛ waar ɛ, ɩ̃ na lɛb'a kul a ɩ̃ tẽw nɩ a ɩ̃ yir.»

³¹ A Moyiir lɛb yel ʋ: «Ta zawrɩ tɩ bɛr ɛ. Fʋ bãw nɩ a wɛja-kpalɛ ziir al tɩ na na mɩ́ tʋ̃ɔ́ maalɩ a tɩ laɩ a, fʋ na wule tɩ nɩ a sɔ́r.

³² Fʋ̃ʋ wa páw tɩ cen a, tɩ na tɩ ɩ na fʋ pʋɔ a maalʋ a Sore na na kʋ̀ tɩ a pʋɔ.»

³³ A Ɩsɩrayɛl nɩbɛ tɩ yi n a Sore tãgɛ̃́ cen bibie ata. A Sore wõ-taa daga tɩ de bɛ nɩ niwn, k'ʋʋ tɩ bɔ a zie bɛ na na tʋ̃ɔ́ maalɩ a laɩ a bɛr bɛ.

³⁴ A mʋ̃tɔ̃w daarɩ́ a, a Sore zũzuwr mɩ́ tɩ be n a bɛ zu-sɔw, a lɛn daar bɛ na mɩ́ tɩ lɛb lore a sɔ́r a.

³⁵ A daw-sõw na mɩ́ tɩ lore a sɔ́r a, a Moyiir mɩ́ tɩ yel'a: «Ìr àr, Sore e, a fʋ dɔ̃ dem zɔ yaarɩ, bɛ zɔ bɔr a fʋ niŋé!»

³⁶ Ɛ́ bɛlɛ wa bine a da-sõw a lɛn daar a, a Moyiir mɩ́ yel'a: «Sore e, lɛb wa! Wa be a Ɩsɩrayɛl yie na bɛ dɩ vuo a sɔgɔ!»