Sɔr-nɛ́ɛ 1 - A SƐB-SÕW

A ƖSƖRAYƐL NƖBƐ NA BE A SINAYI WƐJA-KPALƐ PƲƆ A 1:1—10:10 A Ɩsɩrayɛl nɩbɛ sɔ́rʋ dãw-niwn sob

¹ A Sore tɩ ƴɛ̀r'ɩ a Moyiir zie, a tuor-taa pɛn-sɛw pʋɔ, a Sinayi wɛja-kpalɛ pʋɔ. A Ɩsɩrayɛl nɩbɛ Eziptɩ yib yome ayi sob tɩ n'a, a cuwr ayi sob bibi-dãw-niwn. A Sore tɩ yel ʋ na:

² «Fʋ̃ʋ nɩ a Aarɔ̃, nyɩ sɔ́r a Ɩsɩrayɛl lãw nɩbɛ dɔwlʋ dɔwlʋ nɩ yie yie. Nyɩ sɛb a dɛbr za yée, been been.

³ Nyɩ sɔ́r a dɛbr za na tɛr yome lɩzɛr'ɩ dɔwlɛ, ɛ́ na tʋ̃ɔ́ kpɛ a sojarɩ a. A Ɩsɩrayɛl zɛbr-nɩbɛ na ŋma põ põ a, nyɩ na sɛb bɛ na ƴãw a be bɛ na pʋɔ a.

⁴ Dɔwlʋ za pʋɔ nɩ-been na ɩ yir sob a na sõwne nyɩ na.

⁵ A bɛ yée n'ɩ á ŋá: Urubɛn dɔwlʋ: Sedewuur bidɛb, Elisuur

⁶ Sɩmɩ̃ɔ dɔwlʋ: Suurisadaɩ bidɛb, Selumiyɛl

⁷ Zuda dɔwlʋ: Aminadab bidɛb, Nason

⁸ Ɩsakaar dɔwlʋ: Suwaar bidɛb, Netanɛl

⁹ Zabulɔ̃ dɔwlʋ: Helon bidɛb, Eliyaavʋ

¹⁰ Zuzɛb bidɛb Efarayim dɔwlʋ: Amihudɩ bidɛb, Elisama Zuzɛb bidɛb Manase dɔwlʋ: Pedasuur bidɛb, Gamaliyɛl

¹¹ Bɛ̃zamɛ dɔwlʋ: Gideoni bidɛb, Avidan

¹² Dan dɔwlʋ: Amisadaɩ bidɛb, Ahiezɛɛr

¹³ Asɛɛr dɔwlʋ: Okiran bidɛb, Pagiyel

¹⁴ Gadɩ dɔwlʋ: Dewuyɛl bidɛb, Eliyasafʋ

¹⁵ Nɛfɩtali dɔwlʋ: Einan bidɛb, Ahira.»

¹⁶ A Ɩsɩrayɛl lãw yie nɩ-bɛrɛ bɛ na tɩ kaa ír a mɩ̀ tɩ ɩ n a Ɩsɩrayɛl zɛbr-nɩbɛ nɩ-bɛrɛ.

¹⁷ A Moyiir nɩ a Aarɔ̃ tɩ de nɩ a dɛbr pie nɩ ayi bɛ ŋa bɛ na kaa ír a, ƴãw pʋɔ a bɛ ƴãw,

¹⁸ ɛ́ bʋɔlɩ a lãw nɩbɛ za ɓã taa, a cuwr ayi sob bibi-dãw-niwn sob. A Ɩsɩrayɛl nɩbɛ bɛl za na tɩ tɛr yome lɩzɛr'ɩ dɔwlɛ a tɩ ƴãw na bɛ sɛb a bɛ yée, dɔwlʋ dɔwlʋ nɩ yie yie.

¹⁹ A Sinayi wɛja-kpalɛ pʋɔ n'a a Moyiir tɩ sɔ́r bɛ, mɛ̃ a lɛ a Sore na tɩ ƴãw a nʋɔr kʋ̀ ʋ a.

^20-43 Bɛ tɩ sɔr'ɩ a Ɩsɩrayɛl dɔwlʋ been been nɩbɛ, a dɔwlʋ nɩ a yie. A dɛbr bɛl za na tɩ tɛr yome lɩzɛr'ɩ dɔwlɛ ɛ́ na tʋ̃ɔ́ kpɛ a sojarɩ a, bɛ tɩ sɛb'ɩ a bɛ been been yée. A Zakɔb bidɛb-kpɛ̃ɛ Urubɛn dɔwlʋ n'ʋ bɛ tɩ tĩ nɩ. A nɩbɛ nɛ́ɛ á ŋá n'a bɛ tɩ nyɛ̃: Urubɛn dɔwlʋ: 46 500 Sɩmɩ̃ɔ dɔwlʋ: 59 300 Gadɩ dɔwlʋ: 45 650 Zuda dɔwlʋ: 74 600 Ɩsakaar dɔwlʋ: 54 400 Zabulɔ̃ dɔwlʋ: 57 400 Zuzɛb bidɛb Efarayim dɔwlʋ: 40 500 Zuzɛb bidɛb Manase dɔwlʋ: 32 200 Bɛ̃zamɛ dɔwlʋ: 35 400 Dan dɔwlʋ: 62 700 Asɛɛr dɔwlʋ: 41 500 Nɛfɩtali dɔwlʋ: 53 400

⁴⁴ À à ŋá n'a a Moyiir, a Aarɔ̃ nɩ a yie nɩ-bɛrɛ pie nɩ ayi bɛl na lɩɛrɩ a Ɩsɩrayɛl dɔwlʋ a, tɩ sɔ́r a nɩbɛ à ɩ.

⁴⁵ A Ɩsɩrayɛl nɩbɛ za bɛ na tɩ sɔ́r a yie yie a, a bɛl na tɩ tɛr yome lɩzɛr'ɩ dɔwlɛ ɛ́ na tʋ̃ɔ́ kpɛ a sojarɩ a,

⁴⁶ a bɛ za nʋɔr tɩ ɩ n tùr-kɔbr ayʋɔb dɔwlɩ túr ata kɔbr anũu nɩ lɩz'a ayi nɩ pie (603 550)

A Levi dɔwlʋ tõ-nʋɔr ɩ n ʋ tʋɔra

⁴⁷ Bɛ bɛ tɩ sɔ́r a Levi dɔwlʋ nɩbɛ lãwnɩ a Ɩsɩrayɛl nɩbɛ bɛl na cɛ a ɩ.

⁴⁸ Bʋ̃ʋ n'ʋ vɛ̃, a Sore tɩ yel'ɩ a Moyiir:

⁴⁹ «Ta sɔ́r a Levi bʋʋrɛ lãwnɩ a Ɩsɩrayɛl nɩbɛ ŋmãa ɩ.

⁵⁰ Fʋ na de nɩ a kpɛb-zi-sõw na ƴãw a wõ-taa kʋsɛ-pamɛ a kaafʋ kʋ̀ bɛ, lãwnɩ a ʋ kpɛ̃kpɛrsɩ za, a bome za na be a ʋ pʋɔ a. Bɛ na mɩ́ tuo nɩ a kpɛb-zi-sõw nɩ a ʋ kpɛ̃kpɛrsɩ. Bɛ na tone nɩ a kpɛb-zi-sõw tome, ɛ́ mɩ́ maalɩ a bɛ laɩ jil koli ʋ.

⁵¹ Nyɩmɛ wa lore a sɔ́r a, bɛlɛ nɛbɛ na mɩ́ wɩl a kpɛb-zi-sõw, ɛ́ nyɩmɛ wa tɛwr zɩnɛ a, bɛlɛ nɛbɛ na mɩ́ lɛb maalɩ ʋ. Nɩ-zawla wa pɩɛlɛ a kpɛb-zi-sõw a, bɛ na kʋ ʋ na.

⁵² A Ɩsɩrayɛl nɩbɛ na mɩ́ maal'ɩ a bɛ pɛnɛ-sɛwr, ŋa za a ʋ laɩ pʋɔ, pɩɛlɩ a ʋ sojarɩ nɩ-pɛr na ɓã taa a dɩrapo.

⁵³ A Levi bʋʋrɛ tɛwr nɛbɛ na mɩ́ maalɩ a bɛ laɩ jil koli a kpɛb-zi-sõw, ɛ́ tone a bɛ tome a ʋ pʋɔ. À ŋá n'a a Ɩsɩrayɛl nɩbɛ kʋ̃ mɩ́ ɩrɛ wa ɩ a ɩ̃ suur ìr a bɛ ƴãw ɛ.»

⁵⁴ A Ɩsɩrayɛl nɩbɛ tɩ ɩ n a lɛ tɔr za a Sore na tɩ yel kʋ̀ a Moyiir a.