Nɩ-toni 26 - A SƐB-SÕW

A Pol manɛ nɩ a ʋ yel-mɩŋa a Agɩrɩpa niŋé

¹ A Agɩrɩpa tɩ yel'ɩ a Pol: «Fʋ tɛr'ɩ sɔ́r na ƴɛ̀r faa fʋ tʋɔra.» Lɛ n'a a Pol tɩ dɔl nũu ɛ́ de a ƴɛ̀rʋ yel:

² «Nãà Agɩrɩpa a, a dɩ̃a ɩ̃ na na ƴɛ̀r faa ɩ̃ tʋɔra a fʋ niŋé, a ziri al za ƴãw a Zifʋ mɩnɛ na ŋmarɛ dɔwlɛ a ɩ̃ zu a, nʋ̃ɔ̀ kpɩɛr mɛ̃ na bɛ tɛr vuo ɩ.

³ Bʋ̃ʋ n'ʋ vɛ̃, fʋ bãw nɩ a Zifʋ mɩnɛ ɩ-ɩrɩ za, nɩ a yele al za ƴãw bɛ na tɛr a taw-taa a. Lɛ so, ɩ̃ zɛlɛ fʋ, sàw bɛr wõ m nɩ su-nʋ̃ɔ̀.»

⁴ «A Zifʋ mɩnɛ za bãw nɩ a ɩ̃ pɔ̀lʋ daar nyɔ-vʋʋrʋ a ɩ̃ nɩ-bʋʋrɛ sɔgɔ, a Zerizalɛm.

⁵ Bɛ bãw mɛ̃ nɩ koro za, bɛlɛ wa bɔbr a, bɛ na tʋ̃ɔ́ na dɩ a dãsɩɛ, a Faarizɩ̃ɛ mɩnɛ lãw na tuur a tɩ puoru yele ceretete a, ʋl pʋɔ n'a ɩ̃ tɩ pʋɔ.

⁶ Ɛ́ mãa wa àr a ka bɛ maalɛ nɩ mɛ̃ ƴɛ̀rʋ a dɩ̃a a, ɩ̃ na tɩɛrɛ kɛ́ a nʋɔr a Naaŋmɩn na ƴãw kʋ̀ a tɩ sãàkʋm-kore a, k'ʋʋ na tu na a, al zũú n'a.

⁷ A Ɩsɩrayɛl yie dɔwlʋ pie nɩ ayi, na tu a Naaŋmɩn puoru yele mʋ̃tɔ̃w nɩ tɩ̃ɩsɔw za bɛ tɛr bɛ́rʋ daar a, mɩ̀ tɩɛrɛ na kɛ́ a nʋɔr ŋa na tu na. Nãà Agɩrɩpa a, a tɩɛrʋ ŋa ƴãw n'a a Zifʋ mɩnɛ tɛr'ɩ mɛ̃ a ƴɛ̀rʋ.

⁸ Bʋ̃ʋ ƴãw n'a a nyɩɩm Zifʋ mɩnɛ, nyɩ tɩɛrɛ kɛ́ a bɛ tɛr sɔ́r kɛ́ nɩr sàw de kɛ́ Naaŋmɩn mɩ́ ɩ na a kũuni bɛ lɛb ìr?

⁹ Mãa a, ɩ̃ tɩ tɩɛrɛ na k'aa ɩ n fɛrʋ k'ɩ̃ɩ ɩ lɛ za ɩ̃ na na tʋ̃ɔ́ a, a Nazarɛtɩ Yeezu yúor ta yi ɛ.

¹⁰ Lɛ tɔr za n'a ɩ̃ ɩ a Zerizalɛm. Ɩ̃ nyɔw nɩ nɩ-son yaga yaga lɔb ƴãw gaso pʋɔ. A bàwr-maal-nɩ-bɛrɛ tɩ kʋ̀ m'ɩ fãw a al ƴãw. Mɔ̃ mɩ̀, bɛ na mɩ́ tɩ kʋrɛ bɛ a, ɩ̃ mɩ́ tɩ sàw na.

¹¹ Kʋralɛ, ɩ̃ mɩ́ tɩ cɔlɛ nɩ a puoru-diru za pʋɔ dɔwrɛ bɛ viire nɩ, ɛ́ fɛrɛ bɛ kɛ́ bɛ zawrɩ a Yeezu sàw-deb. A ɩ̃ su-yãyaar a bɛ ƴãw tɩ ɩ na ɩ̃ mɩ́ diw bɩɛrɩ bɛ tɩ sãá nɩ tẽ-yoru pʋɔ.»

A Pol manɛ nɩ a ʋ kɩrɩta-nɩr lɩɛbʋ yele

¹² «À ŋá n'a bibir kãw, a bàwr-maal-nɩ-bɛrɛ tɩ sàw bɛr mɛ̃ sɔ́r bom za ƴãw, ɛ́ tõ m ɩ̃ cere Damasɩ.

¹³ Nãà a, ɩ̃ tɩ lo n a sɔ́r cere, gbãgbãw tɩ pɩɛlɛ na, wa bere ɩ̃ nyɛ̃ cãà na caalɛ zuo a mʋ̃tɔ̃w a, ʋ yi a salom zu wa caalɩ pili pàw mɛ̃, mãa nɩ a ɩ̃ sɔr-lãw-cen-taabɛ.

¹⁴ Tɩ za tɩ lo na gã tẽw, ɩ̃ɩ wõ kɔkɔr ʋ ƴɛ̀rɛ nɩ mɛ̃ arameyɛ̃ yere: “Sol i, Sol i, bʋ̃ʋ n'ʋ so fʋ dɔwrɛ mɛ̃? Fʋ̃ʋ n'ʋ lɛb ŋmɛlɩ ɩrɛ a kpɩɛr fʋ tʋɔra, mɛ̃ dʋ̃w na lɩɛb bà gbɛ́r a dabɔl bɛ na kparɛ nɩ ʋ a ƴãw a.”

¹⁵ Ɩ̃ tɩ sowr'ʋ na: “Ãa nɛ b Sore e?” A Sore tɩ lɛb'a yel: “Mãa n'ɩ a Yeezu, mãa n'ʋ fʋ dɔwrɛ.

¹⁶ Ɛcɛ ìr àr. Ɩ̃ wul'ɩ ɩ̃ tʋɔra a fʋ zie k'ɩ̃ɩ ɩ fʋ lɩɛbɩ a ɩ̃ tõ-tõ-bie. Fʋ na dɩ n a ɩ̃ dãsɩɛ manɩ a lɛ fʋ na nyɛ̃ m a dɩ̃a a, ɛ́ hiere a yele al ɩ̃ na na wul fʋ nyɛ̃ a pùorí a.

¹⁷ Ɩ̃ na piw fʋ na tɛr a Zifʋ bʋʋrɛ ƴãw nɩ a nɩ-bʋʋr-yoru bɛl zie ɩ̃ na tone fʋ a ƴãw.

¹⁸ Ɩ̃ tone fʋ na kɛ́ fʋ tɩ yuo bɛ a mimie, kɛ́ fʋ tɩ tɛr bɛ a lige pʋɔ yi wa n a cãà pʋɔ, kɛ́ fʋ tɩ taw bɛ a Sɩtaana naalʋ pʋɔ yi wa n a Naaŋmɩn zie, bɛ wa tʋ̃ɔ́ páw a bɛ yel-bebe suur, ɛ́ lãwnɩ a nɩ-son páw gbã-dɩ-bom, bɛlɛ wa sàw de a ɩ̃ yele a.”»

A Pol manɛ nɩ a ʋ tõ-nʋɔr kʋ̀rɛ a Agɩrɩpa

¹⁹ «A na tɩ ɩ à á ŋa a, nãà Agɩrɩpa a, ɩ̃ bɛ zawrɩ na tu a nyɛ́b ŋa na yi a saa-zu wa ɩ̃ nyɛ̃ a ɩ.

²⁰ Ɩ̃ nɩ̃ɛ na tɩ ìr tĩ a Damasɩ tẽw be, nɩ a Zerizalɛm nɩ a Zude tẽw za pʋɔ, tɩ lʋ̃ɔ nɩ a nɩ-bʋʋr-yoru ten pʋɔ, hiere kɛ́ a fɛr'a kɛ́ bɛ lɩɛbɩ a bɛ ɩb ɛ́ lɛb wa a Naaŋmɩn zie, wa vʋʋrɛ nyɔ-vʋʋrʋ na wul kɛ́ bɛ lɩɛbɩ a bɛ ɩb a.

²¹ À á ŋá ƴãw n'a Zifʋ mɩnɛ tɩ wa nyɔw mɛ̃ a Ŋmɩn-yir-kpɛ̃ɛ pʋɔ bɔbr a ɩ̃ kʋb.

²² Ɩ̃ bãwnɩ a na, Naaŋmɩn gù mɛ̃ nɩ a lɛn daar za wa tɩ tɔ a dɩ̃a, alɛ so ɩ̃ cãà dɩrɛ a dãsɩɛ a bibiir nɩ a nɩ-bɛrɛ zie. A naaŋmɩn-ƴɛ̀r-manbɛ nɩ a Moyiir tɩ dãw na hieri yel a yele na waar na ta a, ɩ̃ bɛ yere bom za dɔwlɛ a bɛ ƴɛ̀rʋ zu ɛ.

²³ Bɛ tɩ dãw na yel kɛ́ a Kɩrɩta na wõ n tuo ɛ́ lɛb de niwn yi a kũuni pʋɔ, k'ʋʋ na hier'ɩ a faafʋ cãà kʋ̀ a tɩ bʋʋrɛ nɩ a nɩ-bʋʋr-yoru.»

A Pol bɔbr'a kɛ́ a Agɩrɩpa sàw de a Yeezu yele

²⁴ A ka n'a a Pol tɩ manɩ a ʋ yele wa ta, ɛ́ a Fɛsɩtɩsɩ ŋmãa de tanɩ yel: «Pol i, fʋ yarɛ na! Fʋ zànɩ nɩ a yele a tɩ ƴãw fʋ yãyaar!»

²⁵ Ɛcɛ a Pol tɩ sɔw na: «Ɩ̃ bɛ yarɛ ɩ, Fɛsɩtɩsɩ i! Ɩ̃ bãw nɩ yã ɛ́ ƴɛ̀rɛ yel-mɩŋa ƴɛ̀rʋ.

²⁶ A nãà ŋa zie ɩ̃ na ɓãá ƴãw ƴɛ̀rɛ a, ʋ wõ n a yele á ŋá, ɩ̃ɩ bãwnɩ a na been kãw za na bɛ sɔwlɩ a ʋ zie a, bʋ̃ʋ n'ʋ vɛ̃, gõgon kãw pʋɔ bɛ n'a a yele á ŋá ɩ ɛ.

²⁷ Nãà Agɩrɩpa a, mɛ̃ fʋ taa sàw de a naaŋmɩn-ƴɛ̀r-manbɛ ƴɛ̀rʋ? Bʋnʋ bɛ ka be ɩ, ɩ̃ bãwnɩ a na kɛ́ fʋ sàw na de.»

²⁸ Lɛ n'a a Agɩrɩpa lɩɛb yel a Pol: «Fʋ tɩɛr kɛ́ fʋ ɩ ɩ̃ lɩɛbɩ kɩrɩta-nɩr fɔ̃wlɛ à ŋá ʋ?»

²⁹ A Pol tɩ sɔw na: «Fɔ̃wlɛ n'a bɩɩ a cɛlɩ n'a a, a Naaŋmɩn, ʋ sàw fʋ̃ʋ nɩ a bɛlɩ dem za na bɛrɛ wone a ɩ̃ ƴɛ̀rʋ a dɩ̃a a, nyɩ wa ŋmɛ̃ taa nɩ mɛ̃, ɛ́ tɩ cɛ a bamɛ á ŋá!»

³⁰ A nãà tɩ ìr'a, ʋlɛ nɩ a Ʋrɔm tẽw na-kpɛ̃ɛ-lɩɛrɛ lãwnɩ a Berenisɩ nɩ a bɛ lãw-zɩnbɛ.

³¹ Bɛ tɩ ƴɛ̀rɛ na yire nɩ yere: «A nɩr ŋa bɛ ɩ bom za na sɛwnɩ a kũu bɩɩ a bamɛ ɩ.»

³² A Agɩrɩpa tɩ yel'ɩ a Fɛsɩtɩsɩ zie: «A nɩr ŋa bɛ tɩ yel k'aa ʋ yele ta a na-kpɛ̃ɛ a, bɛ nãá tʋ̃ɔ́ na lɛb bɛr ʋ.»