Nɩ-toni 25 - A SƐB-SÕW

A Pol bɔbr'a kɛ́ a ƴɛ̀rʋ dɩ a Ʋrɔm tẽw na-kpɛ̃ɛ niŋé

¹ A Fɛsɩtɩsɩ na wa de a ʋ tome maalɩ bibie ata a, ʋ yi n a Sezaare ɛ́ cen a Zerizalɛm.

² A bàwr-maal-nɩ-bɛrɛ nɩ Zifʋ mɩnɛ nɩ-kore tɩ wa n a ʋ zie kɛ́ bɛ wa manɩ a Pol sãwna. Bɛ tɩ zɛlɛ nɩ maalʋ a Fɛsɩtɩsɩ zie,

³ k'ʋʋ sàw lɛb ƴãw bɛ tɛr a Pol wa n a Zerizalɛm. Bɛ tɩ bɔbr kɛ́ bɛ sɔwlɩ gù ʋ, wa kʋ ʋ a sɔ́r zu.

⁴ Ɛcɛ a Fɛsɩtɩsɩ tɩ sɔw na yel bɛ kɛ́ a Pol pàwfʋ zie n'ɩ a Sezaare, ɛ́ lɛb waar, kɛ́ ʋl mɩŋa kʋ̃ yaa kɛ́ lɛb kul ɛ.

⁵ Ʋ tɩ yel bɛ na ƴãw pʋɔ: «Nɩbɛ wa be a nyɩ pʋɔ na na tʋ̃ɔ́ a, bɛ tu m siw a Sezaare bɛlɛ wa tɩ nyɛ̃ a dɔɔ ŋa sãwna a, bɛ̃ɛ yel.»

⁶ A Fɛsɩtɩsɩ tɩ maal'ɩ bibie ani bɩɩ pie tɛwr a bɛ zie. Al pùorí, ʋ tɩ lɛb'a kul a Sezaare. Ʋ na tɩ vɩɛrɛ bio wa báarɛ a, ʋ tɩ kpɛ na tɩ zɩ̃ a ƴɛ̀rʋ-dɩb zie ɛ́ ƴãw bɛ tɛr a Pol wa n.

⁷ Ʋ na wa ta a, a Zifʋ mɩnɛ bɛl na tɩ yi a Zerizalɛm wa a, tɩ ŋmãa na viiri koli ʋ ɛ́ manɛ a ʋ sãwna a bɛ tɩ dɩ vuo ɩ, ɛ́ kpɛ faa yaga. Ɛcɛ bɛ bɛ mɩ́ tɩ tʋ̃ɔ́ manɩ wul k'aa ɩ n sɩza ɩ.

⁸ A Pol ʋl tɩ cãà na tɛr kpɛ̃w za k'ʋʋ bɛ sãw ɛ. Ʋ tɩ yere na: «Ɩ̃ bɛ sãw yel na càarɩ a Zifʋ mɩnɛ Naaŋmɩn wulu a ɩ, mɩ̀ bɛ lɛb sãw a Ŋmɩn-yir-kpɛ̃ɛ ƴãw ɛ, cãà bɛ lɛb tɛr sãwna a na-kpɛ̃ɛ zie ɩ.»

⁹ A Fɛsɩtɩsɩ na tɩ bɔbr k'ʋʋ ɩ a pɛlɩ a Zifʋ mɩnɛ pʋɔ a, ʋ yel'ɩ a Pol: «Fʋ na sàw na do a Zerizalɛm bɛ tɩ maal'ɩ fʋ a ƴɛ̀rʋ a ɩ̃ niŋé e?»

¹⁰ A Pol tɩ sɔw na yel ʋ: «A Ʋrɔm tẽw na-kpɛ̃ɛ ƴɛ̀rʋ-maalʋ zie n'ɩ a ka ɩ̃ na be a, a ka n'a a sɛw kɛ́ bɛ maal'ɩ mɛ̃ a ƴɛ̀rʋ. Fʋ̃ʋ mɩŋa za nyɛ̃ a na, ɩ̃ bɛ sãw a Zifʋ mɩnɛ yel kãw za ƴãw ɛ.

¹¹ Mãa wa sɩrɩ ɩ sãwna sob a, mãa wa ɩ bom kãw sãw sɛwnɩ kũu a, ɩ̃ bɛ nɩɩrɛ a kũu bɛrɛ ɩ. Ɛcɛ, a sãwna á ŋá a nɩbɛ bɛ ŋa na dier dɔwlɛ a ɩ̃ zu a, alɛ bɛ wa tɛr niwn a, nɩr bɛ tɛr sɔ́r na de m ƴãw a bɛ nuru pʋɔ ɩ. A Ʋrɔm tẽw na-kpɛ̃ɛ zie n'a ɩ̃ bɔbr k'ɩ̃ɩ ta.»

¹² Lɛ n'a a Fɛsɩtɩsɩ tɩ sowri a ʋ yã-wulbɛ lɛ a na sɛw a. Al pùorí ʋ tɩ yel'a: «Fʋ na bɔbr kɛ́ fʋ ta a Ʋrɔm tẽw na-kpɛ̃ɛ zie a, fʋ na ta na.»

A Pol bɛ na tɛr wa n Agɩrɩpa nɩ Berenisɩ niŋé a

¹³ Bibie à ŋá lɛ pùorí, a nãà Agɩrɩpa nɩ a ʋ yeepuule Berenisɩ tɩ wa n a Sezaare kɛ́ bɛ wa puori a Fɛsɩtɩsɩ.

¹⁴ Bɛ na tɩ be a be na ta bibie à ŋá lɛ a, a Fɛsɩtɩsɩ tɩ manɩ nɩ a Pol yele kʋ̀ a nãà. Ʋ tɩ yel'a: «Nɩr kãw, Felisɩ na bɛr a gaso pʋɔ a, be n a ka.

¹⁵ Ɩ̃ na tɩ do a Zerizalɛm a, a bàwr-maal-nɩ-bɛrɛ nɩ a Zifʋ mɩnɛ nɩ-kore tɩ wa na wa yere k'ʋʋ sãw na, ɛ́ bɔbr k'ɩ̃ɩ ƴãw bɛ kʋ ʋ.

¹⁶ A lɛ n'a ɩ̃ tɩ sɔw kʋ̀ bɛ kɛ́ tɩɩm Ʋrɔm tẽ-biir zie a, a bɛ tɛr sɔ́r kɛ́ fʋ kʋ nɩr, ɛ́ a ʋ sob bɛ de niwn nyɛ̃ vuo manɩ a ʋ yel-mɩŋa a sãwna al bɛ na yel k'ʋʋ sãw na a ƴãw, a ʋ dɔ̃ dem niŋé ɩ.

¹⁷ Lɛ n'a bɛ tɩ páw mɛ̃ wa a ka, ɩ̃ bɛ wa vɛ̃ ɩ, ɛ́ a bio daarɩ́ tɔr za, ɩ̃ zɩ̃ a ƴɛ̀rʋ-maalʋ zie ɛ́ ƴãw bɛ tɛr a nɩr nɛ wa n.

¹⁸ A ʋ dɔ̃ dem na wa viiri koli ʋ a, bɛ bɛ manɩ yel-faa kãw za mãa na nɩ̃ɛ tɩ tɩɛrɛ a ɩ.

¹⁹ A bɛ taw-taa tɩ càar'ɩ a bɛ puoru sɔ́r, nɩ Yeezu kãw nɛ na kpi ɛ́ a Pol yel k'ʋʋ vʋʋrɛ na a.

²⁰ Ɩ̃ bɛ tɩ bãw ŋmɩŋmɩn za n'a ɩ̃ na ɩ a yel ŋa ƴãw ɛ. Lɛ so ɩ̃ tɩ sowr'ʋ k'ʋʋ taa ɩrɛ wa bɔbr k'ʋʋ do a Zerizalɛm bɛ tɩ dɩ a yel ŋa ƴɛ̀rʋ a be.

²¹ Ɛcɛ a Pol tɩ yel'a k'ʋʋ bɔbr'a kɛ́ a ʋ yele tɔl nidaa. Ʋ bɔbr'a kɛ́ a na-kpɛ̃ɛ tɔr za maal'ɩ ʋ a ƴɛ̀rʋ. Lɛ so ɩ̃ cãà bɛr ʋ a gaso pʋɔ gùre nɩ k'ɩ̃ɩ wa tɩr ʋ kʋ̀ a na-kpɛ̃ɛ.»

²² Lɛ n'a a Agɩrɩpa tɩ yel a Fɛsɩtɩsɩ: «Ɩ̃ mɩ̀ bɔbr'a k'ɩ̃ɩ nãà wõ a nɩr ŋa ƴɛ̀rʋ.» A Fɛsɩtɩsɩ tɩ sɔw ʋ na yel: «Bio tɛwr fʋ na wõ n a ʋ ƴɛ̀rʋ.»

²³ A bio daarɩ́, a Agɩrɩpa nɩ a Berenisɩ tɩ wa na wa kpɛ a ƴɛ̀rʋ dĩó nɩ dɛpaalʋ. Sojarɩ nɩ-bɛrɛ nɩ a tẽw nɩ-bɛrɛ tɩ bɩɛlɛ bɛ na. A Fɛsɩtɩsɩ tɩ ƴãw na bɛ tɛr a Pol wa n.

²⁴ Lɛ n'a a Fɛsɩtɩsɩ tɩ de a ƴɛ̀rʋ yel: «Nãà Agɩrɩpa a, nɩ nyɩɩm za mɩ̀ na lãwnɩ tɩ a ka a, nyɩ jɩ́r a nɩr ŋa vla. A Zifʋ mɩnɛ tẽw nɩbɛ za wa na wa páw mɛ̃ a ʋ ƴãw a Zerizalɛm, ɛ́ cãà tu m do wa a ka wa cɩɩrɛ k'ɩ̃ɩ ta bɛr ʋ ʋ cãà vʋʋrɛ ɩ.

²⁵ Mãa bɛ nyɛ̃ bom a ʋ ɩ-ɩrɩ pʋɔ na sɛw k'ʋʋ kpi a ɩ. Ɛcɛ ʋ na bɔbr kɛ́ a na-kpɛ̃ɛ tɔr za dɩ a ʋ ƴɛ̀rʋ a, ɩ̃ na tɩr ʋ na kʋ̀ ʋ.

²⁶ Ɛcɛ yel kãw za na bɛ nyɛrɛ ɩ̃ na sɛb manɩ kʋ̀ a na-kpɛ̃ɛ a, alɛ so ɩ̃ yel k'ʋʋ wa ƴɛ̀r a nyɩ za niŋé, baa zuo a za, a fʋ̃ʋ nãà Agɩrɩpa niŋé, kɛ́ a ƴɛ̀rʋ pùorí a, ɩ̃ tʋ̃ɔ́ tɛr bom sɛb kʋ̀ a tɩ na-kpɛ̃ɛ.

²⁷ Mãa zie a, fʋ na na bɛr nɩ-pàwra ʋ cen a Ʋrɔm, ɛ́ fʋ bɛ manɩ a sãwna na be a ʋ zu a, a ɩ na mɛ̃ dãbolu n'a a.»