Nɩ-toni 21 - A SƐB-SÕW

A Pol dúor'ɩ a Zerizalɛm

¹ Tɩ na wa tɩ bɛr taa a, tɩ kpɛ n a gbor cen Kɔsɩ daadaalɛ. A bio daarɩ́, tɩ tɩ ta n Ʋrɔdɩ, yi a be cen Patara.

² Tɩ tɩ nyɛ̃ nɩ gbor kãw a be ʋ cere Fenisi, tɩ kpɛ a ʋ pʋɔ cen.

³ Tɩ na tɩ pɩɛlɛ Sɩɩpʋr nyɛ̃ a tẽw ʋ sãá a, tɩ ŋmɛ na lɩɛbɩ a kʋ̃ɔ-kpɛ̃ɛ-sɔgɔ-tẽw dʋrʋ lowr, tu a Siiri lowr sɔ́r, tɩ ta siw a Tɩ́ɩ̀r. Be n'a a gbor tuor tɩ siwr.

⁴ Tɩ tɩ nyɛ̃ nɩ po-tuurbɛ a be, lɛ so tɩ tɩ kpɛ a be bibie ayopõi. A Vʋʋrʋ Sõw tɩ ƴãw bɛ na bɛ yel a Pol k'ʋʋ ta do a Zerizalɛm ɛ.

⁵ Tɩ na tɩ kpɛ a be tɩ ta a bibie ayopõi a, tɩ lɛb'a lo a sɔ́r. Tɩ na tɩ cere a, bɛ za, tɩ lãwnɩ a pɔwbɛ nɩ a bibiir, tɩ bɩɛlɩ tɩ na tɩ yi n a tẽw pʋɔ. Tɩ na tɩ ta a kʋ̃ɔ-kpɛ̃ɛ nʋɔr a, tɩ gbĩ n dume lãw puori.

⁶ Al pùorí, tɩ tɩ puori taa ɛ́ tɩ kpɛ a gbor, ɛ́ bɛ lɛb kule.

⁷ A tɩɩm na tɩ kpɛ a gbor a, tɩ tɩ yi n a Tɩ́ɩ̀r ɛ́ cen tɩ ta Pitolemayisɩ. Tɩ tɩ siw na puori a yɛbr na be a be a, ɛ́ lãw zɩ̃ nɩ bɛ bibi-been.

⁸ A bio daarɩ́, tɩ tɩ duw na tɩ ta Sezaare, cen tɩ kpɩɛr Yel-nʋ̃ɔ̀ hiere Filib yir. A Filib tɩ ɩ n a nɩbɛ ayopõi bɛl kãw bɛ na tɩ kaa ír a Zerizalɛm a.

⁹ Ʋ tɩ tɛr'ɩ pɔwyabɛ anaar na bɛ kul sɩrbɛ, ɛ́ ƴɛ̀rɛ naaŋmɩn-ƴɛ̀r-manbɛ ƴɛ̀rʋ a.

¹⁰ Tɩ na tɩ cãà be a be maalɩ bibie á ŋá a, Zude tẽw naaŋmɩn-ƴɛ̀r-manɛ kãw na dɩ Agabisɩ a tɩ wa ta na.

¹¹ Ʋ tɩ wa n a tɩ zie wa de a Pol kpàwr 'lẽ nɩ a ʋl tɔr za gbɛ́ɛ nɩ a nuru ɛ́ yel: «À ŋá n'a a Vʋʋrʋ Sõw yere: “À à ŋá tɔr za n'a a Zifʋ mɩnɛ na 'lẽ a kpàwr ŋa sob a Zerizalɛm, ɛ́ de ʋ ƴãw a nɩ-bʋʋr-yoru nuru pʋɔ.”»

¹² Tɩ na tɩ wõ à à ŋá a, tɩɩm nɩ a yɛbr na be a Sezaare a, tɩ zɛlɩ nɩ a Pol yãayãa k'ʋʋ ta do a Zerizalɛm ɛ.

¹³ Lɛ n'a ʋ tɩ sɔw yel tɩ: «Bʋ̃ʋ ƴãw n'a nyɩ kone ɛ́ sãwnɛ mɛ̃ pʋɔ à ŋá? Mãa a, 'leb yõ bɛ n'a ɩ̃ gù ɛ, ɩ̃ mɩ̀ gù n a kũu a Zerizalɛm a Sore Yeezu yúor ƴãw.»

¹⁴ Ʋ na bɛ tɩ sàwr dier a tɩ ƴɛ̀rʋ a, tɩ tɩ bɛr ʋ na ɛ́ yel: «A Sore pʋ-tɩɛrʋ, ʋ maalɩ!»

¹⁵ Tɩ na tɩ kpɛ a be bibie blã a, tɩ cɔbr'ɩ a tɩ tuor yi lo n a Zerizalɛm sɔ́r.

¹⁶ Sezaare tẽw po-tuurbɛ, mɩ̀ na tɩ páw tɩ dúor a Zerizalɛm a, tɩ tɛr tɩ na cen nɩ Mɩnasɔ̃ na yi Sɩɩpʋr a yir, tɩ tɩ be a be. A Mɩnasɔ̃ ŋa tɩ sàw na de a Yeezu yele a pɛr-tib daar za.

A Pol cen na tɩ nyɛ̃ a Zakɩ

¹⁷ Tɩ na wa ta a Zerizalɛm a, a yɛbr tuor'a nyɔw tɩ nɩ nʋ̃ɔ̀.

¹⁸ A bio daarɩ́, tɩɩm nɩ a Pol tɩ cen nɩ a Zakɩ zie. Be n'a a Lãw-yir nɩ-kore za mɩ̀ tɩ ɓã taa.

¹⁹ A Pol na wa puori bɛ baar'a, ʋ manɩ na owri a yele al za a Naaŋmɩn na tɩ tu a ʋ tome pùor maalɩ a nɩ-bʋʋr-yoru zie a.

²⁰ Bɛ na tɩ wõ a ʋ manʋ a, bɛ danɩ nɩ a Naaŋmɩn ɛ́ yel a Pol: «Yɛb i, nyɛ̃, Zifʋ mɩnɛ ta n túre túre na lɩɛbɩ a kɩrɩta-nɩbɛ a. Bɛ za tu n a Naaŋmɩn wulu pùor sɩza.

²¹ Ɛcɛ bɛ wone nɩ a lɛ a nɩbɛ na ƴɛ̀rɛ a fʋ ƴãw a: a nɩbɛ yere na kɛ́ fʋ wule nɩ a Zifʋ mɩnɛ na kpɩɛr a nɩ-bʋʋr-yoru pʋɔ a, kɛ́ bɛ ta tuur a Wulu a Moyiir na ƴãw a ɩ, kɛ́ fʋ cãà na mɩ̀ lɛb yere kʋ̀rɛ bɛ kɛ́ bɛ ta ŋmarɛ a bɛ bibiir yɛɛ ɩ, ɛ́ mɩ̀ ta tuur a Zifʋ mɩnɛ ɩ-ɩrɩ ɛ.

²² Ŋmɩŋmɩn za n'a tɩ na ɩ? Bʋnʋ bɛ ka be ɩ, bɛ na wõ na kɛ́ fʋ be n ka.

²³ Lɛ so, sàw tu à à ŋá tɩ na na yel kʋ̀ b a. Tɩ tɛr'ɩ dɛbr anaar na kõ nʋɔr a.

²⁴ Tɛr bɛ nyɩ za lãw tu a dɛwr-so-bɛrʋ tub, ɛ́ fʋ ya a bɛ bʋ̃-daarɩ kʋ̀ bɛ, bɛ tʋ̃ɔ́ fɔr a bɛ zuru. Lɛ n'a nɩr za na bãw kɛ́ a lɛ bɛ na yere a fʋ ƴãw a bɛ tɛr pɛr ɛ, ɛ́ kɛ́ a fʋ̃ʋ mɩ̀, fʋ tuur'ɩ a Naaŋmɩn wulu.

²⁵ Ɛcɛ, a nɩ-bʋʋr-yoru nɩbɛ bɛl na lɩɛbɩ a kɩrɩta-nɩbɛ a, tɩ sɛb'a yel kʋ̀ bɛ kɛ́ bɛ ciir a bàwr nɛnɛ nɩ a zɩ̃ɩ, kɛ́ bɛ ciir dʋ̃w bɛ na bɛ ŋmãa a kɔkɔr a nɛn, kɛ́ bɛ ta maalɛ pɩ̃ɔ-yele ɩ.»

²⁶ Lɛ n'a a Pol tɩ ìr a bio daarɩ́ tɛr a dɛbr anaar bɛl tĩ nɩ a dɛwr-so-bɛrʋ tub. Ʋ tɩ kpɛ n a Ŋmɩn-yir-kpɛ̃ɛ pʋɔ k'ʋʋ tɩ ƴãw a bibir ʋl bɛ nãà wa tu a dɛwr-so-bɛrʋ tub baarɩ, ɛ́ bɛ maalɩ a bàwr a bɛ been been ƴãw a.

Bɛ wa na wa nyɔw a Pol a Ŋmɩn-yir-kpɛ̃ɛ pʋɔ

²⁷ A bibie ayopõi na tɩ waar na baar'a, Azi tẽw Zifʋ bɛ mɩnɛ kãw tɩ nyɛ̃ nɩ a Pol a Ŋmɩn-yir-kpɛ̃ɛ pʋɔ. Bɛ tɩ ƴɛ̀r'a ƴãw a zu-sɛbla dam a ʋ ƴãw, ɛ́ bɛ nyɔw ʋ.

²⁸ Bɛ tɩ cɩɩrɛ na yere nɩ: «Ɩsɩrayɛl biir i, nyɩ wa faa tɩ! Nyɩ nyɛ̃ ʋ! A nɩr ŋa wule nɩ a nɩbɛ a ziir za kɛ́ bɛ hɩ̃ɛn a tɩ nɩ-bʋʋrɛ nɩ a tɩ zi-sõw ŋa, kɛ́ bɛ ta tuur a Wulu a Moyiir na ƴãw kʋ̀ tɩ a ɩ. Ʋ sʋ̃ɔm'a bul tɛr Gɩrɛkɩ mɩnɛ kpɛ n a Ŋmɩn-yir-kpɛ̃ɛ pʋɔ, dɛw nɩ a zi-sõw ŋa bɛr.»

²⁹ Efɛɛzɩ tẽw Torofim nɩ a Pol nɛbɛ bɛ tɩ nyɛ̃ bɛ cɔlɛ a tẽw pʋɔ. Lɛ n'a bɛ tɩ manɛ kɛ́ a Pol tɛr ʋ na kpɛ n a Ŋmɩn-yir-kpɛ̃ɛ pʋɔ.

³⁰ A damnʋ tɩ tɔ n a tẽw nɩbɛ za, ɛ́ a zu-sɛbla zɔ wa gbõ taa. Bɛ tɩ nyɔw nɩ a Pol vɩr yi n bɛr a Ŋmɩn-yir-kpɛ̃ɛ pʋɔ ɛ́ pàw a pamɛ daadaalɛ.

³¹ Bɛ tɩ bɔbr'ɩ a Pol kʋb a lɛn daar a sojarɩ túr (1 000) nɩ-kpɛ̃ɛ na tɩ wõ a yel ŋa a: «A Zerizalɛm dam'a nyaw taa ʋ za!»

³² Daadaalɛ, a sojarɩ túr nɩ-kpɛ̃ɛ tɩ bʋɔl'ɩ a sojarɩ kʋba (100) nɩ-bɛrɛ nɩ a sojarɩ zɔ cen nɩ a zu-sɛbla zie. Bɛ na wa nyɛ̃ a sojarɩ-nɩ-kpɛ̃ɛ nɩ a sojarɩ a, bɛ bɛr'ɩ a Pol ŋmɛb.

³³ A sojarɩ túr (1 000) nɩ-kpɛ̃ɛ tɩ taw na ta ƴãw bɛ nyɔw a Pol 'lẽ nɩ bamɛ ayi. Al pùorí ʋ tɩ sowr'a kɛ́ ãa n'ʋ? Nɩ kɛ́ bʋ̃ʋ n'ʋ ʋ ɩ?

³⁴ Ɛcɛ a zu-sɛbla pʋɔ a, ŋa za mɩ́ tɩ cɩɩrɛ nɩ à ŋá, ɛ́ a ʋ tɔ mɩ́ tɩ cɩɩrɛ a mɩnɛ. A na bɛ tɩ tɛr a sojarɩ túr nɩ-kpɛ̃ɛ na bãw yel-mɩŋa kãw za a damnʋ zũú a, ʋ tɩ ƴãw na kɛ́ bɛ tɛr a Pol kpɛ n a yir-kpɛ̃w ʋl pʋɔ a sojarɩ na mɩ́ be gù a tẽw a.

³⁵ A Pol na wa nyɔw a tanɛ dɛ́r dúor a yir pʋɔ a, a tɩ fɛr'a kɛ́ a sojarɩ ɓáw ʋ, a zu-sɛbla na tɩ damnɛ taa yaga a ʋ ƴãw a zũú.

³⁶ Bɛ za tɩ tuur ʋ na cɩɩrɛ yere nɩ: «Nyɩ kʋ ʋ!»

A Pol ƴɛ̀r'a k'ʋʋ faa ʋ tʋɔra

³⁷ A na tɩ cɛ blã bɛ na na ɩ a Pol kpɛ a sojarɩ yir pʋɔ a, ʋ sowr'ɩ a sojarɩ túr nɩ-kpɛ̃ɛ: «Ɩ̃ na tʋ̃ɔ́ na ƴɛ̀r a fʋ zie e?» A sojarɩ-nɩ-kpɛ̃ɛ tɩ sɔw ʋ na yel: «Fʋ wone nɩ a Gɩrɛkɩ ƴɛ̀rʋ ʋ?

³⁸ A ɩ lɛ fʋ bɛ ɩ a Eziptɩ tẽw dɔɔ ʋl na daar ìr wa n a damnʋ, ɛ́ tɛr nɩ-kʋrbɛ túr-anaar (4 000) zɔ kpɛ n wɛja pʋɔ a ʋ?»

³⁹ A Pol tɩ lɛb'a yel ʋ: «A mãa a, Zifʋ nɛ m. Tarsɩ na be Silisi a n'a ɩ̃ dɔw. Tẽw na tɛr yúor a tẽ-bie nɛ m. Ɩ̃ zɛlɛ fʋ na, sàw ɩ̃ ƴɛ̀r a zu-sɛbla zie.»

⁴⁰ A sojarɩ túr nɩ-kpɛ̃ɛ tɩ sàw na kʋ̀ ʋ. A Pol tɩ ìr'a àr a tanɛ dɛ-mimie zu, ɛ́ zɛw nũu kabrɩ yel a nɩbɛ kɛ́ bɛ bɛr gɔmɛ. A nɩbɛ tɩ ŋmãa nɩ vʋʋrʋ ɛ́ a Pol de a ƴɛ̀rʋ nɩ a arameyɛ̃ kɔkɔr yel: