Nɩ-toni 19 - A SƐB-SÕW

A Pol ta n a Efɛɛzɩ hiere a Naaŋmɩn ƴɛ̀rʋ

¹ A lɛn daar a Apɔlɔsɩ na tɩ be a Korɛ̃tɩ a n'a a Pol tɩ tu Azi Mɩnɛɛr tan pʋɔ sɔ́r wa ta a Efɛɛzɩ. Ʋ tɩ nyɛ̃ nɩ po-tuurbɛ bɛ mɩnɛ a Efɛɛzɩ,

² sowri bɛ: «A lɛn daar nyɩ na tɩ sàw de a Yeezu yele a, nyɩ tɩ páw nɩ a Vʋʋrʋ Sõw ɩ?» Bɛ tɩ sɔw na yel ʋ: «Tɩ bɛ dãw wõ bɛ ƴɛ̀r Vʋʋrʋ Sõw ƴɛ̀rʋ ɛ!»

³ A Pol tɩ lɛb'a sowri bɛ: «Ɛ́ suob buor'ʋ bɛ kʋ̀ nyɩ?» Bɛ tɩ sɔw na yel: «Zã suob'ʋ.»

⁴ A Pol tɩ lɛb'a yel bɛ: «Ɩb-lɩɛbʋ suob'ʋ a Zã tɩ kʋ̀rɛ a nɩbɛ yere nɩ kɛ́ bɛ sàw de a ʋlɩ sob na be a ʋ pùorí waar a, a pɛr lɛ kɛ́ bɛ sàw de a Yeezu.»

⁵ Bɛ tɩ bɛr'a wõ a Pol ƴɛ̀rʋ ɛ́ de a suob a Sore Yeezu yúor ƴãw.

⁶ A Pol tɩ ír'ɩ nuru dɔwlɩ a bɛ zu, a Vʋʋrʋ Sõw siw bɛ, bɛ ƴɛ̀rɛ ƴɛ̀r-pɛ-bʋʋrɛ bɛ na bɛ tɩ dãw wone a, ɛ̀ ƴɛ̀rɛ naaŋmɩn-ƴɛ̀r-manbɛ ƴɛ̀rʋ.

⁷ Bɛ za tɩ ta n nɩbɛ pie nɩ ayi.

⁸ A Pol mɩ́ tɩ cen nɩ a puoru-dĩó tɩ ɓãá ƴãw ƴɛ̀rɛ a Naaŋmɩn Naalʋ ƴɛ̀rʋ. Cuwr ata n'a ʋ ƴãw fãw tu à à ŋá, kɛ́ a nɩbɛ na bɛrɛ wone a ʋ ƴɛ̀rʋ a, bɛ sàw de kɛ́ sɩza n'a.

⁹ Ɛcɛ bɛ mɩnɛ tɩ kpãa nɩ tobr, ɛ́ zawrɩ a ƴɛ̀rʋ sàw deb ɛ́ sãwnɛ a Sore sɔ́r yúor a nɩbɛ pʋɔ. Lɛ so a Pol tɩ bɛr bɛ, ɛ́ bibir za, ʋ mɩ́ tɛr a po-tuurbɛ tɛwr kpɛ n a Tɩranɔsɩ nakol-yir tɩ kanɛ nɩ bɛ.

¹⁰ À ŋá n'a a tu tɩ maalɩ yome ayi, a Azi tẽw nɩbɛ tʋ̃ɔ́ páw a Sore ƴɛ̀rʋ wõ, a Zifʋ mɩnɛ nɩ a Gɩrɛkɩ mɩnɛ.

Seva bidɛbr yele

¹¹ Naaŋmɩn mɩ́ tɩ tu n a Pol maalɩ nɔ-ɓãa-yele na bɛ tɛr manʋ a.

¹² Lɛ so bɛ mɩ́ tɩ de niwn-pɛn-fɩɛlɩ, bɩɩ pɛnɛ na tɔ a Pol ƴã-gan a, tɩ dɔl pàw a bàalbɛ. A bàalbɛ mɩ́ tɩ sanɩ na, ɛ́ a kɔ̃tɔ̃-faar yi ɛ́ bɛr bɛ.

¹³ Zifʋ bɛ mɩnɛ kãw na mɩ́ tɩ diwr kɔ̃tɔmɛ cɔlɛ nɩ a, mɩ̀ wa tɩ ìr'a pore a Sore Yeezu yúor ƴãwnɛ a kɔ̃tɔ̃-ìrbɛ. Bɛ mɩ́ tɩ yel'ɩ a kɔ̃tɔ̃-faar: «A Yeezu ŋa a Pol na hiere a yúor ƴãw, nyɩ yi!»

¹⁴ À ŋá n'a Zifʋ bàwr-maal-kara kãw, na dɩ Seva a, tɩ tɛr bibiir ayopõi bɛ ɩrɛ à à ŋá.

¹⁵ Bibir kãw, a kɔ̃tɔ̃-faa wa tɩ yel bɛ na: «A Yeezu a, ɩ̃ bãw ʋ na, ɛ́ mɩ̀ cãà lɛb bãw a Pol. Ɛ́ a nyɩɩm, ã-mɩnɛ n'ɩ nyɩ?»

¹⁶ A kɔ̃tɔ̃-ìre tɩ ìr'a lo a bɛ za zu, tʋ̃ɔ́ bɛ za ɛ́ pɔb bɛ faa faa, bɛ wa tɩ yi a ʋ yir zɔ n pɛ-zawlɛ, ɛ́ ɩ natɩɛ tɛwr.

¹⁷ A Efɛɛzɩ tẽw nɩbɛ za, a Zifʋ mɩnɛ nɩ a Gɩrɛkɩ mɩnɛ za, tɩ wõ n a yel ŋa. Dɛ̃bɩ̃ɛ tɩ nyɔw nɩ bɛ za. Bɛ tɩ danɛ nɩ a Sore Yeezu yúor na ɩ kpɛ̃ɛ a.

¹⁸ A kɩrɩta-nɩbɛ yaga mɩ́ tɩ wa na wa háa nʋɔr wo a bɛ ɩ-faar.

¹⁹ Nɩbɛ yaga na tɩ tɛr a sɔ-ɩb a, tɩ wob'ɩ a bɛ sɛbr ɓã taa nyɩw bɛr a nɩbɛ za niŋé. Bɛ na wa man a sɛbr á ŋá daarʋ a, bɛ nyɛ̃ na a ta salm-zɩɛ libie tùr-lɩz'a ayi nɩ pie (50 000).

²⁰ À ŋá n'a a Sore fãw zũú, a Naaŋmɩn ƴɛ̀rʋ tɩ yɛ́rɛ pàwr a be za. Ɛ́ a mɩ́ tɩ sãá kɛ́ a ƴɛ̀rʋ ŋa tɛr'ɩ fãw.

A damnʋ na dam a Efɛɛzɩ a

²¹ A yele á ŋá pùorí, Vʋʋrʋ Sõw tɩ caal'ɩ a Pol ʋ yel k'ʋʋ na tu na yi Masedʋan nɩ Akayi ten pʋɔ cen Zerizalɛm. Ʋ tɩ yere na: «Mãa wa ta a be a, a mɩ̀ na fɛr'a k'ɩ̃ ta a Ʋrɔm.»

²² Lɛ n'a ʋ tɩ tõ a ʋ sõw-sõwnbɛ ayi kãw, Timote nɩ Erasɩ, a Masedʋan. Ɛcɛ a ʋl tɔr za tɩ cãà na kpɛ a Azi kɔwrɩ blã.

²³ A vuo nɛ pʋɔ n'a a Efɛɛzɩ tɩ dam yaga yaga a Sore sɔ́r yele ƴãw.

²⁴ Dɔɔ kãw tɩ be n be dɩ Demetiriyisi, ɛ́ tɩ maalɛ salm-zɩɛ bome. Ʋ mɩ́ tɩ nyɩl'ɩ a salm-zɩɛ maal'ɩ yili na ŋmɛ̃ taa nɩ a ŋmɩn-pɔw Atemisɩ yir a. À ŋá n'a ʋ tɩ ɩrɛ nyɛrɛ tɔnɛ kʋ̀rɛ a bɛlɩ dem na tɩ tone nɩ a bɛ nuru a.

²⁵ Ʋ tɩ bʋɔl'ɩ a nɩbɛ bɛ ŋa ɓã taa, lãwnɩ a bɛlɩ dem a tome na ŋmɛ̃ taa nɩ a bɛ dem a, ɛ́ yel bɛ: «Ɩ̃ bá mɩnɛ ɛ, nyɩɩm mɩŋa za bãwnɩ a na, a tõ-nʋɔr ŋa pʋɔ n'a a tɩ tɛra yi.

²⁶ Ɛcɛ nyɩ nyɛ̃ a na, bɩɩ nyɩ wõ a na: a Pol ƴɛ̀rʋ damnɛ nɩ nɩ-yaga yaga a Efɛɛzɩ ka, tɩ faar na ta n a Azi za. Ʋ ɩ na a nɩbɛ sàw kɛ́ a ŋmɩmɛ tɩ na maalɛ nɩ a tɩ nuru a, ɛ́ a bɛ ɩ ŋmɩmɛ ɩ.

²⁷ A na ɩrɛ nɩ à ŋá, bɛ kʋ̃ʋ wa cãà ƴɛ̀rɛ vla a tɩ ton ŋa ƴãw ɛ. Ɛ́ lɛb waar, a tɩ ŋmɩn-pɔw-kpɛ̃ɛ Atemisɩ yir kʋ̃ cãà tɛr yúor ɛ. Ɛ́ alɛ wa ɩ à à ŋá a, a ŋmɩn-pɔw ŋa kʋ̃ cãà tɛr yúor ɛ, ʋl bɛ na puore ɛ́ ƴãwnɛ a Azi ka nɩ a tẽ-daa za zu a.»

²⁸ Bɛ na wa wõ à ŋá a, bɛ nyɛ̃ nɩ suur ɛ́ cɩɩrɛ bɛ tɛr bɛ́rʋ daar ɛ, yere nɩ: «A Efɛɛzɩ Atemisɩ ɩ n kpɛ̃ɛ!»

²⁹ A damnʋ tɩ dam'a pàw a tẽw za. A zu-sɛbla tɩ darɛ nɩ taa zɔrɛ wɩɛr'ɩ a dɩ̃ɛnʋ yir-kpɛ̃ɛ pʋɔ. Bɛ tɩ ŋmãa na nyɔw Gayisɩ nɩ Arɩsɩtakɩ na yi Masedʋan, ɛ́ tɩ bɩɛlɛ a Pol a ʋ cɔlʋ pʋɔ a.

³⁰ A Pol tɩ ìr'a yel k'ʋʋ na cen nɩ a zu-sɛbla zie be, ɛcɛ a po-tuurbɛ tɩ piw ʋ nɩ sɔ́r.

³¹ A Azi tẽw tõ-tõ-nɩ-bɛrɛ bɛ mɩnɛ kãw, na tɩ ɩ a Pol bárɩ a, tɩ tõ na bɛ tɩ yel ʋ k'ʋʋ taa wa burbure yel k'ʋʋ cere nɩ a dɩ̃ɛnʋ yir-kpɛ̃ɛ nɛ pʋɔ ɩ.

³² A be a, ŋa mɩ́ tɩ àr'a kɔw a ʋ tɔ ɛ́ cɩɩrɛ ƴɛ̀r-bie kãw, ɛ́ a ʋ tɔ mɩ̀ vaa kɔkɔr cɩɩrɛ bʋ̃-yoru, a dɛ tɩ ɩ gɔmɛ cɩlwɩlɩ a be za! A bɛ yaga zie bɛ tɩ bãw bom nɛ ƴãw bɛ na ɓã taa mɩ̀ a ɩ.

³³ Nɩbɛ kãw, a zu-sɛbla pʋɔ, wa tɩ manɩ nɩ a yele pɛr kʋ̀ dɔɔ kãw na dɩ Alɛsãdɩr a, a Zifʋ mɩnɛ na tɩ dáa ƴãw a yele niŋé a. A Alɛsãdɩr tɩ zɛw nɩ nũu kabrɩ yel a zu-sɛbla, kɛ́ bɛ bɛr gɔmɛ ʋ tʋ̃ɔ́ manɩ a pɛr kʋ̀ bɛ.

³⁴ Ɛcɛ bɛ na wa bãw kɛ́ a Alɛsãdɩr ɩ n Zifʋ a, bɛ za tɩ lãw na cɩɩrɛ mɛ̃ nɩ-been a, tɩ ta tɛm gbele ayi. Bɛ tɩ yere na: «A Efɛɛzɩ Atemisɩ ɩ n kpɛ̃ɛ!»

³⁵ A tẽw sɛ-sɛbrɛ tɩ wa nanɩ na ɓaalɩ a nɩbɛ bɛ bɛr a gɔmɛ, ʋʋ yel bɛ: «Efɛɛzɩ tẽw nɩbɛ ɛ, ãa n'ʋ bɛ bãwnɩ a, a Atemisɩ tẽ-sõw na n'ɩ a Efɛɛzɩ a? A Atemisɩ dasule na yi a salom zu wa lo a, ãa n'ʋ mɩ̀ cãà bɛ lɛb bãwnɩ a?

³⁶ Bʋnʋ bɛ wa ka be a ka a, nyɩɩm nyɔw nyɩ tʋɔra bɛr a damnʋ, ɛ́ gù taa wa tone dãbol-tome ɩ.

³⁷ A nɩbɛ bɛ ŋa nyɩ na tɛr wa n a ka a, bɛ bɛ tɔ bʋ̃-kãw za a ŋmɩmɛ yie pʋɔ ɩ, ɛ́ bɛ lɛb tʋ a tɩ ŋmɩn-pɔw zʋm ɛ.

³⁸ Demetiriyisi nɩ a nuru tõ-tonbɛ na tu a ʋ pùor a, bom wa be bɛlɛ nɩ nɩr cara pʋɔ a, ƴɛ̀rʋ-maalʋ zie be n be, ƴɛ̀r-maalbɛ be n be, bɛ cen a be bɛ tɩ bãw a yel-mɩŋa kʋ̀ bɛ.

³⁹ Ɛ́ nyɩmɛ wa cãà tɛr bom bɔbr kɛ́ nyɩ bãw a pɛr a, a ƴɛ̀rʋ-dɩb-lãw na tu n a lɛ a na sɛw kɛ́ a tu a kʋ̀ nyɩ.

⁴⁰ A kpaa-taa ŋa tɩ na àr'ɩ a dɩ̃a a, bɛ na tʋ̃ɔ́ na yel kɛ́ a tẽw nãà ŋmɛ-lɔbrʋ n'a tɩ bɔbr. Yel-mɩŋa za bɛ ka be tɩ na tʋ̃ɔ́ manɩ wul kɛ́ a ɓã-taa ŋa sɛw na ɩ.»

⁴¹ Ʋ na wa ƴɛ̀r à à ŋá baar'a, ʋ ƴãw nɩ a zu-sɛbla bɛ yaarɩ lɛb kule.