Nɩ-toni 16 - A SƐB-SÕW

Timote páw nɩ a Pol nɩ a Sɩlasɩ

¹ A Pol tɩ ta n Dɛrbe, al pùorí ʋ ta Lɩsɩtɩr. Po-tuure kãw na dɩ Timote a tɩ be n be. A mã tɩ ɩ n Zifʋ na sàw de a Yeezu yele a, ɛ́ a sãà ɩ Gɩrɛkɩ.

² A yɛbr na tɩ kpɩɛr a Lɩsɩtɩr nɩ a Ɩkonɩɔm a tɩ pore nɩ a ʋ yúor yo-vla.

³ A Pol tɩ bɔbr'a k'ʋʋ tɛr ʋ cen nɩ, lɛ n'a ʋ tɩ de ʋ ŋmãa a yʋ̀ɔr, a Zifʋ mɩnɛ na tɩ kpɩɛr a alɩ voru nɛ pʋɔ a ƴãw. Bʋ̃ʋ n'ʋ vɛ̃, bɛ za tɩ bãwnɩ a na a ʋ sãà na ɩ Gɩrɛkɩ a.

⁴ A ten al za pʋɔ a Pol nɩ a Sɩlasɩ na mɩ́ tɩ tɔlɛ a, bɛ mɩ́ tɩ manɛ nɩ a nɛ́ɛ al za a nɩ-toni nɩ a Zerizalɛm nɩ-kore na ƴãw a, kʋ̀rɛ a nɩbɛ, ɛ́ yere kʋ̀rɛ bɛ kɛ́ bɛ tuur.

⁵ A Lãw-yie naaŋmɩn-sàwfʋ tɩ bɩrɛ na, ɛ́ a nɩbɛ na tɩ kpɩɛr pʋɔrɛ a Lãw-yie pʋɔ a tɩ yãwmɛ na dɔwlɛ bibie za.

Nyɛ́b kãw a Pol na nyɛ̃ Tʋrʋwasɩ a

⁶ A Pol nɩ a Sɩlasɩ tɩ cɔlɩ nɩ a Firizi nɩ a Galasi vuo. Bʋ̃ʋ n'ʋ vɛ̃, a Vʋʋrʋ Sõw bɛ tɩ sàw bɛ na hieri a Naaŋmɩn ƴɛ̀rʋ a Azi ɛ.

⁷ Bɛ na tɩ ta a Mizi tʋr-bɔw ƴãw a, bɛ tɩ tɩɛrɛ na kɛ́ bɛ tɔl Bitini, ɛcɛ a Yeezu Vʋʋrʋ tɩ piw bɛ nɩ sɔ́r.

⁸ Lɛ n'a bɛ tɩ tu tɔl a Mizi siw Tʋrʋwasɩ.

⁹ Tɩ̃ɩsɔw kãw, a Pol tɩ nyɛ̃ nɩ Masedʋan nɩr, ʋ àr zɛlɛ ʋ yere nɩ: «Gãw wa a Masedʋan wa sõw tɩ!»

¹⁰ A yel ŋa a Pol na tɩ nyɛ̃ a pùorí, tɩ tɩ ìr'ɩ daadaalɛ bɔbr kɛ́ tɩ lo a Masedʋan sɔ́r. Tɩɩm zie a, bʋnʋ bɛ tɩ ka be ɩ, Naaŋmɩn n'ʋ tɩ bʋɔlɛ tɩ kɛ́ tɩ cen tɩ hieri a Yel-nʋ̃ɔ̀ a be.

Lidi sàw na de a Sore Filib tẽw

¹¹ Tɩ tɩ kpɛ n gbor a Tʋrʋwasɩ, lɩɛbɩ daadaalɛ tu Samɔtɩrasɩ sɔ́r, ɛ́ a bio daarɩ́ tɩ lɩɛbɩ tu a Neyapolisɩ sɔ́r.

¹² Be n'a tɩ tɩ yi ɛ́ cen a Filib tẽw, na ɩ a Masedʋan tẽw vuo pʋɔ tẽ-kpɛ̃ɛ za, ɛ́ ɩ Ʋrɔm tẽw nɩbɛ zi-sóra a. Tɩ tɩ kpɛ n a tẽw ʋl pʋɔ kɔwrɩ blã.

¹³ A Zifʋ mɩnɛ pɩ̃ɛnʋ-bibir na wa vɩɛ a, tɩ yi n a tẽw pʋɔ lanɩ bàa kãw cen zie kãw tɩ na tɩɛrɛ kɛ́ puoru zie be n a be a. Tɩ tɩ zɩ̃ na ƴɛ̀r'ɩ pɔwbɛ na tɩ ɓã taa a be a.

¹⁴ A bɛ ƴen sob kãw, na dɩ kɛ́ Lidi a, tɩ ɩ n yɛ-yɛrɛ na kʋɔrɛ pɛn-zɩɩr, pɛn-vɩɛlɩ vɩɛlɩ a. Tɩatɩɩr'a ʋ tɩ yi, ɛ́ tu a Naaŋmɩn puoru sɔ́r. Ʋ tɩ ƴãw nɩ tobr a ƴɛ̀rʋ ƴãw, a Sore tɩ sɩrɩ na ɩ ʋ cɛlɛ a Pol ƴɛ̀rʋ zie vla.

¹⁵ Ʋ na wa de a suob, ʋlɛ nɩ a ʋ yir dem za a, ʋ bʋɔlɩ tɩ na yere nɩ: «Nyɩ na tɩɛr bãw k'ɩ̃ɩ sàw na de a Sore a, nyɩ wa kpɩɛr a ɩ̃ yir.» Ɛ́ tɩ fɛr tɩ ƴãw tɩ sàw a ʋ bʋɔlʋ.

Bɛ nyɔw nɩ a Pol nɩ a Sɩlasɩ pàw a Filib tẽw

¹⁶ Bibir kãw tɩ na tɩ cere a puoru zie a, tõ-tõ-bi-pɔwle kãw tɩ cen na tuori tɩ: Kɔ̃tɔ̃-faa na ɩ ʋ bãwnɛ nɩdaar yele a, tɩ nyɔw ʋ na, ʋʋ tɩ páwr libie yaga kʋ̀rɛ a ʋ nɩ-bɛrɛ, nɩ a nɩdaar yele ʋ na mɩ́ tɩ manɛ a.

¹⁷ Ʋ tɩ ta na tu tɩɩm nɩ a Pol, ɛ́ ŋmɩɛr cɛlsɩ yere nɩ: «Naaŋmɩn-na-do-saa-bɛ-pɩɛl-a tõ-tõ-biir'ɩ a nɩbɛ bɛ ŋa, a faafʋ sɔr'ʋ bɛ hiere kʋ̀rɛ nyɩ.»

¹⁸ Bibi-yaga n'a ʋ tɩ ɩ à à ŋá. A wa tɩ zuo nɩ a Pol ʋ lɩɛb yel a kɔ̃tɔn: «A Yeezu Kɩrɩta yúor ƴãw, ɩ̃ ƴãwnɛ nɩ nʋɔr kʋ̀rɛ fʋ: yi zaa a powle ŋa pʋɔ!» A kɔ̃tɔn tɩ yi n a pɛr nɛ pʋɔ.

¹⁹ A powle ʋl nɩ-bɛrɛ na tɩ nyɛ̃ bɛ kʋ̃ cãà páwr tɔnɛ a, bɛ nyɔw nɩ a Pol nɩ a Sɩlasɩ taw cen nɩ a nɩbɛ tuor-taa zie, a nɩ-bɛrɛ niŋé.

²⁰ Bɛ tɩ tɛr bɛ na tɩ wul a Ʋrɔm tẽw ƴɛ̀r-dɩrbɛ ɛ́ yel: «A nɩbɛ bɛ ŋa ƴãwnɛ nɩ damnʋ a tɩ tẽw pʋɔ. Bɛ ɩ n Zifʋ bʋʋrɛ,

²¹ ɛ́ wule a nɩbɛ kɛ́ bɛ tuur ɩ-ɩrɩ tɩɩm Ʋrɔm tẽw nɩbɛ na kʋ̃ tʋ̃ɔ́ sàw ɛ́ mɩ̀ kʋ̃ tʋ̃ɔ́ tuur a.»

²² Lɛ n'a a zu-sɛbla tɩ ìr lo a Pol nɩ a Sɩlasɩ zu. A ƴɛ̀r-dɩrbɛ tɩ ƴãw na bɛ yaarɩ a bɛ fɔbr ɛ́ fɔb'ɩ bɛ fʋbr.

²³ Bɛ na wa fɔb bɛ vla vla a, bɛ nyɔw bɛ na lɔb ƴãw gaso pʋɔ ɛ́ yel a gaso-gùre k'ʋʋ taa yire bɛ pùor ɛ.

²⁴ A kpãàfʋ ŋa zũú, a gaso-gùre tɩ ƴãw bɛ nɩ a gaso di-pɛ-baara pʋɔ, ɛ́ ƴãw bɛ kpule a gbɛ́ɛ ƴãw.

²⁵ A tɩ̃ɩsɔw zi-põ-zɛ̃-taa vuo pʋɔ, a Pol nɩ a Sɩlasɩ tɩ puore na yiele danɛ nɩ a Naaŋmɩn, ɛ́ a nɩ-pàwrɩ ŋmaarɛ bɛl bɛrɛ wone.

²⁶ Bɛ wa bere na a tẽsɔw kɔbr dam kpɛ̃w kpɛ̃w za, dam a gaso yir pɛr. A gaso yir pamɛ za tɩ yuori nɩ a pɛr nɛ pʋɔ, ɛ́ a nɩ-pàwrɩ za bamɛ kpa lo.

²⁷ A gaso-gùre na wa zaw ìr a, ʋ nyɛ̃ nɩ a gaso dɩ̃dɛɛ pamɛ na yuori a, lɛ n'a ʋ tɩɛr kɛ́ a nɩ-pàwrɩ yi na zɔ, ɛ́ tɩ vʋ̃ɔ a ʋ sʋɔ k'ʋʋ kʋ n ʋ tʋɔra.

²⁸ Ɛcɛ a Pol tɩ tanɩ na nɩ kɔkɔr-kpɛ̃w yel ʋ: «Taa wa nanɩ kʋrɛ fʋ tʋɔra ɩ, tɩ za be n ka!»

²⁹ A gaso-gùre tɩ ƴãw na bɛ kʋ̀ ʋ vũu, ʋ caalɩ zɔ tɩ kpɛ n a gaso pʋ̃ɔmɩ, tɩ lo gbĩ dume a Pol nɩ a Sɩlasɩ pile ɛ́ màwr ʋ za.

³⁰ Al pùorí, ʋ tɩ tɛr bɛ na yi n ɛ́ sowri bɛ: «Ɩ̃ bá mɩnɛ ɛ, bʋ̃ʋ n'ʋ a fɛr k'ɩ̃ɩ ɩ páw a faafʋ?»

³¹ Bɛ tɩ sɔw ʋ na: «Sàw de a Sore Yeezu ɛ́ fʋ na páw nɩ a faafʋ, fʋ̃ʋ nɩ a fʋ yir dem za.»

³² Lɛ n'a bɛ tɩ hieri a Sore ƴɛ̀rʋ kʋ̀ ʋ, lãwnɩ a nɩbɛ bɛl za na tɩ kpɩɛr a ʋ yir a.

³³ A ʋlɩ pɛr nɛ pʋɔ, a tɩ̃ɩsɔw-bɩ̃ɩn, a gaso-gùre tɩ tɛr bɛ na cen nɩ k'ʋʋ tɩ pɛ́w a bɛ natɩɛ. Al pùorí, ʋ tɩ de nɩ a suob daadaalɛ, ʋlɛ nɩ a ʋ nɩbɛ za.

³⁴ Ʋ tɩ tɛr'ɩ a Pol nɩ a Sɩlasɩ do n a ʋ yir tɩ ɩ bʋ̃-dɩrɩ kʋ̀ bɛ, ɛ́ ʋlɛ nɩ a ʋ yir dem za tɩ cɩlɛ, bɛ na sàw de a Naaŋmɩn a.

³⁵ A zie na wa vɩɛ a, a ƴɛ̀r-dɩrbɛ tɩ tõ n a bɛ sõw-sõwnbɛ kɛ́ bɛ tɩ yel a gaso-gùre: «Yuo a nɩbɛ bɛl bɛr!»

³⁶ A gaso-gùre tɩ yel'ɩ à ŋá kʋ̀ a Pol: «A ƴɛ̀r-dɩrbɛ tõ na yel kɛ́ bɛ yuo nyɩ bɛr. A na ɩ à ŋá a, nyɩ yi cere nɩ ƴã-ɓaarʋ!»

³⁷ Ɛcɛ a Pol tɩ sɔw na: «Tɩɩm na ɩ Ʋrɔm tẽ-biir a, nɩ-yaga niŋé n'a bɛ fɔb tɩ, ɛ́ bɛ maal'ɩ tɩ ƴɛ̀rʋ wul a tɩ sãwna ɩ, ɛ́ nyɔw tɩ pàw. Ɛ́ ƴɛrɛŋa bɛ bɔbr kɛ́ bɛ pãa sɔwlɩ yuo tɩ bɛr ɩ? A lɛ kʋ̃ ɩ ɛ! A bɛl tɛɛ za, bɛ wa yuo tɩ bɛr!»

³⁸ A ƴɛ̀r-dɩrbɛ sõw-sõwnbɛ tɩ cen na tɩ manɩ kʋ̀ a ƴɛ̀r-dɩrbɛ. Bɛ na tɩ wõ kɛ́ Ʋrɔm tẽ-biir nɛbɛ a, dɛ̃bɩ̃ɛ nyɔw bɛ na.

³⁹ Lɛ n'a bɛ tɩ wa wa yel kɛ́ bɛ sãw na. Al pùorí bɛ tɩ yuo bɛ na bɛr, ɛ́ zɛlɛ kɛ́ bɛ yi zaa a tẽw pʋɔ.

⁴⁰ A Pol nɩ a Sɩlasɩ na wa yi a gaso pʋɔ a, bɛ cen na tɩ páw a Lidi, ɛ́ nyɛ̃ a yɛbr puori bɛ ɛ́ yel kʋ̀ bɛ kɛ́ bɛ cãà ƴãw fãw. Al pùorí, bɛ tɩ lɛb'a yi cere.