Nɩ-toni 13 - A SƐB-SÕW

A Banabasɩ nɩ a Sol a Vʋʋrʋ Sõw na tõ a

¹ A Ãtɩɔsɩ Lãw-yir pʋɔ, naaŋmɩn-ƴɛ̀r-manbɛ nɩ kã-kanbɛ tɩ be n be: Banabasɩ nɩ Sɩmɩ̃ɔ bɛ na kpɔwrɛ bʋɔlɛ Nɩ-sɛbla a, Lisiisɩ na yi Sɩɩrɛn a, nɩ Manayɛn na ɩ a Galile tẽw nàle Erɔdɩ bibi-daarɩ tu-ta-tɔ a, pãa de nɩ Sol.

² Bibir kãw bɛ na tɩ ɓã taa puore a Sore, tɛr'ɩ mʋta-tuo a, a Vʋʋrʋ Sõw tɩ yel bɛ na: «Nyɩ ír a Banabasɩ nɩ a Sol bɛr mɛ̃: ɩ̃ bʋɔlɩ bɛ nɩ tõ-nʋɔr kãw ƴãw.»

³ Lɛ n'a, bɛ na tɩ tɛr a mʋta-tuo baarɩ ɛ́ puori baarɩ a, bɛ ír'ɩ nuru dɔwlɩ a bɛ zu, ɛ́ bɛr bɛ bɛ cen.

A Banabasɩ nɩ a Sol hiere nɩ a Yel-nʋ̃ɔ̀ a Sɩɩpʋr

⁴ A Vʋʋrʋ Sõw na tɩ tõ a Banabasɩ nɩ a Sol à à ŋá a, bɛ tɩ cen nɩ Selesi tɩ kpɛ gbor a be cere Sɩɩpʋr na tɩ be a kʋ̃ɔ-kpɛ̃ɛ sɔgɔ a.

⁵ Bɛ na tɩ ta a Salamɩn a, bɛ nyɔw nɩ a Naaŋmɩn ƴɛ̀rʋ hieru a Zifʋ mɩnɛ puoru-diru pʋɔ. A Zã-Markɩ tɩ be n a bɛ zie sõwne bɛ.

⁶ Bɛ tɩ yi n a be ɛ́ tu tɔl a Sɩɩpʋr tẽw ʋl za na ɩ kʋ̃ɔ-kpɛ̃ɛ-sɔgɔ-tẽw a pʋɔ, tɩ sãá Pafɔsɩ. Be n'a bɛ tɩ nyɛ̃ tɩtɩblɛ kãw na tɩ bʋɔlɛ ʋ tʋɔra naaŋmɩn-ƴɛ̀r-manɛ a. Ʋ tɩ ɩ n Zifʋ bʋʋrɛ, ɛ́ dɩ kɛ́ Baar Yeezu.

⁷ A Ʋrɔm tẽw na-kpɛ̃ɛ-lɩɛrɛ Sɛrzi-Polisɩ, na ɩ nɩr na tɛr yã a, zie n'a ʋ tɩ be. A Sɛrzi-Polisɩ tɩ bɔbr'a k'ʋʋ wõ a Naaŋmɩn ƴɛ̀rʋ, lɛ so ʋ tɩ bʋɔlɩ a Banabasɩ nɩ a Sol.

⁸ Ɛcɛ a tɩtɩblɛ Elimasɩ, — a yúor pɛr'ɩ a lɛ a gɩrɛkɩ kɔkɔr pʋɔ — tɩ piw bɛ nɩ sɔ́r, ɛ́ bɛ bɔbr k'aa na-kpɛ̃ɛ-lɩɛrɛ sàw de a Yeezu Kɩrɩta ɩ.

⁹ Lɛ n'a a Vʋʋrʋ Sõw tɩ paalɩ a Sol, mɩ̀ na dɩ kɛ́ Pol a, ʋ jɩ́r a tɩtɩblɛ gbẽgbẽ

¹⁰ ɛ́ yel: «Gɛgɛra bie ŋa, nɩ-nɛb yã nɩ po-tuolu tɛwr'a fʋ bãw, fʋ̃ʋ na ɩ yel-mɩnʋ za dɔ̃ sob a! Debor'a fʋ na bɛr a Sore pʋ-tɩɛrʋ na ɩ dẽdẽ a sãw-bɛrʋ?

¹¹ Ƴɛrɛŋa a, cɛlɛ, a Sore zɛw nɩ nũu k'ʋʋ ŋmɛ n fʋ: fʋ na zɔ̃w na tɩ ta tab kãw, ɛ́ kʋ̃ lɛb nyɛ̃ a mʋ̃tɔ̃w cãà ɩ.» Daadaalɛ, lige tɩ pili na pàw a Elimasɩ ʋ bɔblɛ viire bɔbr'ɩ tawrɛ.

¹² A na-kpɛ̃ɛ-lɩɛrɛ na tɩ nyɛ̃ à à ŋá a, ʋ sàw na de a Yeezu Kɩrɩta, bʋ̃ʋ n'ʋ vɛ̃, a kanʋ na tɩ càarɩ a Sore a, tɩ tɔ ʋ na bɛ dɩ vuo ɩ.

A Pol nɩ a Banabasɩ ta n a Ãtɩɔsɩ na be a Pisidi a

¹³ A Pol nɩ a ʋ taabɛ tɩ de nɩ a gbor a Pafɔsɩ cen Pɛrze na be Pãfili a. Be n'a a Zã-Markɩ tɩ bɛr bɛ, ɛ́ lɛb cen a Zerizalɛm.

¹⁴ A bɛl a, bɛ tɩ yi n a Pɛrze ɛ́ cen tɩ ta Ãtɩɔsɩ na be a Pisidi a. A pɩ̃ɛnʋ-bibir na wa vɩɛ a, bɛ kpɛ n a puoru-dĩó zɩ̃.

¹⁵ A kanʋ na wa kanɩ a Naaŋmɩn wulu nɩ a naaŋmɩn-ƴɛ̀r-manbɛ sɛbr pʋɔ baar'a, a puoru-dĩo nɩ-bɛrɛ tɩ ƴãw na bɛ yel bɛ: «Yɛbr i, nyɩmɛ wa tɛr sõwfʋ ƴɛ̀r-bie na tʋ̃ɔ́ ƴɛ̀r sõw a nɩbɛ a, nyɩ de a ƴɛ̀rʋ.»

¹⁶ Lɛ n'a a Pol tɩ ìr zɛw a nũu ɛ́ yel: «Ɩsɩrayɛl biir i, nɩ nyɩɩm na zɔrɛ a Naaŋmɩn a, nyɩ bɛrɛ wone.

¹⁷ A Ɩsɩrayɛl bʋʋrɛ Naaŋmɩn tɩ kaa na ír a tɩ sãàkʋm-kore. Ʋ tɩ ɩ na a ʋ nɩ-bʋʋrɛ yɛ̀r, a lɛn daar bɛ na tɩ be a Eziptɩ a, ʋʋ wa ɩ n gãdaalʋ bɛ yi a be.

¹⁸ Ʋ tɩ guoli bɛ nɩ a wɛja-kpalɛ pʋɔ tɩ ta mɛ̃ yome lɩz'a ayi a.

¹⁹ Al pùorí, ʋ tɩ kʋ n Kanãa tẽw ten ayopõi nɩbɛ pàw pɛr, ɛ́ de a bɛ ten kʋ̀ a ʋ nɩ-bʋʋrɛ bɛ so a,

²⁰ tɩ ta mɛ̃ yome kɔbr anaar dɔwlɩ lɩz'a ayi nɩ pie (450) a. A yele á ŋá pùorí, ʋ tɩ kʋ̀ bɛ nɩ ƴɛ̀r-dɩrbɛ tɩ ta n a naaŋmɩn-ƴɛ̀r-manɛ Samɩɛl daar.

²¹ A lɛn daar'a a Ɩsɩrayɛl nɩbɛ tɩ zɛlɩ nãà. A Naaŋmɩn tɩ kʋ̀ bɛ nɩ Kisɩ bidɛb Sawul na ɩ Bɛ̃zamɛ dɔwlʋ nɩr a. A Sawul tɩ dɩ n a naalʋ yome lɩz'a ayi.

²² A Naaŋmɩn na wa zawrɩ a Sawul bɛr a, ʋ ír'ɩ Daviir kʋ̀ bɛ ʋ ɩ a bɛ nãà, ʋʋ dɩ a ʋ dãsɩɛ yel: “Ɩ̃ nyɛ̃ nɩ a Zese bidɛb Daviir, a ɩ̃ yã nɩr'ʋ, ʋ na maal'ɩ a ɩ̃ pʋ-tɩɛrʋ za.”

²³ Ɛcɛ mɛ̃ a lɛ a Naaŋmɩn na tɩ ƴãw a nʋɔr a, ʋ ɩ na faarɛ yi a Daviir bʋʋrɛ pʋɔ a Ɩsɩrayɛl nɩbɛ ƴãw, ʋlɛ n'ɩ a Yeezu.

²⁴ Ʋ na bɛ tɩ wa sɛr a, a Zã tɩ de nɩ niwn hieri yel kʋ̀ a Ɩsɩrayɛl nɩbɛ kɛ́ bɛ lɩɛbɩ a bɛ ɩb ɛ́ de a suob.

²⁵ A Zã tome na tɩ ta baarʋ a, ʋ tɩ yere na: “Nyɩ tɩɛr kɛ́ ãa nɛ m? Ɩ̃ bɛ ɩ a sob nɛ nyɩ na gùre a ɩ, ɛcɛ ʋlɛ n'ɩ ŋan be a ɩ̃ pùor waar, ɩ̃ɩ bɛ sɛwnɩ na cɛ̀r a ʋ nafawr bʋ̃-'leni ɛ.”»

²⁶ «Yɛbr i, nyɩɩm na ɩ a Abraham bʋʋrɛ a, nɩ nyɩɩm na be a ka pʋɔ a Naaŋmɩn puoru pʋɔ a, tɩɩm za nɛbɛ bɛ tõ bɛ wa yel a faafʋ ƴɛ̀rʋ ŋa kʋ̀.

²⁷ A Zerizalɛm nɩbɛ nɩ a bɛ nɩ-bɛrɛ bɛ tɩ bãw a Yeezu ɛ, ɛ́ bɛ na tɩ ƴãw ʋ a kũu dɔwrʋ a, a naaŋmɩn-ƴɛ̀r-manbɛ ƴɛ̀rʋ bɛ na mɩ́ kanɛ a pɩ̃ɛnʋ-bibir za a, alɛ n'a bɛ tu.

²⁸ Bɛ na saa bɛ tɩ nyɛ̃ yel na sɛwnɩ kũu a, bɛ ƴãw na k'aa Pɩlatɩ kʋ ʋ.

²⁹ Bɛ na tɩ tu a yele al za na sɛb a ʋ ƴãw a baarɩ a, bɛ yaw ʋ nɩ a da-gara zu tɩ ũù.

³⁰ Ɛcɛ Naaŋmɩn ɩ na ʋ lɛb yi a kũu pʋɔ,

³¹ ɛ́ wul ʋ tʋɔra bibi-yaga a bɛlɩ dem na tɩ páw ʋ a Galile do a Zerizalɛm a, bɛl na ɩ a ʋ dãsɩɛ dem ƴɛrɛŋa a Ɩsɩrayɛl nɩbɛ zie a.

³² A tɩɩm mɩ̀ a, a Yel-nʋ̃ɔ̀ ŋa n'ʋ tɩ hiere kʋ̀rɛ nyɩ: a nʋɔr a Naaŋmɩn na ƴãw kʋ̀ a tɩ sãàkʋm-kore a,

³³ ʋ tu ʋ na tɩ ɓɩɩlɩ, a tɩɩm na ɩ a bɛ bibiir a ƴãw, a lɛn daar ʋ na ɩ a Yeezu ʋ lɛb yi a kũu pʋɔ, a tu mɛ̃ a lɛ bɛ na sɛb a Sɛb-sõw yielu ayi sob pʋɔ a: “Fʋ̃ʋ n'ɩ a ɩ̃ bidɛb, a mãa a, ɩ̃ dɔw fʋ nɩ a dɩ̃a.”

³⁴ A Naaŋmɩn tɩ dãw na yel k'ʋʋ na ɩ na ʋ lɛb yi a kũu pʋɔ taa wa bãwnɛ pʋ̃ɔ́fʋ ɛ. À ŋá n'a ʋ tɩ dãw ƴɛ̀r a yel ŋa ƴɛ̀rʋ: “Ɩ̃ na kʋ̀ nyɩ nɩ maalʋ na ɩ son ɛ́ bɛ tɛr bʋnʋ a, ɩ̃ na tɩ ƴãw nʋɔr k'ɩ̃ɩ na kʋ̀ n a Daviir a.”

³⁵ Lɛ so ʋ lɛb tɩ yel a Sɛb-sõw pʋɔ zie kãw: “Fʋ kʋ̃ bɛr a fʋ Nɩ-sõw ʋ pʋ̃ɔ ɩ.”

³⁶ Ɛcɛ a Daviir na tɩ tõ a ʋ daar, mɛ̃ a lɛ a Naaŋmɩn na cɔbrɩ a yele bin a, ʋ kpi n a pùorí, bɛ ũù ʋ pɩɛlɩ a ʋ sãàkʋm-kore, ʋ pʋ̃ɔ.

³⁷ Ɛcɛ a ʋlɩ sob nɛ a Naaŋmɩn na ɩ ʋ lɛb yi a kũu pʋɔ a, ʋ bɛ pʋ̃ɔ ɩ.

³⁸ Lɛ so, yɛbr i, nyɩ bãwnɩ a, a yel-bebe suur-dɩ-kʋ̀b bɛ na hieri kʋ̀ nyɩ a, a Yeezu zie n'a ʋ yi, ɛ́ a mɩnʋ nyɩ na bɛ tɩ tʋ̃ɔ́ páw a Naaŋmɩn wulu pʋɔ a Moyiir na tɩr a,

³⁹ a ʋl zie n'a nɩr za na sàw de a Naaŋmɩn a, mɩ́ páw ʋ.

⁴⁰ Nyɩ gùre nyɩ tʋɔra vla, à à ŋá a naaŋmɩn-ƴɛ̀r-manbɛ na sɛb a, taa tarɛ nyɩ ɛ:

⁴¹ “Nyɩ bɛl nyɛ̃, nyɩɩm pɔ̀lʋ dem i, nɔ-ɓãan a nyɔw nyɩ, ɛ́ nyɩ bɔr! Bʋ̃ʋ n'ʋ vɛ̃, ɩ̃ na tõ n ton a nyɩ cãafʋ daar, kɛ̀ nɩr tɩ n'ʋ manɛ kʋ̀rɛ nyɩ a, nyɩɩm bɛ sàw kɛ́ sɩza n'a ɩ.”»

⁴² Bɛ na wa yi a, a nɩbɛ zɛlɩ nɩ a Pol nɩ a Banabasɩ kɛ́ bɛ lɛb wa a pɩ̃ɛnʋ-bibir pùorí sob wa cow a ƴɛ̀rʋ ŋa.

⁴³ A nɩbɛ na wa yaarɩ baar'a, Zifʋ nɩbɛ yaga nɩ nɩ-yaga na tɩ tu a bɛ Naaŋmɩn sɔ́r a, tɩ tu n a Pol nɩ a Banabasɩ pùor. A bɛ ƴɛ̀rʋ pʋɔ a, a Pol nɩ a Banabasɩ tɩ yere na kʋ̀rɛ bɛ kɛ́ bɛ ƴãw fãw tɛr a Naaŋmɩn maalʋ vla.

⁴⁴ A pɩ̃ɛnʋ-bibir na lɛb wa ta a, a tẽw nɩbɛ za, ɛ́ tɩ cɛ blã, tɩ ɓã n taa a Sore ƴɛ̀rʋ bɛr-wob ƴãw.

⁴⁵ A Zifʋ mɩnɛ na tɩ nyɛ̃ a nɩbɛ bɛ yãwmɛ sɛw a lɛ a, nyuur tɩ ɩrɛ bɛ nɩ yaga, bɛ tɩ sɔwr a Pol ƴɛ̀rʋ tʋʋr'ɩ ʋ.

⁴⁶ Lɛ n'a a Pol nɩ a Banabasɩ pãa tɩ nyar bɛ za ɛ́ yel bɛ: «Nyɩmɛ nɛbɛ a tɩ fɛr kɛ́ tɩ de niwn manɩ a Naaŋmɩn ƴɛ̀rʋ kʋ̀, ɛcɛ nyɩ na bɛ sàwr dier a, ɛ́ nyɛ̃ nyɩ bɛ sɛwnɩ a nyɔ-vʋʋrʋ na be kʋralɛ a, tɩ cere nɩ a nɩ-bʋʋr-yoru zie.

⁴⁷ À ŋá sɩrɩ n'a a Sore ƴãw a nʋɔr kʋ̀ tɩ: “Ɩ̃ ƴãw na fʋ ɩ a nɩ-bʋʋr-yoru cãà, kɛ́ fʋ tʋ̃ɔ́ ɩ a faafʋ ta a tẽ-daa ziir za.”»

⁴⁸ A nɩ-bʋʋr-yoru nɩbɛ na tɩ wõ a ƴɛ̀r-bie á ŋá a, nʋ̃ɔ̀ tɩ ɩrɛ bɛ na, bɛ danɛ a Sore ƴɛ̀rʋ. Ɛ́ a bɛlɩ dem za, a Naaŋmɩn na tɩ bãwnɩ a nyɔ-vʋʋrʋ na be kʋralɛ a, tɩ sàw na de a Naaŋmɩn.

⁴⁹ A Sore ƴɛ̀rʋ tɩ ŋmɩɛr'a yaarɛ a zie ʋl za pʋɔ.

⁵⁰ Ɛcɛ a Zifʋ mɩnɛ tɩ dɔ na ƴãw a pɔw-tɩbr tɩbr bɛl na puore a Naaŋmɩn a, bɛlɛ nɩ a tẽw nɩ-bɛrɛ, bɛ dɔwrɛ a Pol nɩ a Banabasɩ, ɛ́ tɩ diw bɛ bɛr a bɛ tẽw pʋɔ.

⁵¹ A Pol nɩ a Banabasɩ tɩ tɛb'ɩ a bɛ gbɛ́ɛ uuru ƴãw bɛ ɛ́ cen Ɩkonɩɔm.

⁵² A po-tuurbɛ bɛl a, nʋ̃ɔ̀ tɩ ɩrɛ bɛ nɩ yaga, ɛ́ a Vʋʋrʋ Sõw tɩ be a bɛ za zie.