Nɩ-toni 11 - A SƐB-SÕW

A Pɩɛr lɛb'a wa manɩ a yele kʋ̀ a Zerizalɛm kɩrɩta-nɩbɛ

¹ A nɩ-toni nɩ a yɛbr na tɩ be a Zude a, tɩ wõ na k'aa nɩ-bʋʋr-yoru mɩ̀ sàw na de a Naaŋmɩn ƴɛ̀rʋ.

² A Pɩɛr na wa lɛb wa a Zerizalɛm a, a kɩrɩta-nɩbɛ bɛl na ŋma a yɛɛ a, tɩ ŋmɩɛr'ɩ ʋ nɩ nɔkpɛn.

³ Bɛ tɩ yere na: «Fʋ kpɛ n nɩbɛ na bɛ ŋma a yɛɛ a zie, fʋ̃ʋ nɩ bɛl lãw dɩ!»

⁴ Lɛ n'a a Pɩɛr tɩ tĩ manɩ a lɛ a yele na ɩ tu taa a kʋ̀ bɛ. Ʋ tɩ yel'a:

⁵ «Ɩ̃ tɩ be n Zope puore, wa bere ɩ̃ nyɛ̃ bʋ̃-kãw nɩr na kʋ̃ tʋ̃ɔ́ bãw a, ʋ yi a salom zu siwr. Ʋ tɩ ɩ na mɛ̃ pɛn-kpɛ̃ɛ bɛ na nyɔw a nɛ́ɛ anaar ƴãw a, ʋ tɩ yi n a salom zu ɛ́ siwr waar wa pɩɛlɩ mɛ̃.

⁶ Ɩ̃ na tɩ jɩ́rɛ ʋ gbẽgbẽ a, ɩ̃ nyɛ̃ nɩ dʋ̃-gbɛ́ɛ anaɩ, wɛ-dʋn, bʋ̃-vuri nɩ bʋ̃-pɩgɛ za a ʋ pʋɔ.

⁷ Lɛ n'a ɩ̃ tɩ wõ kɔkɔr ʋ yel mɛ̃: “Pɩɛr i, ìr nyɔw kʋ 'wɔb!”

⁸ Ɛcɛ ɩ̃ tɩ sɔw na: “Towtow Sore e, bʋ̃ʋ n'ʋ vɛ̃, ɩ̃ na cɔ̃ kɛ́ dɔw wa tɔ dɩ̃a a, bʋ̃-ciira nɩ bʋ̃-dɛwr za bɛ kpɛ ɩ̃ nʋɔrɩ́ ɛ.”

⁹ A kɔkɔr tɩ ƴɛ̀r'ɩ a salom zu a gb'a ayi sob ƴãw yel: “Bom nɛ a Naaŋmɩn na ɩ ʋ vɩɛl a, fʋ̃ʋ kʋ̃ tʋ̃ɔ́ yel k'ʋʋ ɩ n bʋ̃-dɛwr ɛ.”

¹⁰ À ŋá n'a a tɩ ɩ gb'a ata, ɛ́ a za lɛb do a salom zu.

¹¹ A pɛr nɛ pʋɔ, dɛbr ata tɩ ta n a yir nɛ pʋɔ tɩ na tɩ be a, Sezaare n'a bɛ tɩ tõ bɛ a ɩ̃ zie.

¹² A Vʋʋrʋ Sõw tɩ yel mɛ̃ na k'ɩ̃ɩ ta bʋ́nɛ ɩ, ɛ́ páw bɛ cen. A yɛbr ayʋɔb bɛ ŋa tɩ bɩɛlɩ mɛ̃ na cen nɩ a Sezaare, tɩ za tɩ kpɛ a Kɔrnɛɩ yir.

¹³ Ʋ tɩ man na kʋ̀ tɩ a lɛ ʋ na nyɛ̃ malkɩ ʋ wa a ʋ yir wa yel ʋ: “Tõ nɩr a Zope, ʋ tɩ bʋɔlɩ Sɩmʋ̃ bɛ na bʋɔlɛ Pɩɛr a.

¹⁴ Ʋ na wa manɩ nɩ yele na na faa fʋ̃ʋ nɩ a fʋ yir dem za a kʋ̀ b.”

¹⁵ Ɩ̃ tɩ tine nɩ a ƴɛ̀rʋ wa báarɛ, a Vʋʋrʋ Sõw siw a bɛ zu, mɛ̃ a lɛ ʋ na tɩ siw a tɩ zu a pɛr-tib daar a.

¹⁶ Lɛ n'a ɩ̃ tɩ lɛb tɩɛrɩ a ƴɛ̀rʋ ŋa a Sore na ƴɛ̀r a: “Kʋ̃ɔ n'a a Zã tɩr'ɩ a suob, ɛcɛ nyɩɩm a, Vʋʋrʋ Sõw pʋɔ n'a nyɩ na de a suob.”

¹⁷ A Naaŋmɩn wa kʋ̀ bɛ a maalʋ been nɛ tɩ na tɩ páw, a lɛn daar tɩ na sàw de a Sore Yeezu Kɩrɩta yele a, mãa mɩ̀ n'ɩ anʋ na yel kɛ́ a Naaŋmɩn ta ɩ a lɛ?»

¹⁸ Bɛ na tɩ wõ a ƴɛ̀r-bie á ŋá a, bɛ tɩ lɛb'a nyɔw bɛ tʋɔra ɛ́ danɛ a Naaŋmɩn yere nɩ: «A na ɩ à ŋá a, a Naaŋmɩn mɩ̀ sɩrɩ na kʋ̀ a nɩ-bʋʋr-yoru a fãw kɛ́ bɛ mɩ̀ lɩɛbɩ a bɛ ɩb páw a nyɔ-vʋʋrʋ.»

A Ãtɩɔsɩ tẽw Lãw-yir yele

¹⁹ A dɔwrʋ na tɩ wa a Ɩtɩɛn kũu daar a, tɩ ɩ na a sàw-dierbɛ zɔ yaarɩ, bɛ mɩnɛ zɔ tɩ sãá Fenisi, Sɩɩpʋr nɩ Ãtɩɔsɩ. Ɛcɛ a ten á ŋá pʋɔ a, Zifʋ mɩnɛ tɛwr zie n'a bɛ tɩ hiere a Naaŋmɩn ƴɛ̀rʋ.

²⁰ Ɛcɛ a bɛ mɩnɛ na yi Sɩɩpʋr nɩ Sɩɩrɛn ten a na wa ta a Ãtɩɔsɩ a, bɛ mɩ̀ tɩ hiere nɩ a Sore Yeezu Yel-nʋ̃ɔ̀ kʋ̀rɛ a Gɩrɛkɩ mɩnɛ.

²¹ A Sore tɩ tɩɛ bɛ na tɛr kpɛ̃w za a bɛ Yel-nʋ̃ɔ̀ hieru tome pʋɔ, lɛ so nɩ-yaga tɩ lɩɛbɩ a bɛ ɩb ɛ́ sàw de a Sore.

²² A Zerizalɛm Lãw-yir dem na wa wõ a yel ŋa a, bɛ kaa na ír Banabasɩ tõ a Ãtɩɔsɩ.

²³ A Banabasɩ na tɩ ta a Ãtɩɔsɩ nyɛ̃ a lɛ a Naaŋmɩn na maalɩ a nɩbɛ bɛ ŋa a, nʋ̃ɔ̀ kpɛ ʋ na. Lɛ n'a ʋ tɩ kpaalɛ bɛ, kɛ́ bɛ za ƴãw fãw tu a Sore pùor nɩ a bɛ pʋɔ za.

²⁴ A Banabasɩ tɩ ɩ n nɩ-vla, ʋ tɩ tɛr'ɩ naaŋmɩn-sàwfʋ, ɛ́ a Vʋʋrʋ Sõw tɩ be a ʋ zie. Nɩ-yaga yaga tɩ sàw na de a Sore.

²⁵ Lɛ n'a a Banabasɩ tɩ cen a Tarsɩ k'ʋʋ tɩ tɛr a Sol wa n.

²⁶ Ʋ tɩ nyɛ̃ ʋ nɩ a be, tɛr ʋ wa n a Ãtɩɔsɩ, bɛ wa lãw tõ yũon-ɓil a Ãtɩɔsɩ Lãw-yir pʋɔ, kanɩ nɩ nɩ-yaga. A Ãtɩɔsɩ n'a bɛ tɩ zànɩ bʋɔlɩ a po-tuurbɛ kɛ́ kɩrɩta-nɩbɛ.

²⁷ A alɩ bibie nɛ pʋɔ, naaŋmɩn-ƴɛ̀r-manbɛ tɩ yi n Zerizalɛm ɛ́ siw wa a Ãtɩɔsɩ.

²⁸ Vʋʋrʋ Sõw tɩ caal'ɩ a bɛ ƴen sob, na dɩ kɛ́ Agabisɩ a, ʋ yel kɛ́ kɔ̃-kpɛ̃ɛ kʋ̃ yaa kɛ́ lo a tẽ-daa za zu ɛ. A kɔ̃ ʋl wa sɩrɩ na lo a Ʋrɔm tẽw na-kpɛ̃ɛ Kuloor daar.

²⁹ Lɛ n'a a po-tuurbɛ tɩ yel kɛ́ ŋa za na mɩ́ tɩr'ɩ lɛ ʋ na tʋ̃ɔ́ a, ɛ̀ bɛ tɩr sõwfʋ kʋ̀ a yɛbr na kpɩɛr a Zude a.

³⁰ A lɛ n'a bɛ tɩ ɩ, ɛ́ de a bɛ bome ƴãw Banabasɩ nɩ Sol nuru pʋɔ, kɛ́ bɛ tɩ kʋ̀ a Zude tẽw nɩ-kore.