Nɩ-toni 10 - A SƐB-SÕW

A Kɔrnɛɩ na tõ bʋɔlɩ a Pɩɛr a

¹ Dɛb kãw tɩ be n a Sezaare a yúor dɩ kɛ́ Kɔrnɛɩ. Ʋ tɩ ɩ n sojarɩ kʋba nɩ-kpɛ̃ɛ, a Ʋrɔm sojarɩ bɛl bɛ na bʋɔlɛ Ɩtali sojarɩ a pʋɔ.

² Ʋlɛ nɩ a ʋ yir dem za tɩ zɔrɛ na ɛ́ ƴãwnɛ a Naaŋmɩn. Ʋ tɩ sõwne nɩ a Zifʋ mɩnɛ nɩ-kɔmɛ bɛ dɩ vuo ɩ, ɛ́ puore a Naaŋmɩn kʋralɛ.

³ Bibir kãw, a na tɩ cen man zaanʋɔra gbele ata daar a, ʋ tɩ càar'a nyɛ̃ Naaŋmɩn malkɩ ʋ wa kpɛ a ʋ zie bʋɔl'ʋ yel: «Kɔrnɛɩ i!»

⁴ A Kɔrnɛɩ tɩ jɩ́r ʋ nɩ gbẽgbẽ, ɛ́ dɛ̃bɩ̃ɛ nyɔw ʋ, ʋ sɔw: «Ɛ́ bʋnʋ, Sore e?» A malkɩ tɩ lɛb yel ʋ: «Naaŋmɩn nyɛ̃ nɩ a lɛ fʋ na sõwne a nɩbɛ a, ʋ sàw na de a fʋ puoru, ʋ bɛ yiiri fʋ bɛr ɛ.

⁵ Ƴɛrɛŋa a, tõ nɩbɛ a Zope bɛ tɩ tɛr nɩr kãw na dɩ Sɩmʋ̃, ɛ́ bɛ bʋɔlɛ Pɩɛr a, wa n.

⁶ Ʋ be n nɩr kãw mɩ̀ na dɩ kɛ́ Sɩmʋ̃ a yir. A Sɩmʋ̃ ŋa ʋl nɔnɛ́ nɩ gamɛ ɛ́ a ʋ yir be a kʋ̃ɔ-kpɛ̃ɛ nʋɔr.»

⁷ A malkɩ na tɩ ƴɛ̀rɛ a ʋ zie a, na wa cen baar'a, daadaalɛ a, a Kɔrnɛɩ bʋɔl'ɩ a ʋ yir nɩbɛ ayi de nɩ soja kãw na nɔnɛ puoru ɛ́ be a ʋ zie koro za a,

⁸ wa manɩ a za kʋ̀ bɛ ɛ́ tõ bɛ a Zope.

⁹ A bio daarɩ́, bɛ na tɩ lo a sɔ́r pɩɛlɛ a Zope a, a Pɩɛr ʋl tɩ do n a gàrʋ́ k'ʋʋ tɩ puori. A tɩ manɛ na mɛ̃ gbãgbãw daar a.

¹⁰ Kɔ̃ tɩ kpɩɛr'ɩ a Pɩɛr ʋ bɔbr k'ʋʋ dɩ. Bɛ tɩ cãà na ɩrɛ a ʋ bʋ̃-dɩrɩ, ɛ́ wa bere ʋ nyɛ̃ bʋ̃-nyɛra.

¹¹ Ʋ tɩ nyɛ̃ nɩ a salom ʋ yuo, bom kãw nɩr na kʋ̃ tʋ̃ɔ́ bãw a, tɩ yi n a salom zu siwr a tẽw. Ʋ tɩ ɩ na mɛ̃ pɛn-kpɛ̃ɛ kpɛ̃ɛ bɛ na nyɔw a nɛ́ɛ anaar ƴãw, ɛ́ bɛr ʋ siwr a tẽw a.

¹² Dʋ̃-pɛ-bʋʋrɛ za tɩ be n a ʋ pʋɔ: a bʋ̃-gbɛ́ɛ anaɩ, a bʋ̃-vuri nɩ a bʋ̃-pɩgɛ.

¹³ Kɔkɔr tɩ yel'ɩ a Pɩɛr: «Pɩɛr i, ìr nyɔw kʋ 'wɔb!»

¹⁴ A Pɩɛr tɩ sɔw na: «Towtow Sore e, bʋ̃ʋ n'ʋ vɛ̃, ɩ̃ na cɔ̃ kɛ́ dɔw a, ɩ̃ bɛ dãw dɩ bʋ̃-dɩ-ciira ɩ, bɩɩ bʋ̃-dɩ-dɛwr ɛ.»

¹⁵ A kɔkɔr tɩ lɛb'a ƴɛ̀r a ʋ zie a gb'a ayi sob ƴãw yel: «Bom Naaŋmɩn na ɩ ʋ vɩɛl a, fʋ̃ʋ kʋ̃ tʋ̃ɔ́ yel k'ʋʋ ɩ n bʋ̃-dɛwr ɛ!»

¹⁶ A tɩ ɩ n à à ŋá tɩ ta gb'a ata, ɛ́ a bom nɛ lɛb do a salom zu daadaalɛ.

¹⁷ A Pɩɛr tɩ cãà na zɩ̃ tɩɛrɛ bɔbr k'ʋʋ bãw a bʋ̃-nyɛra ŋa pɛr, ɛ́ tɩ bãwnɛ guur. Ʋ wa bere na, a nɩbɛ a Kɔrnɛɩ na tõ a, sowri bãw a Sɩmʋ̃ yir zie wa ta àr a dɩ̃dɔrɩ́.

¹⁸ Bɛ tɩ bʋɔl'a sowri: «Sɩmʋ̃ bɛ na bʋɔlɛ Pɩɛr a, a yir ŋa pʋɔ n'a ʋ kpɩɛr'ɩ?»

¹⁹ A Pɩɛr tɩ cãà na su zu tɩɛrɛ a ʋ bʋ̃-nyɛra. A Vʋʋrʋ Sõw tɩ yel ʋ na: «Dɛbr ata n'ɩ bɛ ŋa na àr sowre fʋ a,

²⁰ siw a ƴɛrɛŋa páw bɛ lo a sɔ́r. Ta bʋ́nɛ ɩ, mãa n'ʋ tõ bɛ.»

²¹ A Pɩɛr tɩ siw nɩ a nɩbɛ bɛl zie tɩ yel bɛ: «Nyɩ nyɛ̃ m. Mãa n'ɩ a sob nɛ nyɩ na bɔbr a. Bʋ̃ʋ ƴãw n'a nyɩ wa?»

²² Bɛ tɩ sɔw na yel: «A sojarɩ kʋba nɩ-kpɛ̃ɛ ʋl na dɩ Kɔrnɛɩ a, ʋlɛ n'ʋ tõ tɩ. Ʋ ɩ n nɩ-mɩŋa, ʋ zɔrɛ nɩ Naaŋmɩn, ɛ́ a Zifʋ mɩnɛ za mʋʋrɛ ʋ. Malkɩ sõw wa na wa yel k'ʋʋ tõ bʋɔlɩ fʋ a ʋ yir, fʋ wa manɩ yele ʋ bɛr wõ.»

²³ A Pɩɛr tɩ tɛr bɛ na kpɛ n tɩ tɛr bɛ a sãanʋ. A bio daarɩ́ tɔr za, bɛlɛ nɩ a Pɩɛr tɩ yi na lo a sɔ́r. A Zope tẽw kɩrɩta-nɩbɛ bɛ mɩnɛ tɩ bɩɛl'ɩ a Pɩɛr.

²⁴ A deyere daarɩ́, bɛ tɩ ta n a Sezaare. A Kɔrnɛɩ nɩ a ʋ yir dem za, lãwnɩ a ʋ bá-túor ʋ na tɩ bʋɔlɩ a, tɩ gùre bɛ na.

²⁵ A Pɩɛr na tɩ tarɛ a Kɔrnɛɩ yir a, a Kɔrnɛɩ ìr'a tuor'ʋ, tɩ lo gbĩ dume a ʋ pile puor'ʋ.

²⁶ Ɛcɛ a Pɩɛr tɩ nyɔw ʋ na ʋ lɛb ìr, ʋʋ yel: «Ìr, a mãa mɩ̀ a, nɩsaal tɛwr nɛ m.»

²⁷ Lɛ n'a ʋ tɩ cãà ƴɛ̀rɛ nɩ a Kɔrnɛɩ tɩ kpɛ n a dĩó, nyɛ̃ nɩ-yaga bɛ ɓã taa.

²⁸ Ʋ tɩ yel bɛ na: «Nyɩ bãwnɩ a na, a bɛ sɛw kɛ́ Zifʋ bʋʋrɛ nɩ nɩ-bʋʋr-yoru nɩr cere tʋɔr taa ɩ, a mɩ̀ bɛ sɛw kɛ́ Zifʋ bʋʋrɛ kpɛ nɩ-bʋʋr-yoru yir ɛ. Ɛcɛ daar tɛwr, Naaŋmɩn daar wul mɛ̃ na kɛ́ a bɛ tɛr sɔ́r k'ɩ̃ɩ yel kɛ́ nɩr ɩ n nɩ-ciira bɩɩ nɩ-dɛwr ɛ.

²⁹ Alɛ n'a so, fʋ na tõ kɛ́ bɛ bʋɔlɩ mɛ̃ a, ɩ̃ ìr wa daadaalɛ. Ɛcɛ ɩ̃ pãa bɔbr'a k'ɩ̃ɩ bãw a fʋ bʋɔlʋ pɛr.»

³⁰ Lɛ n'a a Kɔrnɛɩ tɩ de a ƴɛ̀rʋ yel: «Bibie ata n'ɩ à ŋá, à à ŋá tɔ won, zaanʋɔra gbele ata sãw, ɩ̃ tɩ be n a ɩ̃ yir puore, wa bere nɩr kãw na su fɔbr na nyɩwrɛ a, wa àr a ɩ̃ niŋé,

³¹ ɛ́ yel mɛ̃: “Kɔrnɛɩ i, Naaŋmɩn wõ n a fʋ puoru, ʋ bɛ yiiri a fʋ nɩ-kɔmɛ sõwfʋ bɛr ɛ.

³² Tõ nɩr a Zope ʋ tɩ bʋɔlɩ a Sɩmʋ̃ bɛ na bʋɔlɛ Pɩɛr a, ʋ wa a ka. Sɩmʋ̃ na nɔnɛ́ gamɛ a, ɛ́ kpɩɛr a kʋ̃ɔ-kpɛ̃ɛ nʋɔr a, ʋl yir'a ʋ be.”

³³ A pɛr nɛ pʋɔ, ɩ̃ tõ na kɛ́ bɛ wa tɛr fʋ wa n, ɛ́ fʋ sɩrɩ sàw a ɩ̃ bʋɔlʋ wa a tɩ zie ka. Ƴɛrɛŋa a, tɩ za n'ɩ bɛ ŋa a Naaŋmɩn niŋé, kɛ́ tɩ bɛr wõ bom nɛ a Sore na ƴãw kɛ́ fʋ yel kʋ̀ tɩ a.»

A ƴɛ̀rʋ a Pɩɛr na ƴɛ̀r a Kɔrnɛɩ yir a

³⁴ Lɛ n'a a Pɩɛr pãa tɩ de a ƴɛ̀rʋ yel: «Ɩ̃ pãa nyɛ̃ nɩ yel-mɩŋa kɛ́ Naaŋmɩn bɛ owre a nɩbɛ a ʋ ɩb pʋɔ ɩ:

³⁵ bʋʋrɛ nɛ kãw za pʋɔ, nɩr na zɔrɛ ʋ ɛ́ tuur a yel-mɩnʋ a, a ʋ yele mɩ́ nʋmɛ nɩ a Naaŋmɩn zie.

³⁶ Ʋ tɩr'ɩ a ʋ ƴɛ̀rʋ kʋ̀ a Ɩsɩrayɛl bibiir, kɛ́ a Yeezu Kɩrɩta wa yel a ƴã-ɓaarʋ Yel-nʋ̃ɔ̀ kʋ̀ bɛ: a Yeezu na ɩ a nɩsaalbɛ za Sore a.

³⁷ Nyɩ bãw nɩ a yel ʋl na ɩ a Zifʋ mɩnɛ tẽw za pʋɔ a, a Galile a na tĩ a pɛr a Zã suob hieru pùorí a:

³⁸ a Nazarɛtɩ Yeezu yele, Naaŋmɩn paal'ʋ na nɩ a Vʋʋrʋ Sõw fãw. Be za ʋ na mɩ́ tɩ tɔlɛ a, ʋ mɩ́ tɩ maalɛ nɩ a nɩbɛ vla, ɛ́ sanɛ a bɛlɩ dem na be a Gɛgɛra gbãgbaalʋ pʋɔ a. Naaŋmɩn tɩ sɩrɩ na be a ʋ zie.

³⁹ Ɛ́ a tɩɩm a, tɩ nyɛ̃ nɩ a tome ʋ na tõ a Zifʋ mɩnɛ tẽw nɩ a Zerizalɛm a, tɩ dɩ n a tome á ŋá dãsɩɛ. A ʋl bɛ na tɩ nyɔw yawlɩ da-gara zu kʋ a,

⁴⁰ Naaŋmɩn ɩ na ʋ lɛb yi a kũu pʋɔ, a ʋ kũu bibie ata sob, ɛ́ ɩ ʋ wul ʋ tʋɔra.

⁴¹ Ɛcɛ ʋ bɛ wul ʋ tʋɔra a Ɩsɩrayɛl nɩbɛ za ɩ, ʋ wul'ɩ ʋ tʋɔra a dãsɩɛ dem bɛl a Naaŋmɩn na tɩ dãw kaa ír a, a tɩɩm na lãw nɩ ʋ dɩ ɛ́ nyũ a ʋ kũu-pʋɔ-lɛb-yibu pùorí a.

⁴² Ʋ ƴãw nɩ nʋɔr kʋ̀ tɩ kɛ́ tɩ hiere kʋ̀rɛ a Ɩsɩrayɛl nɩbɛ, ɛ́ dɩrɛ a dãsɩɛ kɛ́ ʋlɛ n'ʋ a Naaŋmɩn kaa ír, k'ʋʋ wa dɩ n a nɩ-vʋʋrɩ nɩ a nɩ-kũuni a ƴɛ̀rʋ.

⁴³ A naaŋmɩn-ƴɛ̀r-manbɛ za dɩ n a dãsɩɛ ŋa a ʋ ƴãw: nɩr za, na sàw de a ʋ yele a, na páw nɩ a yel-bebe suur a ʋ yúor ƴãw.»

Nɩ-bʋʋr-yoru mɩ̀ páw nɩ a Vʋʋrʋ Sõw

⁴⁴ A Pɩɛr tɩ cãà na ƴɛ̀rɛ wa bere, a Vʋʋrʋ Sõw siw a bɛlɩ dem za na tɩ bɛrɛ wone a ʋ ƴɛ̀rʋ a zu.

⁴⁵ A kɩrɩta-biir bɛl na ɩ a Zifʋ bʋʋrɛ nɩbɛ ɛ́ bɩɛlɩ a Pɩɛr wa n a, nɔ-ɓãa tɩ nyɔw bɛ nɩ yaga, a nɩ-bʋʋr-yoru mɩ̀ na tɩ páw a Vʋʋrʋ Sõw a ƴãw.

⁴⁶ Bɛ tɩ sɩrɩ na wone bɛ ƴɛ̀rɛ ƴɛ̀r-pɛ-bʋʋrɛ kãw, ɛ́ danɛ a Naaŋmɩn kpɛnʋ. Lɛ n'a a Pɩɛr tɩ yel:

⁴⁷ «Ãa n'ʋ na tʋ̃ɔ́ sɩb a suob kʋ̃ɔ, ɛ́ yel kɛ́ a nɩbɛ bɛ ŋa ta de a suob, bɛl na páw a Vʋʋrʋ Sõw mɛ̃ a tɩɩm a?»

⁴⁸ Ʋ tɩ ƴãw na bɛ kʋ̀ bɛ a suob a Yeezu Kɩrɩta yúor ƴãw. A nɩbɛ bɛl tɩ zɛlɩ nɩ a Pɩɛr k'ʋʋ kpɛ a be bibie blã.