Neemi 8 - A SƐB-SÕW

^1-2 A cuw bibi-dãw-niwn sob, bɛ tɩ ɓã n taa mɛ̃ nɩ-been a, a Zerizalɛm, a zie ʋl na tori a Kʋ̃ɔnɩ dɩ̃dɔr a. Bɛ tɩ yel'ɩ a bàwr-maalɛ Ɛsɩdɩrasɩ, na ɩ a Naaŋmɩn wulu bãw-bãw-kara a, k'ʋʋ de a wulu sɛbɛ wa n, a wulu a Sore na tɩ ƴãw a Moyiir kʋ̀ a Ɩsɩrayɛl nɩbɛ a. A Ɛsɩdɩrasɩ tɩ de ʋ na wa n a lãw nɩbɛ na ɩ dɛbr, pɔwbɛ nɩ a bibiir bɛl na na tʋ̃ɔ́ wõ a ƴɛ̀rʋ a niŋé.

³ A Ɛsɩdɩrasɩ tɩ àr'ɩ a zie nɛ na tori a Kʋ̃ɔnɩ dɩ̃dɔr a, ɛ́ kanɩ a sɛbɛ pʋɔ, a zi-wɛl-paala tɩ ta a mʋ̃tɔ̃w na do põ-zɛ̃-taa a, a dɛbr, a pɔwbɛ nɩ a bibiir bɛl na na tʋ̃ɔ́ wõ a ƴɛ̀rʋ a niŋé. A nɩbɛ za tɩ maal'a bɛrɛ wone a kanʋ ŋa.

⁴ A Ɛsɩdɩrasɩ tɩ àr'ɩ gboro zu bɛ na maal'ɩ dàar a yel ŋa ƴãw a. Matitɩa, Sema, Anaya, Uriya, Hɩlkɩa nɩ Maaseya tɩ àr'ɩ a ʋ dʋrʋ lowr, ɛ́ Pedaya, Mɩkayɛl, Malkɩa, Hasum, Hasɩbadana, Zekarɩa nɩ Mesulam àr a ʋ gʋba lowr.

⁵ A na ɩ lɛ a, a Ɛsɩdɩrasɩ tɩ àr'a do zuo a lãw nɩbɛ. Ʋ na wa yuo a sɛbɛ a, a nɩbɛ za nyɛ̃ ʋ na ɛ́ ìr àr.

⁶ A Ɛsɩdɩrasɩ tɩ puor'ɩ a Sore, a Naaŋmɩn, na ɩ kpɛ̃ɛ a yãanɩ, a nɩbɛ za zɛw a nuru ɛ́ sɔw: «Amɛn! Amɛn!» Al pùorí bɛ gbĩ dume gũu tɩ tɔ tẽw puori a Sore.

⁷ Bɛ tɩ lɛb'a ìr, ɛ́ a levitɩ mɩnɛ bɛ ŋa: Yesua, Bani, Serevɩa, Yamin, Akuvʋ, Sabɩtaɩ, Hodiya, Maaseya, Kelita, Azarɩa, Yozavadɩ, Hanan nɩ Pelaya tĩ manɛ a Naaŋmɩn wulu kʋ̀rɛ bɛ.

⁸ Bɛ tɩ kanɛ nɩ a Naaŋmɩn wulu sɛbɛ pʋɔ, kanɛ welwel íre nɩ a pɛr, kɛ́ ŋa za mɩ́ tʋ̃ɔ́ wõ a ʋlɩ bom nɛ bɛ na kanɩ a.

⁹ A lãw nɩbɛ za na tɩ wõ a Naaŋmɩn wulu ƴɛ̀rʋ a, bɛ tɩ kone na. Alɛ n'a so a na-kpɛ̃ɛ-lɩɛrɛ Neemi, a bàwr-maalɛ Ɛsɩdɩrasɩ na ɩ a Naaŋmɩn wulu bãw-bãw-kara a, nɩ a levitɩ mɩnɛ na tɩ íre a kanʋ pɛr a, tɩ yel bɛ za à ŋá: «A Sore nyɩ Naaŋmɩn so a bibir ŋa! Pʋ-sãwna nɩ kon bibir bɛ n'ʋ ɛ.»

¹⁰ A Ɛsɩdɩrasɩ tɩ yel'a ƴãw pʋɔ: «Nyɩ kul tɩ dɩ bʋ̃-dɩ-vɩɛlɩ, nyɩ tɩ nyũ dã-nʋʋr, ɛ́ a bɛlɩ dem na bɛ cɔbrɩ bom a, nyɩ ɩ a bɛ dem kʋ̀ bɛ, bʋ̃ʋ n'ʋ vɛ̃, a tɩ Sore so a bibir ŋa! Nyɩ ta tɛr pʋ-sãwna ɩ! A nʋ̃ɔ̀ na yi a Sore zie a n'ɩ a nyɩ fãw.»

¹¹ A levitɩ mɩnɛ tɩ ɓaalɛ nɩ a nɩbɛ yere nɩ: «Nyɩ bɛr a kon! A Naaŋmɩn so a bibir ŋa. Nyɩ ta tɛr pʋ-sãwna ɩ!»

¹² Lɛ n'a bɛ za tɩ kul a bɛ yie pʋɔ kɛ́ bɛ tɩ dɩ kɛ́ nyũ. Bɛ tɩ lãw nɩ nɩ a bɛlɩ dem na bɛ tɛr bom a, ɛ́ tɩ maalɩ cuw-kpɛ̃ɛ. Bʋ̃ʋ n'ʋ vɛ̃, bɛ tɩ wõ n a ƴɛ̀rʋ bɛ na ƴɛ̀r kʋ̀ bɛ a vla.

A Sɛwr cuw maalʋ

¹³ A bio daarɩ́ a, a Ɩsɩrayɛl yie nɩ-bɛrɛ za, a bàwr-maalbɛ nɩ a levitɩ mɩnɛ tɩ ɓã n taa a Ɛsɩdɩrasɩ na ɩ a Naaŋmɩn wulu bãw-bãw-kara a zie, kɛ́ bɛ bãw a Naaŋmɩn wulu ƴɛ̀rʋ pɛr vla.

¹⁴ A wulu ŋa a Naaŋmɩn na tɩ ƴãw a Moyiir kʋ̀ bɛ a pʋɔ a, bɛ tɩ nyɛ̃ na bɛ sɛb k'aa fɛr'a k'aa Ɩsɩrayɛl nɩbɛ kpɩɛr sɛwr pʋɔ a sɛwr cuw maalʋ daar, a cuwr ayopõi sob daar:

¹⁵ a mɩ́ tɩ fɛr'a kɛ́ bɛ ɩ a nɩbɛ za bãw, ɛ́ bɛ hieri a tẽ-bɛrɛ za pʋɔ tɩ lãw nɩ a Zerizalɛm, yel à ŋá: «Nyɩ yi do a tãw zu tɩ kar olivʋ tɩɩr bɛ na sɛl a nɩ olivʋ tɩɩr na bʋnɩ bul a mʋ̃ɔ pʋɔ a wuli, mɩrtɩ tɩɩr wuli, kpãkparmɛ tɩɩr wuli nɩ tɩ-zimpiri zimpiri wuli wa n, wa maal'ɩ sɛwr mɛ̃ a lɛ bɛ na sɛb a.»

¹⁶ Lɛ n'a a Ɩsɩrayɛl nɩbɛ tɩ cen tɩ kar a wuli wa maal'ɩ a sɛwr a bɛ garɛ zu, bɩɩ a bɛ davʋrɩ pʋɔ, bɩɩ a Ŋmɩn-yir-kpɛ̃ɛ davʋrɩ pʋɔ, nɩ a ziir al na tori a Kʋ̃ɔnɩ dɩ̃dɔr nɩ a Efarayim dɩ̃dɔr a.

¹⁷ A bɛlɩ dem za na tɩ ɓã taa a be a, a bɛl na tɩ yi a diw-cenu zie lɛb wa a, tɩ maal'ɩ sɛwr kpɩɛr. A tɩ ɩrɛ nɩ nʋ̃ɔ̀ yaga za, bʋ̃ʋ n'ʋ vɛ̃, a Nun bidɛb Zozue daar za n'a a Ɩsɩrayɛl nɩbɛ bɛ lɛb tɩ maalɩ a cuw ŋa ɩ.

¹⁸ A cuw bibir za, a dãw-niwn sob tɩ tɔ a pɛ-baara, bɛ mɩ́ tɩ kanɩ nɩ a Naaŋmɩn wulu sɛbɛ zie kãw. Bɛ tɩ dɩ n a cuw bibie ayopõi, ɛ́ kʋ a nʋɔr a bibie ani sob nɩ lãw kpɛ̃ɛ, mɛ̃ a lɛ a tub na ƴãw a.