Neemi 5 - A SƐB-SÕW

A Neemi ír'ɩ a nɛb-taa na be a nɩbɛ cara pʋɔ a bɛr

¹ Bibir kãw, a Zifʋ dɛbr nɩ pɔwbɛ bɛ mɩnɛ tɩ zɛbr'ɩ nɩ a bɛ yɛbr Zifʋ bɛ mɩnɛ.

² Bɛ mɩnɛ tɩ yere na: «Tɩɩm nɩ a tɩ bidɛbr nɩ a tɩ pɔwyaar yãwmɛ nɩ yaga. Tɩ bɔbr'a kɛ́ tɩ nãá páw ble tʋ̃ɔ́ dɩ cãà vʋʋrɛ.»

³ Bɛ mɩnɛ yere: «Tɩmɛ wa bɔbr kɛ́ tɩ páw ble a kɔ̃ daar a, a fɛr'a kɛ́ tɩ de a tɩ póru, a tɩ divɛ̃ tɩɩr nɩ a tɩ yie tɛɛ za tɩr, a ɩ san bom sɛr.»

⁴ Bɛ mɩnɛ tɩ cãà na yere: «A nãà samɛ yab ƴãw a, a fɛr'a kɛ́ tɩ pɛ̃w libir ƴãw a tɩ póru nɩ a tɩ divɛ̃ tɩɩr póru ƴãw.

⁵ Ɛcɛ tɩ za ɩ n nɩ-bʋʋr-been! Ɛ́ a tɩ bibiir nɩ a bɛ bibiir za ɩ been! Ɛcɛ a mɩ́ fɛr'a tɩ de a tɩ bibiir tɩr bɛ ɩ gbãgbaar. A tɩ pɔwyaar bɛ mɩnɛ ɩ n a gbãgbaar baarɩ, a bɛ tɛr tɩ ɩb ɛ, bʋ̃ʋ n'ʋ vɛ̃, nɩ-yoru so nɩ a tɩ póru nɩ a tɩ divɛ̃ tɩɩr póru baarɩ.»

⁶ Ɩ̃ na tɩ wõ a ƴɛ̀rʋ á ŋá nɩ a kon á ŋá a, ɩ̃ nyɛ̃ nɩ suur yaga za.

⁷ Ɩ̃ tɩ yel'a k'ɩ̃ɩ na yere nɩ a nɩ-yée nɩ a nɩ-bɛrɛ. Ɩ̃ tɩ yel bɛ na: «Nyɩ tuo nɩ a nyɩ bʋʋrɛ nɩbɛ tuor na tɩbrɛ zuo a!» Al pùorí ɩ̃ bʋɔlɩ bɛ kpaa-ta-kpɛ̃ɛ ƴãw.

⁸ Ɩ̃ tɩ yel bɛ na: «Mɛ̃ a lɛ a tɩ fãw na ta a, tɩ ya na de a tɩ bʋʋrɛ nɩbɛ na tɩ kʋɔrɩ bɛ tʋɔra kʋ̀ nɩ-bʋʋr-yoru a. Ɛcɛ nyɩɩm kʋɔrɛ nɩ a nyɩ yɛbr nɩ a nyɩ yeepuuli, ɛ́ a ɩ Zifʋ yoru zie n'a nyɩ kʋɔrɛ bɛ!» Bɛ bɛ tɩ nyɛ̃ ƴɛ̀rʋ za na ƴɛ̀r a ka ɩ, ɛ́ ɩ gbili.

⁹ Ɩ̃ tɩ lɛb'a yel: «À ŋá nyɩ na ɩrɛ a, a bɛ vɩɛl ɛ! A bɛ tɩ fɛr kɛ́ nyɩ tɛr a tɩ Naaŋmɩn zɔba, a nɩ-bʋʋr-yoru na ɩ a tɩ dɔ̃ dem a ta tʋʋr tɩ zʋmɛ ɩ?

¹⁰ A mãa mɩ̀ a, ɩ̃ pɛ̃w nɩ libie nɩ ble tɩr, mɛ̃ a ɩ̃ nɩbɛ nɩ a ɩ̃ lãw-tõ-taabɛ a. A na ɩ à ŋá a, nyɩ ɩ tɩ bɛr a bome tɩ na so a sowru.

¹¹ A dɩ̃a za mɩ̀ a, nyɩ lɛb kʋ̀ a nyɩ samɛ dem a bɛ póru, a divɛ̃ tɩɩr póru, a bɛ olivʋ tɩɩr nɩ a bɛ yie. Nyɩ ta ƴãw bɛ kʋ̀ nyɩ dɔwlɛ a bome za nyɩ na pɛ̃w bɛ a zu ɛ: a libie, a ble, a divɛ̃ bɩɩ a kãá.»

¹² Bɛ tɩ sɔw na: «Tɩ na ɩ n a lɛ fʋ na yel a, tɩ na lɛb'a tɩr a bome al tɩ na de a, ɛ́ tɩ bɛ lɛb sowre bɛ bom ɛ.» Lɛ n'a ɩ̃ tɩ bʋɔlɩ a bàwr-maalbɛ wa ƴãw a nɩbɛ pɔ a bɛ niŋé, kɛ́ bɛ na ɩ n a lɛ bɛ na yel a.

¹³ Al pùorí, ɩ̃ tɩ pĩ pĩ n a ɩ̃ kpar-kpɛ̃ɛ, ɛ́ yel à ŋá: «A Naaŋmɩn, ʋ mɩ̀ pĩ à à ŋá a bɛlɩ dem za nãà bɛ wa tu a bɛ ƴɛ̀rʋ a! Ʋ ɩ bɛ ta cãà tɛr yie dem nɩ bome ɩ, bɛ zɩ̃ nũ-zawlɛ!» A lãw nɩbɛ tɩ sɔw na: «Amɛn! A ɩ a lɛ!» Bɛ za tɩ danɩ nɩ a Sore, ɛ́ a pùorí bɛ tu a lɛ bɛ na yel a.

¹⁴ A Artazɛrsɛsɩ na tɩ dɩrɛ a naalʋ a lɛn daar a n'a bɛ tɩ kaa ír mɛ̃, ɩ̃ ɩ a Zuda tẽ-ŋmãa-kʋ̀ra na-kpɛ̃ɛ-lɩɛrɛ. Ɩ̃ tɩ ɩ ʋ nɩ a ʋ naalʋ-dɩb yome lɩzɛr sob tɩ tɔ a lɩzɛr'ɩ pie nɩ ayi sob. A yome pie nɩ ayi á ŋá pʋɔ a, mãa nɩ a ɩ̃ yir dem bɛ tɩ dɩ a zuru-yar libie bɛ na mɩ́ ya kʋ̀ a na-kpɛ̃ɛ-lɩɛrɛ a ɩ.

¹⁵ A na-kpɛ̃ɛ-lɩɛrbɛ bɛl na tɩ de niwn a ɩ̃ ƴãw a, tɩ kʋrɛ nɩ a nɩbɛ guur, ƴãw bɛ kʋ̀rɛ bɛ bʋ̃-dɩrɩ nɩ divɛ̃ pʋɔ a salm-pla libie lɩz'a ayi ƴãw. A na-kpɛ̃ɛ-lɩɛrbɛ lãw-tõ-taabɛ tɛɛ za mɩ̀ tɩ dɔwrɛ nɩ a nɩbɛ. Ɛcɛ mãa bɛ tɩ dãw ɩ à à ŋá ɩ, a Naaŋmɩn ɩ̃ na zɔrɛ a zũú.

¹⁶ Mãa mɩŋa nɩ̃ɛ na tɩ tone a dacĩ-kpɛ̃ɛ lɛb-mɛb tome. Ɩ̃ bɛ dà púo kãw za ɩ, a ɩ̃ lãw-tõ-taabɛ mɩ̀ na tɩ tone a dacĩ-kpɛ̃ɛ lɛb-mɛb tome a, mɩ̀ bɛ dà ɩ.

¹⁷ Ɛcɛ a Zifʋ mɩnɛ nɩ a nɩ-bɛrɛ na tɩ dɩrɛ a ɩ̃ yir a, tɩ ɩ n nɩbɛ lɩz'a ayopõi nɩ pie (150) de nɩ a tẽ-kpɔwlɩ sãanbɛ na mɩ́ tɩ waar a.

¹⁸ Bibir za, bɛ mɩ́ tɩ kʋ n náab, pi-vɩɛlɩ vɩɛlɩ ayʋɔb nɩ nʋʋr, ɩ n a bʋ̃-dɩrɩ, ɩ̃ɩ so a san, ɛ́ bibie piir piir, bɛ mɩ́ wa n divɛ̃ yaga za wa kʋ̀ m. Ɛcɛ a na saa ɩ à à ŋá a, ɩ̃ bɛ dãw sowri a bʋ̃-dɩrɩ a na fɛr kɛ́ bɛ mɩ́ kʋ̀ a na-kpɛ̃ɛ-lɩɛrɛ a ɩ, bʋ̃ʋ n'ʋ vɛ̃, a tome tɩ wa n nɩ fɛrʋ yaga a nɩbɛ zie baarɩ.

¹⁹ «Ɩ̃ Naaŋmɩn i, lɛb tɩɛrɩ a alɩ bome nɛ za ɩ̃ na ɩ a nɩ-bʋʋrɛ bɛ ŋa ƴãw a, ɛ́ tɛr pʋ-pɩɛlʋ a ɩ̃ zie!»