Neemi 3 - A SƐB-SÕW

A Zifʋ mɩnɛ lɛb'a mɩɛr a Zerizalɛm dacine

¹ A bàwr-maal-kara Ɛlyasivʋ tɩ nyɔw nɩ a tome, ʋlɛ nɩ a ʋ bàwr-maal-taabɛ. Bɛ tɩ lãw na mɛ a Píir dɩ̃dɔr. Bɛ na wa maalɩ ʋ k'ʋ ɩ sõw baar'a, bɛ ƴãw nɩ a pamɛ. Bɛ mɩ̀ tɩ maal'ɩ a dacĩ-kpɛ̃ɛ ƴãw tɩ tɔ a Kɔ̀br yir-cõcowla, ɛ́ bɛ na wa maalɩ ʋ k'ʋ ɩ sõw baar'a, bɛ cow na tɩ ta a Hananeyɛl yir-cõcowla.

² Zeriko tẽw dem nɛbɛ tɩ tone a bɛ lõbowrí, Imɩri bidɛb Zakuur mɩ̀.

³ Ha-Senaa tẽw dem nɛbɛ tɩ lɛb mɛ a Zʋ́mɛ́ dɩ̃dɔr. Bɛ na tɩ bɛ a dɩ̃dɔr zawle baar'a, bɛ ƴãw nɩ a dɩ̃dɔr pamɛ, nɩ a ʋ dà-jɩ̀rɩ́ nɩ a ʋ bʋ̃-kparɩ.

⁴ Nɩbɛ bɛ ŋa nɛbɛ tɩ tone a bɛ lõbowrí: Uriya bidɛb Meremɔtɩ na ɩ Hakɔsɩ yãw a, Berekɩa bidɛb Mesulam na ɩ Mesezaveɛl yãw a, nɩ Baana bidɛb Sadɔkɩ.

⁵ Al pùorí, Tekowa tẽw dem tɩ nɛbɛ, ɛcɛ a bɛ nɩ-yée bɛ tɩ sàw a tõ-tõ-nɩ-bɛrɛ nɩ-kpɛ̃ɛnʋ a.

⁶ Pasea bidɛb Yehoyada nɩ Besodɩa bidɛb Mesulam nɛbɛ tɩ lɛb mɛ a Yesana dɩ̃dɔr. Bɛ na tɩ bɛ a dɩ̃dɔr zawle baar'a, bɛ ƴãw nɩ a ʋ pamɛ, a ʋ dà-jɩ̀rɩ́ nɩ a ʋ bʋ̃-kparɩ.

⁷ Nɩbɛ bɛ ŋa nɛbɛ tɩ tone a bɛ lõbowrí: Melatɩa na yi Gabaɔ̃ a, Yadon na yi Meronɔtɩ tẽw a, nɩ nɩbɛ bɛ mɩnɛ na yi Gabaɔ̃ nɩ Misɩpa ɛ́ tone a na-kpɛ̃ɛ-lɩɛrɛ na be a Efaratɩ gãwn mʋ̃tɔ̃w-kpɛb-lowr a yúor ƴãw a.

⁸ A bɛ lõbowrí a, Haraya bidɛb Uzɩɛl na ɩ a salm-zɩɛ bʋ̃-vɩɛlɩ bãw-maalɛ a, nɩ Hananɩa na ɩ a parfɛ̃ maalɛ a, tɩ be n be. Bɛ na tɩ ta a zie ʋl a dacĩ-kpɛ̃ɛ na yɛ̀lɩ a n'a bɛ baarɩ a bɛ tome a Zerizalɛm.

⁹ A bɛ lõbowrí a, Huur bidɛb Erefaya na ɩ a Zerizalɛm zie na põ-zɛ̃-taa a nɩ-kpɛ̃ɛ a n'ʋ tɩ tone.

¹⁰ A nidaa blã a, Harumafʋ bidɛb Yedaya tɩ tone nɩ zie kãw na tori a ʋ yir a, ɛ́ Hasavɩneya bidɛb Hatusɩ n'ʋ tɩ be a ʋ lõbowrí.

¹¹ Harim bidɛb Malkɩa nɩ Pahatɩ-Mowab bidɛb Hasuvʋ tɩ tone nɩ zi-yoru, a be a damɛ yir-cõcowla na be a.

¹² A bɛ lõbowrí a, Ha-Lohɛsɩ bidɛb Salum na ɩ a Zerizalɛm zie na põ-zɛ̃-taa a nɩ-kpɛ̃ɛ a n'ʋ tɩ tone, ɛ́ a ʋ pɔwyaar sõwne ʋ.

¹³ Hanun nɩ Zanoa tẽ-kpɛ̃ɛ nɩbɛ nɛbɛ tɩ lɛb mɛ a Bà-fʋɔla dɩ̃dɔr. Bɛ na tɩ lɛb mɛ ʋ baar'a, bɛ ƴãw nɩ a ʋ pamɛ, a ʋ dà-jɩ̀rɩ́ nɩ a ʋ bʋ̃-kparɩ. Bɛ mɩ̀ tɩ maal'ɩ a dacĩ-kpɛ̃ɛ ƴãw, mɛtɩr kɔbr anũu (500), tɩ ta a Pʋɔrʋ dɩ̃dɔr.

¹⁴ Erekaavʋ bidɛb Malkɩa na ɩ a Bɛtɩ-Kerɛm zie nɩ-kpɛ̃ɛ a n'ʋ tɩ lɛb mɛ a Pʋɔrʋ dɩ̃dɔr. Ʋ na tɩ lɛb mɛ ʋ baar'a, ʋ ƴãw ʋ nɩ a ʋ pamɛ, a ʋ dà-jɩ̀rɩ́ nɩ a ʋ bʋ̃-kparɩ.

¹⁵ Kol-Hoze bidɛb Salum na ɩ a Misɩpa zie nɩ-kpɛ̃ɛ a n'ʋ tɩ lɛb mɛ a Bule dɩ̃dɔr. Ʋ na tɩ lɛb mɛ ʋ baarɩ bɛ̀ a, ʋ ƴãw ʋ nɩ a ʋ pamɛ, a ʋ dà-jɩ̀rɩ́ nɩ a ʋ bʋ̃-kparɩ. Ʋ mɩ̀ tɩ lɛb'a maalɩ a dacĩ-kpɛ̃ɛ ƴãw na pɩɛlɩ a Silowe gbãtar, ɛ́ be a nãà zaadɛ̃ nɩ a tanɛ dɛ́r na yi a «Daviir Tẽ-kpɛ̃ɛ́» siwr a cara pʋɔ a.

¹⁶ A nidaa a, Azɩbukɩ bidɛb, Neemɩa, na ɩ Bɛtɩ-Suur zie na põ-zɛ̃-taa a nɩ-kpɛ̃ɛ a n'ʋ tɩ tone, tɩ ta n a Daviir yarʋ pɛr, tɩ ta n a gbãtar nɩsaalbɛ na tuw a, tɩ ta n a sojarɩ na gùre a nãà a yir.

¹⁷ A nidaa a, levitɩ bɛ ŋa nɛbɛ tɩ tõ a tome: Bani bidɛb Erehum, Hasavɩa na ɩ Keila zie na põ-zɛ̃-taa a nɩ-kpɛ̃ɛ a, ɛ́ tone a ʋl mɩŋa zie ƴãw a,

¹⁸ Henadadɩ bidɛb Binuwi na ɩ a Keila zie na põ-zɛ̃-taa a nɩ-kpɛ̃ɛ,

¹⁹ nɩ Yesua bidɛb Ezɛɛr na ɩ Misɩpa nɩ-kpɛ̃ɛ a. A Ezɛɛr tɩ maalɛ nɩ zie kãw na tori a sɔ́r na dúor a zɛbr bome yir ƴãw a, a be a dacĩ-kpɛ̃ɛ na tɩ ɩ gõgon a.

²⁰ A ʋ lõbowrí a, Zabaɩ bidɛb Barukɩ tɩ tone nɩ vũuvũu, maalɛ a zie ʋl na tu a ƴãwn, a zie ʋl na be a dacĩ-kpɛ̃ɛ gõgon nɩ a bàwr-maal-kara Ɛlyasivʋ yir dɩ̃dɔr cara pʋɔ a.

²¹ A nidaa a, Uriya bidɛb, Meremɔtɩ, mɩ̀ na ɩ Hakɔsɩ yãw a, tɩ maalɛ nɩ zi-yoru ƴãwn, zie na be a Ɛlyasivʋ yir dɩ̃dɔr nɩ a yir baarʋ zie cara pʋɔ a.

²² A nidaa a, a bàwr-maalbɛ na yi a Zerizalɛm tẽ-kõkowe pʋɔ wa a nɛbɛ tɩ tone.

²³ Bɛ̃zamɛ nɩ Hasuvʋ tɩ maalɛ nɩ zie na tori a bɛ yie a ƴãwn, ɛ́ Maaseya bidɛb Azarɩa, mɩ̀ na ɩ Ananɩa yãw a, tone a ʋ yir pɛr.

²⁴ Henadadɩ bidɛb Binuwi tɩ tone nɩ a nidaa, zie kãw na be a Azarɩa yir nɩ a be a dacĩ-kpɛ̃ɛ na ƴãw gõgon a cara pʋɔ.

²⁵ Uzaɩ bidɛb Palal tɩ tone na tori a dacĩ-kpɛ̃ɛ gõgon ŋa nɩ a yir-cõcowla kpɛ̃ɛ na be a nãà yir nidaa, ɛ́ pɩɛlɩ a soja-zi-gùrbɛ davʋra a. Pareɔsɩ bidɛb Pedaya,

²⁶ nɩ a Ŋmɩn-yir-kpɛ̃ɛ tõ-tõ-biir na kpɩɛr a Ofɛl vuo pʋɔ a, tɩ tõ na tɩ tɔ a dacĩ-kpɛ̃ɛ gõgon yir-cõcowla na be a Kʋ̃ɔnɩ dɩ̃dɔr saa-pɛrɩ́ a.

²⁷ A Tekowa tẽw dem tɩ tone nɩ a zie ʋl na tu a pʋɔ, ɛ́ be a zie ʋl na tori a dacĩ-kpɛ̃ɛ gõgon yir-cõcowla nɩ a Ofɛl dacin cara pʋɔ a.

²⁸ A na tɩ tĩ a Wie dɩ̃dɔr ƴãw a, bàwr-maalbɛ tɩ tone na, ŋa za tone a zie ʋl na tori a ʋ yir a.

²⁹ A nidaa a, Ɩmɛɛr bidɛb Sadɔkɩ n'ʋ mɩ̀ tɩ tõ a tome tori nɩ a ʋ yir. A ʋ niŋé a, a bɛl na tɩ tone a n'ɩ bɛ ŋa: Sekanɩa bidɛb Semaya na ɩ a Saa-pɛrɩ́ dɩ̃dɔ-gùre a,

³⁰ Selemɩa bidɛb Hananɩa nɩ Hanun na ɩ Salafʋ bidɛbr ayʋɔb sob ɛ́ tɩ maalɛ a vuo ʋl na tu a ƴãwn a. Berekɩa bidɛb Mesulam n'ʋ tɩ tone a ʋ lõbowrí tori a be ʋ na kpɩɛr a.

³¹ A nidaa a, a Malkɩa na ɩ a salm-zɩɛ bʋ̃-vɩɛlɩ bãw-maalɛ a n'ʋ tɩ tone tɩ ta n a Ŋmɩn-yir-kpɛ̃ɛ tõ-tõ-biir yir, nɩ a yɛ-yɛrbɛ yir na tori a Mifɩkadɩ dɩ̃dɔr a, ɛ́ tɩ ta n a zi-piwrbɛ zie na be a dacĩ-kpɛ̃ɛ gõgon ƴãw a.

³² A bɛlɩ dem na bãw a salm-zɩɛ bʋ̃-vɩɛlɩ maalʋ a nɩ a yɛ-yɛrbɛ tɩ tone nɩ a zi-pɛ-baara na be a zi-piwrbɛ zie nɩ a Píir dɩ̃dɔr cara pʋɔ a.

A Zifʋ mɩnɛ dɔ̃ dem bɔbr'a kɛ́ bɛ ɩ a tome ŋmãa

³³ A Sanbalatɩ na tɩ wõ k'aa tɩɩm, Zifʋ mɩnɛ, kɛ́ tɩ lɛb'a mɩɛr a Zerizalɛm dacĩ-kpɛ̃ɛ a, ʋ nyɛ̃ nɩ suur mab. Ʋ mɩ̀ tɩ ɩrɛ tɩ na laar,

³⁴ ɛ́ yere a ʋ yɛbr nɩ a Samaari tẽw sojarɩ niŋé: «Bʋ̃ʋ n'ʋ a Zifʋ mɩnɛ bɛ ŋa na bɛ tɛr bir a bɔbr kɛ́ bɛ ɩ? Tɩ na bɛr bɛ na bɛ cãà ɩrɛ cere nɩ bɩɩ? Bɛ na maal'ɩ bagɛ bɩɩ? Bɛ na baarɩ a tome a dɩ̃a bɩɩ? Bɛ na tʋ̃ɔ́ na de kʋsɛbɛ bɛ na ír deboru pʋɔ ɛ́ vũu dɩ dɩ a, lɛb mɛ n bɩɩ?»

³⁵ Toviya na yi Amɔ̃ tẽw a tɩ àr'a kɔw ʋ. Ʋ tɩ yel'a: «Nyɛ̃ dacin kãw a! Tʋrbaa tɛwr wa ƴaw do a ʋ zu a, ʋ na dáa ʋ na lɔb!»

³⁶ Lɛ n'a ɩ̃ tɩ puori à ŋá: «Fʋ̃ʋ tɩ Naaŋmɩn i, bɛr wõ, a tɩ dɔ̃ dem ɩrɛ tɩ na laar, ɩ a bɛ zʋm-bie lɛb lo a bɛ zu, ɩ kɛ̀ bɛ fa a bɛ bome, ɛ́ diw bɛ cen nɩ tẽ-yũo!

³⁷ Taa dɩrɛ a bɛ sãwna suur kʋ̀rɛ bɛ ɩ, taa dier a bɛ yel-bier bɛrɛ a báarɛ ɩ, bɛ càarɩ tɩ na ɛ́ tʋ, tɩ na lɛb mɩɛr a dacĩ-kpɛ̃ɛ a ƴãw.»

³⁸ À ŋá n'a tɩ tɩ lɛb mɛ a dacĩ-kpɛ̃ɛ. Tɩ tɩ lɛb'a maalɩ ʋ ƴãw ʋ do tɩ ta a põ-zɛ̃-taa, ɛ́ viiri koli a tẽw za, bʋ̃ʋ n'ʋ vɛ̃, ŋa za tɩ ƴãw nɩ fãw a tome tob ƴãw.