Neemi 1 - A SƐB-SÕW

¹ Hakalɩa bidɛb, Neemi, manʋ ʋ na manɩ a. A Artazɛrsɛsɩ naalʋ-dɩb yome lɩzɛr sob, a Kisile cuw pʋɔ, a mãa Neemi, a lɛ ɩ̃ na tɩ kpɩɛr a Siizɩ tẽw bɛ na mɛ dacine viiri koli a pʋɔ a,

Bɛ manɩ nɩ a Zifʋ mɩnɛ na be a Zerizalɛm a yele kʋ̀ a Neemi

² a ɩ̃ yɛb kãw, Hanani, tɩ yi n a Zuda tẽ-ŋmãa-kʋ̀ra pʋɔ wa ta, ʋlɛ nɩ nɩbɛ bɛ mɩnɛ. Ɩ̃ tɩ sowri bɛ nɩ a Zifʋ bɛl na yi a diw-cenu zie lɛb kul a yele, nɩ a Zerizalɛm yele.

³ Bɛ tɩ sɔw mɛ̃ na: «A nɩbɛ bɛ na tɩ dãw diw cen nɩ a, bɛ kpɩɛr'ɩ a Zuda tẽ-ŋmãa-kʋ̀ra pʋɔ, ɛcɛ bɛ ɩrɛ nɩ wʋ̀ʋr yaga ɛ́ nyɛrɛ vĩ. Ɛ́ a Zerizalɛm a, a ʋ dacine puor puor'ɩ vɛɛ, ɛ́ bɛ nyɩw a pamɛ bɛr.»

A Neemi puore na kʋ̀rɛ a Zifʋ mɩnɛ

⁴ Ɩ̃ na tɩ wõ a yele á ŋá a, ɩ̃ zɩ̃ na kone. Pʋ-sãwna tɩ tɛr mɛ̃ nɩ bibi-yaga, ɩ̃ɩ tɛr a mʋta-tuo. Ɩ̃ tɩ nyɔw nɩ a Naaŋmɩn na be a salom zu a puoru,

⁵ ɛ́ tɩ yel ʋ à ŋá: «'Woi! Sore e, fʋ̃ʋ Naaŋmɩn na be a salom zu a, Naaŋmɩn na ɩ kpɛ̃ɛ, ɛ́ bɛ tɛr dɩ̃ɛnʋ a! Fʋ mɩ́ tɛr'ɩ a fʋ wõ-taa, fʋ̃ʋ nɩ a bɛlɩ dem na sàwr a fʋ nɛ́ɛ a zie, fʋ ŋmɛ̃ n fʋ ŋmɛ̃a a bɛlɩ dem na nɔnɛ fʋ a zie.

⁶ Cɛlɛ be, bɛr wõ m, ɛ́ jɩ́r mɛ̃ kaa, pãa bɛr wõ a puoru a mãa fʋ tõ-tõ-bie na puore fʋ a. Mʋ̃tɔ̃w nɩ tɩ̃ɩsɔw, ɩ̃ mɩ́ puore fʋ nɩ a tɩɩm Ɩsɩrayɛl nɩbɛ fʋ tõ-tõ-biir ƴãw. Ɩ̃ sàw nɩ a yel-bebe tɩ na maalɩ sãw fʋ a. Yel-mɩŋa n'a, mãa nɩ a ɩ̃ sãàkʋm-kore a, tɩ maal'ɩ yel-bebe,

⁷ tɩ sãw fʋ na, tɩ na bɛ sàw a nɛ́ɛ, a wulu nɩ a tub fʋ na tɩ ƴãw a fʋ tõ-tõ-bie Moyiir kʋ̀ tɩ a.

⁸ Ɛcɛ cãà bãwnɩ a ƴɛ̀rʋ ʋl fʋ na ƴãw a Moyiir ƴɛ̀r kʋ̀ tɩ a: “Nyɩmɛ bɛ wa tu m a, ɩ̃ na diw nyɩ na yaarɩ a nɩ-bʋʋr-yoru pʋɔ.

⁹ Ɛcɛ a pùorí, nyɩmɛ wa lɛb wa a ɩ̃ zie a, nyɩmɛ wa sàwr a ɩ̃ nɛ́ɛ a, nyɩmɛ wa maal tɛr a a, ɩ̃ na lɛb'a ɓã nyɩ taa. Bɛlɛ saa diw nyɩ cen nɩ a tẽw baarʋ zie a, ɩ̃ na lɛb'a tɛr nyɩ wa n a zie ʋl ɩ̃ na kaa ír k'ɩ̃ɩ mɩ́ wul k'ɩ̃ɩ be n a be a.”

¹⁰ Sore e, tɩ ɩ n a fʋ tõ-tõ-biir, tɩ ɩ n a fʋ nɩ-bʋʋrɛ! Tɩmɛ nɛbɛ fʋ faa nɩ a fʋ fãw na ɩ kpɛ̃ɛ a, tɩmɛ nɛbɛ fʋ faa nɩ a fʋ kpãkpãw-kpɛ̃w.

¹¹ Sore e, ɩ̃ zɛlɛ fʋ nɩ yãayãa, cɛlɛ be, bɛr wõ a ɩ̃ puoru, mɩ̀ bɛr wõ a fʋ tõ-tõ-biir na nɔnɛ a fʋ ƴãwfʋ a puoru. Ɩ a yele tu vla a ɩ̃ zie, ɛ́ sàw a nãà pʋɔ pɛlɩ a ɩ̃ ƴãw.» Ɩ̃ tɩ ɩ n a nãà dã-pʋrɛ a lɛn daar.