Nahum 2 - A SƐB-SÕW

¹ Zuda tẽw dem i, nyɩ nyɛ̃ yel-nʋ̃ɔ̀ yere na be a tan zu waar a: ƴã-ɓaarʋ n'a ʋ yere! Nyɩ maalɛ a nyɩ cuwr, nyɩ ír a nɛ́ɛ nyɩ na kõ kʋ̀ a Naaŋmɩn a. A zi-sãwnɛ kʋ̃ lɛb kpɛ a nyɩ tẽw pʋɔ ɩ, a ʋ fãw baar'a.

² Nɩnɩɩvʋ tẽw i, zɛbr-nɩbɛ dúor'a waar a fʋ ƴãw. Sojarɩ ɩ, nyɩ gù a zɛbr-yir-kpɛn, nyɩ piwre a sɛ́ɛ, nyɩ cɔbrɩ nyɩ tʋɔra a zɛbr ƴãw, nyɩ ƴãw a nyɩ fãw za.

³ A Sore lɛb'a maalɛ a Zakɔb bʋ̃-dɔwrɩ yele ƴãwn. Ʋ lɛb'a ɩrɛ a Ɩsɩrayɛl bʋʋrɛ yúor yire, bɛl na ɩ divɛ̃ tɩɛ a fa-farbɛ na sãw sãw bɛr, ɛ́ kar kar bɛr a.

A Nɩnɩɩvʋ tẽw loba

⁴ A dɔ̃ sob sojarɩ tɛr'ɩ zɛbr-kur-pãgalɩ zɩɩr zɩɩr, ɛ́ su kpar-zɩɩr ɓõɓõ. Bɛlɛ wa cɔbrɩ a zɛbr ƴãw a, a zɛbr-torkori mɩ́ nyɩwrɛ na mɛ̃ vũuni a, ɛ́ a kafine damnɛ.

⁵ A zɛbr-torkori ŋmʋrɛ nɩ a zɛbr ƴãw, a sɛ́ɛ pʋɔ nɩ a nɩbɛ tuor-taa ziir, mɛ̃ dʋn na fʋʋrɛ a. A ɩ na mɛ̃ mɔ̃-'lena vũuni a, ɛ́ pawr mɛ̃ saa na mɩ́ nyɩwrɩ a.

⁶ A Nɩnɩɩvʋ tẽw nãà bʋɔlɛ nɩ a ʋ sojarɩ, ɛcɛ bɛ cere na kawr lore. A dɔ̃ dem dãwnɛ nɩ taa cere a dacĩ-kpɛ̃ɛ na piw a tẽw tɛr a ƴãw, bɛ àr'a pĩ.

⁷ Bɛ wa bere na bɛ kar a mamɛ lowr dɩ̃dɛɛ pamɛ, a nãà yir pʋɔ a, zɔ ŋmɛ taa n'a!

⁸ Bɛ ɓáw nɩ a ŋmɩn-pɔw dasule, bɛ ɓáw ʋ na cere nɩ. A pɔwbɛ bɛl na kaarɛ a ʋ zie a kone na mɛ̃ naŋmamɛ na kone nɩbaal-kon a, bɛ kone nɩ a bɛ pʋ-sãwna pʋɔ lɔbr'ɩ nuru.

⁹ A Nɩnɩɩvʋ tẽw ɩ na mɛ̃ kʋ̃ɔ ƴãwfʋ zie, a kʋ̃ɔ na cire a za a. Bɛ cɩɩrɛ na yere: «Nyɩ tɛw àr! Nyɩ tɛw àr!» Ɛcɛ nɩr za bɛ ŋmɛlɛ kaar pùor ɛ.

¹⁰ Nyɩ za a salm-pla, nyɩ za a salm-zɩɛ! A tẽw na-bome bɛ tɛr baarʋ ɛ. Bʋ̃-vɩɛlɩ bʋʋrɛ bʋʋrɛ za n'a paalɩ ʋ.

¹¹ Zab, fab, zazawfʋ! Bɛ za kanyir baar'a, a dume màwr'a ŋmɩɛr taa, a ƴã-gamɛ màwr, ɛ́ a niŋe sɔb sɔb.

A Nɩnɩɩvʋ tẽw ɩ na mɛ̃ gbẽw bɛ na zɛb tʋ̃ɔ́ a

¹² A gbẽw kpɛb zie ɩ n ŋmɩn? A gbẽw-bili tɩ páwr'ɩ a bʋ̃-dɩrɩ a be. A gbẽw na mɩ́ tɩ yi cen a nabawlʋ a, nɩr za bɛ mɩ́ tɩ damnɛ a ʋ bili ɛ.

¹³ A gbẽw-daa mɩ́ tɩ kʋ n a bome taw ŋma, wa ƴãw a gbẽw-nyãw nɩ a bili. Ʋ mɩ́ tɩ paal'ɩ a ʋ bɔwrɩ, nɩ a dʋn nɛnɛ ʋ na kʋ taw ŋma a.

¹⁴ A Sore, a Kpɛnʋ-za-sob, yere na: «Ɩ̃ na ìr'ɩ a fʋ ƴãw, Nɩnɩɩvʋ ʋ, ɩ̃ na ɩ na a fʋ zɛbr-torkori dɩ ɩrɛ zʋ̀ʋ́r, a fʋ pɔ́lɛ́ na ɩ mɛ̃ gbẽw-bili a, bɛ na kʋ bɛ nɩ a zɛbr zie. A fáb fʋ na fárɛ a, ɩ̃ na ɩ na a baarɩ a tẽw zu, nɩr kʋ̃ lɛb wõ a nɩbɛ fʋ na mɩ́ tɩ tõ a kɔkɔr ɛ.»