Nahum 1 - A SƐB-SÕW

¹ Ƴɛ̀r-kpɛ̃w na càarɩ a Nɩnɩɩvʋ tẽw a. Ɛlkɔsɩ tẽw Nahum yel-nyɛra sɛbɛ.

A Sore a, Naaŋmɩn na bɛ tɛr dɩ̃ɛnʋ, ɛ́ ɩ Naaŋmɩn-vla a n'ʋ

² A Sore ɩ n Naaŋmɩn na kpɛ nyuur ɛ́ mɩ́ yáa a san a, a Sore mɩ́ yáa nɩ a san, a ʋ suur bɛ tɛr dɩ̃ɛnʋ ɛ. A Sore mɩ́ yáa nɩ a san a ʋ dɔ̃ dem zu, ʋ bɛ mɩ́ dɩ suur kʋ̀ bɛ ɩ.

³ A Sore suur bɛ páwr ɛ, ɛ́ a ʋ kpɛnʋ bɛ dɩ vuo ɩ, ɛcɛ ʋ bɛ bɛrɛ a sãwna sob dɔwrʋ ɛ. Ʋlɛ wa tɔlɛ a, saa sɛsɛb-kpɛ̃ɛ mɩ́ cɛ̀r a. Zũzuwe n'ɩ a uuru a ʋ gbɛ́ɛ na ɩrɛ a ìre a.

⁴ Ʋ mɩ́ tanɩ nɩ a kʋ̃ɔ-kpɛ̃ɛ ʋ ko, ʋ mɩ́ ɩ n a mamɛ za a sɩr. Lɛ n'a a Basan dʋn mʋ̃ɔ 'wɔbrʋ ziir mʋ̃ɔ̀, nɩ a Karmɛl tãw za mɩ́ mʋ̃ɔ̀ mʋ̃ɔ̀, ɛ́ a Libã tɩ-puuru vàr vàr.

⁵ A tã-bɛrɛ gbiwre nɩ a ʋ niŋé, ɛ́ a tãli yʋʋrɛ. A tẽsɔw damnɛ nɩ a ʋ niŋé, lãwnɩ a nɩbɛ za na be a ʋ zu a.

⁶ Ãa n'ʋ na cãà àr a ʋ su-yãyaar daar? Ãa n'ʋ na cɩ̃ɛ a ʋ su-tʋlʋ-kpãkpã daar? A ʋ suur ɩ na mɛ̃ vũu na nyɔw dɩrɛ a, a pìe tɛɛ za pure na yaarɛ a ʋ niŋé.

⁷ A Sore ɩ n nɩ-vla, ʋ ɩ n taw-lanʋ zie a kpɩɛrʋ daar. Ʋ mɩ́ kaa nɩ a bɛlɩ dem na zɔrɛ kpɩɛr a ʋ naayir a zie,

⁸ a lɛn daar a kpɩɛrʋ na mɩ́ wa ta bɛ yaga za mɛ̃ kʋ̃ɔ na darɛ taa a. Ɛcɛ ʋ mɩ́ sãw nɩ a tẽw bɛr pẽlẽpẽlẽ, ɛ́ diw a ʋ dɔ̃ dem ƴãw a kũu lige pʋɔ.

A ƴɛ̀rʋ na ƴɛ̀r tu taa a Zuda nɩ a Nɩnɩɩvʋ tẽw nɩbɛ ƴãw a

⁹ Bʋ̃ʋ bʋ-taa n'a nyɩ tɛr a Sore ƴãw? Ʋlɛ n'ʋ mɩ́ kʋ a ʋ dɔ̃ dem pàw pɛr, bɛ kʋ̃ lɛb maal dɔwrɩ nyɩ ɛ!

¹⁰ Bɛ ŋmɛ̃ na mɛ̃ gʋʋr na mɩl mɩl taa a, a bɛl na mɩ́ nyũ tɩ kuoli a. Bɛ na dɩ n kʋmkʋm, mɛ̃ mɔ̃-kon a.

¹¹ Nɩnɩɩvʋ tẽw i, a fʋ pʋɔ n'a nɩr yi, tɩɛrɛ faa a Sore ƴãw, nɩ-bɛ-tɛr-bir a tɩɛrʋ na bɛ vɩɛl a.

¹² A Sore yere nɩ à ŋá kʋ̀rɛ a Zuda tẽw dem: «A nyɩ dɔ̃ dem saa yãwmɛ ɛ́ kpɛmɛ a, bɛ na bɔr'a, been kʋ̃ cɛ ɩ. Ɩ̃ ɩ na vĩ kpɛ nyɩ, ɩ̃ bɛ lɛb ɩrɛ vĩ kpɩɛr nyɩ ɛ.

¹³ Ƴɛrɛŋa a, ɩ̃ na faa nyɩ nɩ a nyɩ dɔ̃ sob nuru pʋɔ ɛ́ ŋma a bʋ̃-'leni na 'lẽ nyɩ a bɛr.»

¹⁴ Nɩnɩɩvʋ tẽw dem i, a Sore ƴɛ̀rɛ nɩ à ŋá a nyɩ ƴãw: «Nyɩ kʋ̃ cãà tɛr bʋʋrɛ a nyɩ yúor pore ɩ. A nyɩ ŋmɩmɛ yir pʋɔ a, ɩ̃ na ír'ɩ a nyɩ dà-pɛnɩ tɩbɛ nɩ a nyɩ kure tɩbɛ bɛr. Ɩ̃ tuwr'ɩ a nyɩ bɔw, bʋ̃ʋ n'ʋ vɛ̃, nyɩ bɛ cãà tɛr bir a ɩ̃ niŋé ɩ.»