Mise 7 - A SƐB-SÕW

A naaŋmɩn-ƴɛ̀r-manɛ kone nɩ a nɩbɛ faalʋ ƴãw

¹ 'Woi! Mãa baw-bi-nɩr! Ɩ̃ ɩ na mɛ̃ nɩr na cere tɩ-wɔmɛ pɔrʋ a pɔrʋ daar a, mɛ̃ nɩr bɛ na pɔr a divɛ̃ tɩ-wɔmɛ baarɩ ʋʋ cere a yiiru a: ʋ bɛ nyɛrɛ divɛ̃ tɩ-wɔm-cãacul kãw za dɩrɛ ɩ, ʋ bɛ nyɛrɛ kãkãw wɔ̃-dãw been za a vʋla na tɩ kpɩɛr ʋ a ɩ.

² Nɩbɛ na tu a Naaŋmɩn a, bɛ cãà a tẽw pʋɔ ɩ, nɩ-mɩŋa bɛ cãà be ɩ. Nɩ-kʋ tɩɛrʋ n'a bɛ za tɛr, yɛb mɩ́ jɩɛrɛ nɩ ʋ yɛb.

³ Bɛ de nɩ jalɩ a ɩ-faar maalʋ ƴãw. A nɩ-bɛrɛ nɩ a ƴɛ̀r-dɩrbɛ mɩ́ fɛr'a ƴãw bɛ ŋmɛ bɛ nʋɔr. A nɩ-yée mɩ́ yel'ɩ a bɛ bʋ̃-bɔbrɩ cãàmɩ́ lɛ, ɛ́ a bɛ za ɓã taa tɛr a bɛ gõlõgõlõ ɩb.

⁴ A nɩ-vla vla za a bɛ pʋɔ ɩ na mɛ̃ gʋ̀ɔ́ a, ɛ́ a nɩ-mɩŋa za kpɛ faa zuo gɔ-tuw. A nyɩ dɔwrʋ bibir'ɩ ŋan tarɛ, a bibir ʋl a nyɩ zi-piwrbɛ, a naaŋmɩn-ƴɛ̀r-manbɛ, na yel a. Dɛ̃bɩ̃ɛ tĩ na kpɩɛr nyɩ.

⁵ Nyɩ ta mɩ́ sàw de a nyɩ nɩbɛ ƴɛ̀rʋ ɛ, nyɩ ta mɩ́ ƴãw a nyɩ tɩɛrʋ a nyɩ bárɩ ƴãw ɛ. Nyɩ gù vla taa háarɛ nʋɔr ɛ, a nyɩ mɩŋa pɔw zie saa n'a a.

⁶ Bʋ̃ʋ n'ʋ vɛ̃, bidɛb mɩ́ tʋʋr'ɩ a ʋ sãà, pɔwyaa mɩ́ ìr'a ʋlɛ nɩ a ʋ mã taw teli taa, bie-pɔw ìr ʋlɛ nɩ a ʋ sɩr-mã taw teli taa, ŋa za dɔ̃ dem mɩ́ ɩ n a ʋ yir nɩbɛ tɛɛ za.

⁷ Ɛcɛ mãa a, a Sore n'ʋ ɩ̃ jɩ́rɛ, a Naaŋmɩn ɩ̃ faarɛ ƴãw n'a ɩ̃ ƴãw a ɩ̃ tɩɛrʋ, a Naaŋmɩn na wõ n a ɩ̃ bʋɔlʋ.

A Ɩsɩrayɛl nɩbɛ tɩɛrʋ nɩ a bɛ puoru a Naaŋmɩn zie

⁸ Alɛ! Nyɩɩm tɩ dɔ̃ dem i! Nyɩ ta laar tɩ ɛ! Tɩmɛ saa lo a, tɩ na lɛb'a ìr. Tɩmɛ saa be lige pʋɔ a, a Sore n'ɩ a tɩ cãà!

⁹ A fɛr'a kɛ́ tɩ sàw a Sore suur ʋ na nyɛ̃ nɩ tɩ a, bʋ̃ʋ n'ʋ vɛ̃, tɩ maal'ɩ yel-bier sãw ʋ. Ɛcɛ a daar waar'a, ʋ na na ƴɛ̀r kpɛ tɩ, ɛ́ ɩ a tɩ yel-mɩŋa ʋ sãá a. Ʋ na tɛr tɩ na lɛb wa n a cãà pʋɔ, ɛ́ paalɩ tɩ nɩ a ʋ maalʋ.

¹⁰ A tɩ dɔ̃ dem wa nyɛ̃ à ŋá a, vĩ na kpɛ bɛ na bɛ dɩ vuo ɩ, bɛl na mɩ́ tɩ sowre tɩ à ŋá a: «Bʋ̃ʋ n'ʋ a Sore nyɩ Naaŋmɩn ɩrɛ mɔ̃?» A bɛ dɔ̃ dem na nɛb'ɩ bɛ nɩ gbɛ́ɛ, mɛ̃ sɔ́r zu mɛ̃mɛrɛ a, ɛ́ tɩ na jɩ́r bɛ na wõ nʋ̃ɔ̀!

¹¹ A bibir waar'a bɛ na na lɛb mɛ a nyɩ tẽ-kpɛ̃ɛ dacine a. A ʋlɩ bibir nɛ a, bɛ na taw nɩ a nyɩ tẽw tʋr-bɔwrɩ tɔl'ɩ nidaa.

¹² A ʋlɩ bibir nɛ a, a nyɩ tẽ-bi-taabɛ na be a voru á ŋá pʋɔ a: Asiiri tɩ tɔ a Eziptɩ, Eziptɩ tɩ tɔ Efaratɩ man, kʋ̃ɔ-kpɛ̃ɛ tɩ tɔ kʋ̃ɔ-kpɛ̃ɛ, tãw tɩ tɔ tãw, bɛ na yi n a be lɛb wa a nyɩ zie.

¹³ A tẽ-daa na cɛ a na lɩɛb'ɩ tẽw na bɛ tɛr kpɛb a, a nɩbɛ na kpɩɛr a ʋ pʋɔ a faalʋ zũú.

¹⁴ Sore e, cɩ̃ɩnɛ a nɩbɛ fʋ na so a, nɩ a fʋ na-cɩ̃ɩn-da-kʋra. Bɛ àr'ɩ bɛ yõ zie wɛ-kar pʋɔ tɩ-wɔnɩ zaadɛ̃ na jil koli a. Cɩ̃ɩnɩ bɛ mɛ̃ a dãwdãw a, cen nɩ a Basan tẽw nɩ a Galaadɩ tẽw dʋn mʋ̃ɔ 'wɔbrʋ zie.

¹⁵ — Mɛ̃ a lɛn daar fʋ na tɩ ɩ tɩ yi a Eziptɩ a, ɩ tɩ nyɛ̃ nɔ-ɓãa-yele. —

¹⁶ Nɩ-bʋʋr-yoru na nyɛ̃ a na, ɛ́ vĩ kpɛ bɛ, bɛlɛ nɩ a bɛ fãw za bɛ na tɛr a. Nʋɔr na ɓãá bɛ na, bɛ bɛ tɛr ƴɛ̀rʋ ɛ, ɛ́ bãw kɛ́ ɩ won.

¹⁷ Bɛ na mɔwr'ɩ tanɛ mɛ̃ a wɩɩr a, mɛ̃ a tẽsɔw bʋ̃-vuri za a. Bɛ na yi n a bɛ zɛbr-yir-kpɛn pʋɔ, màwr waar'ɩ a fʋ̃ʋ Sore tɩ Naaŋmɩn zie. Pʋ̀lá na vʋ̃ɔnɛ bɛ na ɛ́ a fʋ dɛ̃bɩ̃ɛ ɩrɛ bɛ.

¹⁸ Sore e, ŋmɩn kãw bɛ ŋmɛ̃ taa nɩ fʋ ɛ, fʋ mɩ́ de nɩ a sãwna bɛr a baarɩ, ɛ́ dɩ a yel-bebe suur kʋ̀ a fʋ nɩ-bʋʋrɛ na cɛ bɛ kpi a. Fʋ bɛ mɩ́ nyɛ̃ a suur ʋ ka baarʋ ɛ, a na nʋmɛ a fʋ zie kɛ́ fʋ mɩ́ wul tɩ a fʋ nɔ̃wfʋ a ƴãw.

¹⁹ Fʋ na lɛb'a maal zɔ tɩ nɩbaalʋ, fʋ kʋ̃ cɛlɛ a tɩ sãwna zie ɩ, fʋ na lɔb'ɩ a tɩ yel-bebe za ƴãw a kʋ̃ɔ-kpɛ̃ɛ pɛrɩ́.

²⁰ Fʋ na wul'ɩ a fʋ nɔ̃wfʋ na bɛ lɛbr pùor a, a Abraham nɩ a Zakɔb bʋʋrɛ, mɛ̃ a lɛ fʋ na tɩ pɔ a koro za a tɩ sãàkʋm-kore zie a.