Mise 4 - A SƐB-SÕW

Zerizalɛm, ƴã-ɓaarʋ tẽ-kpɛ̃ɛ

¹ «Daar waar'a na ta, a Ŋmɩn-yir-kpɛ̃ɛ tãw na wɩɛr tɩ àr a tan nyʋɔrɩ́, ɛ́ kɛrɩ do gãw a tãli. Lɛ n'a a nɩ-bʋʋrɛ na darɛ taa cere a ʋ zu.

² Nɩ-bʋʋr-yaga na ìr'a lo a sɔ́r ɛ́ yere: “Nyɩ wa! Nyɩ wa tɩ do a Sore tãw zu, tɩ do a Zakɔb Naaŋmɩn yir. Ʋ na wul tɩ nɩ a ʋ sɛ́ɛ, ɛ́ tɩ na cere nɩ a ʋ soli zu.” Sɩza, Sɩyɔ̃ n'a a Sore wulu yire waar, Zerizalɛm'a a ʋ ƴɛ̀rʋ yire waar wa páwr tɩ.

³ Ʋ na mɩ́ dɩ n a ƴɛ̀rʋ kʋ̀ nɩ-bʋʋr-yaga na tɛr taw-taa a, ʋ na mɩ́ bãw nɩ yele kʋ̀ ten na tɛr fãw a, alɛ saa zãá a. A na mɩ́ de nɩ a zɛbr-sɔ-bɛrɛ zuw maal'ɩ kue, ɛ́ de a kafine maal'ɩ sɔ̀rʋ. Tẽw kãw kʋ̃ mɩ́ lɛb ŋmãa nɩ tẽw kãw zɛbr ɛ, nɩr kʋ̃ lɛb cãà zanɛ zɛbr zɛbrʋ ɛ.

⁴ Ŋa za na mɩ́ ɓãá nɩ ƴãw kʋɔr a ʋ divɛ̃ tɩɩr púo nɩ a ʋ kãkã-tɩɩr, ɛ́ nɩr za bɛ damnɛ ʋ ɛ.» À à ŋá n'a a Sore Kpɛnʋ-za-sob yere.

⁵ A nɩ-bʋʋrɛ za mɩ́ ɩrɛ na k'aa pɛlɩ a bɛ ŋmɩmɛ pʋʋr, tɩɩm'a, a Sore tɩ Naaŋmɩn n'ʋ tɩ bɔbr kɛ́ tɩ ɩrɛ a ʋ pʋɔ pɛlɩ kʋralɛ nɩ bibie za.

A Sore na ɩ n nãà a Zerizalɛm tẽw

⁶ A Sore yere na: «A ʋlɩ bibir nɛ a, ɩ̃ na bʋɔl'ɩ a bɛl na cere cɛwrɛ a ɓã taa, a bɛl bɛ na diw cen nɩ gbãgbaalʋ pʋɔ tẽ-yoru a, ɩ̃ na ɓã bɛ nɩ taa, bɛl ɩ̃ na ɩ a kpɛ yaga za a.

⁷ A bɛl na cɛwrɛ a, ɩ̃ na ɩ na bɛ ɩ nɩ-bʋʋrɛ na cɛ cãà vʋʋrɛ a, a bɛl bɛ na diw cen nɩ a gbãgbaalʋ pʋɔ a tẽ-yoru a, ɩ̃ na ɩ na bɛ ɩ nɩ-bʋʋrɛ na tɛr fãw a. A mãa Sore, ɩ̃ na dɩrɛ nɩ naalʋ a bɛ zu, a Sɩyɔ̃ tãw zu, a na tĩ a ʋlɩ daar nɛ a, nɩ kʋralɛ.

⁸ Ɛ́ fʋ̃ʋ Zerizalɛm tãle na piwre a Naaŋmɩn nɩ-bʋʋrɛ, mɛ̃ dʋ̃-cɩ̃ɩnɛ na be zie na kɛrɩ a zu a, fʋ kʋ̃ yaa kɛ́ lɛb nyɛ̃ a fʋ koro za fãw ɛ. A Zerizalɛm na lɛb'a ɩ a naalʋ-tẽw tẽ-kpɛ̃ɛ za.»

A Zerizalɛm kpɩɛrʋ nɩ a ʋ faafʋ yele

⁹ Zerizalɛm nɩbɛ ɛ, bʋ̃ʋ n'ʋ so a cɛlsɩ á ŋá a ƴɛrɛŋa? Bʋ̃ʋ n'ʋ so a 'wɔbrʋ 'wɔbr nyɩ nyɩ ŋmɩɩlɛ mɛ̃ pɔw na dɔwr a? Nyɩ bɛ cãà tɛr nãà bɩɩ? A nyɩ yã-wulbɛ kpi na bɩɩ?

¹⁰ A 'wɔbrʋ, a 'wɔbr nyɩ, nyɩ ŋmɩɩlɛ, nyɩ ŋmɩɛr cɛlsɩ mɛ̃ pɔw na dɔwr a! A na fɛr'a nyɩ yi kɛ́ bɛr a tẽw, tɩ kpɩɛr wɛ̀rʋ pʋɔ, nyɩ cen tɩ sãá Babɩlɔn. Be n'a nyɩ na tɩ nyɛ̃ a faafʋ, be n'a a Sore na tɩ ya de nyɩ a nyɩ dɔ̃ dem nuru pʋɔ.

¹¹ A ƴɛrɛŋa a, nɩ-bʋʋr-yaga tĩ na ɓanɛ taa a nyɩ ƴãw. Bɛ yere na: «A bɛ tẽ-kpɛ̃ɛ, ʋ́ nyɛ̃ vĩ, nyɩ wa tɩ jɩ́r a Zerizalɛm deboru wõ nʋ̃ɔ̀!»

¹² A nɩbɛ bɛ ŋa bɛ bãw a lɛ a Sore na bɔbr k'ʋʋ ɩ a ɩ. Bɛ bɛ bãw a ʋ tɩɛrʋ ɛ: ʋ bɔbr'a k'ʋʋ ɓã bɛ taa mɛ̃ ble zuru a ble vab gbãgbala pʋɔ a.

¹³ A Sore yere na: «Zerizalɛm nɩbɛ ɛ, nyɩ ìr va a ble! Ɩ̃ na ɩ na nyɩ kpɛmɛ mɛ̃ náab na ƴãw kure ɩ́lɛ́ nɩ kur-zɩɛ nafɩlɛ a. Nyɩ na nɛb'ɩ nɩ-bʋʋr-yaga nɩ gbɛ́ɛ. Ɛ́ a bɛ na-bome nyɩ na na fa a, nyɩ na de a na kʋ̀ m, a mãa Sore, mãa na so a tẽ-daa za a.»

¹⁴ Ɛcɛ, ƴɛrɛŋa a, Zerizalɛm nɩbɛ ɛ, nyɩ cɩr cɩr nyɩ tʋɔra a ɩ ko-tuolu bãwfʋ, nyɩɩm na bʋɔlɛ a nyɩ zɛbr-nɩbɛ ɓanɛ taa a. A nyɩ dɔ̃ dem jile na kole nyɩ a zɛbr ƴãw. Bɛ ŋmɩɛr'ɩ a Ɩsɩrayɛl bʋʋrɛ nɩ-kpɛ̃ɛ nɩ dabɔl a kɔrɩ́.