Mise 3 - A SƐB-SÕW

A Sore yere nɩ a nɩ-bɛrɛ na nɛbr a Naaŋmɩn nɩ-bʋʋrɛ a.

¹ Ɩ̃ yere na kʋ̀rɛ nyɩ: «Nyɩ bɛrɛ wone, nyɩɩm Zakɔb bʋʋrɛ nɩ-bɛrɛ ɛ, nyɩɩm Ɩsɩrayɛl nɩbɛ ƴɛ̀r-dɩrbɛ ɛ. A nyɩ tõ-nʋɔr bɛ n'ɩ kɛ̀ nyɩ kaarɛ a lɛ-na-tu-sɔr-a zie ɩ?

² Ɛcɛ, nyɩ hɩ̃ɛn nɩ a vla, ɛ́ nɔnɛ a faa, nyɩ sɩrɛ nɩ a nɩbɛ gamɛ ɛ́ bɩɛlɛ a nɛn-buge na pàw a bɛ kɔbɛ a.»

³ Sɩza n'a, a ɩ̃ nɩ-bʋʋrɛ ƴã-gã-nɛnɛ n'ɩ a bɛ dɩb. Bɛ tawr'ɩ a bɛ gamɛ tʋɔrɛ, bɛ karɛ nɩ a bɛ kɔbɛ, bɛ ŋmarɛ bɛ nɩ pʋrpʋr, mɛ̃ nɛn bɛ na ƴãw ziduwle pʋɔ a.

⁴ Lɛ so, bɛlɛ wa kone bʋɔlɛ a Sore a, ʋ kʋ̃ sɔw bɛ ɩ, ʋ kʋ̃ ŋmɛlɩ kaa bɛ a lɛn daar ɛ, a yel-faar bɛ na maalɩ a ƴãw.

A naaŋmɩn-ƴɛ̀r-manbɛ bɛl na tule a Naaŋmɩn nɩ-bʋʋrɛ a

⁵ À ŋá n'a a Sore ƴɛ̀rɛ cáarɛ nɩ a naaŋmɩn-ƴɛ̀r-manbɛ bɛl na tule a ɩ̃ nɩ-bʋʋrɛ a: «A nʋɔr wa pɩ̃ɛ a, ƴã-ɓaarʋ ƴɛ̀rʋ n'a bɛ mɩ́ ƴɛ̀rɛ, ɛcɛ nɩr bɛ wa ƴãw bɛ bom nʋɔrɩ́ a, zɛbr mɩ́ n'a.

⁶ A na ɩ à ŋá a, a bʋ̃-nyɛrɩ nʋɔr kʋ na! Zie na sɔb'a pàw nyɩ, naaŋmɩn-ƴɛ̀r-manbɛ ɛ. Nɩdaar yele yelu baar'a! Lige na pili na pàw nyɩ mɛ̃ a lɛ mʋ̃tɔ̃w na mɩ́ wa kpɛ baar'a, ɛ́ nyɩ na be n lige pʋɔ.»

⁷ A bʋ̃-nyɛrɩ nyɛrbɛ na nyɛ̃ nɩ vĩ, vĩ na ɩrɛ nɩ a bàwr-bʋwrbɛ, bɛ za na pàw nɩ a bɛ niŋe, a Naaŋmɩn na bɛ cãà sɔwr bɛ a ƴãw.

⁸ Ɛcɛ mãa a, a Sore Vʋʋrʋ ʋ na kʋ̀ m a zũú, ɩ̃ tɛr'ɩ fãw yaga za. Mɩnʋ nɩ kanyir be n a ɩ̃ zie, ɩ̃ yere a Zakɔb bʋʋrɛ sãwna kʋ̀rɛ bɛ, ɛ́ yere a Ɩsɩrayɛl nɩbɛ yel-bier kʋ̀rɛ bɛ.

A Mise yere na k'aa Zerizalɛm na lo na

⁹ Nyɩ bɛrɛ wone, nyɩɩm, Zakɔb bʋʋrɛ nɩ-bɛrɛ ɛ, nyɩɩm, Ɩsɩrayɛl nɩbɛ ƴɛ̀r-dɩrbɛ ɛ, nyɩ hɩ̃ɛn nɩ a mɩnʋ ɛ́ bom za na tu sɔ́r a, nyɩ mɩ́ ɩ na ʋ bɛ cãà tu sɔ́r ɛ.

¹⁰ Nyɩ mɩɛr'ɩ a Sɩyɔ̃ zɩ̃ɩ pʋɔ, ɛ́ ŋmaarɛ a Zerizalɛm faalʋ pʋɔ.

¹¹ Nʋɔr'ʋ bɛ mɩ́ ŋmɛ a ƴɛ̀r-dɩrbɛ bɛ dɩ a ƴɛ̀rʋ, tɔnɛ ƴãw n'a a bàwr-maalbɛ wule, libie ƴãw n'a a naaŋmɩn-ƴɛ̀r-manbɛ bãwnɛ a nɩdaar yele. Ɛcɛ à á ŋá za a, a Sore ƴãw n'a bɛ mɩ́ ɩrɛ ƴãwn yere nɩ: «A Sore be n a tɩ sɔgɔ, yel-faa za bɛ páwr tɩ ɛ.»

¹² Alɛ n'a so, a nyɩɩm zũú a, a Sɩyɔ̃ na lɩɛb'ɩ púo bɛ na kɔ a, a Zerizalɛm tẽw yie na lo na gbõ taa, ɛ́ a Ŋmɩn-yir-kpɛ̃ɛ tãw ɩ tuw gã.