Mise 2 - A SƐB-SÕW

A bɛlɩ dem na nɛbr a bɛ taabɛ a

¹ Baw-bio dem n'ɩ a bɛlɩ dem na mɩ́ gã a tɩ̃ɩsɔw tɩɛrɩ ɛ́ cɔbrɩ a yel-faa maalʋ a. A zie wa wɛlɛ a, bɛ mɩ́ maal'a, bɛlɛ wa tɛr a fãw a lɛn daar a.

² Bɛlɛ wa bɔbr wɛ̀rʋ a, bɛ mɩ́ de a na. Bɛlɛ wa nyɛ̃ yie bɔbr a a, bɛ mɩ́ de de a na. Bɛ mɩ́ dɔwr'ɩ a yie dem nɩ a bɛ nɩbɛ, a nɩr nɩ a ʋ bʋ̃-sori.

³ Alɛ n'a so a Sore yere: «Ɩ̃ cɔbrɛ nɩ kpɩɛrʋ a nyɩɩm bɛ ŋa taabɛ ƴãw, nyɩ bɛ cɩ̃ɛnɛ ɩ, nyɩ kʋ̃ cãà mɩ̀ lɛb dʋɔ zu cere nɩ ɛ. Bʋ̃ʋ n'ʋ vɛ̃, a nɩdaar na waar a na ɩ n kpɩɛrʋ daar.»

⁴ A lɛn daar a, bɛ na ƴãw nɩ nyɩ nɩ yielu ŋa, bɛ na ŋmaarɛ nɩ lãw-mʋɔlɛ yere nɩ: «Tɩ bɛ cãà tɛr bom za towtow ɛ, a tɩ nɩ-bʋʋrɛ bɛ cãà tɛr a ʋ tẽsɔw ɛ, a bɛlɩ dem na farɛ tɩ a, põ nɩ taa a tɩ póru. Bʋ̃ʋ n'ʋ so bɛ fárɛ a tɩ bome za?»

⁵ A na ɩ à ŋá a, a tẽsɔwr a Sore nɩ-bʋʋrɛ na na lɛb põ a, nyɩ been kãw za bɛ páwr a ʋ dem ɛ.

A bɛlɩ dem na bɛ sàwr a naaŋmɩn-ƴɛ̀r-manɛ ƴɛ̀rʋ a.

⁶ Bɛ mɩnɛ kãw ƴɛ̀rɛ nɩ à ŋá a ɩ̃ zie: «Ta cãà ƴɛ̀rɛ a ƴɛ̀rʋ á ŋá taabɛ ɩ, dãbolu n'a, fʋ na yere k'aa vĩ bɛ tɛr nɩɩr-bɛrʋ a.

⁷ Bɛ ŋmɛ na ƴãw a Ɩsɩrayɛl bʋʋrɛ bɩɩ? A Sore nyɔw nɩ a ʋ suur gù bɩɩ? A ʋ ɩb n'ɩ à à ŋá a?» Mãa ƴãw a, a bɛlɩ dem na ɩrɛ vla a, bɛl tɛwr zie n'a a ɩ̃ ƴɛ̀rʋ mɩ́ nʋmɛ.

⁸ Ɛcɛ a Sore ƴɛ̀rɛ nɩ à ŋá a nyɩ zie: «Nyɩ ìr'a ɩ a ɩ̃ nɩ-bʋʋrɛ dɔ̃ dem. A nɩbɛ na mɩ́ yi a zɛbr zie lɛb waar bɛr yã ɛ́ cere a, nyɩ mɩ́ faa nɩ a bɛ kpar-bɛrɛ bɛ na su dɔwlɩ a kpali zu a.

⁹ A ɩ̃ nɩ-bʋʋrɛ pɔwbɛ a, nyɩ mɩ́ diw bɛ na bɛr a bɛ yie bɛ na nɔnɛ a pʋɔ, a maalʋ ɩ̃ na mɩ́ kʋ̀ a bɛ bibiir a, nyɩ mɩ́ nyɔw ʋ na faa a nʋɔr kʋ.

¹⁰ Nyɩ ìr! Nyɩ cere! A nyɩ pɩ̃ɛnʋ baar'a! Kpɩɛrʋ na bɛ tɛr manʋ a gùre nyɩ na, a nyɩ ɩ-faar ƴãw.»

¹¹ Nɩr'ɩ ŋa ta, ƴɛ̀rɛ ƴɛ̀r-zawlɛ, ɛ́ ŋmarɛ ziri yere nɩ: «Ɩ̃ yere na kʋ̀rɛ nyɩ, nyɩ na páw nɩ divɛ̃ nɩ dã-kpɛn!» A lɛn daar a, ʋ na ɩ n a nɩbɛ bɛ ŋa kã-kanɛ.

¹² A Sore yere na: «Zakɔb bʋʋrɛ ɛ, ɩ̃ na ɓã nyɩ nɩ taa nyɩ za. Ɩsɩrayɛl nɩbɛ na cɛ a, ɩ̃ na ɓã nyɩ nɩ taa. Ɩ̃ na ɓã nyɩ nɩ taa mɛ̃ píir na be zaw pʋɔ a, mɛ̃ dʋn na duo nadʋʋrá a, nyɩ na yãwmɛ na damnɛ kʋrkʋrkʋr.

¹³ A sob nɛ na puore a sɔ́r kʋ̀rɛ nyɩ a de nyɩ nɩ niwn. Bɛ faa nyɩ na, nyɩ fɩrfɩr'a tɔl yi. A Sore nyɩ nãà n'ʋ de nyɩ a niwn.»