Matie 8 - A SƐB-SÕW

A Yeezu na sanɩ kɔ̃w kãw a

¹ A Yeezu na tɩ yi a tãw zu siwr a, nɩ-yaga yaga tɩ tu ʋ na.

² Bɛ wa bere na kɔ̃w kãw taw pɩɛl ʋ, lo gbĩ dume a ʋ niŋé ɛ́ yel ʋ: «Sore e, fʋ̃ʋ wa bɔbr a, fʋ na tʋ̃ɔ́ na ɩ ɩ̃ lɛb vɩɛl.»

³ A Yeezu tɩ dɔl'ɩ nũu tɔ n ʋ ɛ́ yel: «Ɩ̃ bɔbr'a, lɛb vɩɛl.» Ɛ́ daadaalɛ, a ʋ kɔnʋ baarɩ.

⁴ Al pùorí, a Yeezu tɩ yel ʋ na: «Taa wa nanɩ manɛ a yel ŋa kʋ̀rɛ nɩr za ɩ. Ɛcɛ cen a bàwr-maalɛ tɩ jɩ́r fʋ kaa, ɛ́ fʋ tɩr a bàwr-maal-bom ʋl a Moyiir na yel kɛ́ bɛ mɩ́ tɩr a, a wul bɛ za kɛ́ fʋ lɛb'a vɩɛl.»

A Yeezu na sanɩ sojarɩ nɩ-kpɛ̃ɛ kãw tõ-tõ-bie a

⁵ A Yeezu na tɩ kpɩɛr a Kafarnawɔm tẽw pʋɔ a, sojarɩ kʋba nɩ-kpɛ̃ɛ kãw tɩ taw na pɩɛl'ʋ zɛlɛ ʋ yãayãa

⁶ yere nɩ: «Sore e, a ɩ̃ tõ-tõ-bie gbɛ̀r a gã a yir, ʋ wone nɩ tuo yaga za.»

⁷ A Yeezu tɩ yel ʋ na: «Ɩ̃ na cen na tɩ sanɩ ʋ.»

⁸ Ɛcɛ a sojarɩ kʋba nɩ-kpɛ̃ɛ tɩ lɛb'a yel: «Sore e, ɩ̃ bɛ sɛwnɩ kɛ́ fʋ wa kpɛ a ɩ̃ yir ɛ, ɛcɛ ƴɛ̀r ƴɛ̀r-bi-been yõ ɛ́ a ɩ̃ tõ-tõ-bie na sanɩ na.

⁹ Mãa mɩŋa tɛr'ɩ nɩ-bɛrɛ, ɛ́ mɩ̀ dɩ nɩ-kpɛ̃ɛnʋ sojarɩ zu. Ɩ̃ mɩ́ yel'ɩ a kãw: “Cen”, ʋ cen, ɛ́ yel a ƴen sob: “Wa”, ʋ wa, ɛ́ yel a ɩ̃ tõ-tõ-bie: “Ɩ bom ŋa”, ʋ ɩ.»

¹⁰ A Yeezu na tɩ wõ a ƴɛ̀r-bie á ŋá a, ʋ nyɔw nɩ nʋɔr, ɛ́ yel a bɛlɩ dem na tɩ tuur ʋ a: «Yel-mɩŋa sɩza, ɩ̃ yere na kʋ̀rɛ nyɩ: ɩ̃ bɛ nyɛ̃ a naaŋmɩn-sàwfʋ ŋa tɔ nɩr kãw za zie a Ɩsɩrayɛl tẽw pʋɔ ɩ.

¹¹ Ɩ̃ yere na kʋ̀rɛ nyɩ, nɩ-yaga na yi n saa-pɛrɩ́ nɩ mʋ̃tɔ̃w-kpɛb-lowr wa lãw nɩ a Abraham nɩ a Ɩzaakɩ nɩ a Zakɔb a tẽ-vla Naalʋ cuw dɩb pʋɔ,

¹² ɛ́ bɛ nɩ̃ɛ diw a tẽ-vla Naalʋ bibiir bɛr yẽw lige pʋɔ. Be n'a bɛ na kone 'wɔbr'ɩ nyɩmɛ.»

¹³ Al pùorí, a Yeezu tɩ yel'ɩ a sojarɩ kʋba nɩ-kpɛ̃ɛ: «Kule! A tu a fʋ zie mɛ̃ a lɛ fʋ na sàw de a!» Ɛ́ a pɛr nɛ pʋɔ, a ʋ tõ-tõ-bie tɩ sanɩ na.

A Yeezu sanɩ nɩ Pɩɛr dɩɛm-mã nɩ bàalbɛ yaga yaga

¹⁴ A Yeezu na tɩ cen Pɩɛr yir a, ʋ tɩ nyɛ̃ nɩ a Pɩɛr dɩɛm-mã ʋ gã nɩ ƴã-tʋlʋ.

¹⁵ Ʋ tɩ tɔ n a ʋ nũu, a ƴã-tʋlʋ bɛr ʋ, ʋ ìr kaarɛ a ʋ zie.

¹⁶ A zaanʋɔra na wa ta a, bɛ tɛr'ɩ kɔ̃tɔ̃-ìrbɛ yaga wa n a Yeezu zie. Ʋ tɩ diw nɩ a kɔ̃tɔ̃-faar nɩ ƴɛ̀r-bi-been yõ ɛ́ sanɩ a bàalbɛ za,

¹⁷ k'aa lɛ a naaŋmɩn-ƴɛ̀r-manɛ Ɩzayi na sɛb yel a, tʋ̃ɔ́ tu: «Ʋlɛ n'ʋ de a tɩ nɩ-kɔwlʋ, ɛ́ tuo a tɩ bàalʋ.»

A bɛlɩ dem na bɔbr a Yeezu pùor-tub a

¹⁸ A Yeezu na tɩ nyɛ̃ a zu-sɛbla na ŋmãa viiri koli ʋ a, ʋ yel'ɩ a ʋ po-tuurbɛ kɛ́ bɛ ɩ bɛ gãw a kʋ̃ɔ-kpɛ̃ɛ gãwn.

¹⁹ Naaŋmɩn wulu sɛ-sɛbrɛ kãw tɩ taw na ta yel ʋ: «Wul-wul-kara a, ɩ̃ na tuur fʋ nɩ zie nɛ za fʋ na cere a.»

²⁰ A Yeezu tɩ sɔw ʋ na: «A tʋrbaar tɛr'ɩ bɔwrɩ kpɩɛr, ɛ́ a mʋ̃ɔ pʋɔ lili tɛr cowr, ɛcɛ a Nɩsaal Bie ʋl bɛ tɛr zie na mɩ́ gã pɩ̃ɛnɩ ɛ.»

²¹ A ʋ po-tuure ƴen sob kãw tɩ yel ʋ na: «Wul-wul-kara a, kʋ̀ m sɔ́r ɩ̃ cen tɩ ũù a ɩ̃ sãà baarɩ.»

²² Ɛcɛ a Yeezu tɩ sɔw ʋ na: «Tuur mɛ̃, ɛ́ bɛr a kũuni bɛ ũùne a bɛ kũuni.»

A Yeezu na ɩ a sɛsɛb ʋ ŋmãa a kʋ̃ɔ-kpɛ̃ɛ zu a

²³ A Yeezu tɩ kpɛ n a gbor pʋɔ, ɛ́ a ʋ po-tuurbɛ bɩɛlɛ ʋ.

²⁴ Bɛ wa bere na sɛsɛb-kpɛ̃ɛ kãw cɛ̀r a kʋ̃ɔ-kpɛ̃ɛ zu, a kʋ̃ɔ mie tɩ faar na ìr pàw a gbor. Ɛcɛ a Yeezu ʋl tɩ gúre na.

²⁵ A ʋ po-tuurbɛ tɩ taw na ta sɩ̃wnɛ ʋ yere nɩ: «Sore e, faa tɩ, tɩ kpiir a!»

²⁶ Ʋ tɩ yel bɛ na: «Bʋ̃ʋ n'ʋ so nyɩ zɔrɛ dɛ̃bɩ̃ɛ, nyɩɩm a naaŋmɩn-sàwfʋ na bɛ saalɩ a?» Lɛ n'a ʋ tɩ ìr àr ɛ́ tanɩ a sɛsɛb nɩ a kʋ̃ɔ-kpɛ̃ɛ, a zie ŋmãa vʋʋrʋ cɩ̃ɩɩ!

²⁷ A nɩbɛ tɩ nyɔw nɩ nʋɔr yere nɩ: «Ãa n'ɩ a sob ŋa, a sɛsɛb nɩ a kʋ̃ɔ-kpɛ̃ɛ za wa sàwr a ʋ nʋɔr?»

A Yeezu na sanɩ kɔ̃tɔ̃-ìrbɛ ayi kãw a

²⁸ A Yeezu na tɩ gãw a kʋ̃ɔ-kpɛ̃ɛ ta Gadara tẽw a, kɔ̃tɔ̃-ìrbɛ ayi kãw tɩ yi n yarʋ pʋɔ tuor'ʋ. A bɛ po-tuolu zũú, nɩr za bɛ tɩ sàw tuur a sɔ́r ʋl ɛ.

²⁹ Bɛ tɩ ŋmɩɛr'ɩ cɛlsɩ yere nɩ: «Bʋ̃ʋ n'a jɩ́rɛ fʋ, Naaŋmɩn Bie e? Fʋ wa na kɛ́ fʋ wa sɔbr tɩ niwn ɛ́ a daar bɛ ta sɛr ɛ?»

³⁰ Zɩ̃ kɛ́ doba-yaga yaga tɩ àr'a zãá blã a be bɔbr a bʋ̃-dɩrɩ.

³¹ A kɔ̃tɔmɛ tɩ zɛlɛ nɩ a Yeezu yere nɩ: «Fʋ̃ʋ wa diwr tɩ a, fʋ̃ʋ ƴãw tɩ cen tɩ kpɛ a dobaar á ŋá pʋɔ.»

³² A Yeezu tɩ yel a na: «Nyɩ cen.» A tɩ yi na cen tɩ kpɛ a dobaar pʋɔ. A dobaar za tɩ yi a tãw na ɩ cũgbulu a zu, ɛ́ dãw taa tɩ lo a kʋ̃ɔ-kpɛ̃ɛ pʋɔ tu kʋ̃ɔ.

³³ A doba-cɩ̃ɩnbɛ tɩ zɔ na kul a tẽw pʋɔ tɩ manɩ a za, lãwnɩ a kɔ̃tɔ̃-ìrbɛ yele.

³⁴ Lɛ n'a a tẽw dem za tɩ yi tuori a Yeezu. Bɛ na wa nyɛ̃ ʋ a, bɛ zɛlɩ ʋ na k'ʋʋ yi zaa a bɛ tẽw pʋɔ.