Matie 6 - A SƐB-SÕW

A nɩ-kɔmɛ sõwfʋ yele

¹ «Nyɩ gùre nyɩ tʋɔra vla, taa wa tuur a nyɩ puoru yel-bɛrɛ kɛ́ a sãá a nɩbɛ nyɛ̃ nyɩ ɛ, alɛ bɛ ɩ lɛ, nyɩ kʋ̃ páw maalʋ a nyɩ Sãà na be a tẽ-vla pʋɔ a zie ɩ.

² A na ɩ à ŋá a, fʋ̃ʋ wa kʋ̀rɛ bom nɩ-kɔmɛ a, ta ɩrɛ gɔmɛ a nɩbɛ niŋé mɛ̃ a lɛ a nɩsaal-libelibe na mɩ́ ɩrɛ a puoru-diru pʋɔ nɩ a sɛ́ɛ pʋɔ, k'aa nɩbɛ tʋ̃ɔ́ danɛ bɛ a ɩ. Yel-mɩŋa sɩza, ɩ̃ yere na kʋ̀rɛ nyɩ, bɛ páw nɩ a bɛ maalʋ baarɩ.

³ Fʋ̃ʋ a, fʋ̃ʋ wa kʋ̀rɛ bom nɩ-kɔmɛ a, a fʋ gʋba nũu, ʋ ta bãw ʋlɩ bom nɛ a fʋ dʋrʋ nũu na ɩrɛ a ɩ.

⁴ À ŋá n'a a fʋ nɩ-kɔmɛ sõwfʋ na sɔwlɩ, ɛ́ a fʋ Sãà Naaŋmɩn na mɩ́ nyɛ̃ bom za na sɔwlɩ a, na maalɩ fʋ na.»

A Yeezu wule tɩ nɩ lɛ tɩ na na mɩ́ puore a

⁵ «Nyɩmɛ wa puore a, nyɩ ta mɩ́ ɩrɛ mɛ̃ a nɩsaal-libelibe a ɩ: bɛ mɩ́ nɔnɛ na kɛ́ bɛ àr saaƴẽwn a puoru-diru pʋɔ nɩ a sɔ-carɩ pʋɔ puore, k'aa nɩbɛ za tʋ̃ɔ́ nyɛ̃ bɛ. Yel-mɩŋa sɩza, ɩ̃ yere na kʋ̀rɛ nyɩ, bɛ páw nɩ a bɛ maalʋ baarɩ.

⁶ Fʋ̃ʋ a, fʋ̃ʋ wa puore a, kpɛ tɔl a fʋ di-pɛ-baara za pʋɔ, pàw a pan ɛ́ puore a fʋ Sãà Naaŋmɩn na be a be, a zi-sɔwla ʋl pʋɔ a. A fʋ Sãà Naaŋmɩn na mɩ́ nyɛ̃ bom za na sɔwlɩ a, na maalɩ fʋ na.

⁷ Nyɩmɛ mɩ́ wa puore a, nyɩ ta mɩ́ puule a ƴɛ̀r-been kʋralɛ mɛ̃ a tɩbɛ dem a ɩ: bɛ mɩ́ manɛ kɛ́ bɛlɛ wa ƴɛ̀rɛ yaga a n'a a Naaŋmɩn na de a bɛ puoru.

⁸ A na ɩ lɛ a, nyɩ ta ɩrɛ mɛ̃ a bɛl a ɩ, a nyɩ Sãà Naaŋmɩn mɩ́ bãw nɩ a nyɩ bʋ̃-bɔbra ɛ́ nyɩ bɛ zɛlɩ ʋ sɛr ɛ.

⁹ A na ɩ lɛ a, a nyɩɩm, nyɩ mɩ́ puore à ŋá: “Tɩ Sãà na be a tẽ-vla pʋɔ, a nɩbɛ za, bɛ bãw kɛ́ fʋ̃ʋ n'ɩ a Naaŋmɩn na ɩ sõw a,

¹⁰ a fʋ naalʋ, ʋ wa, a fʋ pʋ-tɩɛrʋ, ʋ maalɩ a tẽw zu mɛ̃ a tẽ-vla pʋɔ a.

¹¹ Kʋ̀ tɩ a dɩ̃a dɩb tɩ na bɔbr a.

¹² Dɩ a tɩ sãwna suur kʋ̀ tɩ, mɛ̃ a lɛ a tɩɩm tɛɛ za na mɩ́ dɩ suur kʋ̀ a bɛlɩ dem na sãw tɩ a.

¹³ Ta sàw a bɛlʋ ta tɩ ɛ, ɛ́ faa tɩ a Faalʋ sob nuru pʋɔ. [Fʋ̃ʋ sɩrɩ so naalʋ nɩ kpɛnʋ nɩ danʋ, a yome yome za. Amɛn.]”

¹⁴ Sɩza n'a, nyɩmɛ mɩ́ wa dɩ a nɩsaalbɛ sãwna suur kʋ̀ bɛ a, a nyɩ Sãà na be a tẽ-vla pʋɔ a, mɩ̀ na mɩ́ dɩ n a nyɩ sãwna suur kʋ̀ nyɩ.

¹⁵ Ɛcɛ nyɩmɛ bɛ mɩ́ wa dɩ a nɩsaalbɛ sãwna suur kʋ̀ bɛ a, a nyɩ Sãà mɩ̀ kʋ̃ dɩ a nyɩ sãwna suur kʋ̀ nyɩ ɛ.»

A mʋta-tuo yele

¹⁶ «Nyɩmɛ mɩ́ wa tɛr a mʋta-tuo a, nyɩ ta mɩ́ kʋɔlɛ mɛ̃ a nɩsaal-libelibe a ɩ, bɛ mɩ́ sãw nɩ niwn k'aa nɩbɛ za nyɛ̃ bɛ na tɛr a mʋta-tuo a. Yel-mɩŋa sɩza, ɩ̃ yere na kʋ̀rɛ nyɩ, bɛ páw nɩ a bɛ maalʋ.

¹⁷ Ɛcɛ fʋ̃ʋ a, fʋ̃ʋ wa tɛr a mʋta-tuo a, fʋ̃ʋ pɛ́w a fʋ niwn ɛ́ zɛ a fʋ zu kãa-nyũu,

¹⁸ a nɩbɛ ta bãwnɩ a fʋ na tɛr mʋta-tuo a ɩ. A fʋ Sãà Naaŋmɩn na nyɛrɛ bom za na sɔwlɩ a, na maalɩ fʋ na.»

Nyɩ bɔbr a na-bome bine a tẽ-vla pʋɔ

¹⁹ «Nyɩ ta bɔbr na-bome gbone taa a tẽw zu ka, mɔwr nɩ zãzule na mɩ́ sãwnɛ bɛrɛ, ɛ́ a nyãnyuwr mɩ́ kar a pamɛ ɛ́ kpɛ zu a ɩ.

²⁰ Nyɩ nɩ̃ɛ bɔbr na-bome gbone taa a tẽ-vla pʋɔ, be mɔwr nɩ zãzule na bɛ sãwnɛ bɛrɛ a, ɛ́ nyãnyuwr bɛ karɛ a pamɛ bɛrɛ ɛ́ zure a.

²¹ A be a fʋ na-bome na be a, be n'a a fʋ tɩɛrʋ mɩ̀ na be.»

Mimie n'a caalɛ a ƴã-gan za

²² «A mimie n'ɩ a ƴã-gan fɩ̃tɩlɛ. A fʋ mimie wa ɩ mimi-kpɛn a, a fʋ ƴã-gan za na be n cãà pʋɔ,

²³ ɛcɛ a fʋ mimie wa ɩ mimi-sãwnɩ a, a fʋ ƴã-gan za na be n lige pʋɔ. A na ɩ lɛ a, a cãà na be a fʋ pʋɔ a, wa ɩ lige a, nyɛ̃ lige na pãa sɛw a!»

A Naaŋmɩn bɩɩ a libir

²⁴ «Nɩr za kʋ̃ tʋ̃ɔ́ ɩ na-mɩnɛ ayi tõ-tõ-bie ɩ: ʋ na hɩ̃ɛn nɩ a dãw-niwn sob, ɛ́ nɔnɛ a ayi sob, bɩɩ ʋ na tu n a kãw pùor, ɛ́ bɛr a kãw. Nyɩ kʋ̃ tʋ̃ɔ́ lãw ɩ a Naaŋmɩn nɩ a libir tõ-tõ-biir ɛ.»

Nyɩ ƴãw a nyɩ tɩɛrʋ za Naaŋmɩn ƴãw

²⁵ «Lɛ so ɩ̃ yere kʋ̀rɛ nyɩ: a nyɩ nyɔ-vʋʋrʋ ƴãw a, nyɩ ta tɩɛrɛ bʋ̃ʋ n'ʋ nyɩ na dɩ ɛ, ɛ́ a nyɩ ƴã-gan ƴãw a, nyɩ ta tɩɛrɛ bʋ̃ʋ n'ʋ nyɩ na su ɛ. A nyɔ-vʋʋrʋ bɛ zuo a bʋ̃-dɩrɩ ɛ? Ɛ́ a ƴã-gan bɛ zuo a bʋ̃-suuri ɛ?

²⁶ Nyɩ nyɛ̃ a mʋ̃ɔ pʋɔ lili a, a bɛ bʋ̀rɛ ɩ, bɛ cɩɛr ɛ, bɛ suur bowe pʋɔ ɩ, ɛ́ a nyɩ Sãà na be a tẽ-vla pʋɔ a, guole a. Nyɩ bɛ zuo a lili polpol lɛ ɩ?

²⁷ Nyɩ buor sob'ʋ na tɩɛrɛ za, wa ɩ a ʋ nyɔ-vʋʋrʋ ʋ wõwme dɔwlɩ blã?

²⁸ A bʋ̃-suuri ƴãw a, bʋ̃ʋ n'ʋ so nyɩ mɩ́ dɩ tuo tɩɛrɛ? Nyɩ jɩ́r nyɛ̃ a lɛ a póru mɔ̃-puuru na mɩ́ bule ìre a: a bɛ tone wone tuo ɩ, bɛ wóbr pɛnɛ ɩ,

²⁹ ɛcɛ mãa n'ʋ yere kʋ̀rɛ nyɩ, a Salomɔ̃ tɔr za, nɩ a ʋ dɛpaalʋ vɩɛlʋ za, bɛ tɩ su ta a mɔ̃-puuru á ŋá been kãw za ɩ.

³⁰ A Naaŋmɩn mɩ́ wa su a póru pʋɔ mʋ̃ɔ à ŋá a, al na mɩ́ be dɩ̃a ɛ́ bio bɛ na lɔb a ƴãw vũumí a, ʋ na ɩ n ŋmɩn kʋ̃ su nyɩ vla zuo lɛ, nyɩɩm a naaŋmɩn-sàwfʋ na bɛ saalɩ a!

³¹ A na ɩ lɛ a, nyɩ ta mɩ́ dɩ tuo tɩɛrɛ yere nɩ: bʋ̃ʋ n'ʋ tɩ na dɩ? Bʋ̃ʋ n'a tɩ na nyũ? Bʋ̃ʋ n'ʋ tɩ na su ɛ?

³² Tɩbɛ dem nɛbɛ mɩ́ bɔbr à á ŋá za kʋralɛ. Ɛcɛ a nyɩ Sãà na be a tẽ-vla pʋɔ a, bãwnɩ a na nyɩ na tɛr à á ŋá za yel-ɩra a.

³³ Nyɩ mɩ́ de niwn bɔbr a Naaŋmɩn Naalʋ nɩ a ʋ nyɔ-vʋʋr-vla, ʋʋ na kʋ̀ nyɩ nɩ a al za na báa cɛ a dɔwlɩ.

³⁴ A na ɩ lɛ a, nyɩ ta zɔrɛ dɛ̃bɩ̃ɛ a bio ƴãw ɛ, a bio na tɛr'ɩ a ʋ mɩŋa tɩɛrʋ. Bibir za nɩ ʋ bàlʋ.»