Matie 22 - A SƐB-SÕW

A kul-taa cuw dɩb zʋkpar

¹ A Yeezu tɩ lɛb'a lɔbr zʋkpaɩ kʋ̀rɛ bɛ yere nɩ:

² «A tẽ-vla Naalʋ ŋmɛ̃ na mɛ̃ nãà kãw na tɩ maalɩ a ʋ bie kul-taa cuw a.

³ Ʋ tɩ tõ n a ʋ tõ-tõ-biir kɛ́ bɛ cen tɩ bʋɔlɩ a nɩbɛ ʋ na bʋɔlɩ a cuw dɩb ƴãw a. Ɛcɛ bɛ bɛ tɩ bɔbr a waa ɩ.

⁴ Ʋ tɩ lɛb'a tõ tõ-tõ-biir bɛ mɩnɛ kɛ́ bɛ tɩ yel a nɩbɛ ʋ na bʋɔlɩ a: “Nyɩ nyɛ̃, ɩ̃ cɔbr'ɩ a cuw dɩb baarɩ, ɩ̃ kʋ n a ɩ̃ nadɛɛ nɩ a ɩ̃ dʋ̃-'wɔɛ, bom za cɔbr'a baarɩ, nyɩ wa a kul-taa cuw dɩb zie.”

⁵ Ɛcɛ, bɛ bɛ tɩ cɛlɛ be ɩ, ɛ́ ìr, ŋa cere a ʋ pu-pʋɔ, ŋa cere ʋ yɛ̀rʋ́ zie,

⁶ ɛ́ bɛ mɩnɛ nyɔw a tõ-tõ-biir dɔwrɩ ɛ́ kʋ.

⁷ A nãà tɩ nyɛ̃ nɩ suur, ɛ́ tõ a ʋ sojarɩ bɛ cen tɩ kʋ a nɩ-kʋrbɛ bɛ ŋa, ɛ́ nyɩw a bɛ tẽw bɛr.

⁸ Al pùorí, ʋ yel a ʋ tõ-tõ-biir: “A kul-taa cuw dɩb cɔbr'a baarɩ, ɛcɛ a nɩbɛ ɩ̃ na bʋɔlɩ a, bɛ tɩ sɛw taa nɩ ɛ.

⁹ A na ɩ lɛ a, nyɩ yi cen a sɔ-carɩ pʋɔ tɩ bʋɔlɩ a bɛlɩ dem za nyɩ na na nyɛ̃ a, wa n a kul-taa cuw dɩb zie.”

¹⁰ A ʋ tõ-tõ-biir tɩ yi n a sɛ́ɛ pʋɔ tɩ bʋɔlɩ a bɛlɩ dem za bɛ na nyɛ̃ a ɓã taa, a nɩ-faar lãwnɩ a nɩ-vɩɛlɩ. Lɛ n'a a cuw dĩo tɩ paalɩ a cuw-dɩrbɛ.

¹¹ A nãà tɩ kpɛ na k'ʋʋ tɩ jɩ́r a cuw-dɩrbɛ kaa, ʋ tɩ nyɛ̃ nɩ nɩr kãw ʋ bɛ su a cuw bʋ̃-suuri ɛ.

¹² Ʋ tɩ sowr'ʋ na: “Ɩ̃ bá a, ŋmɩŋmɩn n'a fʋ ɩ kpɛ a ka ɛ́ bɛ su a cuw bʋ̃-suuri?” A sob nɛ tɩ ɩ n gbili.

¹³ Lɛ n'a a nãà tɩ yel a tõ-tõ-biir: “Nyɩ nyɔw ʋ 'lẽ a gbɛ́ɛ nɩ a nuru, ɛ́ lɔb ʋ bɛr yẽw lige pʋɔ: be n'a ʋ na kone 'wɔbr'ɩ nyɩmɛ.”

¹⁴ Sɩza n'a, nɩ-yaga nɛbɛ bɛ bʋɔlɩ, ɛcɛ blãlɛ n'a bɛ kaa ír.»

A zuru-yar bɛ na ya kʋ̀ a Sezaar a

¹⁵ A Faarizɩ̃ɛ mɩnɛ tɩ cen na tɩ kpaa taa, kɛ́ bɛ nyɛ̃ a lɛ bɛ na na ɩ nyɔw a Yeezu a ʋ ƴɛ̀rʋ pʋɔ a.

¹⁶ Al pùorí, bɛ tɩ tõ n a bɛ po-tuurbɛ nɩ Erɔdɩ nɩbɛ kɛ́ bɛ tɩ yel ʋ: «Wul-wul-kara a, tɩ bãw na kɛ́ fʋ yere nɩ yel-mɩŋa, ɛ́ wule a nɩbɛ a Naaŋmɩn sɛ́ɛ nɩ yel-mɩŋa, fʋ bɛ zɔrɛ nɩr za ɩ, ɛ́ bɛ owre ɩ.

¹⁷ Yel a lɛ fʋ na tɩɛrɛ a, tɩ nyɛ̃: sɔ́r be n be kɛ́ bɛ mɩ́ ya a zuru-yar kʋ̀ a Sezaar bɩɩ sɔ́r bɛ ka be?»

¹⁸ Ɛcɛ a Yeezu na tɩ bãw a bɛ yã-faa a, ʋ yel bɛ na: «Nɩsaal-libelibe bɛ ŋa! Bʋ̃ʋ n'ʋ so nyɩ bɔbr kɛ́ nyɩ ŋmãa a ɩ̃ pùor?

¹⁹ Nyɩ wul mɛ̃ a libir ʋl bɛ na mɩ́ ya n a zuru-yar a.» Bɛ tɩ wul ʋ nɩ bibi-been sã-ya libir.

²⁰ A Yeezu tɩ sowri bɛ na: «Ãa niwn nɩ ãa yúor'ɩ à á ŋá na wi a libir zu a?»

²¹ Bɛ tɩ sɔw na: «Sezaar dem'a.» Lɛ n'a ʋ tɩ yel bɛ: «A na ɩ à ŋá a, nyɩ mɩ́ kʋ̀ a Sezaar a ʋ bome, ɛ́ mɩ̀ kʋ̀ a Naaŋmɩn a ʋ dem.»

²² A ƴɛ̀r-bie á ŋá tɩ ɓãá bɛ nɩ nʋɔr, bɛ bɛr ʋ ɛ́ tɔlɛ cere.

A kũu-pʋɔ-lɛb-yibu yele

²³ A ʋlɩ bibir nɛ, Sadiseyɛ̃ mɩnɛ tɩ taw na ta a Yeezu zie. A Sadiseyɛ̃ mɩnɛ n'a mɩ́ yel k'aa kũu-pʋɔ-lɛb-yibu bɛ ka ɩ. Bɛ tɩ sowr'ʋ na:

²⁴ «Wul-wul-kara a, Moyiir yel a kɛ́: “Nɩr wa kul pɔw bɛ dɔw bie ɛ́ kpi a, a ʋ yɛb, ʋ kul a pɔw-kʋɔr tʋ̃ɔ́ dɔw bibiir kʋ̀ a ʋ yɛb na kpi a.”

²⁵ Zɩ̃ kɛ́ yɛbr ayopõi kãw tɩ be n be a tɩ zie ka. A dãw-niwn sob tɩ kul'ɩ pɔw, bɛ tɛr bibiir ɛ, ɛ́ kpi, ɛ́ bɛr a ʋ pɔw-kʋɔr a ʋ yɛb.

²⁶ A mɩ̀ tɩ ɩ n a lɛ a ayi sob zie, nɩ a ata sob, tɩ tɔ a bɛ za ayopõi.

²⁷ A bɛ kũu pùorí a, a pɔw mɩ̀ pãa wa kpi na.

²⁸ A na ɩ à ŋá a, a kũu-pʋɔ-lɛb-yibu daar, a bɛ ayopõi pʋɔ a, ʋ na ɩ n buor sob pɔw? Bɛ za na kul ʋ lɩɛrɩ taa a?»

²⁹ A Yeezu tɩ sɔw bɛ na: «Nyɩ be n tulu pʋɔ, nyɩ na bɛ bãw a Sɛb-son nɩ a Naaŋmɩn fãw a ƴãw.

³⁰ A kũu-pʋɔ-lɛb-yibu daar a, dɛbr bɛ kule pɔwbɛ ɩ, pɔwbɛ bɛ kule sɩrbɛ ɩ, bɛ na ɩ na mɛ̃ malkɩ mɩnɛ a, a tẽ-vla pʋɔ.

³¹ Ɛcɛ a kũuni na lɛbr yire a ƴãw a, nyɩ bɛ dãw kanɩ a lɛ a Naaŋmɩn na yel kʋ̀ nyɩ a ɩ?

³² “Mãa n'ɩ a Abraham Naaŋmɩn, a Ɩzaakɩ Naaŋmɩn, nɩ a Zakɔb Naaŋmɩn.” Ʋ bɛ ɩ nɩ-kũuni Naaŋmɩn ɛ, nɩ-vʋʋrɩ Naaŋmɩn n'ʋ.»

³³ A zu-sɛbla na tɩ wõ a ʋ wulu ŋa a, nʋɔr tɩ ɓãá bɛ na.

A Naaŋmɩn nɛ-ƴãwnɩ za pʋɔ nɔ-kpɛ̃ɛ

³⁴ A Faarizɩ̃ɛ mɩnɛ na wa wõ k'aa Yeezu ƴɛ̀r'a tʋ̃ɔ́ a Sadiseyɛ̃ mɩnɛ a, bɛ ɓã n taa.

³⁵ Ɛ́ a bɛ ƴen sob kãw, na tɩ ɩ Naaŋmɩn wulu bãw-bãw-kara a, tɩ bɔbr k'ʋʋ ɩ ʋ kaa. Ʋ tɩ sowr'ʋ na:

³⁶ «Wul-wul-kara a, a Naaŋmɩn wulu pʋɔ a, a nɔ-ƴãwna kpɛ̃ɛ za n'ɩ buor?»

³⁷ A Yeezu tɩ sɔw ʋ na: «“Fʋ na nɔnɛ nɩ a Sore fʋ Naaŋmɩn nɩ a fʋ socir za, nɩ a fʋ sɩ́ɛ za, nɩ a fʋ yã za.”

³⁸ A nɔ-ƴãwna ŋa n'ɩ a kpɛ̃ɛ za nɩ a dãw-niwn sob.

³⁹ Ɛcɛ a nɛ-ƴãwnɩ ayi sob'ɩ ŋa, mɩ̀ na ɩ kpɛ̃ɛ sɛw a dãw-niwn sob a: “Fʋ na nɔnɛ nɩ a fʋ tɔ sob mɛ̃ a fʋ mɩŋa a.”

⁴⁰ A nɛ-ƴãwnɩ ayi á ŋá a, alɛ so a Moyiir wulu za nɩ a naaŋmɩn-ƴɛ̀r-manbɛ wulu za.»

A Naaŋmɩn Nɩ-kabra nɩ a Daviir yele

⁴¹ A Faarizɩ̃ɛ mɩnɛ na tɩ ɓã taa a, a Yeezu tɩ sowri bɛ na:

⁴² «Ŋmɩŋmɩn n'a nyɩ tɩɛrɛ a Nɩ-kabra ƴãw? Ãa bʋʋrɛ n'ʋ?» Bɛ tɩ sɔw na: «Daviir bʋʋrɛ n'ʋ.»

⁴³ A Yeezu tɩ yel bɛ na: «Ɛ́ ŋmɩŋmɩn za n'a a Vʋʋrʋ Sõw na tɩ ƴãw a Daviir ʋ ƴɛ̀r a, tɩ bʋɔlɛ a Naaŋmɩn Nɩ-kabra: Sore? Ɛ́ tɩ yel a ƴɛ̀r-bie á ŋá:

⁴⁴ “A Sore Naaŋmɩn yel'ɩ a ɩ̃ Sore, zɩ̃ a ɩ̃ dʋrʋ lowr, ɛ́ gù ɩ̃ wa tɩ nɛb a fʋ dɔ̃ dem bin a fʋ pile?”

⁴⁵ A na ɩ à ŋá a, a Daviir wa bʋɔlɛ ʋ: Sore a, ŋmɩŋmɩn n'a ʋ ɩ a ʋ bie?»

⁴⁶ Nɩr kãw za bɛ tɩ tʋ̃ɔ́ sɔw ʋ bom ɛ. Ɛ́ a na dɛ tɩ tĩ a ʋlɩ bibir a, nɩr za bɛ tɩ sàw lɛb sowr'ʋ bom za ɩ.