Matie 2 - A SƐB-SÕW

Saa-pɛrɩ́ bãw-bãwnbɛ wa na wa puori a Yeezu

¹ A Yeezu na tɩ dɔw Bɛtɩlɛm, Zude tẽw pʋɔ, Erɔdɩ naalʋ-dɩb daar a, bãw-bãwnbɛ kãw tɩ yi n Saa-pɛrɩ́ wa ta a Zerizalɛm.

² Bɛ tɩ sowr'a: «Nyɩnɛ n'a a Zifʋ mɩnɛ nãà na dɔw a daar yɩ̃ɛ ŋa a be? Tɩ nyɛ̃ nɩ a ʋ ŋmar-bir a Saa-pɛrɩ́ ɛ́ wa kɛ́ tɩ wa puor'ʋ nɩ tɩ tʋɔra-siwru.»

³ A nãà Erɔdɩ na tɩ wõ a yel ŋa a, pʋ̀lá vʋ̃ɔ nɩ ʋlɛ nɩ a Zerizalɛm tẽw dem za.

⁴ Ʋ tɩ bʋɔl'ɩ a bàwr-maal-nɩ-bɛrɛ za nɩ a Naaŋmɩn wulu sɛ-sɛbrbɛ za ɓã taa, ɛ́ sowri bɛ a be a Nɩ-kabra na na dɔw a.

⁵ Bɛ tɩ sɔw na: «Bɛtɩlɛm, Zude tẽw n'a. À ŋá n'a a naaŋmɩn-ƴɛ̀r-manɛ sɛb yel:

⁶ “Fʋ̃ʋ Bɛtɩlɛm na be a Zude tẽw pʋɔ a, fʋ̃ʋ bɛ n'ɩ a pʋrɩ za a Zuda tẽw loge za pʋɔ ɩ. A fʋ pʋɔ sɩrɩ n'a a nãà na yi, a ʋl na na cɩ̃ɩnɛ a ɩ̃ nɩ-bʋʋrɛ Ɩsɩrayɛl a.”»

⁷ Lɛ n'a a Erɔdɩ tɩ sɔwlɩ bʋɔlɩ a Saa-pɛrɩ́ bãw-bãwnbɛ, wa kpɩwrɩ bãw a ʋlɩ daar nɛ tɔr za bɛ na nyɛ̃ a ŋmar-bir na pur a.

⁸ Al pùorí, ʋ ƴãw bɛ a Bɛtɩlɛm sɔ́rɩ́ ɛ́ yel: «Nyɩ cen tɩ kpɩwrɩ bãw a bie yele, ɛ́ nyɩmɛ wa nyɛ̃ ʋ a, nyɩɩm lɛb wa yel kʋ̀ m, ɩ̃ mɩ̀ cen tɩ puor'ʋ nɩ ɩ̃ tʋɔra-siwru.»

⁹ Bɛ na tɩ wõ a nãà ƴɛ̀rʋ baar'a, bɛ yi na lo a sɔ́r. Zɩ̃ kɛ́ a ŋmar-bir ʋl bɛ na tɩ nyɛ̃ a Saa-pɛrɩ́ a, tɩ lɛb'a de bɛ niwn tɩ tɛw àr a zie ʋl a bie na be a.

¹⁰ Bɛ na tɩ nyɛ̃ a ŋmar-bir a, nʋ̃ɔ̀ tɩ kpɛ bɛ nɩ yaga bɛ dɩ vuo ɩ.

¹¹ Bɛ tɩ kpɛ n a yir pʋɔ nyɛ̃ a bie nɩ a ʋ mã Marya, bɛ tɩ puor'ʋ na nɩ bɛ tʋɔra-siwru, ɛ́ yuo a bɛ dawli ír bome kʋ̀ a bie: salm-zɩɛ, tɩ-suur-zɔ̃-na-nyùur-vla-vla-a, nɩ mɩ́ɩ̀r kãa-nyũu.

¹² Al pùorí, a Naaŋmɩn tɩ yel'a kʋ̀ bɛ zánʋ pʋɔ kɛ́ bɛ ta lɛb cen a Erɔdɩ zie ɩ, lɛ so bɛ tɩ tu sɔr-yũo lɛb kul a bɛ tẽw.

A Eziptɩ tẽw zɔ-cenu

¹³ A Saa-pɛrɩ́ bãw-bãwnbɛ na wa kul a, a Zuzɛb nyɛ̃ nɩ a Sore malkɩ zánʋ pʋɔ ʋ yel ʋ: «Ìr tɛr a bie nɩ a ʋ mã zɔ cen nɩ Eziptɩ tẽw tɩ be n a be, ɛ́ gù ɩ̃ wa tɩ yel kɛ́ fʋ lɛb wa. Bʋ̃ʋ n'ʋ vɛ̃, a Erɔdɩ na ìr'a bɔbr a bie k'ʋʋ kʋ.»

¹⁴ A Zuzɛb tɩ ìr'ɩ tɩ̃ɩsɔw tɛr a bie nɩ a ʋ mã cen nɩ a Eziptɩ tẽw.

¹⁵ Ʋ tɩ be n a be ɛ́ gù a Erɔdɩ tɩ kpi, k'aa à ŋá a Sore na tɩ yel'ɩ a ʋ ƴɛ̀r-manɛ nʋɔr a tʋ̃ɔ́ tu: «Ɩ̃ bʋɔl'ɩ a ɩ̃ bie ʋ yi a Eziptɩ tẽw pʋɔ.»

A Erɔdɩ ƴãw na bɛ kʋ a Bɛtɩlɛm tẽw bibiir

¹⁶ A Erɔdɩ na tɩ nyɛ̃ k'aa Saa-pɛrɩ́ bãw-bãwnbɛ bɛlɩ ʋ na a, ʋ nyɛ̃ nɩ suur yaga, ɛ́ tõ nɩbɛ bɛ cen a Bɛtɩlɛm nɩ a ʋ tẽ-kpɔwlɩ pʋɔ, tɩ kʋ a dɛbli za na bɛ tɩ ta yome ayi a. A yome ayi á ŋá tɩ man na taa nɩ a lɛ ʋ na tɩ sowri a yele a Saa-pɛrɩ́ bãw-bãwnbɛ manɩ kʋ̀ ʋ a.

¹⁷ Lɛ n'a a tɩ tu à à ŋá a naaŋmɩn-ƴɛ̀r-manɛ Zeremi na tɩ dãw yel a:

¹⁸ «Bɛ wõ n kɔkɔr a Arama tẽw pʋɔ, kon nɩ lãw-mʋɔlɛ n'a: Arasɛl'ʋ kone a ʋ bibiir, ɛ́ bɛ sàwr bɛ na mɔwl'ʋ, a bɛ na bɛ cãà a ƴãw.»

A Zuzɛb tɛr'ɩ a bie nɩ a ʋ mã lɛb wa n

¹⁹ A Erɔdɩ kũu pùorí, a Zuzɛb tɩ nyɛ̃ nɩ a Sore malkɩ zánʋ pʋɔ a Eziptɩ tẽw

²⁰ ʋ yel ʋ: «Ìr tɛr a bie nɩ a ʋ mã cen nɩ a Ɩsɩrayɛl tẽw, a bɛlɩ dem na tɩ bɔbr a bie kʋb a, bɛ kpi na.»

²¹ A Zuzɛb tɩ ìr'a tɛr a bie nɩ a ʋ mã lɛb cen nɩ a Ɩsɩrayɛl tẽw.

²² Ɛcɛ, a Zuzɛb na tɩ wõ kɛ́ Arkelayisɩ lɩɛr'ɩ a ʋ sãà Erɔdɩ ɩ a Zude tẽw nãà a, ʋ zɔ n dɛ̃bɩ̃ɛ a be cenu ƴãw. Naaŋmɩn tɩ lɛb'a yel kʋ̀ ʋ zánʋ pʋɔ ʋ cen Galile tẽw lowr.

²³ Ʋ tɩ cen na tɩ kpɩɛr tẽw kãw bɛ na bʋɔlɛ kɛ́ Nazarɛtɩ a, k'aa tʋ̃ɔ́ tu a lɛ a naaŋmɩn-ƴɛ̀r-manbɛ na tɩ yel a: «Bɛ na bʋɔlɛ ʋ na kɛ́ Nazarɛtɩ tẽw nɩr.»