Matie 18 - A SƐB-SÕW

Sob nɛ na ɩ kpɛ̃ɛ zuo a bɛ za a tẽ-vla Naalʋ pʋɔ a

¹ A ʋlɩ tɛm nɛ, a Yeezu po-tuurbɛ tɩ taw na pɩɛl'ʋ, ɛ́ sowr'ʋ: «Ãa n'ʋ ɩ kpɛ̃ɛ zuo a nɩbɛ za a tẽ-vla Naalʋ pʋɔ?»

² A Yeezu tɩ bʋɔl'ɩ bi-cãpile wa ƴãw a bɛ sɔgɔ,

³ ɛ́ yel: «Yel-mɩŋa sɩza, ɩ̃ yere na kʋ̀rɛ nyɩ, nyɩmɛ bɛ wa lɩɛbɩ a nyɩ ɩb ŋmɛ̃ mɛ̃ a bibi-cãpili a, nyɩ kʋ̃ kpɛ a tẽ-vla Naalʋ pʋɔ ɩ.

⁴ Lɛ so, ʋlɩ sob na siwre ʋ tʋɔra ŋmɛ̃ mɛ̃ a bi-cãpile ŋa a, ʋlɛ n'ʋ ɩ kpɛ̃ɛ zuo a bɛ za a tẽ-vla Naalʋ pʋɔ.

⁵ Ɛ́ sob nɛ na de a bi-cãpile ŋa tɔ sob a ɩ̃ yúor ƴãw a, a mãa tɔr za n'ʋ ʋ mɩ̀ de.»

Nyɩ gùre nyɩ mɩŋa

⁶ «Ɛcɛ sob nɛ za na ɩrɛ a bibi-cãpili bɛ ŋa kãw na sàw de m a, ʋ lore yel-bier pʋɔ a, bɛlɛ 'lẽ kʋsɛ-kpɛ̃ɛ ƴãw a ʋ kɔkɔrɩ́, ɛ́ dáa ʋ lɔb ƴãw kʋ̃ɔ-kpɛ̃ɛ pʋɔ a, alɛ sa.

⁷ Nyɛ̃ a tẽ-daa baw-bio na sɛw a, a yele al za na ɩrɛ a nɩsaalbɛ maalɛ yel-bebe a ƴãw! A fɛr'a k'aa yele á ŋá mɩ́ ɩ, ɛcɛ baw-bio sob'ɩ a nɩr ʋl na n'ʋ mɩ́ so a ɩ a.

⁸ A fʋ nũu bɩɩ a fʋ gbɛ́r wa tawr fʋ ƴãwn yel-bier pʋɔ a, ŋmãa a lɔb bɛr a zãá nɩ fʋ, fʋ na na kpɛ a nyɔ-vʋʋrʋ pʋɔ nɩ nũ-gãw bɩɩ gbɛ-gãw a, alɛ sa fʋ na na tɛr a fʋ nuru a za ayi bɩɩ a fʋ gbɛ́ɛ a za ayi, ɛ́ bɛ lɔb fʋ ƴãw a vũu na bɛ tɛr kpiiru daar a pʋɔ a.

⁹ Ɛ́ a fʋ mimir wa n'ʋ tawr fʋ ƴãwn a yel-bier pʋɔ a, 'lòw ʋ ír lɔb bɛr ʋ zãá nɩ fʋ. Fʋ na na kpɛ a nyɔ-vʋʋrʋ pʋɔ ɛ́ ɩ mimi-fɩɔ a, alɛ sa fʋ na na tɛr a fʋ mimie a za ayi, ɛ́ bɛ lɔb fʋ ƴãw a tẽ-faa vũumí a.»

A pɛ́rʋ na bɔr ɛ́ bɛ lɛb nyɛ̃ a zʋkpar

¹⁰ «Nyɩ gù nyɩ tʋɔra taa wa jewre a bibi-cãpili bɛ ŋa been kãw za ɩ. Ɩ̃ sɩrɩ na yere kʋ̀rɛ nyɩ, a bɛ malkɩ mɩnɛ àr'ɩ a ɩ̃ Sãà na be a tẽ-vla pʋɔ a niŋé kʋralɛ. [

¹¹ A Nɩsaal Bie wa na wa faa a bɛlɩ dem na tɩ bɔr a.]

¹² Nyɩ tɩɛr'ɩ ŋmɩn? Nɩr wa tɛr píir kʋba (100), ɛ́ a pɛ́rʋ been wa bɔr a, ʋ kʋ̃ bɛr a kʋba for bir al a tãw zu ɛ́ cen tɩ bɔ a ʋl na bɔr a ɩ?

¹³ Ɛ́ ʋlɛ wa nyɛ̃ ʋ a, yel-mɩŋa sɩza, ɩ̃ yere na kʋ̀rɛ nyɩ, nʋ̃ɔ̀ mɩ́ kpɛ ʋ nɩ a ʋ ƴãw zuo a kʋba for bir al na bɛ bɔr a ƴãw.

¹⁴ Lɛ mɩ̀ n'a, a nyɩ Sãà na be a tẽ-vla pʋɔ a bɛ bɔbr k'aa bibi-cãpili bɛ ŋa been kãw za bɔr ɛ.»

A fʋ yɛb wulu

¹⁵ «A fʋ yɛb wa ɩ sãw fʋ a, cen tɩ páw ʋ, fʋ̃ʋ nɩ ʋl tɛwr zie, ɛ́ wul ʋ a ʋ sãwna. Ʋlɛ wa bɛr wõ fʋ a, fʋ na páw nɩ a fʋ yɛb.

¹⁶ Ʋlɛ bɛ wa bɛrɛ wone a fʋ ƴɛ̀rʋ a, fʋ̃ʋ tɛr nɩ-been bɩɩ nɩbɛ ayi ƴãw pʋɔ a fʋ ƴãw, kɛ̀ “Yel za tʋ̃ɔ́ mɩ́ maalɩ dãsɩɛ dem ayi bɩɩ ata ƴɛ̀rʋ zũú.”

¹⁷ Ɛcɛ ʋlɛ bɛ wa sàwr a bɛ ƴɛ̀rʋ a, fʋ̃ʋ yel kʋ̀ a Lãw-yir. Ɛ́ ʋlɛ cãà bɛ wa wone a Lãw-yir ƴɛ̀rʋ a, ʋ ɩ mɛ̃ tɩbɛ sob bɩɩ zuru-yar-diere a a fʋ zie.»

¹⁸ «Yel-mɩŋa sɩza, ɩ̃ yere na kʋ̀rɛ nyɩ, bom nɛ za nyɩ na na 'lẽ a tẽw zu ka a, mɩ̀ na 'lẽ nɩ a tẽ-vla pʋɔ, ɛ́ bom nɛ za nyɩ na na cɛ̀r bɛr a tẽw zu ka a, mɩ̀ na cɛ̀r'ɩ a tẽ-vla pʋɔ.»

¹⁹ «Ɩ̃ mɩ̀ cãà na lɛb yere kʋ̀rɛ nyɩ, a tẽw zu ka a, nɩbɛ ayi a nyɩ pʋɔ wa wõ taa zɛlɛ bom a, a ɩ̃ Sãà na be a tẽ-vla pʋɔ a, na kʋ̀ bɛ na.

²⁰ Zie nɛ za nɩbɛ ayi bɩɩ nɩbɛ ata na ɓã taa a ɩ̃ yúor ƴãw a, ɩ̃ be n a bɛ sɔgɔ.»

A tõ-tõ-bie na bɛ dɩ suur kʋ̀ a ʋ tɔ sob a zʋkpar

²¹ Lɛ n'a a Pɩɛr tɩ taw ta a Yeezu zie sowr'ʋ: «Sore e, a ɩ̃ yɛb wa sãw mɛ̃ a, gb'a a ŋmɩn n'a ɩ̃ na dɩ suur kʋ̀ ʋ tɩ ta? A tɩ ta gb'a ayopõi bɩɩ?»

²² A Yeezu tɩ sɔw na: «Ɩ̃ bɛ yel k'aa tɩ ta gb'a ayopõi ɛ, ɛcɛ a tɩ ta gb'aa lɩz'a ata nɩ pie gb'a ayopõi.

²³ À ŋá n'a a tẽ-vla Naalʋ ŋmɛ̃ taa nɩ nãà kãw na tɩ bɔbr k'ʋʋ bãw a ʋ libie yele ʋlɛ nɩ a ʋ tõ-tõ-biir a.

²⁴ Ʋ na tɩ tine a, bɛ tɛr'ɩ a tõ-tõ-bie kãw na tɩ tɛr a ʋ san bɛ dɩ vuo a, wa n a ʋ zie.

²⁵ A tõ-tõ-bie nɛ na bɛ tɩ tɛr a na ya a, a ʋ nɩ-kpɛ̃ɛ tɩ ƴãw na kɛ́ bɛ nyɔw ʋ kʋɔrɩ, ʋlɛ nɩ a ʋ pɔw nɩ a ʋ bibiir, nɩ a ʋ bʋ̃-tɛrɩ za, wa ya a ʋ san.

²⁶ A tõ-tõ-bie tɩ lo na gbĩ dume a ʋ pile zɛlɛ ʋ yere nɩ: “Cãà bɛr mɛ̃ sɛr, ɩ̃ na ya b'ɩ a fʋ san za.”

²⁷ Nɩbaalʋ tɩ kpɛ n a ʋ nɩ-kpɛ̃ɛ, ʋ bɛr ʋ, ɛ́ mɩ̀ bɛr ʋ a ʋ san.

²⁸ A tõ-tõ-bie ŋa tɩ yi na tuori a ʋ tõ-tõ-bi-tɔ sob kãw na tɛr a ʋ san zaa pʋrɩ a. Ʋ tɩ nyɔw ʋ nɩ a kɔkɛɛ fɩɩrɩ faar na kʋ ɛ́ yere: “Ya a fʋ san!”

²⁹ A ʋ tɔ sob tɩ lo na gbĩ dume a ʋ pile zɛlɛ ʋ yãayãa yere nɩ: “Cãà bɛr mɛ̃ sɛr, ɩ̃ɩ na ya b'a.”

³⁰ Ɛcɛ ʋ bɛ tɩ sàw ɛ, ɛ́ nɩ̃ɛ tɩ ƴãw bɛ nyɔw ʋ ƴãw gaso pʋɔ, ɛ́ cɛlɛ k'ʋʋ wa ya a ʋ san.

³¹ A ʋ tõ-tõ-bi-taabɛ na tɩ nyɛ̃ a yele á ŋá na ɩ a, a bɛ pʋɔ za tɩ sãw na, bɛ cen tɩ manɩ a za kʋ̀ a bɛ nɩ-kpɛ̃ɛ.

³² Lɛ n'a a nɩ-kpɛ̃ɛ tɩ ƴãw bɛ bʋɔlɩ a tõ-tõ-bie ŋa, ʋ wa yel ʋ: “Tõ-tõ-bi-faa ŋa! Fʋ na zɛlɩ mɛ̃ a, ɩ̃ lɛb'a bɛr fʋ a fʋ san za.

³³ A mɩ̀ bɛ tɩ fɛr kɛ́ fʋ zɔ a fʋ tɔ sob nɩbaalʋ mɛ̃ a lɛ ɩ̃ na zɔ a fʋ nɩbaalʋ a ɩ?”

³⁴ A ʋ nɩ-kpɛ̃ɛ tɩ nyɛ̃ nɩ suur yaga, ɛ́ nyɔw ʋ tɩr kɛ́ bɛ dɔwrɛ ʋ, ɛ́ gù ʋ wa tɩ ya a ʋ san za.»

³⁵ A Yeezu tɩ yel'a ƴãw pʋɔ: «À ŋá n'a a ɩ̃ Sãà na be a tẽ-vla pʋɔ a, mɩ̀ na ɩrɛ nyɩ, a nyɩ kãw za bɛ mɩ̀ wa dɩ suur kʋ̀ a ʋ yɛb nɩ a ʋ pʋɔ za a.»